لمداكرة د لخدايمي:Elmerrakchi
ويكيپيديا بالدارجة
[بدل لكود]شكون لي بغى يخمّم معايا على كيفاش نبداو نكتبو على العلوم ؟ وباش نبداو ؟ — هاد لميساج مامسنيش خلاه Elmerrakchi (نقاش)، نهار 23 نونبر 2020 معا 16:42
- سلام عليكم سي لمراكشي. أول حاجة مرحبا بيك معانا ف لمشروع د ويكيپيديا ب دارجة. ب نسبة لسؤال ديالك، كان عليك تحطو ف صفحة د لبرلمان باش جماعة يقدرو يشوفوه و لي مهتم يقدر يعاون. لمهم، لي نقدر نصحك بيه هو أنك تبدا تخدم علا لمقالات لي كاينين ديجا باش تحاول تحسن من لمحتوى (هاد تصنيف كيجمع ڭاع لمقالات ف لمجالات لعيلمية). و ب نسبة لهاد لمقالة لي درتي، صراحة حسن تفرقهوم علا شكل بيبان/قيساريات (بحال هادا متلان؛ تقدر تلقا لكمالة ف صفحة لولا). سمحلي لا كترت عليك:) لمهم أنا موجود إلا عندك سي تساؤل.
- و كأخر نقطة، راه كاينة واحد لمقالة علا فاروق المراكشي، إلا كنتي نفس لواحد..ألف مرحبا معانا و تبارك الله عليك:) --Reda benkhadra (نقاش) 20:29، 23 نونبر 2020 (+01)
مرحبا بيك أسيدي، فالحقيقة ماشفتش البرلمان ! غادي نمشي نشوف. زوينة هاد كلمة "قيسارية " عجباتني. بالنسبة لسؤالك، إييه أنا هو فاروق المراكشي :) Elmerrakchi (نقاش)
- مرحبا ب أستادنا المراكشي! يلّاه لقيتيني سيمانة لّي فاتت ڭلت ل دراري خاصنا نقاش علا لمصطلحات ديال صيونص، ؤ تنسيق ديال لخدمة علا لمقالات لعلمية. حاليا أنا خدام علا لعناصر لكيماوية، ؤ ساليت جوج أرتيكلات ديال لهيدروجين ؤ لكريپتون. يلا عندك شي ملاحضات ؤلا نتيقادات ؤلا بغيتي تصلح شي حاجة، فا مرحبا. كنضن ضروري غادي يخصنا نّاقشو كيفاش نجيبو لمصطلحات، خصوصا يلا ماكانتش ديجا موجودة ف دّاريجة (بحال سّميات ديال بعض لمعادن ؤ لمواد)، ؤ كنقتارح كا حل مبدئي أننا نجيبوها من نّڭليزية. --Ideophagous (نقاش) 12:10، 02 دجنبر 2020 (+1)
مرحبا أسيدي، أنا فالحقيقة تانبغي يكونو الكلمات جايين من الدارجة، بحال : تنبغي كلمة البونت ولّ الڭزو على كلمة عنصر (هاد كلمة الڭزو لقيت الجلايجية هوما لي تايقولوها الجزء) ، عجباتني كلمة النمرة لي كتبتيها فبلاصة كلمة الرقم، عجباتني كلمة لْبولات لي كتبتيها فبلاصة كلمة المصابيح، كلمة الجدول ماكتعجبنيش، تنبغي كلمة الضّو على كلمة كهرباء، تنبغي كلمة الضاير على كلمة الدوري، تنبغي كلمة مستّف على كلمة مرتّب، تنبغي كلمة الشيمي على كلمة كيماوي.
لأنه لي تيهمني هو أنه الكلمة د الدارجة لي كان عندها واحد المعنى، يولي عندها معاني جداد جايين من العلوم.
ما عرفتش أنت كيفاش تاتبان ليك هاد القاضية ؟ Elmerrakchi
- مرحبا مرة خرة. ب طبيعة لحال متافق أن لكلمات د دّاريجة خاص تكون عندهوم أسبقية، ؤلا حتا نشتقو كلمات جداد ب ستيعمال قواعد لشتيقاق ديال دّاريجة، بحال صّيغة ديال ڭزار => تاڭزارت، عصر => تاعصريت، إلخ. غير كاينين حالات فاش لمصطلح ب نڭليزية ؤلا لفرونسي كيكون منتاشر ديجا، بحال إلكترون ؤلا پروطون، ؤلا كيكون صعيب نلقاو مصطلح مقابل ب دّاريجة (شنو غادي نسميو سپين spin متلا؟) حيت كيكون كونصيپط علمي ماعندوش مقابل ف لحياة ليومية، ؤ حتا ب نڭليزية كيكون مصطلح تقريبي، فا ب نّسبة لينا ربما حسن نخدموه كيفما هوّا، كا تسهيل علا نّاس لّي كيدرسو دوك لمجالات، ؤ باش يبان ب وضوح أن لأمر كيتعلق ب كونصيپط جديد تماما. و لكم واسع نّضر.
