ببر
ببر
| ||
| ||
| معلومات عامة | ||
| سمية لعيلمية | Panthera tigris (كارولوس لينيوس، 1758) | |
| لخاصية د ترتاب | نوع | |
| تابع ل | پانطيرا | |
| حالة د لحماية | ||
| لعيشة | ||
| لمودة د لعيشة | حتال 26.3 عام | |
| كايعيش ف | غابة | |
| وقيتة لعيشة | ليلي | |
| لمناسلة | ||
| شحال كايولد ف دقّة | 2.5 | |
| خصايصو | ||
| لكتلة | 1.19 (وزن الولادة) | |
| صوت لي كايدير | زئير | |
| الجهد دلعضة | 127 | |
| كاياكل | حافريات، سعدان، تدرجية، أرنبيات و حوت | |
| لخاريطة ديال فين عايش لكائن | ||
| ||
| معلومات خرين | ||
| رمز ديال ليونيكود | 🐅، 🐯 | |
ببر (سمية علمية: panthera tigris، پانطيرا تيݣريس) هو عضو ف ݣنس پانطيرا و أكبر نوع د لقط باقي عايش، مستوطن أصلي ف آسيا. عندو كسدة مجهدة و عضلية ب راس كبير و مخالب كبار، زنطيط طويل و فرو ليموني ب خطوط كوحل و شبه عموديين. لببر مقسم ب شكل تقليدي ل تسعود النوييعات، وخا شي وحدين كايعتارفو غير ب جوج نوييعات، ببور آسيا لقارة و ببور لݣزيرة د ݣزاير السوندا.
على طول لمادى ديالو، لببر كايسكن ب شكل ساسي ف لغابات، من غابات الصنوبر و لغابات لمعتادلين عراض لوراق و لمخلطين ف الشرق الروسي لبعيد و شمال شرق الشينوا ل لغابات الستيوائيين و الشبه ستيوائيين لفازݣين عراض لوراق ف شبه لقارة لهندية و جنوب شرق آسيا. لببر كايتعتابر مفتارس لولاني و كايفرس ب شكل ساسي لحوافر، لي كايطيحهوم ب لمكيدة. كايعيش ف لغالب حياة خلوية و كايبقى ف لمادى لمملوك ديالو، ب الدفاع على هادشي من لفراد من نفس الجنس. لمادى د دكر لببر كايتلاقى معا لمادى ديال بزاف د النتوات، النتوات كايولدو ف لعادة جوج ولا تلاتة د لبيبرات لي كايبقاو معا مهوم شي عاماين، منين كايوليو مستاقلين، كايخليو لمادى لمملوك د مهوم و كايديرو الساس ل لمادى ديالهوم.
من لبدية د لقرن 20، نسمات لببر خسرو عل آقل 93٪ من لمادى التاريخي ديالهوم و دابا منقارضين ف غرب و وسط آسيا، ف بلايص كبار ف الشينوا و ف ݣزاير جاڤا و بالي. ليوما، لمادى د لببر مقسم ب شكل شديد. هاد النوع مليستي مهدد ف الليستا لحمرا د التيحاد الدولي ل لمحافضة على الطبيعة، ف لوقيتة لي لمادى ديالهوم تكمش ب 53٪ حتى ل 68٪ من اللواخر د عوام ل 1990.
التهديدات لكبار على لببر هوما تخراب و تقسام لموايل ب سباب تقطاع لغابة، الصيادة اللاقانونية د لفرو و التجارة اللاقانونية د طراف لكسدة ل غراض طبيين. لببور عاوتاني ضحايا د الصراع د بنادم معا لبريّة ماحدهوم كايهجمو و كايفرسو لكسيبة ف بلايص فين لفرايس لبريين نادرين. لببر محمي ب شكل قانوني ف ݣاع لبلدان د لمادى نتاعو، ليجراءات د لمحافضة على الطبيعة مكوْنين من بلانات فعليين، حملات ضد الصيادة اللاقانونية و منهاجيات باش يحضيو النسمات د لببر. ف بزاف د لبلدان لي داخلين ف لمادى د لببر، لپّاسّاجات لبرّيين تبناو و لمعاودة د تدخال لببور تخطط ليها.
لببر واحد من أكتر لحيوانات لكبار لكاريزميين ف الشعبية. حطوه كاپتيڤ من الزمانات لقدام و روضوه باش يخدم ف السيرك و السپيكطاكلات د الترفيه لخرين. لببر بان ب شكل بارز ف لميطولوجيا و لفولكلورات لقدام د التقافات على طول لمادى التاريخي ديالو و باقي كايبان ف التقافة ف لعالم كامل.
ف 1758، كارل لينيوس وصف لببر ف لعمل ديالو النضام الطبيعي (Systema Naturae) و عطاه السمية لعلمية فيليس تيݣريس(Felis tigris)، حيت ݣنس فيليس كان كايتخدم ل ݣاع لقطوط ف ديك لوقيتة. لوصف لعلمي ديالو تبازا على لوصايف د عولاما الطبيعة لي قبل منو بحال كونراد ݣيسنير و أوليس آلضروڤاندي. ف 1929، ريدجنلد إينيس پوكوك بلاصا النوع ف ݣنس پانطيرا ب تخدام السمية لعلمية پانطيرا تيݣريس(Panthera tigris).
تسعود د النوييعات د لببر تقتارحو بينات لبدية د لقرن 19 و لبدية د لقرن 21، لي هوما لببر لبينݣالي، لمالاي، لاندوشينوي، الجنوب شينوي، السيبيري، لقزويني، الجاڤي، و ديال بالي و سومطرة. الشرعية د بزاف النواع التحتانيين د لببر تشكك فيها ف 1999 حيت جل النوييعات لمفتارضين تفرزو على ساس طول لفرو و التلوينة، نماك لخطوط و قد لكسدة د عيينات ف كوليكسيوات د متحف التاريخ الطبيعي لي ماشي ب الضارورة مومتيلين ل النسمات كلهوم. تقتارح باش يتعتارف غير ب جوج نوييعات د لببور شرعيين، لي هوما، پ. ت. تيݣريس لي ف آسيا لقارة و پ. ت. سوندايكا لي ف ݣزاير السوندا لكبيرة.
هاد لقتيراح د الجوج نوييعات توكّد ف 2015 ب مقاربة كاملة ديال لمورفولوجية، لإيكولوجية، خصايل لا دي إن لميطوكوندري (mtDNA) د ݣاع نوييعات لببور لمفتارضين. ف 2017، قوات لمعاونين ديال كلاصاج لقطوط د التيحاد الدولي ل لمحافضة على الطبيعة عاودو لمراجعة د الطاكسونوميا ب التيفاق معا لقتيراح د الجوج نوييعات و عتارفو غير ب پ. ت. تيݣريس و پ. ت. سوندايكا. لحاصول ديال واحد الديراسة ف 2018 ديال تتابوعية د الجينوم كامل من 32 عيينة د ستة د نوييعات مفتارضين عايشين د لببر–لبينݣالي، لمالاي، لاندوشينوي، الجنوب شينوي، السيبيري، و السومطري–لقاتهوم مفرّزين و ف تقسيمات مبدلين. هاد النتائيج توكدات ف 2021 و 2023. ݣروپ لمختصين ف لقطوط قالو بلي "يلا خدينا ف لبال التفسيرات لمنوعين د الضونيات، طاكسونوميا د النوييعات د هاد النوع، دابايا كاينين تحت لمراجعة عند ݣروپ لمختصين ف لقطوط ف التيحاد الدولي ل لمحافضة على الطبيعة".
الليستة الجاية تبازات على لكلاصاج د لببور ف 2005، و كاتوري عاوتاني لكلاصاج لمعتارف بيه من قوات لمعاونين ديال كلاصاج لقطوط ف 2017.
- پانطيرا تيݣريس تيݣريس
- ببر بينݣالي : هاد النسمة كاتسكن ف شبه لقارة لهندية. لببر لبينݣالي عندو فرو قصر على لببور لي لفوق ف الشمال، ب تلوينة ليمونية فاتحة حتى ل ليمونية حمرا، و قنانف طوْل و ضيْق.
