انتقل إلى المحتوى

كارنيڤورات

بدل ليانات
من ويكيپيديا
كارنيڤورات
معلومات عامة
سمية لعيلمية Carnivora
(Thomas Edward Bowdich، 1821)
لخاصية د ترتاب تنضيمة
تابع ل Carnivoraformes، مشيميات، بزوليات و لوراسيات
لعيشة
عايش فلفترة 42 ملاين دالسنين قبل لميلاد


كارنيڤورات، هي تنضيمة ديال لبزوليات لمشيمية لي تخصصو ب شكل لولاني ف لماكلة د اللحم، التنضيمة د لكارنيڤورات هي خامس أكبر تنضيمة ديال لبزوليات، كاتجمع عل لاقل 279 نوع حيواني كايعيشو ف ݣاع قنات د لعالم وسط موايل مبدلين على بعضياتهم، من لبلايص لقطبيين لباردين ل لبلايص لقاحلين د الصحرا لكبرى ل لبحور لمحلولة. هاد لبزوليات كاتجي ف مجموعة كبيرة من لفورمات لمبدلين د لكسدة معا تنواع كبير ف الشكال و لقدود.

التنضيمة د لكارنيڤورات كاتقسم ل جوج تنضيمات تحتانيين، سنوريات الشكل، لي كاتجمع السنوريات لحقيقية، و بزاف د لحيوانات لي "كاتشبه ل لقط"؛ و كلبيات الشكل، لي كاتجمع لكلبيات لحقيقية، و بزاف د لحيوانات لي "كاتشبه ل لكلب". سنوريات الشكل فيها لفاميلات د السنوريات، الزباديات، الضبع، و النمس، لاغلبية د هاد لحيوانات كايعيشو ف لعالم لقديم؛ إلا لقطوط، لي كايعيشو ف لعالم لقديم و الجديد، دخلو ل لامريكيتين من لقنطرة لارضية بيرين. أما كلبيات الشكل فيها لكلبيات، الراكونيات، الدبوبا، لعرسيات، الضربان، و لفقميات لي عايشين ف ݣاع قنات لعالم ب تنواع عريض ف لمرفولوجية، الريجيم و السلوك نتاعهوم.

لأصل د لكلمة

[بدل | بدل لكود]

كلمة كارنيڤور مشتقة من لكلمة اللاتينية كارو - carō من (الجدر كارن - carn) لي كاتعني 'لحم' و كلمة ڤوراري - vorāre لي كاتعني 'كلا'، 'كونصوما'، و كاتعود على أي أورݣانيزم كاياكل اللحم.

لفيلوجينيا

[بدل | بدل لكود]

أقدم شبيه د لكارنيڤور تعرف (شباه لكارنيڤورات - carnivomorpha) بان ف أمريكا الشمالية هادي 6 مليون عام من مورا لواقعة د النقيراض د لعصر الطاباشيري-لپاليوجيني.[1][2] هاد الجدود اللولانيين ديال لكارنيڤورات كانو بزوليات كايشبهو ل شي بن عرس صغير ولا شي زردي، شادين هيت ليلي ف لوطا د لغابة ولا ف الشجر، ف لوقيتة لي ݣروپات خرى من لبزوليات بحال لمزنيقيات و بعدهوم لكرييوضونات شدو النيش د لحيوانات لعملاقة اللحايمية. غير هو، مورا النقيراض د لمزنيقيات و لكرييوضونات-الضبعيات لماضية ف اللخر د عصر لإيوصين، لكارنيڤورات خداو هاد النيش، ب فورمات بحال النمراڤيدات لي كايوليو لمفتارسات د لمكيدة ب كسدة كبيرة لي مسيطرين ف عصر لأوليݣوصين هوما و لكرييوضونات - ضبعيات السنان. غير بان عصر لمييوصين، جل النسولة لكبيرة و لفاميلات د لكارنيڤورات يلا ما قلناش كلها، تنوعات و ولاو أكتر ݣروپ د لمفتارسات لارضية لكبيرة مسيطر ف أوراسيا و أمريكا الشمالية، ب بزاف د النسولة (lineages) نجحات ف النيشات د لحيوانات لعملاقة اللحايمية ف وقيتات زمانية مبدلة، ف عصر لمييوصين و لعصور لي موراها.