- ولاكن لبحت ف لمصطلحات لقديمة ؤلا لّي كتستعمل ف مجالات محدودة هيّا فيكرة زوينة بزاف، ؤ غادي تعطينا إمكانيات جداد. ديجا كنا بدينا لخدمة علا لويقاموس ديال دّاريجة، مي شخصيا حبست لخدمة فيه حيت تشغلت ب تطوير لمقالات هنا. تقدر تطالع علا شنو دّار فيه ل حد سّاعة هنا. --Ideophagous (نقاش) 19:46، 02 دجنبر 2020 (+1)
مرحبا نعام أسيدي، متافق معاك أنه فاش لمصطلح تايكون بالنڭليزية ولّ بالفرونسي حسن يبق هاكاك، بحال إلكترون غادي نكتبو إلكترون، إنما charge électrique négative ماغاديش نبغي نكتبها "شحنة كهربائية سالبة" وما ماغاديش نبغي نكتبها "شارج إليكتريك نيڭاتيڤ" تانبغي نكتبها "الفرتيت د الضّو الناقص " . وهاكّاك Spin غادي نكتبها سپّين إنما moment cinétique ماغاديش نبغي نكتبها "عزم الدوران " وما ماغاديش نبغي نكتبها "المومون سينيتيك" تانبغي نكتبها " عكّاز التّضوار" . هادشي علاش تايجيني فشكل نكتب "عنصر " على Element ! و ماكرهتش نختارعو شي كلمة عليه ولّ نلقاو شي كلمة فايتة كاينة فالداريجة. خصوصا أن هاد كلمة "عنصر " غادي نحثاجوه فجنانات آخرين د المعارف بحال الفلسفة ووو.
أما القاموس ولّ "ورّاي الكلام" تنضن أنه خص يكون عندنا واحد مليون مقالة بعدا باش نقدرو نخرجو منها الكلام لي شد معنى واحد عاد ديك الساع نحطوه فالورّاي د الكلام. تنضن غادي يكون هو آخر حاجة.
شكرا بزاف وراني فرحان لي لقيت ناس بحالكوم هنا تايخممو فهادشي لي كان مبرزط ليا راسي شحال هادي. Elmerrakchi
- متافق 100% معاك أ أستاد ف لمبدأ، غير هوّا يلا حاولنا نديرو تدريج شامل من لبدية كنضن غادي يكونو جوج مشاكيل:
- غادي تتطلب لقضية خدمة زايدة من جيهتنا باش نلقاو ؤلا نصايبو هاد لمصطلحات، ؤ باش نديرو مقالات تعريفية كتشرح كولّا مصطلح منها، ؤ هادشي غادي يعطل لوتيرة د لخدمة، من غير أنه يلا كان شي محرر جديد مافراسوش لبلان باش خدامين، ؤلا مامتافقش معاه، مايمكنش لينا نمنعوه يكتب مقال ب مصطلحات عربية ؤلا فرانصاوية.
- يلا كترنا من لبدية من مصطلحات داريجية مامعروفاش مزيان ؤلا جديدة، غادي يوليو لمقالات صعاب ف لقراية ؤ يقدرو لقاريين ينفرو منهوم، ؤ هادشي ضد لهْداف ديال لويكيپيديا د دّاريجة لّي هوّا أنها تنتاشر لّوغة لمغربية ؤ تولي مقبولة كا لوغة ديال لعلوم ؤ لفيكر.
