كريپطون

كريپطون
لجدوال الدوري
الرمز	Kr
النمرة الدرية	36
قبل منّو	عنصر كيماوي (بروم)
بعد منّو	عنصر كيماوي (روبيديوم)
ليحداتيات فلجدوال	عناصر الدورة الرابعة و غاز نبيل
ليكتيشاف
اللي كتاشفو	سير ويليام رامزي
فين تكتاشف	لمملكة لمتاحدة
إيمتا تكتاشف	1898
تسمّى على	إخفاء
لبيانات لمعبورة
لكتلة	83.798 Da
شكل ليليكترونات	1s² 2s² 2p⁶ 3s² 3p⁶ 4s² 3d¹⁰ 4p⁶
لخاصيات	ماعندوش لون، ماعندوش مداق و ماعندوش ريحة
لكهروسيلبية	3
مخطّاط الدرة

لكريپطون (ب نّݣليزية: Krypton من لْيونانية κρυπτός كريپطوص ب معنى "مْخفي") هوّا عنصر كيماوي أساسي، رّمز ديالو هوّا Kr ؤ نمرة درية ديالو 36 ف طّابلو دّوري، هاد لعنصر مستّف ف سّطر (دّورة) 4 ؤ لعمود (لمجموعة) 18. هاد لعنصر داخل ف لݣروپ ديال لغازات النبيلة . ف ضروف لمعيارية د ضغط ؤ لحرارة، هاد لعنصر كايكون ف لحالة د غاز ماعندوش لون ؤلا ريحة، ؤ ماكيتفاعل معا حتا شي حاجة خرة من غير عنصر لْفليور ف حالات ستتنائية باش كيعطيو تاني فلوريد لكريپطون KrF₂. هاد لعنصر كتاشفوه جوج عولاما هوما سير ويليام رامزي ؤ موريس تراڤرس ف 30 ماي 1898.

تّاريخ

سير ويليام رامزي ؤ موريس ويليام تراڤرس، من بعد ما كتاشفو لارݣون، ب ليستيخراج ديالو من لهْوا، كانو متأكدين أن هاد لغاز ما هوّا غير واحد من مجموعة جديدة ديال لعناصر ف لجدول دّوري. فَ قررو أنهم يكملو عملية د تّسييل ؤ تّبخير، باش يلقاو شي عنصر عندو كتلة درية كبر. ف 30 ماي 1898 صدقات ليهم لْقضية ؤ قدرو يعزلو 25 سنتيميتر مكعب ديال لكريپطون. ملي دارو لفحص ب سپيكتروميتر، ؤ شافو طّيف دّري ديال هاد لغاز، عرفو أنه عنصر كيماوي جديد.

لخاصيات

لْخاصيات لْخارجية

لكريپطون كيكون علا شكل غاز ف درجة لحرارة لْعادية، ؤ ماعندوش لون ؤلا ريحة. كيولي سايل ف 153.415- درجة سيلسيوس، ؤ كيتجمد ف 157.37- درجة سيلسيوس.

لخاصيات لفيزيكية

لخاصيات لفيزيكية ديال لكريپطون-84، لّي هوّا أكتر نضير د لكريپطون متوفر ف طّبيعة هيّا كتّالي:

• لكتلة درية: 83.911 ݣرام/مول.
• لحالات د لأكسدة: 0، 2
• لكهروسلبية: 3- ف سلوم د پاولينݣ
• لكتافة: 3.74*
• شعاع دري: 1.03 أنݣستروم.

تطبيقات عملية

لكريپطون كيتستعمل ف لْبولات لفلورية لّي كتحفض طّاقة، ؤ ف لْبولات د لْفلاش ديال لْكاميرات ديال تّصوير سّريع. لْمُركّب لكيماوي لّي ناتج عليه، تاني فلوريد لْكريپطون، كليتستعمل ف لإنتاج ديال بعض نّواع ديال لّيزر.

لكريپطون لْمُشِع تستعمل ف لْحرب لْباردة من طرف دّول لْغربية باش يقدّرو لإنتاج ديال طّاقة نّووية ديال لْتّحاد سّوڤياتي. حيت هاد لغاز كيتنتج ف تّفاعلات لكيماوية كولها، حسبو لكمية لّي كاينة ف لْجو، نقصو منها لكمية لّي معروف راها جاية من لْمفاعلات لْغربية، ؤ داكشي لّي بقا ستنتجو منو شحال ديال طّاقة لّي نتجاتها دّول ديال لْتّحاد سّوڤياتي.

من 1960 حتال 1983 كانو لعولاما كيستعملو نّضير كريپطون-86 باش يبنيو تّعريف ديال طّول ف لفيزيك. ميترو واحد كان تّعريف ديالو هوّا ب تّحديد 1650763.73 طول موجي ف طيف دّري ديال هاد نّضير. ف 1983 غادي يولّي تّعريف ديال لميترو معتامد علا سّرعة ديال ضّو ف لْفراغ.

لكريپطون ماعندوش شي دور بيولوجي معروف، ؤ نّسبة ديالو ف لْجو ديال لْأرض قليلة بزاف كتقدّر ب واحد ف لْمليون. باش يتستخرج كيتم تّبريد ديال لْهوا حتا كيولي سايل، ؤ من بعد كتّم عملية ديال تّقطير.

إيزوطوپات

لإيزوطوپات ؤلا نضاير ديال لكريپطون كاين منهم لكريپطون-78 لّي نص لحياة ديالو فايتة 1.5 ألف مليار مليار عام. ؤ كاينين إيزوطوپات خرين بحال لكريپطون 79، 80، 81، 82، 83، 84، 85، ؤ 86.

لإيزوطوپات ديال لكريپطون

سمية د لإيزوطوپ	لكتلة دّرية (ݣرام/مول)	نّسبة ف طّبيعة (%)	نص لحياة
كريپطون-78	77.920	0.355	1.5 ألف مليار مليار عام
كريپطون-79	78.920	0	35 ساعة
كريپطون-80	79.916	2.286	∞
كريپطون-81	80.916	0	210000 عام
كريپطون-82	81.913	11.593	∞
كريپطون-83	82.914	11.5	∞
كريپطون-84	83.911	56.987	∞
كريپطون-85	84.912	0	11 عام
كريپطون-86	85.911	17.279	∞

مصادر

ويكيميديا كومنز عندا تصاور و معلومات على كريپطون.