ليلة لهروب لكبير
ميّز على لهروب لكبير (فيلم).ليلة الهروب الكبير، هو مصطلح تنتاشر ب شكل كبير ف صحافة لمغريبية ؤ حتا لعربية مورما ضطرو لألاف د لمواطنين مغاربة يساليو لعطلات ديالهوم ؤ يقبطو طريق باش يرجعو لمدون ديالهم مورما دارت لحوكومة لمغريبية قرار كيمنع دخول ؤ لخروج من 8 د لمدون مور طناش د ليل د 26 يوليوز 2020 ف إطار لقرارات لي كاتخدهم باش تحد من ڤيروس كورونا ف لمغريب.[1] لموشكل هو أنه هاد لقرار تعلن عليه غير بشي سوايع قبل مايتطبق، هادشي خلا بزاف د طرقان ؤ لوطوروطات يكون عليهم زحام، ؤ بسباب هادشي وقعو بزاف د لكسايد لي ماتو فيها ناس.[1]
صدرات السلطات الحكومية المغربية، ممتلة ف وزارة داخيلية و وزارة صحة نهار 26 يوليوز 2020 بيان مشترك جا فيه قرار كيقضي ب منع التنقل من و ف اتجاه 8 مدن: طنجة، تطوان، فاس، مكناس، الدار البيضاء، برشيد، سطات و مراكش.[2][3]
هاد لقرار جا قبل أيام قليلة من لعيد لكبير لي صادف ف سنة 2020 نهار 31 يوليوز[4] ب هدف الحد من انتشار ڤيروس كورونا على طريق منع تنقل المواطنين بين المدن لي موالفين كيقضيو العيد عند حبابهم و أسرهم، خصوصا من بعد التحديرات ديال اللجنة العلمية الاستشارية الخاصة ب ڤيروس كورونا المستجد ف المغرب لي توقعات "احتمال ارتفاع عدد الحالات موازاة مع العيد الكبير ولا بعدو احتمال وارد بزاف، بحال لي طرا ف لعيد صغير."[5]
السلطات المغربية دعات المواطنين ل الالتزام التام بهاد التدابير، و إلا ف المخالفين غادي يتعرضو ل إجراءات صارمة، طبقا ل القانون.[6]
علا حساب لبيان وزارات داخيلية و صحة، ساباب علاش هاد لقرار تخاد هو حيت لمواطنين ماحتارموش دوك تدابير لي موصيين عليهم، بحال تباعد لجسدي، لباس د لكمامة، ؤ تعقيم د ليدين، واخا هاد جوج لخرين موجود ف سوق؛ هادشي لي خلا لعدوا تزيد تنتاشر ؤ حالات جداد تزاد.[6]
ف نهار 26 يوليوز تسجل أكبر عاداد د لموتا ف نهار واحد ملي بان ڤيروس كورونا، وصلات لـ8 د لموتا، ؤ تسجلات تاني كبر حصيلة د لحالات بـ633 حالة جديدة.[7] هاد لحالات جداد بانو ف بزاف د لمدون من بينهم: : 168 حالة ف برشيد، 114 ف طنجة، 66 ف مراكش، 48 ف الدار البيضاء، 11 ف فاس، ؤ 4 ف تطوان ؤ الحسيمة، هادشي لي خلا داك لقرار ديال لمنع يخرج.[8]
وفق البيان ف قد تم استتناء الاشخاص دوي الحالات الطبية المستعجلة و الناس الخدامين ف القطاع العام ولا الخاص و المكلفين ب أوامر ب مهمة مسلمة من طرف المسؤولين ديالهم، مع شرط الحصول على رخص استتنائية من السلطات المحلية ل التنقل. نفس الشيء، هاد قرار المنع ما كيشملش حركة نقل البضائع و المواد الاساسية لي كتم ف ضروف عادية و انسيابية، باش يتم ضمان تزويد المواطنين ب كامل حاجياتهم اليومية.[3][9]
ب فعل فجائية القرار لي جا فيه أوامر ب سدان المنافد البرية لي كتدي ل بعض المدن، الآلاف ديال المغاربة لي كانوا زربانين باش يرجعو ل ديورهم و المئات ديال الطونوبيلات تحركات مرة وحدة و خلال فترة الدروة، الشي قلب الدنيا، و أدى ل وقوع حوادت و انزلاقات كتيرة على مستوى التنقل.[1] و تزاد طلب و تهافت المواطنين على تداكر الترانات، الشي لي فاقم حالة الزحام ف وسائل النقل العمومي، و المحطات، و كان الزحام بزاف عاوتاني على مستوى محطات الأداء ديال الشركة الوطنية ديال الطرق السيارة، وخصوصا ف محوري الدار البيضاء الرباط و طنجة القنيطرة. هاد الحالة دفعات السلطات ل إصدار تحدير من تفشي الوباء ب سباب هاد التجمعات.[10]