- ببر قزوين (منقارض) : هاد النسمة كانت موجودة من تركيا حتى ل الجوانب د بحر قزوين. كانت عندها فرو حمر مصدي ضاوي ب خطوط قراب من بعضياتهم و غاديين ل لقهوي، و عضم قلقولي (Occipital bone) عرض. التحاليل الجينية ورقات بلي هاد النوييع من لببور مرتابط ب شكل قريب ل ببر السيبيري. هاد النوييع منقارض من عوام ل 1970.
- ببر سيبيري : هاد النسمة كاتعيش ف الشرق الروسي لبعيد، شمال شرق الشينوا، و واقيلا كوريا الشمالية. لببر السيبيري عندو شعر طويل و فرو عامر. اللون ديالو كايتنوع ب شكل عريض من الصفر ف الشتا ل حمر ضاوي من مور تبدال لفرو. الجمجومة قصر و عرْض على الجماجم د لببور لتحت ف الجنوب.
- ببر جنوب شينوي : هاد لببر عاش ب شكل تاريخي ف لوسط الجنوبي د الشينوا. الجماجم ديال لخمسة نواع من لعيينات كانو عندهوم سنان لحايميين و ضراس قصر على لببور د لهند، صندوق لمخ صغر، التقبات د لعين (Orbits) محطوطين قراب ل بعضياتهم و ب حواشي لما برا عضم لعين (Postorbital processes) كبر؛ الجلود كانو عندو صوفر ب خطوط على شكل معيّن. هاد النوييع عندو هاپلوتيپ ظ لآ دي إن لميطوكوندري أونيك ب سباب لمجاوجة معا نسولا قدام د لببور. هاد نوييع منقارض ف لبريّة مادام ما كونفيرما لوجود ديالو من عوام 1970، و باقي عايش غير ف لكاپتيڤات.
- ببر إندوشينوي : هاد النسمة من لببور كاينة ف شبه لݣزيرة لإندوشينوية. لعيينات د لببر لإندوشينوي عندهوم صندوق لمخ صغر عل لببور لبينݣاليين و كايبان بلي عندهوم فرو غلْق ب خطوط رق.
- ببر ماليزي : لببر لماليزي تقتارح كا نوييع مفرّز على حساب التتابوعية ديال لآ دي إن لميطوكوندري و لميكروساطيليطات لي مبدلة على لببر لإندوشينوي. مامبدلش ب شكل زايد ف لون لفرو ولا لقد د الجمجومة. ماكاينش حتى باريير جغرافية بينات نسمات لببور ف شمال ماليزيا و جنوب الطايلاند.
- پانطيرا تيݣريس سوندايكا
- ببر جاڤي : هاد لببر توصف على حساب واحد لعدد ماشي دقيق د الجلود ب شعر رطب و قصير. لببور من جاڤا كانو صغار ب لموقارنة معا لببور د آسيا لقارة، كانت عندهوم جمجومة مطولة ب لموقارنة معا ببر سومطرة، و خطوط رق، طوْل، و كتر ف لعدد. لببر الجاڤي كايتشاف بلي نقارض ف عوام 1980.
- ببر بالي (منقارض) : هاد لببر كان موجود ف بالي و كان عندو فرو ضاوي كتر و جمجومة صغر من لببر الجاڤي. واحد لخصلة نوعية ف الجماجم د ببور بالي هي لعضم لقلقولي الضيق، لي كتيشبه ل جمجومة ببر جاڤا. هاد لببر نقارض ف عوام 1940.
- ببر سومطري : هاد لعيينة النوعية من سومطرة عندها فرو غالق. ببر سومطرة ب الضبط عندو شعر طول ف جناب لوجه، خطوط لكسدة غلاض و عضم نيفي عرض و صغر من ببور لݣزيرة لخرين.
لببر كايتشارك ݣنس پانطيرا معا السبع، النمر، الجاݣوار، و نمر التلج. لحاصول د تحاليل جينية كاتعطي بلي لببر و نمر التلج هوما نواع خوت لي النسولا دياولهوم تفرقو على بعضياتهم بينات 2.70 و 3.70 مليون عام هادي. التتابوعية لكاملة د جينوم لببر ورات تتابوعيات معاودين لي موازيين معا هادوك لي عند جينومات لقطوط لخرين.
النوع لفوصيلي پانطيرا پالييوسينينسيس من بدية ليپوك د پلايسطوسين ف شمال الشينوا توصف ب صيفتو جد محتامل د لببر ف لوقيتة لي كتاشفوه ف 1924، و لايني لكلاديستيكيات لعصريين بلاصاوه كا نوع بيدائي ف ݣنس پانطيرا لعصري. غير هو، من 2023، عل آقل جوج ديراسات متابعين عتابرو پ. زدانسكيي ف لغالب سينونيم ديال پ. پاليوسينينسيس، معا لخودان ف لبال التبدالات لمقتارحين د هاد النوع كانو ف وسط لمادى د التنواع د لفراد. التبيانات اللولانيين د نواع لببر ف التسجال لفوصيلي كانو واحد التقسامات د لفك من لانشيان ف الشينوا لي التاريخ ديالهوم كان ف لبدية د لبلايسطوسين.
من لوسط حتى ل اللخر د لپلايسطوسين، لفوصيلات د لببر تلقاو على طول الشينوا، سومطرة، و جاڤا. النوييعات لماقبل تاريخية بحال پانطيرا تيݣريس ترينيلينسيس و پ. ت. سولوينسيس د جاڤا و سومطرة، و پ. ت. آكوتيدينس د الشينوا؛ ف اللخر د لپلايسطوسين و لبدية د لهولوسين حتى هو تلقى ف بورنييو و پالاوان، لفيليپين. عيينات فوصيلية د ببور تريپورطاو حتى هوما من لوسط حتى ل اللخر د لپلايسطوسين ف الجاپون. لحاصول د تحاليل فيلوجغرافية كايعطي بلي ݣاع لببور لي باقيين عايشين عندهوم جد مشروك لي عاش ما بين 108,000 و 72,000 عام هادي. الديراسات الجينية كاتعطي بلي النسمة د لببر تكمشات هادي 115,000 عام هادي تقريباً ب سباب التجماد. النسمات لعصريين د لببر تأصلو من واحد لموؤل عاتق (Refugium) ف إندوشين و تفرقو على طول آسيا مورا لآوج الجليدي اللخر (Last glacial maximum). و غير ستعمرو شمال شرق الشينوا، الجدود د ببر جنوب الشينوا تكروزو معا واحد النسمة د لببور قلال.
لببور كايقدرو يتجاوجو معا قطوط خرين من ݣنس پانطيرا، و فايت ليهوم داروها ف لكاپتيڤيطي. الليݣور هو التفريخة ديال نتوا د لببر و دكر د السبع و التيݣون هو التفريخة ديال دكر د لببر و نتوا د السبع. لبو (parent) لي هو السبع كايدوّز واحد الجين كايحفّز النمو، و لاكين الجين لمطابق لي كايلبّد النمو (inhibit) من النتوا د لببر لي هي لم غايب، و هادشي لي كايخلي اللياݣر يكبرو ل قد كبر من النواع د والديهوم ب جوج. و على لعكس، دكر لببر ما كايدوّزش الجين لي كايحفّز النمو ف لوقيتة لي السبعة كاتدوّز الجين لي كايلبّد النمو؛ و عليها، التيݣونات كايكونو ف نفس لقد د والديهوم تقريباً. لمجاوجة د هاد التكرويزات من عند بنادم كاتشاف لاخلاقية، مادام هاد التكرويزات كايطوورو ف لغالب عيوب خلوقية لي كاتهدد حياتهوم و كايقدرو ب سهولة يوليو سمان.