- داكشي علاش كنقتارح مقاربة (تاقرابت؟) إيتيراتيڤ، يعني ندخلو لمصطلحات دّاريجية لْقُحّة (سوا لقديمة ؤلا لمصطنعة) بشكل تدريجي علا مراحل ؤ حنا خدامين علا لارتيكلات ؤ لمواضيع، ؤ فينما تكون إشكالية ديال شي مصطلح نفتحو نّيقاش عليه ف لپاج د نّيقاش ديال لمقال لمعني، ؤلا ف ميزان لكلام يلا كانت لقضية عامة. ؤ ف هاد صّدد كنضن لويقاموس غادي يعاونا بزاف، حيت تماك نقدرو نزيدو لكلمات لقدام ديال دّاريجة، سوا لّي منسية ؤلا لّي خاصة ب ضومين محدد (تانجارت، تاحددات، صّيد، إلخ)، ؤ لقواعد، ؤ هادشي غادي يعاونا باش نتآنسپيراو من هاد لمصطلحات ؤ لقواعد باش نديرو كلمات جداد ملّي نحتاجو ليهم. نيت راني كنت كندخل كلمات من لكتاب ديال لأستاد محمد شفيق (لكلمات د دّاريجة لّي جاية من تامازيغت) ف لويقاموس حتال نهار حبست، ؤ باقي معول ندخل داكشي لّي باقي من داك لكتاب ؤ من كتوبا خرين، بلا لمْتال شّعبية ؤ تصريف لفْعال ؤ غيرهم.
- ؤ ب نّسبة ل ميزان لكلام فا لحد سّاعة راه ناقشنا فيه غير مواضيع عامة، ؤ ف أغلب لحالات ماكانفرضوش قاعدة 100% باش يبقا هامش لحرية كبير عند لمحررين ف هاد لمرحلة، حيت كيفما تفضلتي أ أستاد، باقي غادي يخصنا نكتبو بزاف د لمقالات باش توضاح صّورة من نّاحية ديال لمصطلحات ؤ لقواعد ؤ لأسلوب.
- ؤ كا خولاصة، كنقتارح نطبقو ستراتيجية تالية:
- مرحلة 1: ف ويكيپيديا: نستامرو ف لكتبة د لارتيكلات، ؤ يلا كان عندنا مصطلح داريجي واجد ل شي كونصيپط نخدموه، يلا ماكانش نديرو لمصطلح لّي منتاشر كتر، سوا ب نڭليزية ؤلا لفرونصي ؤلا لعربية، ؤ حداه مصطلح جديد ب دّاريجة (يلا قدينا نصاوبو واحد) باش بنادم يبدا يولفو. ف ويقاموس: نحاولو ندخلو لكلمات لقدام ديال دّاريجة كاملين لّي نقدرو نلقاو ؤ لكلمات لّي كتستعمل بشكل يومي، سوا عند عامة نّاس، ؤلا ف خدامي ؤ مجالات محددين.
- مرحلة 2: نستعملو لويقاموس باش نزيدو سوا مصطلحات قديمة ب مْعاني جداد ؤلا مصطلحات مْشتقة ب قواعد لشتيقاق ديال دّاريجة، ؤلا مصلطحات ڭاورية مدرجة، لّي تستعمل ب شكل تفضيلي ب هاد تّرتيب ف لمقالات د ويكيپيديا.
- مرحلة 3: يلا تزادو لقاريين د ويكيپيديا هاد لمصطلحات بشكل تلقائي غادي ينتاشرو، ؤ ربما يبانو مقالات ؤ جورنالات كيستعملوها، ؤ ف هاد لحالة لمصطلحات لّي ماشي مدرجة تقدر تحيد من ويكيپيديا باش يبقاو غير لمصطلحات لمدرجين (أصلية قديمة، مصطانعة ؤلا أجنبية مدرجة).
- هادا غير قتيراح من عندي، ؤ أي نتيقاد ؤلا ملاحضة مرحبا بيهوم. --Ideophagous (نقاش) 13:02، 03 دجنبر 2020 (+1) -- تعديل صغير 13:58، 03 دجنبر 2020 (+1)
- ملاحضة ب نّسبة ل لقتيراحات د لمصطلحات لّي تفضلتي بيهم:
- لبونت: هادا مصطلح زوين، دخلتو دابا ل لويقاموس ب لمعنا لعادي ديالو، هوّا ؤ لڭزو (شوف عافاك نّطق ف ويقاموس واش صحيح ؤلا لا ؤ لمعنا حتا هوّا). خاص نشوفو كيفاش نستعملوهوم كمصطلحات علمية، مي بصراحة "بونت كيماوي" جاتني شوية قاسحة باش نخدموها هاكا، خصوصا أنه ماعندناش سلطة ديال دّولة باش نفرضو مصطلح، ملي "عنصر" ديجا مطلوقة علا لسانات د نّاس لّي كيقراو شّيمي. مي هادا ماكيمنعش أننا نخدموه، خصوصا يلا جّماعة ديالنا تّافقات عليه.
