كلبيات الشكل
كلبيات الشكل
| ||
| ||
| معلومات عامة | ||
| سمية لعيلمية | Caniformia (ميكلوش كريتسوي، 1943) | |
| لخاصية د ترتاب | تنيضيمة | |
| تابع ل | كارنيڤورات | |
| لعيشة | ||
| عايش فلفترة | 42 ملاين دالسنين قبل لميلاد | |
كلبيات الشكل (Caniformia) هي تنضيمة تحتانية ف التنضيمة كارنيڤورات لي كاتكوّن من لكارنيڤورات لي "كايشبهو ل لكلب". كاتجمع لكلاب (الدياب، التعالب، إلخ.)، الدبوبا، الراكونات، و لعرسيات.[1] زعانفيات الرجلين (لفقمات، لفضاض، و عجول لبحر) حتى هوما كاينين ف واحد التقسيمة وسط هاد لݣروپ. لمركز د التنواع ب النسبة ل كلبيات الشكل كان ف أمريكا الشمالية و شمال أوراسيا. كلبيات الشكل، على عكس سنوريات الشكل (لكارنيڤورات لي "كايديو ل لقط")، لي لمركز د التنواع ديالهم كان ف إفريقيا و جنوب آسيا.
جل لعضاء د هاد لݣروپ عندهوم مخالب ماكايتطواوش من غير (لحوات (Fisher)،[2] لخز (Marten)،[3] قضاعة لما (غير لمخالب لقداميين)،[4] لپانضا لحمر،[5] و قزيبة لخاتم (Ringtail)، و شي نواع د التعالب لي عندهوم مخالب كاتطوى ولا كاتطوى ل النص)[6] و كايميلو باش يكونو كفيين لمشية (Plantigrade - كايتمشاو على كف رجليهوم) (من غير لكلبيات). كاينين وصايف خرين لي كايفرقو كلبيات الشكل على سنوريات الشكل بحال، كلبيات الشكل عندهوم فكاك طوْل ب سنان كتر، و سنان لحايميين قل ف لختيصاص. هوما عاوتاني كايميلو كتر ل جيهة الريجيم لقارت و عادات لماكلة النتيهازيين، ف لوقيتة لي سنوريات الشكل، آپار من الزباديات، مختصين كتر ف ماكلة اللحم. كلبيات الشكل عندهوم بواقة سمعية وحدانية لبيوت ولا مقسمة جوزئياً، مكوّنة من عضم واحد، أمّا سنوريات الشكل، عندهوم بواقة سمعية مدوبلة لبيوت و مكوّنة من جوج عضام مربوطين بجوج بيهوم ف باريير وسطهوم.[7] ف كلبيات الشكل، لغدّة لبصليّة لإحليلية و لحويصلة لمنوية دايماً غايبين عندهوم. ب النسبة ل لقد د لكسدة، عضمة لقضيب عند كلبيات الشكل ف لعادة طوْل من سنوريات الشكل.[7]
.jpg)
كلبيات الشكل فيها تسعود لفاميلات باقيين، و تلاتة لفاميلات منقارضين، معتارف بيهوم حتى هوما. لفاميلات د دابا وحدانيين لعرش على حساب التحاليل لموليكية لفيلوجينية.[8] كلبيات الشكل لأرضيين لي ف لبريّة كايتلقاو ف ݣاع لقارات من غير آنطاركتيكا، ف لوقيتة لي زعانفيات الرجلين موزعين ف ݣاع موحيطات الدنيا.
فاميلة كلبيات - Canidae (لكلاب و لكلبيات لخرين) منهوم الدياب، لكلاب، لقيوط، و التعالب، و زيد شي نواع مامعروفينش بزاف. لفاميلة دابايا مقسمة ل جوج ݣروپات كبار، لكلاب لحقيقيين (قبيلة كليبينات - Canini)، لي فيها تسعود د لݣنوسا، و التعالب لحقيقيين (تعيلبيات - Vulpini) ب جوج ݣنوسا. زيد على هادشي، جوج ݣنوسا بيدائيين فايتين توصفو. شي 35 نوع من لكلبيات لباقيين معتارف بيهوم. لكلبيات هوما أكتر نواع جتيماعيين بينات كلبيات الشكل كاملين، شي خطرات كايعيشو ف رباعة (Pack). لكلب هو أكتر بزولي ف التنواع ب النسبة ل التبدالات ف لبنية د لكسدة.