لببر عندو مورفولوجية نوعية ديال السنوريات، ب كسدة عضلية، سيقان مقصرين (Shortened)، طراف قداميين مجهدين ب مخالب قداميين عراض، راس كبير و زنطيط لي تقريباً النص د الطولة د لباقي ف كسدتو. عندو خمسة الصبعان، ب لحساب د لمخلب الرطب (Dewclaw) ف الرجلين لقداميين، و ربعة الصبعان ف الرجلين اللورانيين، كاملين بيهوم عندهوم مخالب كايتطواو لي مضغوطين و مقوسين، و يقدرو يوصلو ل 10 سونتيميطر ف الطول. لودنين ضايرين و لعينين فيهوم مومّو ضاير. لقنوفة كاتسالي ب قمقومة مسكية (Pink) و متلتة ب نقيطات كحلين، لي كايتزادو معا لعمر. جمجومة لببر صليبة، ب موضع قدامي (Front region) مزيّر، و ب تقبات د لعين ببضاويين، عضم نيفي طويل و صندوق لمخ مطوّل ب عرف سهمي كبير. جمجومتو كاتشبه ل لي عند السبع، و لايني مبدلة عليها ف الشكل لمبوّط (concave) ولا لمسطح ف الجنب التحتاني د لفك التحتاني و ف نيفو الطويل. لببر عندو 30 سنّة لي مجهدين بشكل مساوي و ب شي طريقة النياب عندو مقوسين و هوما الطوال ف فاميلة لقطوط ب 6.4–7.6 سونتيميطر.
لببر عندو طول الراس و لكسدة من 1.4–2.8 ميطرو ب 0.6–1.1 ميطرو ف الزنطيط و 0.8–1.1 ميطرو ف لعلو حتى ل لكتاف. لببور لبينݣاليين و السيبيريين هوما لكبر. دكور لببور لبينݣاليين كايوزنو 200–260 و النتوات كايوزنو كايوزنو 100–160 كيلوݣرام؛ ببور لݣزاير هوما الصغر، غالباً ب سباب التقزام لݣزيري (Insular dwarfism). دكور لببور السومطرية كايوزنو 100–140 كيلو ، و النتوات كايوزنو 75–110 كيلو. لببر كايتشاف ب شكل شعبي بلي هو أكبر نوع سنوري عايش ف لقد؛ و لاكين ماحد النوييعات لمبدلين و النسمات د لببور كايتنوّعو ب زايد ف لقد و التقل، لمتوسط ديال لقد د لببر يقدر يكون قل من ديال السبوعا، ف لوقيتة لي لببور لكبار ف لقد كايكونو كبر من النوييعات لكبار ف لقد د السبع.
فرو لببر ف لعادة فيه زغب قصير، كايوصل حتى ل 35 ميليميميطر، وخا الزغب د لببور السيبيريين لي عايشين ف الشمال يقدر يوصل حتى ل 105 ميليميطر. زغب لكرش كايميل باش يكون طوْل على زغب الضهر. لعمورية د فروهوم ف لعادة رفيقة، وخا لببر السيبيري طوور ب الضبط فرو شتوي غليض. لببر عندو خطوط من لفرو ضايرين ب وجهو و شوارب (Whiskers) طوال، ب لآخص ف الدكور. و عندو تلوينة ليمونية لي كاتنوّع من الصفورية ل لحمورية. لفرو لبيض كايغطي الجناب التحتانيين، من الراس ل الزنطيط، و ف السورفاص الدخلانية د السيقان و ف شي بلايص ف لوجه. عندهوم جلخة بيضة بارزة ف اللور د لودنين، لي ضايرة ب لكحل. لببر معلوم ب خطوط مفرّزين كوحل ولا قهويين، لي شادين واحد النمط أونيك عند كل فرد. لخطوط عموديين ف لغالب، و لاكين دوك لي ف الطراف لقداميين و الجبهة كايكونو أفوقيين. هاد لخطوط مركزين بزاف ف جيهة الضهر و دوك لي ف الجدع يقدرو يوصلو ل تحت لكرش. لقمقومات د لخطوط ب شكل عام ماضيين و شي وحدين يقدرو يتفرقو ولا يتفرقو و يتلاصقو عاوتاني. خطوط الزنطيط كايكونو شراطي غلاض و فيهوم واحد لقمقومة كحلة لي كاتساليهوم.
لببر واحد من نواع لقطوط لقلال لي مخططين. لخطوط كايكونو آڤونطاج ف لكاموفلاج وسط النبات ب نماط عموديين د الضو و الضل، بحال الشجر، لقصب، و الربيع الطويل. هادشي مدعوم من واحد الديراسة لي خدمات التحليل د فوغيِي (Fourrier analysis) و لي ورات بلي النماط د لخطوط كاتواتى معا لبيئة ديالهوم. اللون الليموني يقدر حتى هو يعاون التخبية، حيت لفريسة د لببر عندها عمى اللوان و يمكن كاتشوف لببر ب لخضر لي كايتخلط مزيان معا النبات.
التنواعات التلاتة د اللون ديال لببور لبينݣاليين – ب لبيض التلجي بلا خطوط تقريباً، لبيض، و الدهبي – لي دابا ما تقشعش بلي موجود ف لبريّة ب سباب النقصان ف نسمات لببور لبريّين و لايني باقيين ف النسمات لكاپتيڤ. لببر لبيض عندو لون لخلفية بيض ب خطوط قهويين سيپيا. لببر الدهبي كايكون ف اللون الدهبي لباهت ب خطوط قهويين غاديين ل لحمورية. لببر لبيض تلجي هو نمط اللون ب خطوط باهتين ب الجهد و ب زنطيط ب حلاقي قهويين سيپيا باهتين. نماط اللون لبيضين و الدهبيين هوما لحاصول د لخصلة لأوطزومية لمنحية (Autosomal recessive trait) ب موضع صبغي بيض و موضع صبغي عريض النطاق ب شكل تتابوعي. التنويعة لبيضة تلجية سبابها جينات معددة ب مواضع بويض و مواضيع عراض النطاق. لملاقية د لببور لبويض كاتنوض لفتنة، حيتاش ما عندهوم حتى نفع ف لمحافضة. غير 0.001٪ د لببور لبريين عندهوم الجينات ديال هاد النمط اللوني و التمتيلية لفايتة لقياس د لببور لبريّين ف لكاپتيڤيطي هي لحاصول د لمجاوجة الدخلانية. عليها، التكمال ف لملاقية غايريسكي ب التدرديب د لمجاوجة الدخلانية (Inbreeding depression) و لخسران ديال التنواع الجيني ف لببور لكاپتيڤ.
فايت تشجلو ببور شبه ميلانيين (Pseudo-melanistic) ب خطوط غلاض و ممزوجين ف لپارك لوطني سيمليپال و ف التلاتة د حدايق لحيوان ف لهند؛ التحليل الجيني د واحد النسمة د لببر لهندي ورّق بلي هاد لفينوتيپ سبابها طفرة د الجين ديال لپروتين لعابر لغشا (transmembrane aminopeptidase). 37٪ ف لببور د سيمليپال تقريباً عندهوم هاد لخصلة، لي ربطوها ب النعيزال الجيني.
لببر كان عندو مادى تاريخي من شرق تركيا، شمال إيران و آفغانيستان ل آسيا لوسطى و من شمال پاكيستان على طول شبه لقارة لهندية و لاندوشين ل جنوب شرق سيبيريا، سومطرة، جاڤا، و بالي. و على حساب 2022، هاد النوع كايسكن ف قل من 7٪ من لمادى التاريخي ديالو و ولى عندو مادى مشتت ف شبه لقارة لهندية، شبه لقارة لاندوشينيوية، سومطرة، شمال شرق الشينوا و الشرق لبعيد الروسي. و على حساب 2020، لهند عندها أكبر عدد من لموايل د ببور لعالم ب 300,502 كيلوميطر مربع، تابعاها روسيا ب 195,819 كيلوميطر مربع.