السيسطيماتيكات

[بدل | بدل لكود]

التاطوور

[بدل | بدل لكود]

لكارنيڤورات تنضيمة من واحد لݣروپ د لبزوليات معروف ب سمية اللوراسيات، لي كاتجمع ݣروپات خرين بحال لخفافش (سحت الليل) و لحوافر.[3][4] ف وسط هاد لݣروپ لكارنيڤورات محطوطين ف التقسيمة ديال لوحشيات (ferae). التقسيمة د لوحشيات فيها أقرب حيوان ل لكارنيڤورات باقي، لپانݣولان، هو و بزاف د لݣروپات لمنقارضين لاغلابية فيهوم مشيميات لحايميين من لعصر لپاليوجيني بحال لكرييوضونات، لآركطوسيونات و لمزنيقيات.[5] لكرييوضونات تشافو ف لأصل كا ݣروپ خت ل كارنيڤورات، يمكن ݣروپ جد ݣاع، هادشي مبازي على لحضور د السنان اللحايمية (carnassial).[6] و لايني الطبيعة د السنان اللحايمية مبدلة بينات لݣروپات ب جوج. ف لكارنيڤورات، السنان اللحايمية مبلاصية حدا لقبالة الصف د الضراس، أما عند لكرييوضونات، مبلاصية حدا اللور د الصف د الضراس[7]، و هادشي كايعطي تاريخ تاطووري مبدل بينات الجوج و تفراز بينات النيڤوات د الترتاب.[8] زيد على هادشي، آخر التحاليل لفيلوجينية كاتعطي بلي لكرييوضونات قراب كتر ل لپانݣولان ف لوقيتة لي لمزنيقيات يقدرو يكونو ݣروپ خت ل لكارنيڤورات و قرابهوم.[5]

أقرب كارنيڤور من نفس الجدع هوما لمياكويدات. لمياكويدات فيها فاميلات د جدود الزباديات و لمياسيدات، و ب جوج بيهوم زيد لكارنيڤورات و لمياكويدات كايكوْنو التقسيمة-الجدع شباه لكارنيڤورات. لمياكويدات كانو حيوانات كاتشبه ل شي زردي لي شادين بزاف د النيشات لمنوعين بحال لموايل لأرضية و الشجرية. آخر الديراسات ورات واحد لكمية د لبراهن لمدعومة بلي لمياكويدات هي واحد لݣراض تاطووري د شباه لكارنيڤورات، ف لوقيتة لي جدود الزباديات هي ݣروب جاية من عرش واحد قاعدي، لمياسيدات هي ݣروب ب عروشا (شعبة) كتار (كيف ما كايبان ف لفيلوجيني لتحت).[9][10]

شباه لكارنيڤورات بداو يبانو ف أمريكا الشمالية ف عصر لپاليوجين تقريبا 60 مليون عام هادي.[2] لكارنيڤورات لفوقانية بانت أول خطرة هادي 42 مليون عام ف وسط لإيوصين.[11] لفيلوجيني د لجوزيئات كاتبين بلي لكارنيڤورات لباقيين هوما ݣروپ وحداني لعرش (الشعبة)، لݣروپ لفوقاني من شباه لكارنيڤورات.[12] من هنا لكارنيڤورات تفرّقو ل جوج تقسيمات مبازيين على لبنية لعضمية لي ضايرة ب لوسط د لودن ف الجمجومة، هاد الجوج تقسيمات هي سنوريات الشكل لي كايديو ل لقطوط، و كلبيات الشكل لي كايديو ل لكلاب.[13] ف سنوريات الشكل، لبواقة السمعية (Auditory bullae) مدوبلة-لبيوت، مكونة من جوج د لعضام و باريير كاتوصل بيناتهم. كلبيات الشكل عندهوم بواقة سمعية وحدانية-لبيت ولا مفرقة جوزئيا، مكونة من عضم واحد.[14] ف لبدية، لمومتيلين اللولانيين د لكارنيڤورات كانو صغار بحال لكرييوضونات (ب لاخص، الضبعيات لماضية) و لمزنيقيات، هاد الجوج حكمو النيشات د لمفتارسات لفوقانيين ف لوقيتة د عصر لإيوصين، و لاكين ف عصر لأوليݣوصين، النمراڤيدات هوما لي ولاو لمفتارسات لفوقانيين من لكارنيڤورات، و معا جا عصر لميوصين جل لفاميلات د لكارنيڤورات بداو كايتنوعو و ولاو لمفتارسات لأرضيين الرئيسيين ف النص الشمالي د لكورة لأرضية.