فاميلة دبيات - Ursidae هوما لكبر ف ݣاع كلبيات الشكل لرضيين. تمنية النواع معتارف بيهوم، مقسمين ل خمسة د لݣنوسا. كايتفاوتو من الدب لقطبي لكبير ف لقد (350–680 كيلوݣرام ف الدكور) ل دب الشمش الصغير ف لقد (30–60 كيلوݣرام ف الدكور) و من لپانضا لعملاق لمهدد ب النقيراض ل الدب لكحل لي شايع بزاف. لخصايل لمشروكين بينات الدبوبا لعصريين منهم، كسدة كبيرة ب رجلين عامرين، قنوفة طويلة، و زغب كرد، و ب رجلين كفّيين لمشية و خمسة د لمخالب ماكايتطواوش، و زنطيط قصير. لغالبية ف الدبوبا قارتين، ب ريجيم منوّع ب شكل كبير لي كايجمع النبات و لحيوان ب جوج. الدب لقطبي هو أكتر دب لحايمي ف هاد لفاميلة ب سباب الجو لقطبي فين كايعيش، و كايميل باش ياكل لفقمات. لپانضا لعملاق هو أكتر دب عواشبي ف هاد لفاميلة و طوّر بزاف د لآضاپطاسيوات، بحال الصبع السادس، سنان مختصين، و عضلات د لفك مجهدين، باش يخليوه ياكل لبامبو ب شكل حصري. الدب لمعݣاز (Sloth bear) عندو آضاپطاسيوات ف لماكلة د النمل و الطيرميتات، ب قنوفة طويلة، مخالب مجهدين، و سنان فوقانيين قداميين غايبين، وخا يقدر ياكل لعسل و لفروي.
فاميلة إيلوريدات - ailuridae مكوّنة من نوع فرّادي، لپانضا لحمر، لي ف واحد لمرة كان كايتعتابر من النسولا د الراكونيات ولا الدبيات، و لاكين دابا تبلاصا ف فاميلتو ل راسو هو و بزاف د النواع لمنقارضين. كايتلقى ف جبال لهيمالايا، ف جنوب الشينوا، نيپال، بوطان، لهند، و پاكيستان. النواع لفوصيليين من هاد لفاميلة تلقاو عاوتاني ف أمريكا الشمالية.[9]
فاميلة ضربانيات - Mephitidae (الضرابن و غريرات الريحة) كانو مكلاصيين ف لعرسيات، و لايني دابا تعتارف بيهوم كا نسل مستاقل عليهوم. الطناش النوع د الضرابن مقسمين ل ربعة د لݣنوسا: ݣنس الضربان - Mephitis (الضرابن لمكبطين و لمخططين، جوج نواع)، ݣنس سپيلوݣالي - Spilogale (الضرابن لمنقطين، ربعة د النواع)، ݣنس مياضاوس - Myadaus (غريرات الريحة، جوج نواع) و ݣنس كونيپاتوس - Conepatus (ضرابن نيف لحلّوف، ربعة د النواع). الجوج النواع د الضربان ف ݣنس مياضاوس كايسكنو ف [[أندونيسيا|إندونيسيا و لفيليپين؛ و ݣاع النواع د الضرابن لخرين كايسكنو ف لأمريكيتين من كاناضا ل أمريكا لوسطى و الجنوبية.
فاميلة لعرسيات - Mustelidae (لغريرات، بني عرس، و لقضاعات) هي أكبر فاميلة ف لكارنيڤورات، ب 22 ݣنس باقي و ب 57 نوع باقي تقريباً، ف لوقيتة لي هوما منوعين ب زايد ف الشكل، لقد، و السلوك، جل لعرسيات حيوانات صغار ب رجلين قصار، ودنين قصار و ضايرين، و فرو غليض. لعرسيات لحايميين ب شكل طاغي، و ف لوقيتة لي ماشي كولهوم كايتشاركو ف نفس التسنينة، كاملين عندهوم سنان مآضاپطيين على لماكلة د لهبرة، بحال السنان اللحايميين لي كايشرّݣو.