لببر كايسكن ب الساس ف لموايل لغابية و دغيا كايتآضاپطا. التشجالات ف آسيا لوسطى كاتعطي بلي كان كايسكن ب شكل لولاني غابات التوݣاي لوديانية و لغابات لحادرين و لي فيهم لكديات ف لقوقاز. منطاقة آمور-أوسوري ف روسيا و الشينوا، كايسكن ف غابات الصنوبر لكورية و لغابات لمعتادلين عراض و مخلطين لوراق؛ لغابات لوديانية كايخدمو كا كولوارات د التفراق، كايمدو لماكلة و لما ل لببور و لحوافر ب جوج. ف شبه لقارة لهندية، كايسكن ب شكل ساسي ف لغابات الستيوائيين و شبه ستيوائيين عراض و فازݣين لوراق، لغابات لمعتادلين عراض و مخلطين لوراق، لغابات الستيوائيين لفازݣين دايمين لخضورة، لغابات الستيوائيين الناشفين، السهول الرسوبيين و غابات لمانݣروڤ ديال السونضاربانس. ف شرق لهيمالايا، فايت توتق ف غابة معتادلة ف علو واصل حتى ل 4,200 ميطرو ف بوطان، ف 3,630 ميطرو ف سهول ميشمي و ف 3,139 ميطرو ف بلدية ميضوݣ، ف جنوب شرق التيبيت. ف الطايلاند، كايعيش ف لغابات طياحة لوراق و دايمين لخضورة. ف سومطرة، كايسكن ف لغابات لݣلتيين لحادرين د لخت و ف لغابات الجبليين لوعرين.
كاميرات لمكيدة ف لوقيتة د 2010–2015 ف لغابة الصنوبرية الشبه الستيوائية و الطياحة لوراق ديال محمية دجيم كوربيت ف شمال لهند، وراو واحد لكتافة د نسمة لببور تابتة د 12–17 فرد ف كل 100 كيلوميطر مربع ف نطاق ديال 521 كيلوميطر مربع. ف شمال ميانمار، لكتافة السكانية ف واحد النطاق عيينة ديال 3,250 كيلوميطر مربع ف واحد لموزاييك ديال لغابة الستيوائية عريضة لوراق و أرض ربيعية، تقدرات ب 0.21–0.44 ببر ف كل 100 كيلوميطر مربع على حساب 2009. لكتافة السكانية ف لغابات لمخلطين طياحين لوراق و لغابات النص دايمين ف لخضورة ف لخيرية لبريّة هواي كا كين تقدرات ب 2.01 ببور ف كل 100 كيلوميطر مربع؛ ف وقيتة د عوام ل 1970 و ل 1980، قطيع الشجر و الصيادة اللاقانونية كانت كاتطرا ف لپاركات لوطنيين ميي وونݣ و كلون لان لي حدا لخيرية، فين لكتافة السكانية نقصات ب زايد، و تقدرات ب غير 0.359 ببر ف كل 100 كيلوميطر مربع على حساب 2016. لكتافة السكانية د لببور ف لغابات الجبليين و ف نباتات مجنحية التمار ف شمال ماليزيا تقدرات ب 1.47–2.43 ببر بالغ ف كل 100 كيلوميطر مربع ف لپارك لملكي بيلوم، و لاكين كانو غير 0.3–0.92 ببر بالغ الريزيرڤ لغابية طيمينݣور لي مامحمياش و فيها قطيع الشجر ب لعزيلة.
الضوني ديال كاميرات لمكيدة وراو بلي لببور لي ف لمحمية لوطنية تشيطوان تجنبو لبلايص لي كايجيو ليهوم الناس و كانو آكتيڤ كتر ف الليل على النهار. ف لمحمية لوطنية سونضاربانس، ستة لببور لمسلسلين ب الجي پي إس كانو آكتيڤ كتر من لفجر حتى الصباح بكري و وصلو ل الدروة نتاع نشاطهوم ف جوايه 7:00 د الصباح. واحد لكاميرا د لمكيدة كاتشجل تلت سنين ف لمحمية لوطنية شوكلافانطا ورات بلي لببور كانو آكتيڤ كتر من لغسق حتى ل نصاصة الليل. ف شمال شرق الشينوا، لببور كانو شفقيين و آكتيڤ ف الليل ب نشاط كاتوصل دروْتو ف لفجر و لغسق؛ كانو آكتيڤ ب شكل كبير ف نفس لوقت معا لفريسة.
لببر عوّام مجهد و دغيا كايقطع وديان يقدر يوصل عرضهوم حتى ل 8 كيلوميطر؛ كايغطس ف لما، ب الضبط ف يامات الصهد. ب شكل عام، هو عندو قدرة قل ف تشعبيط الشجر على بزاف د لقطوط خرين ب سباب قدّو، و لايني لبيبرات (صغار لببر) قل من 16 الشهر يمكن ليهوم يتشعبطو ب شكل روتيني. واحد لبالغ فايت تشجل كايتشعبط واحد الشجرة لپيپال ملسة و وصل حتى ل 10 ميطرو.
لببور لبالغين كايعيشو حياة خلوية (وحدانية) ب شكل كبير وسط لمادى و النطاق ديالهوم، لقد ديالهوم كايعول ب شكل ساسي على كترة لفرايس، لمنطاقة الجغرافية و الجنس د لفرد. الدكور و النتوات كايدافعو على لمادى ديالهوم من دوك لببور من نفس الجنس و لمادى لمملوك ديال الدكر كايتداخل معا لمادى ديال بزاف د النتوات. جوج نتوات ف سونضاربانس كان عندهوم مادى ديال 10.6 و 14.1 كيلوميطر مربع. ف الريزيرڤ پانا ديال لببور، لمادى لمملوك ديال خمسة المتوات لي عاودو دخلوهوم تنوّع من 53–46 كم مربع ف الشتا ل 55–60 كم مربع ف الصيف و ل 46–94 كم مربع ف لوقيتة د الريح لموسمية (Monsoon)؛ تلاتة الدكور كان عندهوم مادى كبير 84–147 كم مربع ف الشتا، 82–98 كم مربع ف الصيف، و 81–118 كم مربع ف وقيت الريح لموسمية. ف الريزيرڤ لبيوسفير سيخوط آلين، كان لمادى لمملوك ديال 14 النتوا 248–520 كم مربع و كان لمادى خمسة الدكور الساكنين 847–1923 كم مربع لي كان كايتداخل معا دوك داك ديال خمسة النتوات. منين كايكون عند لببرات لي من نفس الريزيرڤ بيبرات حتى ربع شهور ف لعمر، كايبداو ينقصو لمادى لمملوك ديالهوم باش يبقاو حدا ولادهوم و ب شوية ب شوية كايبداو يكبروه حتى كايقفلو ولادهوم 13–18 الشهر ف لعمر.
لببر من النواع لي عندهوم مادى طويل و لفراد كايتفرقو ف بعاد لي يقدرو يوصلو ل 650 كم كيلوميطر باش يوصل ل نسمات لببور لي ف لبلايص لخرين. لببرات الشابات كايديرو الساس ل لمادى ديالهوم لأول مرة حدا ماواتهوم ف لوقيتة لي الدكور كايسافرو بعد من النتوات خوتهوم. ربعة النتوات لمسنسلين ب الجي پي إس ف تشيطوان تفرّقو بينات 0 و 43.2 كيلوميطر و 26.8 و 10 الدكور بينات 9.5 و 65.7 كم.
الدكر التحت بالغ كايعيش غير دايز ف لمادى لمملوك د شي ببر دكر آخر حتى يكبر و يولي صحيح ب شكل كافي باش يتحدى الدكر لي ساكن. لببور كايعلمو لمادى لمملوك ديالهوم ب رشان لبول ف النبات و الصخر، خبيش ولا فريك الريحة على الشجر و ب تعلام الطراجيات ب لخرا، ب إيفرازات من لغدة الشرجية و ب تكشاط لرض. التعلام ب الريحة كايخلي لفرد عاوتاني ياخد معلومات على شي حد آخر. لمادى لمملوك لي مامحددش، ب الضبط دوك لي ديال شي فراد مييتين، يقدرو يتخادو من بعد يام ولا سيمانات.