لكلاصاج د لكارنيڤورات د دابا

[بدل | بدل لكود]

ف 1758، لبوطانيست السويدي كارل لينيس بلاصا ݣاع لكارنيڤورات لي كانت معروفة ف ديك لوقت ف وسط ݣروپ د لوحشيات (Ferae) (مايتغتالطش ليك معا لكونصيپط لعصري د لوحشيات لي كايحط حتى لپانݣولان ف هاد لݣروپ) ف النسخة لعاشرة ديال كتابو النضام الطابيعي - Systema Naturae. عتارف ب ستة د لݣنوسا: كانيس (لكلبيات و الضبعيات)، فوكا (زعانفيات الرجلين)، لقط (السنوريات)، ڤيڤيرا (الزباديات، النمسيات، و الضربانيات)، موسطيلا (لعرسيات آپار من غرير لعسل) و الدب (الدبيات، النواع لكبيرة من لعرسيات، و الراكونيات).[15] هاد لكلاصاج بقى حتى ل 1821 فين لكتاتبي لميريكاني و الرحالة طوماس إيدوارد باوديتش عطى ل لݣروپ السمية لمقبولة د دابا.[16]

ف لبدية، لكونصيپط لعصري ديال لكارنيڤورات كان مقسوم ل جوج تنضيمات تحتانية: لفيسيپيدات (مقسومات الرجلين) لارضية، و لپينيپيدات (زعانفيات الرجلين) النص بحرية.[17] لتحت كاين لكلاصاج كيفاش لفاميلات د دابا عندها علاقة معا بعضياتها مورا التستيفة د عالم لموستاحتات دجوردج ݣايلورد سيمپسن ف 1945.[17]

  • تنضيمة كارنيڤورات باوديتش، 1821
    • تنضيمة تحتانية مقسومات الرجلين بلومينباخ، 1971
      • فاميلة فوقانية كلبيات الشكل د.فيشر دي ڤالدهايم، 1817
        • فاميلة كلبيات د.فيشر دي ڤالدهايم، 1817 - كلاب
        • فاميلة دبيات د.فيشر دي ڤالدهايم، 1917 - الدبوبا
        • فاميلة راكونيات بوناپاغط، 1850 - راكون و پانضا
        • فاميلة عرسيات د.فيشر دي ڤالدهايم، 1817 - ضربان، غرير لعسل، قضاعة، و بن عرس.
      • فاميلة فوقانية سنوريات الشكل د.فيشر دي ڤالدهايم، 1817
        • فاميلة زباديات ج. إ. ݣراي، 1821 - الزباد و النمس
        • فاميلة ضبعيات ج. إ. ݣراي، 1821 - الضبوعة
        • فاميلة سنوريات ج. إ. ݣراي، 1821 - لقطوط
    • تنضيمة تحتانية زعانفيات الرجلين إليݣر، 1811
      • فاميلة عجليات لبحر ح. إ. ݣراي، 1825 - لفقمات ب لودن
      • فاميلة فضيات ج. آ. آلن، 1880 - لفض
      • فاميلة فقميات ج. إ. ݣراي، 1821 - لفقمات بلا ودن

من تما، وخا هاكاك، لميطودات لي خدمو لعولاما د لبزوليات ف تقدار لعالاقات لفيلوجينة بينات لفاميلات د لكارنيڤورات تطووْرات ب تخدام مقاربات معقدة بحال، الجينات، لمرفولوجية، و التسجالات د لفوصيل. لبحات ف لفيلوجيني د لكارنيڤورات من عام 1945 تبتات بلي مقسومات الرجلين هي ف لحقيقة ݣروپ وحداني لعروش،[18] ف لوقيتة لي زعانفيات الرجلين عندهوم علاقة يا ما معا الدبوبا ولا بني عرس.[19][20][21][22][23] زيد على هادشي، تتبت بلي فاميلات لكارنيڤورات بحال الزباديات، الراكونيات، و لعرسيات هي فاميلات متعددة لعروش (الشعبة):