بزاف ديال المغاربة و خصوصا الناس لي كانو معنيين ب القرار انتاقدو السياق و التوقيت ديال الإعلان على قرار المنع، و اعتابرو ب أن الحكومة فشلات فشل دريع ف اجتياز امتحان السيطرة على تفشي وباء كورونا، و وصفو القرار ب "العشوائي" و "الفوضوي" و ب أنه جا ف "توقيت خاطىء" و ݣالو؛ كن أنه تم الإعلان على القرار بكري كن تم اجتناب الاكتضاض و الزحام بين المسافرين لي اضطرو باش يخرجو ل المحطات الطرقية و السككية دقة وحدة قبل التناعش ديال الليل حيت كانو خايفين من السدان ديال الطريق، خصوصا أن الزحام كيساعد على انتشار الڤيروس.[1]
على هادشي طالبات مجموعة من المواطنين ب استقالة رئيس الحكومة سعد الدين العتماني، باعتبارو المسؤول السياسي اللول على القرار لي خداتو مختلف القطاعات الحكومية، حيت ب موجب الفصل 90 من الدستور، هو لي كيمارس السلطة التنفيدية، و يمكن ليه يفوض بعض سلطو ل الوزراء، و هو لي كيرأس مجلس الحكومة لي كيتداول ف القضايا و النصوص المتعلقة ب السياسة العامة ل الدولة.[11]
ب دورو، نتاقد الراپور المغربي توفيق حازب المعروف ب لبيݣ قرار الحكومة "الارتجالي" لي تخاد ف آخر لحضة، و كتب ف ستوري ديالو على الانستݣرام: "الحكومة كانت غادية مزيان ف تدبير كورونا و لكن ل الأسف فرنسا ما عندهاش عيد الاضحى”. هاد التغريدة حسب تفسير جريدة ݣود الالكترونية؛ تاهمات الحكومة المغربية ب تبعية ل فرانسا خلاتها "تخربق" ف قراراتها قبل العيد، حيت فرنسا ما كتحتافلش بالعيد الكبير يعني ما كضربش حساب ليه أصلا.[12]
ݣال رئيس الحكومة سعد الدين العتماني ف افتتاح الاجتماع التالت ديال اللجنة الوزارية ديال تتبع و تيسير البرنامج الحكومي نهار 28 يوليوز 2020 ب أنه كيتحمل مسؤولية قرار منع التنقل من وإلى 8 مدن، و كدلك الحكومة كتحمل المسؤولية ب شكل تضامني. و ݣال ب "أن الجميع خاصو يلتازم ب الإجراءات الضرورية و قواعد النضافة على قبل الوقاية من الوباء" و هادشي باش ما يتمش "اتخاد قرارات أصعب ف المستقبل". وزاد رئيس الحكومة بلي "قرارات الحجر الصحي، و منع الخريج من الدار، و الحبيس ديال ملايين المواطنين على خدمتهم قبل إجراءات التخفيف، كانو أصعب من قرار منع التنقل ديال نهار 26 يوليوز".[13]
نشر سفيان بحري صاحب "صفحة الملك محمد السادس" ف الفيسبوك لي ماشي صفحة رسمية، نشر فيها خبر زائف مفادو أن الملك محمد السادس تدخل باش يمنح مهلة 48 ساعة ل التنقل بين المدن. هاد الخبر تمات مشاركتو ب شكل واسع و تار ضجة كبيرة، الشي لي خلى سفيان بحري يتراجع على الخطأ ديالو ب حدفو ل الخبر و إغلاق الصفحة.[14] فتحات الشرطة القضائية ديال الرباط تحقيق باش تستامع ليه على غرار باقي ناشري الاشاعات و الاخبار الزائفة من البدية ديال الجايحة.[15]
- ^ a b c d عبد السلام الشامخ (27 يوليوز 2020). "دعوات الاستقالة والمحاسبة تلاحقُ العثماني في ليلة "الهروب الكبير"". hespress.com (ب لعربية). هسبريس. مأرشيڤي من لأصل ف 2020-09-07. تطّالع عليه ب تاريخ 30 يوليوز 2020.