لعضاء من فاميلة الراكونيات - Procyonidae (الراكونات، و لكواتي) هوما حيوانات صغار، ب كسدة مسلوتة و قزازب طوال. تسعطاش النوع باقي ف ستة لݣنوسا معتارف بيهوم دابا. و من غير لكينكاجو، ݣاع الراكونيات عندهوم قزازب مخططين و علمات مفرزين د لوجه، و كيف الدبوبا، الراكونيات كفّيين لمشية. لغالبية د النواع عندهوم مخالب ماكايتطواوش. الراكونيات لبديانيين يقدرو يكونو تعريشة من لكلبيات لي تآضاپطاو على الريجيمات لقارتين كتر.[10]
زعانفيات الرجلين - Pinnipedia ( تقسيمة د لفقمات، لفضاض، و عجول لبحر) هو واحد ݣروپ منوّع و موزّع ب شكل عريض مكّون من بزوليات بحريين نص مائيين لي قراب ل واحد لݣروپ منقارض من زعانفيات الرجلين، إينالياركطوات - Enaliarctos. ف لوقيتة لي الدعامات على وحدانية لعرش ب النسبة ل زعانفيات الرجلين مجهدين، لعالاقة د زعانفيات الرجلين ب لبزوليات لرضيين مازالة ماواضحاش. شي ديراسات كايدعمو لفرضيّة د الدبوبا هوما لقراب لقراب ليهوم،[11][12][13] ف لوقيتة لي ديراسات خرين كايدعمو لفرضيّة بلي عندهوم قرابة ل لعرسيات.[14][15][16][17]
زعانفيات الرجلين تفرقو على كلبيات الشكل لخرين هادي 50 مليون عام ف وقيتة لإيوصين.[16]
التقسيمة دابايا مقسمة ل تلاتة د لفاميلات:
فاميلة فقميات - Phocidae (لفقمات لحقيقيين ولا بلا ودن) مكوّنة من 19 نوع من لحيوانات لبحريين ب زايد و لي عندهوم شكل لكسدة كيف لبرميل كايتفاوتو من 45 كيلوݣرام ف التقل و 1.2 ميطرو ف الطول (فقمة لخاتم - Ringed seal)، ل 2,400 كيلو ف التقل و 5 ميطرو ف الطول عند (فقمة لفيل الجنوبية). لفقميات كايتصابو ف ݣاع موحيطات الدنيا.
فاميلة عجليات لبحر - Otaridae (لفقمات ب لودن، عجول لبحر، و فقمات لفرو) موزعين ف ݣاع موحيطات الدنيا من غير الشمال د لموحيط لأطلاسي. هاد ل15 نوع من عجليات لبحر مقسمين ل 7 د لݣنوس كايتفرّزو على لفقميات ب ودنين برّاويين باينين، و ب وجوه كايديو ل "لكلب" كتر، و لقدرة باش يضورو لمجادف اللورانيين دياولهوم ل لقدام.
فاميلة لفضيات - Odobenidae ف هاد لوقيتة كاتجمع نوع فرّادي، لفض - Walrus. زعانفي الرجلين كبير لكسدة و مفرّز ب سبولات (Whiskers) و نياب برّاويين، لفض موزع ب شكل مقطع ف لموحيط الشمالي لقطبي و لبحور الشبه شمال قطبية ف النص الشمالي. هو ف الساس علايفي د الرخويات د د لبيڤالڤ - Bivalve mollusks و شي لاسلسوليات بحريين خرين ف لبلايص لقاعيّين.
كلبيات الشكل بانو ل لخطرة اللولى ب صيفتهوم كارنيڤورات كايتشعبطو ف الشجر و كايشبهو ف الشكل ل لخز - Marten ف عصر لإيوصين جوايه 24 مليون عام هادي. مياسيس كوݣنيتوس - Miacis cognitus ف لغالب كان من كلبيات الشكل لبديانيين. بحال بزاف د لكارنيڤورات لبديانيين لخرين كان مواتي ب شكل مزيان ل التشعبيط ف الشجر ب مخالب ماضيين كيف لبرة، و كان عندو طراف قداميين و مفاصل لي كايشبهو ل لكارنيڤورات لعصريين. م.كوݣنيتوس ف لغالب كان ساكن ف لغابة و رشيق بزاف لي كان كايفرس لحيوانات الصغر منو. بحال لبزوليات الصغار، الزواحف، و الطيور.