  • تلقى بلي النموسا و شي نواع مأصلة ف مادغشقر ف تقسيمة وحدة معا الضبوعا، معا النواع لملغاشية ب فاميلة بوحديتها، لفلنوكيات.[24][25]
  • زباد النخل لإفريقي هو كارنيڤور بيدائي كايدي ل لقط.[26]
  • اللينسانݣ أقرب نوع ل السنوريات.[27]
  • لپانضات ماشي من الراكونيات ولا حتى ݣروپ طابيعي مستاقل ب راسو.[28] لپانضا لعملاقة هو دب د بصح.[29][30] ف لوقيتة لي لپانضا لحمر، فاميلة مفرزة.[31]
  • الضرابن و غريرات الريحة تبلاصاو ف فاميلة ديالهوم بوحدهوم، و هاد لفاميلة ݣروپ خت ل واحد التقسيمة كاتجمع فاميلات د لإيلوريدات (لپانضا لحمر)، الراكونيات، و لعرسيات ب شكل قطعي.[31][32]

التنضيمة كارنيڤورات كاتكون من 292 نوع باقي، كاينتاميو ل 131 ݣنس و حتى لݣنوسا لمنقارضة بحال الدوسيسيون، لي فيه 2 نواع منقارضة، و 4 د النواع خرى منقارضة، لي هوما لكارنيڤور لوحيد لي نقارض من لوقيتة د ما قبل التاريخ. هادشي ماكايشملش نواع مكروزة (بحال لكلاب لمديبين و الليݣور) ولا النواع لمنقارضة قبل التاريخ. الديراسات لجوزيئية لعصرية كاتلمح بلي هاد ل 131 ݣنس يقدرو يترتبو ف 16 لفاميلة، مفروقين بين التقسيمات د كلبيات الشكل و سنوريات الشكل، و بزاف من هاد لفاميلات تقسمو ل فاميلات تحتانيين. تلاتة د لفاميلات من لحيوانات النص بحرية، لفضيات، عجليات لبحر، و لفقميات، مجموعين ف التقسيمة د زعانفيات الرجلين.

تنضيمة تحتانية كلبيات الشكل

  • فاميلة إلوريدات
    • فاميلة تحتانية إلورينات (لپانضات لحمرا): 1 ݣنس، 2 نواع
  • فاميلة كلبيات
    • فاميلة تحتانية كليبيات (الدياب و التعالب): 14 لݣنس (1 نقارض)، 39 نوع (2 نقارضو)
  • فاميلة ضربانيات (الضرابن و غريرات الريحة): 4 ݣنوس، 12 نوع
  • فاميلة عرسيات
    • فاميلة تحتانية لمهاوشيات (لخز و لمهاوش): 4 ݣنوس، 9 نواع
    • فاميلة تحتانية غريريات عرسية (غريرات عرسية): 1 ݣنس، 5 نواع
    • فاميلة تحتانية إيكطونيشينات (دلق إفريقي و لݣريزونات): 5 ݣنوس، 7 نواع
    • فاميلة تحتانية قضاعيات (لقضاعات): 7 ݣنوس، 14 نوع (1 نقارض)
    • فاميلة تحتانية غريريات أوراسيوية (غريرات أوراسيوية): 2 ݣنوس، 6 نواع
    • فاميلة تحتانية غريريات لعسل (غرير لعسل): 1 ݣنس، 1 نوع
    • فاميلة تحتانية عريسيات (بني عرس و لمينك): 2 ݣنوس، 20 نوع (1 نقارض)
    • فاميلة تحتانية غريريات أمريكية (غرير أمريكي): 1 ݣنس، 1 نوع
  • تقسيمة زعانفيات الرجلين
    • فاميلة فضيات (لفض): 1 ݣنس، 1 نوع
    • فاميلة عجليات لبحر (لفقمات ب لودن): 7 ݣنوس، 16 نوع (1 نقارض)
    • فاميلة فقميات (لفقمات لحقيقية/بلا ودن): 14 ݣنس، 19 نوع (1 نقارض)
  • فاميلة راكونيات (الراكون، لكواتي، لأولينݣو، كينكاجو): 6 ݣنوس، 14 نوع
  • فاميلة دبيات
    • فاميلة تحتانية پانضيات (لپانضا): 1 ݣنس، 1 نوع
    • فاميلة تحتانية طريماركتينات (الدب قصير لوجه): 1 ݣنس، 1 نوع
    • فاميلة تحتانية دبدوبيات (الدبوبا): 3 ݣنوس، 6 نواع