دكور لببر ب شكل عام متسامحين ب شكل قل معا الدكور لخرين وسط لمادى لمحلي ديالهوم ب لموقارنة معا النتوات. لمنابزات ف لعادة كايتفكّو غير ب التخويف عوض لمدابزة. غير كاتطبق السيطرة، الدكر يقدر يتسامح معا شي ببور خاضعين وسط لمادى ديالو، مادام ماكايقربوش حداه. لمنابزات لخطيرين ݣاع كايميلو باش يطراو بينات جوج دكور لي منافسين على شي نتوا فيها الدورة لوداقية. وخا لببور كايعيشو بوحدهوم، لعلاقات بينات لفراد يقدرو يكونو معقدين. لببور جتيماعيين ب الضبط ف لقتيلة و دكر لببر شي مرات كايقسم الجيفة معا النتوا و لبييبرات وسط لمادى لمحلي ديالو، و عكس الدكور د السبع، كايخليهوم ياكلو من لفريسة قبل مايسالي منها هو. وخا هاكداك، النتوا كاتكون منرڤزة كتر منين كاتلاقى معا نتوا خرة ف لوقيتة د لقتيلة.
ف لوقيتة د التجماعات لحيبّيين و الترابوط، لببور كايبداو يفركو لكسدات ديالهوم معا بعضياتهوم. تعابير لوجه فيها "تهديد الدفاع"، لي كايشمل وجه مكمش، سنان مكشرين، ودنين راجعين ل اللور، و مومّوات لعين كايبداو يوساعو. الدكور و النتوات ب جوج بيهوم كايوريو واحد الستيجابة د فليمن (flehmen response)، واحد لخصلة لي هي ݣريماص ب شلقومة مقلوبة، كايديروها منين كايشمو شي علمات د الريحة. الدكور حتى هوما كايخدمو لفليمن باش يقلّعو لعلمات لمديورين من لببرات ف لحالة د الدورة لوداقية. لببور كايحركو ودنيهوم باش يوريو الطاشات لبويض، ب الضبط ف لوقيتة د التجماعات لعنيفين بينات لماوات و صغارهوم. كايخدمو عاوتاني زناططهوم باش يلمحو ل لمجاج ديالهوم. منين كايوريو يوريو لمحبّة، الزنطيط كايبدا يقيم و موراها كايتدلى ب شوية ب شوية، ف لوقيتة لي لببر لمنوّي كايطيح زنطيطو ولا كايبدا يطيْشو ل الجناب. منين كايكون مهدن، الزنطيط كايبقى طايح.
لببور ف لعادة سكوتيين و لايني يمكن ليهوم يطلقو بزاف د الصوات. كايبداو يزئرو (Roaring) باش يلمحو ل لحضورهوم ل فراد خرين على بعد كبير. هاد الصوت كايتجهّد من فم محلول و هو كايتسد و يمكن ليه يتسمع حتى ل 3 كم. كايزئرو بزاف د لمرات متابعين و شي ببور خرين كايردّو عليهوم ب نفس الصوت. لببور كايزئرو عاوتاني ف وقيتة لمجاوجة و لم كاتبدا تزئر باش تعيّط على صغارها. منين كايكونو معصبين، لببور كايبداو ينينو (Moaning)، صوت كايشبه ل الزئير ولايني رطب و كايتطلق منين لفم كايكون مسدود شوية. النين يقدر يتسمع حتى ل 400 ميطرو. التجماعات لعنيفين كايجمعو صوات التݣرݣير (Growling)، التخرخير (Snarling) و التهسهيس (Hissing). واحد "الزئير كي لكحّة" ولا "تخرخير كي لكحّة" ب كايتطلق ب شكل مفرݣع من فم محلول و سنان باينين. ف لمواقف لحيبّيين، لببور كايبداو يسيفطو واحد الصوت د الشخير (Snorting) رطب، و ب تردود هابط كايشبه ل صوت تخرخير (Purring) عند لقطوط الصغار. لببرات لماوات كايتواصلو معا صغارهوم ب تزغنين (Grunting)، ف لوقيتة لي لبيبرات كايردّو على مهوم ب لموّا (Miaowing). منين كايخافو، كايبداو يطلقو صوت بحال "هووف". لببور كايبداو يسيفطو صوات كايشبه ل لأيل "پوق" ل سباب مامعروفينش، غالباّ ف لوقيتة د لقتيلة.
لببر حيوان لحايمي و مفتارس لولاني كاياكل ب شكل ساسي لحوافر لموسطة حتى ل كبيرة لقد، ب ميلان ل أيل الصامبار، لواپيتي لمنشوري، أيل لݣلتات، لݣاور و لحلوف لبرّي. كايتفتارض بلي لكترة و تقل لكسدة ديال نواع لفرايس هوما لمعيار الساسي ديال لعزيلة د لببر ل لفرايس، ف لداخل و برا لبلايص لمحميين. كايفرس عاوتاني ب شكل نتيهازي لقرودة، الطواوس و طيور لرض لخرين، النياص، و لحوت. شي هجمات قلال على لفيال لآسياوية و وحيدات لݣرن لهندية حتى هوما تريپورطاو. ف غالبية لخطرات، لببور كايفرسو الصغار الضعاف ݣاع د هاد لحيوانات. شي مرات كايفرسو لكسيبة و لكلاب لي قراب ل لبني. لببور شي مرات كايكونسوميو النبات، لفروي، و لمعادن على ود اللياف الريجيمية و لمكملات.
لببور كايتعلمو الصيادة من ماواتهوم، وخا لقدرة نتاع الصيادة تقدر تكون خلوقية ب شكل جوزئي. ف لعادة كايصيدو ب شكل سبوعي على حساب قد لفريسة، و لايني لماوات كايخصهوم يفرسو كتر من مرة ف السيمانة. لفاميلات كايبداو يصيدو مجموعين منين لبيبرات كايوليو كبار ب شكل كافي. كايقلبو على لفريسة ب تخدام الشوفان و السميع. لببر يمكن ليه عاوتاني يتسنى شي فريسة ف شي حفرة د لما بيدما تجي، ب الضبط ف وقيت يامات الصهد ف الصيف. كايتعتابر مفتارس مكيدة و منين كايقرب ل شي فريسة محتاملة، كايقرّد ب راسو حادر و كايتخبى بين لوراق ولا النبات، و كايقلب بين الزحيف ل لقدّام و لبقو التابت. لببر يقدر ݣاع ينعس و يبقى ف نفس لموضع ل نهار كامل، و هو كايتسنى لفريسة تجي، و كايبدا لهجمة منين لفريسة قريبة ب شكل كافي، ف لعادة 30 ميطرو. يلا لفريسة قشعاتو قبل مايبدا من هاد لبعد، لببر ماكايبقاش تابعها. لببر يقدر يكعّط (Sprinting) ب سرعة 56 كيلوميطر ف الساعة و ينقز ل 10 ميطرو؛ هو ماشي جراي د لمسافات الطوال و كايلاشي الجرية يلا لفريسة سبقاتو ف شي مسافة فلانية.
لببر كايهجم من اللور ولا من الجناب و كايحاول يزعزع توازون لفريسة. كايشقم لفريسة ب طرافو لقداميين، كايبدا يتلوّى و يضور ف لوقيتة منين كايكون كايتعدب باش يجيبها ل لرض. الشدان ف لقرجوطة كايخلي هاد لقط برا الريسك د لݣرون، النياب، و لحوافر. لببور قتالا كايتآضاپطاو و يقدرو يخدّمو ميطودات خرين، بحال تشراݣ لحلق ولا تهراس لعنق. لفرايس لكبار ف لقد يقدرو يتعطبو ب عضان اللور د لعرݣوب (Hock) ديالهوم، هادشي لي كايفرتك ليهوم الطونضو. الضربات د لمخالب لكبار قادرين باش يبوقلو ولا يهرسو جمجومة ݣاموس لما. كايقتلو لفرايس الصغار ب عضة ف اللور د لعنق ولا الراس. كاتفاوت التقديرات ديال موعدال نجاح الصيادة عند لببور من 5٪ ناقصة ل 50٪ زايدة. هوما كايتقتلو ولا كايتبليساو ب لفرايس لخطيرين بحال لݣاور، لكزس و لحلّوف.