- ^ عبد الإله شبل (28 يوليوز 2020). "هل تلجأ السلطات إلى توسيع "منع التنقل" بين المدن قبل العيد؟". hespress.com (ب لعربية). هسبريس. مأرشيڤي من لأصل ف 2020-07-30. تطّالع عليه ب تاريخ 30 يوليوز 2020.
- ^ a b تاج الدين العبدلاوي (26 يوليوز 2020). "المغرب.. إغلاق 8 مدن بعد ارتفاع إصابات كورونا". aa.com (ب لعربية). وكالة الأناضول. تطّالع عليه ب تاريخ 30 يوليوز 2020.
- ^ "عيد الأضحى 2020 بالمغرب والدول العربية". Jadid365.ma (ب لعربية). يوليوز 2020. مأرشيڤي من لأصل ف 2020-07-30. تطّالع عليه ب تاريخ 30 يوليوز 2020.
- ^ يوسف لخضر (25 يوليوز 2020). ""اللجنة العلمية لكورونا" تتوقّع ارتفاع الإصابات خلال عيد الأضحى". hespress.com (ب لعربية). هسبريس. مأرشيڤي من لأصل ف 2020-07-27. تطّالع عليه ب تاريخ 30 يوليوز 2020.
- ^ a b "الداخلية: منع التنقل من وإلى هذه المدن". assabah.ma (ب لعربية). جريدة الصباح. 26 يوليوز 2020. تطّالع عليه ب تاريخ 30 يوليوز 2020.
- ^ "فيروس كورونا «كوفيد-19» في المغرب اليوم الأحد 26 يوليو 2020: 8 وفيات و633 إصابة جديدة". arabia.as.com (ب لعربية). صحيفة أس. 26 يوليوز 2020. مأرشيڤي من لأصل ف 2020-09-27. تطّالع عليه ب تاريخ 30 يوليوز 2020.
- ^ "هذه تفاصيل التوزيع الجغرافي لحالات "كورونا" الجديدة في المغرب". hespress.com (ب لعربية). هسبريس. 26 يوليوز 2020. مأرشيڤي من لأصل ف 2020-07-28. تطّالع عليه ب تاريخ 30 يوليوز 2020.
- ^ "بسبب ارتفاع إصابات كورونا.. منع التنقل من وإلى 8 مدن مغربية". skynewsarabia.com (ب لعربية). سكاي نيوز عربية. 26 يوليوز 2020. مأرشيڤي من لأصل ف 2020-09-20. تطّالع عليه ب تاريخ 30 يوليوز 2020.
- ^ محمد فرحات (27 يوليوز 2020). "المغرب: ارتباك وفوضى على الطرق بعد قرار السلطات إغلاق مدن كبرى بسبب ارتفاع الإصابات بكوفيد-19". france24.com (ب لعربية). فرانس 24. مأرشيڤي من لأصل ف 2022-08-15. تطّالع عليه ب تاريخ 30 يوليوز 2020.
- ^ أنس العمري (يوليوز 2020). "منع التنقل من وإلى 8 مدن.. الجدل يتواصل ولزرق لـ"كود": كان ارتجالي وبين غياب الانسجام بين قطاعات فالحكومة وأظهر أن منصب رئيس الحكومة شاغر". ݣود. مأرشيڤي من لأصل ف 2020-08-07. تطّالع عليه ب تاريخ 30 يوليوز 2020.
- ^ نجوى المالحي (30 يوليوز 2020). "البيݣ: الحكومة كانت غادية مزيان فتدبير جايحة كورونا ولكن دوماج فرنسا ما عندهاش العيد الكبير". ݣود. مأرشيڤي من لأصل ف 2020-08-05. تطّالع عليه ب تاريخ 30 يوليوز 2020.
- ^ "العثماني : أتحمل مسؤولية منع التنقل من وإلى 8 مدن والحكومة كذلك". chouftv.ma (ب لعربية). شوف تيڤي. 28 يوليوز 2020. تطّالع عليه ب تاريخ 30 يوليوز 2020.
- ^ "الخبر زائف يتسبب في إغلاق صفحة الملك محمد السادس على فيسبوك والبحري يوضح". alayam24.com (ب لعربية). الأيام 24. 30 يوليوز 2020. تطّالع عليه ب تاريخ 30 يوليوز 2020.
- ^ مصطفى القاسمي (29 يوليوز 2020). "الشرطة القضائية بالرباط تحقق مع سفيان البحري بعد نشره خبر زائف عن الملك محمد السادس". edito24.com (ب لعربية). إديتو 24. تطّالع عليه ب تاريخ 30 يوليوز 2020.[ليان مهرس ديما]