تنضيمة تحتانية سنوريات الشكل

  • فاميلة فلنوكيات
    • فاميلة تحتانية فلنوكيات مدغشقر (لفلنوكيات لي كايشبهو الزباد): 3 ݣنوس، 4 نواع
    • فاميلة تحتانية ݣاليدينيات (لفلنوكيات لي كايشبهو النمس): 4 ݣنوس، 6 نواع
  • فاميلة سنوريات
    • فاميلة تحتانية سنيوريات (لقطوط صغيرة و متوسطة لقد): 12 ݣنس، 34 نوع
    • فاميلة تحتانية نمريات (لقطوط كبيرة لقد): 2 ݣنوس، 7 نواع
  • فاميلة نمسيات
    • فاميلة تحتانية نميسيات (النموسا لوروپية/آسيوية): 9 ݣنوس، 23 نوع
    • فاميلة تحتانية منݣوسيات (النموس ليفريقية): 6 ݣنوس، 11 نوع
  • فاميلة ضبعيات (الضبوعا): 3 ݣنوس، 4 نواع
  • فاميلة زباديات النخل ليفريقية (زباد النخل لإفريقي): 1 ݣنس، 1 نوع
  • فاميلة لينسانݣيات (اللينسانݣات لآسيوية): 1 ݣنس، 2 نواع
  • فاميلة زباديات
    • فاميلة تحتانية زرديات (الزردي): 2 ݣنوس، 16 نوع
    • فاميلة تحتانية هيميݣالينات (الزبادات الجنوب شرق آسيوية): 4 ݣنوس، 4 نواع
    • فاميلة تحتانية پاراضوكسورينات (الزبادات لآسيوية): 5 ݣنوس، 7 نواع
    • فاميلة تحتانية زبيديات (الزبادات): 3 ݣنوس، 6 نواع

لآناطوميا

[بدل | بدل لكود]

جمجومة

[بدل | بدل لكود]

النياب عند لكارنيڤورات ف لعادة كبيرة، ببوشيين ف الشكل (مخروطيين)، سميكين و كايريزيسطيو الصدمات. ݣاع النواع لأرضية من لكارنيڤورات عندها 3 د لقواطع ف كل جنب د كل فك (الستيتناء هو قضاعة لبحر، لي عندها غير جوج قواطع ف لفك التحتاني).[33] الضرسة التالتة ترزات. السنان اللحايميين (carnassial) كاينين ف الضراس- اللولانيين (Premolar) لفوقانيين الرابعين و ف الضراس التحتانيين اللولين. بحال جل لبزوليات، النواع د هاد التنضيمة عندها تسنينة مبدلة لقد و الشكل (heterodont)، غير هو ف شي نواع، بحال ضبع لرض (proteles cristata)، السنان عندو صغارو بزاف و السنان د لحنك عندو ولاو متخصصين ف لماكلة د لحشرات. عند زعانفيات الرجلين، السنان عندهوم ف نفس لقد و الشكل (homodont) حيت تطورو باش يشقمو ولا يقبطو لحوت، و السنان د لحنك عندهوم مابقاوش ف لغالب.[34] السنان اللحايميين عند الدبوبا و الراكونات، صغارو ب شكل تانوي.[34] جمجومة لكارنيڤورات مدعومة ب شكل كبير ب تقواس وجني مجهد. لعرف السهمي ديما كايكون حاضر، شي مرات كايبان بارز ف النواع لي عندهم الديمورفية لجنسية بحال عجول لبحر و لفقمات لفروية، وخا هاكاك ف شي نواع د لكارنيڤورات الصغار هاد لعرف السهمي صغار ب شكل كبير.[34] صندوق لمخ (Neurocranium) مكبر ب سباب لعضمة لحيطية لقدامية (Frontoparietal) ف لقدام د لوجه. ف كلبيات الشكل، الروسطروم (Rostrum) كايكون ف لعادة طويل معا بزاف د السنان، أما ف سنوريات الشكل كايكون قصر معا سنان قل. لمحارات النيفية كايكونو كبار و معقدين ب لموقارنة معا لبزوليات لخرى، هادشي كايخلي بلاصة كبيرة ل الريسيپطورات الشمية.[34]

لبلايص لمورا جمجومية

[بدل | بدل لكود]

آپار من التكداس د لخصايل لمشروكين بينات لكارنيڤورات ف السنان و الجمجومة، ماكاينينش بزاف د لحوايج لي كايوحدوهوم كا ݣروپ.[33] ݣاع النواع من لكارنيڤورات رباعيين لمشية و جلهوم عندهوم 5 د الصبعان ف الرجلين لقداميين و 4 ف الرجلين اللورانيين. عند لكارنيڤورات لأرضية، الرجلين يقدرو يكونو يا ديجيتيݣراد (كايتمشاو على صباع رجليهوم) كيف ما لمشاش، الضبوعا، و لكلاب ولا پلانتيݣراد (كايتمشاو على لكف د رجليهوم) كيف ما الدبوبا، الضرابن، الراكونات، بني عرس، الزبادات و النموسا. ف زعانفيات الرجلين، الدرعان تموديفياو ل مجادف.