لببور ب شكل نوعي كايديو لمقتولة لشي موطع مستور، ف لعادة ل شي موطع نباتي ما بعدش من 183 م، وخا فايت ليهوم تشجلو كايجرّوهوم ل 549 م. هوما صحاح ب شكل كافي باش يجرّو الجيفة د ݣاموس كامل ف لبلوغ ل شي مسافات. كايرتاحو شي شوية قبل مايبداو لماكلة و يمكن ليهوم يكونسوميو حتى ل 50 كيلوݣرام د اللحم ف وجبة وحدة، و لاكين كاياكلو من الجيفة ل بزاف د ليام، و كايخليو الشياطة ل قمّاما.
ف بزاف من لمادى نتاعهوم، لببور كايشركو لموؤل معا النمور و الضولات. ف لعادة هوما كايسيطرو عليهوم ب جوج، وخا ب النسبة ل الضول هادشي كايعوّل على لقد د الرباعة (Pack). التفاعولات بينات التلاتة د لمفتارسين كايجمعو، لݣريساج د لمقتولات و لقتيل الديريكت. الرباعات لكبار ديال الضول يقدرو يقتلو لببور. النمور، الضولات، و لببور بقدرو يتعايشو ب الصيادة د فرايس مبدلين ف لقد. ف محمية ناݣارولي لوطنية، التقل لمتوسط د مقتولات لببر تلقى بلي 91.5 كݣ، ب لموقارنة معا 37.6 كم ل النمورا و 43.4 كݣ ب النسبة ل كلاب الضول. ف محمية كوي بوري لوطنية، من بعد واحد النقصان ف عداد لفرايس، لببور كملو لقتيلة د لفرايس لعزاز عليهوم ف لوقيتة لي النمور و الضولات زادو ف الستيهلاك د لفرايس الصغار.
النمور و الضولات ب جوج بيهوم قادرين يعيشو ف لموؤل د لببر منين كايكونو لماكلة و لغطا النباتي ب كترة. من غير هادشي، كايبانو بلي شايعين ب شكل قل منين لببور كايكونو بزاف. نتيعاش نسمة لببور ف محمية راجاجي لوطنية ف وقيت عوام 2000 ودى ل نقصان ف لكتافة د نسمة النمور. و كيف هادشي، لقد د رباعات الضول لي كاينين ف جوج مواطع وسط لهند تربطو ب شكل سلبي معا لكتافات د لببور. توزيع النمور و الضولات ف كوري بوري تربطو ب لوصولية ل لفريسة و الندرة د لببور. ف محمية جيݣمي ضورجي لوطنية، لببور تلقاو بلي كايسكنو الطراف لغارقين من لغابة ف لوقيتة لي لمفتارسين الصغار تدفعو قراب ل لحواشي د لغابة.
لببر ب شكل عام كايتجاوج لعام كامل، ب لآخص بين نونبر و أبريل. ببرة كاتكون ف حالة د الدورة لوداقية من تلت حتى ل ست يام من وقيتة ل وقيتة، مفروقين ب تلاتة حتى تسعود السيمانات د لفواصل لوقتيين. دكر ساكن كايتجاوج معا ݣاع النتوات لي وسط لمادى لمحلي ديالو، لي كايلمحو ل الستيجابات نتاوعهوم ب الزئير و التعلام. الدكور ليافعين لعابرين حتى هوما كايتجدبو ل النتاوي، هادشي لي كايوْدّي ل مدابزة لي الدكر لمسيطر كتر فيها، كايجرّي على لمدرّم ف حالو. ف لوقيت لمغازلة، الدكر كايولي حاضي معا النتوا و هو كايتسناها توري ليه سينيالات بلي هي واجدة ل لملاقية. كاتسينيالي ليه ب حطان راسها ف وضعية د طويان الضهر ل لتحت (Lordosis). التخصاب ف لعادة ماكايطولش كتر من 20 تانية، و الدكر كايعض النتوا من لقفا د عنقها. من مور ماكايسالي، الدكر كايبعد دغيا حيت النتوا تقدر تضور و تخبطو. كوپلات لببور يقدرو يبقاو معا بعضياتهوم حتى ل ربع يام و كايتجاوجو فيهم بزاف لخطرات. لحبيل كايبقى ل شي تلت شهور ولا كتر.
لببرة كاتولد ف بلاصة معزولة، تقدر تكون ف شي نبات كتيف، شي غار ولا تحت شي وكر صخري. الصغار يقدرو يكونو حتى ل سبعة لبيبرات، و لاكين ف لعادة كايكونو جوج ولا تلاتة. الصغار لي عاد مولودين كايوزنو 785–1,610 ݣرام و كايكونو عميين و مامكمولينش. لم كاتلحس و تنقي ولادها، ترضعهوم و كاتحامي عليهوم ب شكل عنيف من أي تهديد يقدر يكون. لبيبرات كايحلو عينيهوم ف عمر تلاتة ولا 14 ليوم و الشوفان ديالهوم كايولي واضح من بعد شي سيمانات قلال. كايقدرو يخليو لوكر مورا شهراين و ف نفس لوقت تقريباً كايبداو ياكلو اللحم. لم كاتخليهوم بوحدهوم غير منين كاتمشي تصيد و وخا هاكداك ماكاتسافرش بعيد. منين كاتشك بلي شي بلاصة مابقاتش مأمنة، كاتدي ولادها ل موضع جديد، ب هزانهوم واحد ب واحد ب شدانهوم من لقفا د لعنق ب فمها.
واحد لببرة ف الريزيرڤ لبيوسفيري سيخوط آلين ماكسيمات لوقت لي كاتدوز معا ولادها ب نقصان لمادى لمحلي ديالها، و ب قتيل فرايس كبار و رجوعها ل لوكر ب زربة و هي بلا ولادها؛ منين لبيبرات كايوليو ياكلو اللحم، كاتبدى تديهوم ل بلايص لقتيلة، و هاكدا كاتزيد ف النسبة د لحماية و لوصولية ديالهوم ل لماكلة. ف نفس الريزيرڤ، واحد من 21 بيبر مات ف كتر من تمن سنين من لحضية، و لموت ماتبدلش بينات الطفال الدكور و النتوات. لحضية د لببور ل كتر من تمن سنين ف ريزيرڤ لببور رانطامبور كاتعطي موعدال د متوسط النجو السنوي ف جوايه 85٪ ل 74 دكر و بيبرات نتوات؛ موعدال النجو تزاد ل 97٪ ل الطفال الدكور و النتوات د عام حتى ل عاماين ف لعمر. لسباب د موت لبيبرات منهوم لمفتارسين، لحملات، لحرايق، لموت د لم و لعطبات لقتالين.
من بعد شهراين تقريباً، لبيبرات كايمكن ليهوم يتبعو مهوم. كايبقاو يتخباو ف النبات منين لم كاتمشي تصيد. الصغار كايتعاشرو ب لعيب لمدابزة و ب لانطريما على التلياد (Stalking). واحد لهرمية كاتربى عند لخوت، معا لبيبر لكبير ف لقد، غالباً دكر، كايكون هو لمسيطر ݣاع و اللول لي كاياكل حقو ف لمقتولة. ف جوايه عمر الست شهور، لبيبرات كايفطمو ب لكامل و كاتولي عندهوم حرية كتيشاف لبيئة ديالهوم. بينات عمر التمن حتى ل عشر شهور، كايوليو يمشيو معا مهوم ل الصيادة، بيبر يمكن ليه يقتل بكري ف عمر 11 لشهر و كايولي مستاقل ب صيفتو مراهق ف 18 حتى ل 24 شهر ف لعمر؛ الدكور كايوليو مستاقلين بكري على النتوات. لببور لمطوقين ب الجي پي إس ف تشيطوان بداو يخليو لبلايص لخلوقيين ديالهوم ف عمر 19 الشهر. النتوات الشابات كايبلغو جنسياً ف عمر التلت سنين حتى ل ربع سنين، أما الدكور كايبلغو ف عمر الربع سنين حتى ل خمس سنين. الزمان الجيلي (Generational length) عند لببور ف جوايه 7–10 سنين. لببور لبينݣاليين لبريّين كايعيشو 12–15 لعام. الضونيات من السيجل الدولي د لببور 1938–2018 كايشير بلي كايعيشو حتى ل 19 لعام.