- شنو كتقتارح نخدمو بلاصت "جدول". طابلو متلا؟ كنضن من غير هاد جّوج ماعندناش شي مصطلح داريجي منتاشر عندو نفس لمعنا، مي نقدر نكون غالط. ؤ هنا نيت ب لمناسبة، بغيت نزيد أنه يلا كان عندنا مصطلح معروف ديجا بزاف، ربما حسن نستعملوه، وخا موقتا، مي عل أكتر نزيدو ندرجوه يلا ماكانتش ديجا مدرّج مزيان (متلا نحيدو منو لهمزة، لّي عادة ماشي أصلية ف دّاريجة).
- ضو: كنفضل نخدم تريسينتي ، حيت ضو تقدر تغالط معا لمعنا لاخور ديالها، خصوصا ف لفيزيك.
- ضاير : كنضن ماعندهاش نفس لمعنا بحال دوري . يلا كان ضروري نديرو مصطلح داريجي، خاص نشوفو لمقابل ديال "دورة"، ؤ نجبدو نّعت ديالو. ف أعر حالة يلا مالقينا والو، نقدرو ناخدو پيريوض/پيريود من لفرونصي ؤلا نڭليزية، ؤ نديرو پيريوضي/پيريودي.
- مستف بلاصت مرتب: متافق تماما.
- شيمي: خدمنا لكلمة ديجا ب بمعنا كيمياء. ب نّسبة ل نّعت ختاريت كيماوي بلاصت كيميائي حيت مافيهاش لهمزة. يلا خدمنا كلمة شيمي كا نعت، يقدر يتلف بنادم فاش يقرا شي جملة، ؤلا لا؟
- الفرتيت د الضّو الناقص: فرتيت مابانش ليا مقابل ل "شحنة". ربما حْمْل؟ مهزوز؟ ضّو ديجا هضرت عليه. ناقص حتا هيّا ماشي مقابل دقيق ل سالب، ؤ زيد تقدر دّير تالافا معا علامة ناقص (ديال طّرح)، وخا ماشي مشكيل كبير. لعبارة كولها يلا تستعملات هاكا، ماغاديش يفهمها بنادم، ضونك حتا لو خدينا هاد لمصطلحات ؤلا غيرهوم كنضن خاصنا نتكايسو شوية ف لستيعمال ديالهم، حتا يوليو مقبولين ؤ منتاشرين.
- عكّاز التّضوار: عجبني هاد لمصطلح، غير ولايني نفس لملاحضة ديال أنه ماغاديش يتفهم ف لبدية، ضونك غادي يخص يستعمل حدا حدا معا مصطلح أخور مفهوم ب نّسبة ل نّاس لّي قاريين، علا حساب وجهة نّضر ديالي لمْتواضْعة. --Ideophagous (نقاش) 16:09، 03 دجنبر 2020 (+1)
متافق معاك فكلشي لي قلتي. أمّا الكلام :
جدول : بلاصت "جدول" تايعجبني الطابلو ! ولّ ناخدو كلمة كاينة ونزيدو معنى جديد عليها بحال "القتبان" ولّ نخثارعو كلمة جديدة بحال "التسطيرة".
الضّو : كاتعجبني نخدم بكلمة د الضّو، أما بالنسبة المعنى لاخور وليت تنسميه الشعى
پيريوض : فاش كنت تانكتب على الليشارات د الضو الپيريوضيك، كنت لقيت سمية "خيطيبيطي" ! ما عرفتش ؟
شكرا بزّاف، وعفاك عيّط ليا غي بفاروق، هاديك أستاد تاتشرّف هههه . Elmerrakchi
مرحبا! حالياً كاتّقام مسابقة ديال ويكيپيديا على ود تطوير لمحتوى لمغريبي ف ويكيپيديا ب الداريجة، بلإضافة ل ويكيپيديا لعربية و لأمازيغية. يلا كنتي مهتم(ة) تقدر(ي) تطّالع(ي) على التفاصيل و لقواعد د لمسابقة هنا، و ماتنسا(ي)ش تقيّد(ي) راسك ف هاد الصفحة، و تشوف(ي) لمواضيع لي يقدر يعجبك تكتب(ي) فيهوم هنا. يلا عند سؤال ؤلا ملاحضة، ماعليك غير تسوّل(ي) واحد من أعضاء لجنة التنضيم ؤلا التحكيم. تهلّا(ي)!--PGVBot (مداكرة) 09:57، 17 ماي 2023 (+01)