.jpg)
واحد النيقاش باقي كاين على لأصل د زعانفيات الرجلين. لبراهن لموليكيين الجداد كايلمحو بلي زعانفيات الرجلين تطوورو من واحد الجد لي كايشبه ل "الدب" جوايه 23 مليون عام هادي ف وقيتة اللخر ديال ليپوك د لأوليݣوصين ولا ف لبدية د ليپوك د لميوصين، لي هي پيريوض نتيقالية بين لپيريوضات د لپاليوجين لي سخن و النيوجين لي بْرْد.[18] وخا هاكداك، لكتيشاف د لفوصيل د پوجيلا دارويني - Pujilla darwini ف الرواسب د نوناڤوت ف لبدية د لميوصين كاتلمح ل واحد السيناريو مبدل. بحال لقضاعات د دابا، پوجيلا كائن عندو قزيبة طويلة، رجلين قصار، و صبعان مشبكين ف بلاصة لمجادف. غير هو، رجليه و كتافو كانو صليبين كتر، و هاد لحيوان ف لغالب كان عوام رباعي لمشية–مخلي واحد الشكل من لحركة لبحرية لي ودات ل لحضور د النواع د لعومان لكبار لي كاتوضف دابا من زعانفيات الرجلين لعصريين. پوجيلا تحط ف واحد التقسيمة د لعرسيات.
- تنضيمة تحتانية: كلبيات الشكل (كارنيڤورات لي كاتشبه ل "لكلب")
- ݣنس: ليكوفوصيون (منقارض)
- فاميلة فوقانية: آمفيسيونويديات
- فاميلة: آمفيسيونويدات (لكلب الدب [منقارض])
- تنضيمة صغيورانية فوقانية: آركطوسيونويدات
- تنضيمة صغيورانية: سيونويديات
- فاميلة فوقانية: كلالبيات
- فاميلة: كلبيات (لكلاب و النواع لقراب)
- فاميلة فوقانية: كلالبيات
- تنضيمة صغيورانية: آركطويديات
- تنضيمة قزمة: شباه الدبيات
- ݣنس: آضراكون (منقارض)
- فاميلة فوقانية: دبيات الشكل
- فاميلة: دبيات (الدبوبا)
- فاميلة فوقانية: عرسيات الشكل
- ݣنس: پليسيوݣالي (منقارض)
- فاميلة: إيلوريدات (لپانضات لحمرا و النواع لقراب)
- فاميلة: ضربانيات (الضرابن و غريرات الريحة)
- فاميلة: عرسيات (بني عرس و النواع لقراب)
- فاميلة: راكونيات (الراكونات و النواع لقراب)
- تقسيمة ماميقنش منها:
- ݣنس: پييݣنيتيس (منقارض)
- تنضيمة قزمة: شباه زعانفيات الرجلين
- ݣنس: پيناركتيديون (منقارض)
- فاميلة: إنالياركتيدات (منقارضة)
- فاميلة: سيمانطوريدات (منقارضة)
- تقسيمة: شكال زعانفيات الرجلين
- ݣنس: فقمات د لموحيط لهادي (منقارض)
- ݣنس: پطيروناركطوس (منقارض)
- تقسيمة تحتانية: زعانفيات الرجلين
- فاميلة فوقانية: شباه عجليات لبحر
- فاميلة: فضيّات (لفض و النواع لقراب)
- فاميلة: عجليات لبحر (لفقمات ب لودنين)
- فاميلة فوقانية: شباه لفقميات
- فاميلة: فقميات (لفقمات لحقيقيين/ بلا ودنين)
- فاميلة: ديسماطوفوسيدات (منقارضة)
- فاميلة فوقانية: شباه عجليات لبحر
- تنضيمة قزمة: شباه الدبيات
لكلاضوݣرام مبازي على لفيلوجينيا لموليكية د ستة د الجينات ف فلين (Flynn) (2005)،[18] شباه لعرسيات تميزاجوراو من مور التحاليل لمولتيجينية - Multigene د Law et al، ف 2018.[19]
- ^ ""carnivora"".