لبو ماكايلعب حتى دور ف تربية الصغار، و لاكين كايتلاقى و كايتفاعل معاهوم. الدكر الساكن كايبان بلي كايزور فاميلات النتوا–لبيبر وسط لمادى لمحلي ديالو. كايجمّعو و يقدرو يتشاركو لمقتولة ݣاع. واحد الدكر تشجل كايتهلى ف بيبرات مهوم ماتت. ب الدفاع على لمادى لمحلي ديالو، الدكر كايحامي على النتوات و لبيبرات من شي دكور خرين. منين دكر جديد كايحكمها، لبيبرات لي باقيين لمعولين على مهوم كايوليو ريسك لقتيلة الطفال (Infanticide) حيت هاد الدكر الجديد كايبدا يحاول يجيب ولادو معا النتوات. واحد الديراسة فيها سبع سنين ف محمية تشيطوان لوطنية ورات بلي 12 من 56 بيبر و يافع تقشعو، تقتلو من دكور جداد حكمو لمادى لمملوك.
لببور مشجلين كا موضيفين ل شلا پارازيطات منهون الدود الشريطي بحال ديفيلوبوثريوم إريناسيي (Diphyllobothrium erinacei)، طاينيا پيسيفورميس (Taenia pisiformis) ف لهند و الدود السطواني (Nematodes) بحال انواع طوكسوكارا (Toxocara) ف لهند و فيسالوپطيرا پريپوسياليس (Physaloptera preputialis) و النواع ديروفيلاريا أورسي (Dirofilaria ursi) و أويطيينارطا (Uiteinarta) ف سيبيريا. واحد التعفون د ڤيروسات لبو حمرون كان ف لغالب السباب ف لموت ل ببرة ف الشرق الروسي لبعيد لي لقاو عندها عاوتاني ڤيروس پارڤو السنوريات لقبلي (feline panleukopenia) و ڤيروس كورونا السنوريات. عيينات الدم د 11 لببر بالغ ف نيپال وراو مضادات لجسام ل ڤيروس پارڤو لكلاب 2 (CPV2)، ڤيروس هيرپيس السنوريات، ڤيروس كورونا السنوريات، و باكتيريات بحال لبريميات (leptospirosis)، و الطوكسوپلازما ݣوندي (Toxoplasma gondii).
لببر مليستي نوع مهدد ف الليسة لحمرا د التيحاد الدولي ل لمحافضة على الطبيعة من عام 1986 و النسمة لعالمية د لببر كاتشاف بلي مكملة ف النقصان من واحد النسمة تقديرية د 5,000–8,262 ببر ف اللواخر عوام ل 1990 ل 3,726–5,578 فرد مقدر ف عام 2022. ف وقيت 2001–2020، التضاريس فين لببور كايعيشو نقصو من 1,025,488 كم². ل 911,901 كم². تخراب لموايل، تقسام لموايل و الصيادة اللاقانونية على ود لفرو و طراف لكسدة هوما التهديدات لكبار لي عاونات ف نقصان عداد لببور ف ݣاع لبلدان لي ف لمادى د هاد النوع.
لبلايص لمحميين ف وسط لهند مقسمين ب زايد ب سباب لبنية التحتية لخطّية بحال الطرقان، السكاك، خطوط النقل، قنوات الري و لأنشيطة د تامنجميت ف النطاق ديالهوم. ف منطاقة طانينطاريي ف جنوب ميانمار، تقطاع لغابات معا لأنشيطة د تامنجميت و الضغط د الصيادة الزايد كايهدد نسمة لببور. ف الطايلاند، تسعود من 15 لبلاصة محمية موضيفة د لببور تعزلو و تقسّمو، هادشي كايعطي نسبة طايحة ل التفراق بينات لببور بيناتهوم؛ ربعة من هاد لبلايص ݣاعما فيهوم ببر ساكن من 2013. ف شبه لݣزيرة لماليزية، تحييدو 8,315.7 كم² من موايل لببر ف وقيت 1988–2012، لغالبية ف هاد لموايل مشاو ل لفلاحة الصناعية. لهريف على لاراضي لواسع النطاق لي ف جوايه 23,000 كم² ل لفلاحة التجارية و تخراج لخشب ف كامبوديا عاون ف تقسام لموؤل لمحتامل د لببر، خصوصاً ف السهول الشرقيين. تكماش لمجاوجة الدخلانية (Inbreeding depression) معا تخراب لموايل، لموارد لماكافيينش من لفرايس و الصيادة اللاقانونية هوما تهديدات على النسمة الصغيرة و لمعزولة د لببور ف جبال تشانباي على طول لحدود الشينوية الروسية. ف الشينوا، لببور ولاو مستهديفين من لحملات لواسعة النطاق د "ضد لآفات" ف لبدية د عوام ل 1950، فين لموايل لمواتيين تقسمو من مور تقطاع لغابات و السكنة د بنادم ف لبلايص لبدويين، لي صيدو لببور و نواع لفرايس. وخا تصياد لببر كان ممنوع ف 1977، النسمة كملات ف النقصان و تعتابرات منقارضة ف جنوب الشينوا من 2001.
نسمات لببر ف لهند تستهدفو من الصيادين من عوام ل 1990 و قضاو عليهوم ف جوج ريزيرڤات لببور ف 2005 و 2009. بينات مارس 2017 و يناير 2020، 630 واحد لأنشيطة ديال صيادة مخدمين السلوكا د لمكيدة، الشباكي لعايمين، و نصاب د لقنص و كلاب د لقنص تصابو ف واحد الريزيرڤ د لغابة ف جوايه 1,000 كم² ف جنوب ميانمار. محمية نام إيط–فو لوطنية تعتابرات آخر موطع موهيم ل لببر ف لاوس، و لايني حتى ببر ما تشجل من عام 2013 عل لاقل؛ هاد النسمة ف لغالب طاحت ضحية ل لمكيدة ب السلك (Snaring) لعلّاوية. وحدات ضد الصيادة اللاقانونية ف التضاريس د كيرينسي سيبلاط ف سومطرة حييدو 362 مكيدة د السلك و وقفو 91 جلدة د لببر ف وقيت 2005–2016؛ لموعدالات السنوية د الصيادة اللاقانونية تزادو معا الزيادة ف التمن الجلد. الصيادة اللاقانونية عاوتاني التهديد الساسي ل النسمة د لببر ف الشرق الروسي لبعيد، حيتاش طرقان لمصايبين ل لقطاعا د الشجر كايسهلو لوصولية د الصيادا و الناس لي كايحصدو منتوجات لغابة لي هوما موهيمين ل نواع لفرايس باش ينجاو ف الشتا.
طراف لكسدة ديال 207 ببور تضبطو ف 21 حملة مراقبة ف لوقيتة من 1991–2014 ف جوج د السواق د لبرّيّة ف ميانمار غاديين ل كليانات ف الطايلاند و الشينوا. ف لوقيتة من 2000–2022، تصادر 3,377 ببر علاقل ف 2,205 توقيف ف 28 دولة؛ التوقيفات جمعات 665 ببر حي و 654 ميت، 1,313 جلود كاملين د لببر، 16,214 طرف د لكسدة بحال لعضام، السنان، لكفوف، لمخالب، الشوارب و 1.1 طون طويل د اللحم؛ التوقيفات ف لهند جمعات طراف لكسدة ديال 893 ببر؛ و 403 توقيف ف الطايلاند شملو ف لغالب لببور لي تولدو كاپتيڤ. التوقيفات ف النيپال من يناير 2011 و دجنبر 2015 لقات 585 پياسات من طراف كسدة لببر و جوج كاركاسات كاملين ف 19 لمقاطعة. الضونيات ديال التوقيفات ف لهند ف وقيت 2001–2021 كايعطيو بلي جلود لببور هوما طراف لكسدة لي كايتتاجر فيهوم ف غالبية لوقات، من بعدهوم لمخالب، لعضام و السنان؛ طرقان التهريب غاديين ف الساس من ولايات ماهاراشطرا، كارناطاكا، طاميل نادو و آصام. الطوطال ديال 292 طرف د كسدة لببر لاقانونيين تصادرو ف شي مرسات ف ميريكان ف الدخلة من لباݣاجات الشخصيين، لكوفرات الجويين بينات 2003 و 2012.