على عكس لبالينيات و السيرينيات، لي حتى هوما بزوليات عندهوم قزازب وضايفيين كاملين لي كايعاونوهوم باش يعومو، زعانفيات الرجلين كايخدمو الدرعان ديالهوم تحت لما ف لعومان. لفقمات لحقيقية (بلا ودن) كايخدمو لمجادف اللورانيين ف لعومان؛ عجول لبحر و فقمات لفرو كايخدمو لمجادف لقداميين ف لعومان، لفض كايخدم لمجادف دياولو ب ربعة. لحاصول، زعانفيات الرجلين عندهوم قزازب قل من لكارنيڤورات لخرين ب شكل كبير.

آپار من زعانفيات الرجلين، لكلاب، الدبوبا، الضبوعا، و لقطوط كاملين عندهوم شكال مفرزة على بعضياتها و تقدر تعرفهوم دغيا. لكلاب ف لعادة من لبزوليات الجرايا و كايبانو رشيقين من الشوفة، دايماً كايعولو على سنانهوم ف قبيط لفرايس؛ الدبوبا كبر من لكلاب ف لقد و كايعولو على الجهد د لكسدة ديالهوم ف التقلاب على لماكلة. ب لموقارنة معا لكلاب و الدبوبا، الطراف لقداميين د لقطوط طول و صح، و مسلحين ب مخالب كايتطواو مخصصين ف قبيط لفريسة. الضبوعا من سنوريات الشكل لي كايشبهو ل لكلب عندهوم ضهر محدب حيت رجليهوم لقداميين طول من اللورانيين. لفاميلة د الراكون و لپانضا لحمر كارنيڤورات صغار لقد كايديو ل الدب ب قزازب طوال. لفاميلات لخرين ديال لكارنيڤورات الصغار بحال الزباديات، النمسيات، لعرسيات، لغريريات، الضربانيات ،ب سباب التطوور التقاربي خلاو الشكل الصغير، لي كان عند جدودهم لميياكويدات، غير هو كاينين شي تنوعات شكلية بحال الشكل الصليب و لمدكس لي عند لغريرات و لمهاوشين (Gulo Gulo).[33]

تقريباً ݣاع النواع ديال لكارنيڤورات عندهم موسم لمجاوجة ف وقيتة وحدة. الدكور د لكارنيڤورات عندهوم ف لعادة عضمة ف قضيبهم (bacula)، لي غايبة عند الضبوعا و لبينتورونݣات.

الطول و لعمورية د لفرو كاتبدل على حساب لبيئة فين كايعيش النوع. ف النواع لي كايعيشو ف الجو الدافي، لفرو ديالهوم ف لغالب كايكون قصير ف الطول و لعمورية. ف النواع د الجو لبارد، لفرو عندهوم كايكون يا عامر يا طويل، و فنفس لوقت معاه واحد لمادة مزيتة لي كاتعاون ف لحفيض د لحرارة د كسدتهوم. اللوان د فروهم كايكونو مبدلين على حساب النوع، ف لغالب ب لكحل، لبيض، الليموني، الصفر، لحمر و بزاف الطبقات من الرمادي و لقهوي. شي نواع كايكونو مخططين، منقطين، مطاشيين، ولا منقوشين ب نماط مخلطة. كاتبان بلي كاينة واحد لعالاقة ما بين لموؤل و النمط د اللون؛ متلاً، النواع لمخططة و لمنقطة كايميل باش يتلقاو ب شكل تقيل ف لبيئات لغابوية.[33] شي نواع بحال الديب الرمادي پوليمورفيك، لفراد من هاد النوع كايكون عندهوم لوان مبدلين على بعضياتهم. التعلب لقطبي و لقاقم ، عندهوم فرو لي كايتبدل من بيض و عامر ف الشتا، ل قهوي و خاوي ف الصيف. ف زعانفيات الرجلين و الدبوبا لقطبية، عندهوم واحد الطبقة عازلة و سميكة د الشحمة لي كاتعونهوم يحافضو على درجة لحرارة د لكسدة نتاعهوم.