- ^ Rhines, C (2003). "Martes pennanti". Animal Diversity Web.
- ^ "American Marten". New York State Department of Environmental Conservation. Retrieved March 12, 2011.
- ^ Silverstein, Alvin; Silverstein, Virginia and Robert (1995). The Sea Otter. Brookfield, Connecticut: The Millbrook Press, Inc.
- ^ Roberts, M. S.; Gittleman, J. L. (1984). "Ailurus fulgens" (PDF). Mammalian Species (222). The American Society of Mammalogists: 3.
- ^ Goldberg, J. (2003). "Bassariscus astutus". Animal Diversity Web. Retrieved March 12, 2011.
- ^ a b R. F. Ewer (1973). The Carnivores. Cornell University Press. ISBN 978-0-8014-8493-3. Retrieved 9 January 2013.
- ^ Eizirik E.; Murphy W.J.; Koepfli K.P.; Johnson W.E.; Dragoo J.W.; O'Brien S.J. (2010). "Pattern and timing of the diversification of the mammalian order Carnivora inferred from multiple nuclear gene sequences". Molecular Phylogenetics and Evolution. 56 (1): 49–63.
- ^ "Two new carnivores from an unusual late Tertiary forest biota in eastern North America" (PDF). Archived from the original (PDF) on 2007-09-30.
- ^ Russell, James (1984). Macdonald, D. (ed.). The Encyclopedia of Mammals. New York: Facts on File. pp. 98–99
- ^ Lento, G. M.; Hickson, R. E.; Chambers, G. K.; Penny, D. (1995). "Use of spectral analysis to test hypotheses on the origin of pinnipeds". Molecular Biology and Evolution. 12 (1): 28–52.
- ^ Hunt, R. M. Jr.; Barnes, L. G. (1994). "Basicranial evidence for ursid affinity of the oldest pinnipeds". Proceedings of the San Diego Society of Natural History. 29: 57–67.
- ^ Higdon, J. W.; Bininda-Emonds, O. R.; Beck, R. M.; Ferguson, S. H. (2007). "Phylogeny and divergence of the pinnipeds (Carnivora: Mammalia) assessed using a multigene dataset". BMC Evolutionary Biology. 7: 216.
- ^ Sato, J. J.; Wolsan, M.; Suzuki, H.; Hosoda, T.; Yamaguchi, Y.; Hiyama, K.; Kobayashi, M.; Minami, S. (2006). "Evidence from nuclear DNA sequences sheds light on the phylogenetic relationships of Pinnipedia: Single origin with affinity to Musteloidea". Zoological Science. 23 (2): 125–46.
- ^ Flynn, J. J.; Finarelli, J. A.; Zehr, S.; Hsu, J.; Nedbal, M. A. (2005). "Molecular phylogeny of the Carnivora (Mammalia): Assessing the impact of increased sampling on resolving enigmatic relationships". Systematic Biology. 54 (2): 317–37.
- ^ a b Hammond, J. A.; Hauton, C.; Bennett, K. A.; Hall, A. J. (2012). Nikolaidis, Nikolas (ed.). "Phocid seal leptin: Tertiary structure and hydrophobic receptor binding site preservation during distinct leptin gene evolution". PLOS ONE. 7 (4): e35395.
- ^ Rybczynski, N.; Dawson, M. R.; Tedford, R. H. (2009). "A semi-aquatic Arctic mammalian carnivore from the Miocene epoch and origin of Pinnipedia". Nature. 458 (7241): 1021–24.
- ^ a b Flynn, J. J.; Finarelli, J. A.; Zehr, S.; Hsu, J.; Nedbal, M. A. (2005). "Molecular phylogeny of the Carnivora (Mammalia): Assessing the impact of increased sampling on resolving enigmatic relationships". Systematic Biology. 54 (2): 317–37
- ^ Law, Chris J.; Slater, Graham J.; Mehta, Rita S. (2018-01-01). "Lineage Diversity and Size Disparity in Musteloidea: Testing Patterns of Adaptive Radiation Using Molecular and Fossil-Based Methods". Systematic Biology. 67 (1): 127–144.