الديمورفية لجنسية

[بدل | بدل لكود]

الديمورفية لجنسية هي لحالة فين الجناس من نفس النوع كايوريو خصايل مرفولوجية مبدلين على بعضياتهم، هاد لخصايل ماشي خصهوم ب الضارورة يكونو عندهم علاقة ب لمجاوجة.[35] الديمورفية لجنسية ف لكارنيڤورات، فين الدكر كبر من النتوا شايعة. دايماً كايتستشهد ب لعزيلة الجنسية كا سباب ف التبدالات لي ف وسط النوع ف لكتلة د لكسدة و لمرفولوجية د الجمجومة و لفك بينات النواع لي ف التنضيمة د لكارنيڤورات.[36][37] من لمتوقع بلي لحيوانات لي عندهوم سيسطيمات د التاعدود الزوجات و نيڤوات زايدين ف لحدودية و السلوك لخلوي كايوريو أزيد النيڤوات ف الديمورفية لجنسية ديال لقد. زعانفيات الرجلين أحسن برهان على هادشي.

عيون لكلام

[بدل | بدل لكود]
  1. ^ Hunter, L. (2018). Field Guide to Carnivores of the World. Bloomsbury Wildlife. pp. 1–271.
  2. ^ a b "EARLIEST KNOWN CARNIVORAN AUDITORY BULLA AND SUPPORT FOR A RECENT ORIGIN OF CROWN-GROUP CARNIVORA (EUTHERIA, MAMMALIA)".
  3. ^ ""Towards Resolving the Interordinal Relationships of Placental Mammals"".
  4. ^ ""Phylogenomic analyses elucidate the evolutionary relationships of bats"".
  5. ^ a b "Resolving the relationships of Paleocene placental mammals".
  6. ^ McKenna, M. C. (1975). "Toward a phylogenetic classification of the Mammalia". In Luckett, W. P.; Szalay, F. S. (eds.). Phylogeny of the Primates. New York: Plenum. pp. 21–46.
  7. ^ "Mammalogy: Adaptation, Diversity, Ecology".
  8. ^ Turner, Alan; Antón, Mauricio (2004). Evolving Eden: An Illustrated Guide to the Evolution of the African Large-Mammal Fauna. New York: Columbia University Press. p. 77.
  9. ^ Bryant, H.N., and M. Wolson (2004) “Phylogenetic Nomenclature of Carnivoran Mammals.” First International Phylogenetic Nomenclature Meeting. Paris, Museum National d’Histoire Naturelle
  10. ^ "Carnivoran evolution. New views on phylogeny, form and function".
  11. ^ Heinrich, R.E.; Strait, S.G.; Houde, P. (January 2008). "Earliest Eocene Miacidae (Mammalia: Carnivora) from northwestern Wyoming". Journal of Paleontology. 82 (1): 154–162.
  12. ^ "Pattern and timing of diversification of the mammalian order Carnivora inferred from multiple nuclear gene sequences".
  13. ^ Dogs: Their Fossil Relatives and Evolutionary History. New York: Columbia University Press. pp. 1–232
  14. ^ "The Carnivores".
  15. ^ Linnaeus, C. (1758). Sistema naturae per regna tria Naturae, secundum classes, ordines, genera, species, cum characteribus differentiis, synonimis locis. Tomus I. Impensis direct. Laurentii Salvii, Holmia. pp. 20–32.
  16. ^ 2] Bowditch, T. E. 1821. An analysis of the natural classifications of Mammalia for the use of students and travelers J. Smith Paris. 115. (refer pages 24, 33)
  17. ^ a b Simpson, G.G. (1945). "The principles of classification and a classification of mammals". Bulletin of the AMNH. 85: 1–350.
  18. ^ Arnason, U.; Gullberg, A.; Janke, A.; Kullberg, M. (2007). "Mitogenomic analyses of caniform relationships". Molecular Phylogenetics and Evolution. 45 (3): 863–74.
  19. ^ Lento, G. M.; Hickson, R. E.; Chambers, G. K.; Penny, D. (1995). "Use of spectral analysis to test hypotheses on the origin of pinnipeds". Molecular Biology and Evolution. 12 (1): 28–52
  20. ^ {{مرجع ويب | url = https://archive.org/details/cbarchive_36692_basicranialevidenceforursidaff1990/page/n1/mode/1up | title = "Basicranial evidence for ursid affinity of the oldest
  21. ^ {{مرجع ويب | url = https://www.ncbi.nlm.nih.gov/pmc/articles/PMC2245807/ | title = "Phylogeny and divergence of the pinnipeds (Carnivora: Mammalia) assessed using a multigene dataset"
  22. ^ Sato, J. J.; Wolsan, M.; Suzuki, H.; Hosoda, T.; Yamaguchi, Y.; Hiyama, K.; Kobayashi, M.; Minami, S. (2006). "Evidence from nuclear DNA sequences sheds light on the phylogenetic relationships of Pinnipedia: Single origin with affinity to Musteloidea". Zoological Science. 23 (2): 125–46.
  23. ^ {{مرجع ويب | url = https://academic.oup.com/sysbio/article/54/2/317/2842927?login=false | title = "Molecular phylogeny of the Carnivora (Mammalia): Assessing the impact of increased sampling on resolving enigmatic relationships".
  24. ^ Anne D. Yoder and John J. Flynn 2003: Origin of Malagasy Carnivora.
  25. ^ Philippe Gaubert, W. Chris Wozencraft, Pedro Cordeiro-Estrela and Géraldine Veron. 2005 – Mosaics of Convergences and Noise in Morphological Phylogenies: What's in a Viverrid-Like Carnivoran?
  26. ^ {{مرجع ويب | url = https://www.ncbi.nlm.nih.gov/pmc/articles/PMC7034395/ | title = "Pattern and timing of diversification of the mammalian order Carnivora inferred from multiple nuclear gene sequences". 56 (1): 49-63
  27. ^ Gaubert, P. (2009). "Family Prionodontidae (Linsangs)". In Wilson, D.E.; Mittermeier, R.A. (eds.). Handbook of the Mammals of the World – Volume 1. Barcelona: Lynx Ediciones. pp. 170–173.
  28. ^ Salesa, M.; M. Antón; S. Peigné; J. Morales (2006). "Evidence of a false thumb in a fossil carnivore clarifies the evolution of pandas". Proceedings of the National Academy of Sciences. 103 (2): 379–382.
  29. ^ Yu, Li; Li, Yi-Wei; Ryder, Oliver A.; Zhang, Ya-Ping (2007). "Analysis of complete mitochondrial genome sequences increases phylogenetic resolution of bears (Ursidae), a mammalian family that experienced rapid speciation". BMC Evolutionary Biology. 7 (198): 198.
  30. ^ {{مرجع ويب | url = https://www.ncbi.nlm.nih.gov/pmc/articles/PMC2518930/ | title = "Mitochondrial genomes reveal an explosive radiation of extinct and extant bears near the Miocene-Pliocene boundary".
  31. ^ a b Mehta, R. S.; Slater, G. J.; Law, C. J. (2018). "Lineage Diversity and Size Disparity in Musteloidea: Testing Patterns of Adaptive Radiation Using Molecular and Fossil-Based Methods". Systematic Biology. 67 (1): 127–144.
  32. ^ Koepfli KP, Deere KA, Slater GJ, et al. (2008). "Multigene phylogeny of the Mustelidae: Resolving relationships, tempo and biogeographic history of a mammalian adaptive radiation". BMC Biol. 6: 4–5
  33. ^ a b c d Nowak, R. M. (2005). Walker's Carnivores of the World. Baltimore, Maryland: Johns Hopkins University Press. pp. 1–328.
  34. ^ a b c d Vaughan, T. A.; Ryan, J. M.; Czaplewski, N. J. (2013). Mammalogy. Burlington, Massachusetts: Jones & Bartlett Learning. pp. 1–750.
  35. ^ Encyclopedia of Animal Behaviour. Vol. 2. Academic Press. 21 January 2019. p. 7.
  36. ^ Gittleman, J. L.; Valkenburgh, B. Van (May 1997). "Sexual dimorphism in the canines and skulls of carnivores: effects of size, phylogency, and behavioural ecology". Journal of Zoology. 242 (1): 97–117
  37. ^ Sylvia Brunner, Michael M Bryden, Peter D. Shaughnessy (September 2004). "Cranial ontogeny of otariid seals". Systematics and Biodiversity. 2 (1): 83–110.
مرجّعة من "https://ary.wikipedia.org/w/index.php?title=كارنيڤورات&oldid=369086"