الطلب على طراف لببر على ود الطب الشينوي التقليدي حتى هو تهديد كبير ل النسمات د لببور. أنطيرڤيوات معا الناس اللوكال ف سونداربانس لبنݣلاديشية وراو بلي كايقتلو لببور على ود لكونسوماسيو اللوكال و على ود التجارة ف الجلود، لعضام و اللحم، هادشي كا رد ل لهجمات لببور و على ود التمتاع. طراف كسدة لببر كيف الجلود، لعضام، السنان، و الزغب كايتكونسوماو من لبنݣلاديشين لي لاباس عليهوم و كايتهربو ب شكل لاقانوني من بنݣلاديش ل 15 لدولة بحال لهند، الشينوا، ماليزيا، كوريا، ڤييطنام، كامبوديا، الجاپون و لمملكة لمتحدة على طريق لحدود لبرّيّين، لمطارات و لمرسات لبحريين. مخ لعضم د لببر هو لمنتوج الطاغي د لببور لي كايتباع ل غراض طبية ف هانوي و مدينة هو تشي مينه. "فيرمات لببور" ف الشينوا و جنوب شرق آسيا كايربيو لببور على ود الطراف، و لايني هادشي كايبان بلي كايدير تهديد خيْب ل النسمات لبريّين ب زيادة ف الطلب على منتوجات لببر.
الناس اللوكال كايقتلو لببور كا رد فعلة على لهجمات و فريس لكسيبة و هادشي تهديد ف بزاف د لبلدان لي داخلين ف لمادى د لببور، حيت هاد لعاقيبة على الصراع بين بنادم و لحياة لبرية حتى هي كاتعاون ف النقصان د النسمة.
لببر محمي ب شكل دولي تحت التيفاقية الدولية ل التجارة ف النواع لمهددين ف لحيوان و النبات (Cites)، ب منع لبيع و الشرا ف لببور لحيين و طراف كسدتهوم. ف روسيا، صيادة لببور تمنعات من 1952. ف بوطان، ولى محمي من 1969 و تقيّد ب صيفتو محمي ب شكل كلي من 1995. من 1972، عطاو لببر النيڤو د لحماية الزايد ݣاع تحت عقد حماية لحياة لبرية 1972 ف لهند. ف نيپال و بنݣلاديش، ولى محمي من 1973. و من 1976، ولى محمي ب شكل كلي ف ماليزيا تحت عقد حماية لحياة لبرية، هاد لعقد د حماية لحياة لبرية ودى ف 2010 ل الزيادة ف لعقوبات لي عندهم علاقة معا جرايم لحياة لبرية. ف أندونيسيا، ولى محمي من 1990. ف الشينوا، التجارة ف طراف كسدة لببر تمنعات ف 1993. عقد التهلية و لحماية د لحياة لبرية ف الطايلاند ودى ف 2019 ل لحرب ضد الصيادة اللاقانونية و التجارة ف طراف لكسدة.
ف 1973، السلطة لوطنية ل لمحافضة على لببر و پروجيكت تايݣر (Project Tiger) تصاوبو ف لهند باش ياخدو دعم لپوبليك على ود لمحافضة على لببر. و من ديك لوقت، تصاوبو ف لبلاد 53 ريزيرڤ د لببر مغطيين مساحة د 75,796 كم² حتى ل 2022. ف ميانمار، السطراتيجية لوطنية ل لمحافضة على لببر تديڤلوپات ف 2003 كاتشمل تسيير لخدْمات بحال لمعاودة ف لمصايبة د لموايل لمضرورين، الزيادة ف پاساجات لحياة لبرية و لبلايص لمحميين، لحماية د نواع لفرايس د لببر، جهيض لقتيلة د لببر و التجارة اللاقانونية د طراف كسدتو و دهم لوعي د الناس ب پروݣرامات ترباويين على لحياة لبرية. ف بوطان، أول بلان فعلي تجرّب كان ف وقيت 2006–2015 شمل لمحافضة على لموايل، تسيير الصراع بين بنادم و لحياة لبرية، التربية و لوعي؛ لبلان لفعلي الجاوج ڤيزا الزيادة ف نسمة لببور ف لبلاد ب 20٪ حتى ل 2023 ب لموقارنة معا 2015. ف 2009 ف بنݣلاديش، لبلان لفعلي بدا يݣاد ف النسمة د لببور ف لبلاد، لحفيض على لموايل و لفرايس لكافيين، التحسان ف تطبيق لقانون و دعم الشراكات بينات وكالات لحكومة لمسؤولات على محافضة على لببر. لبلان لفعلي الطايلاندي د لببر لي تصادق عليه ف 2010 كان فيه الزيادة ف نسمات لببور ف لبلاد ب 50٪ ف لموركاب لغابوي لغربي و لموركاب لغابوي ضونݣ فايايين كاو ياي و و ترجاع النسمات ف تلاتة د التضاريس لمحتاملين حتى ل 2022. لپروݣرام لاندونيسي ل ترجاع لي تصادق عليه ف 2010 ڤيزا الزيادة ف نسمة لببور السومطريين حتى ل 2022. الستراتيجية و لبلان لفعلي التالتين على ود لمحافضة على لببر السومطري ل عوام 2020–2030 شمل دعم تسيير وحدات د نسمة لببور الصغيرة ديال قل من 20 فرد ناضج و الربيط بين 13 لبقعة غابوية ف مقاطعات شمال سومطرة و غرب سومطرة.
الزيادات ف مجهودات لحملات ضد الصيادة اللاقانونية ف ربعة د لبلايص لمحميين ف روسيا ف وقيت 2011–2014 عاونات ف نقيص الصيادة اللاقانونية، لمݣادة د نسمة لببور و تحسان ف لحماية د نسمات لحوافر. الصيادة اللاقانونية و التهريب تضيكلاراو ب صيفتهوم جرايم موسطين حتى ل خطيرين ف 2019. لعمليات ضد الصيادة اللاقانونية حتى هوما تصاوبو ف نيپال ف 2010، ب زيادة الشراكات و تباديل الستيخبارات بين لوكالات. هاد السياسات ودات ل "زيرو صيادة لاقانونية" ل بزاف د لعوام و نسمة لببور د لبلاد تدوبلات ف عقد. لحملات ضد الصيادة اللاقانونية ف منطاقة ساسية كبيرة كاتغطي 1,200 كم² ف طامان نيݣارا ودات نقصان ف نسبة الصيادة اللاقانونية لي من 34 حالة مضبوطة ف 2015–2016 ل 20 حالة من 2018–2019؛ التوقيف د سبعة د لفرقات د الصيادين اللاقانونيين و تحياد لمكايد سهلو النجو ديال تلاتة لببرات الساكنات و 11 لبيبر علاقل. ضباط لعسكر و لبوليس كايتفرقو معا بعضياتهوم ف لبلايص لمحميين ف ماليزيا.
پاساجات لحياة لبرية هوما وسايط د لمحافضة موهيمين حيت كايسهلو على نسمات لببور لملاقية بينات لبلايص لمحميين؛ لببور كايخدّمو علاقل تسعود لپاساجات لي تصايبو ف تضاريس طيراي آرك و سهول سيڤاليك ف نيپال و لهند ب جوج بيهوم. لپاساجات ف لبلايص لغابويين ب نشاط قليل د بنادم كايكونو مواتيين ب زايد. ف غرب سومطرة، 12 لپاساج بري تعتابرو أولاوية ب شكل زايد على ود التخفاف ف الصيراعات بين بنادم و لحياة لبرية. ف 2019، الشينوا و روسيا سيناو مودكرة مفاهمة ل الشراكات لعابرة ل لحدود بينات جوج بلايص محميين، لي هوما محمية شمال شرق الشينوا و محمية النمر لوطنية و محمية أرض النمر لوطنية، لي كايجمعو لمصايبة د پاساجات لحياة لبرية و مراقبات و حملات معا بعضياتهوم على طول لحدود الشينوية الروسية.
لببور لمعتوقين و لي عاودو أهلوهوم و لبيبرات ليتام تطلقو ل لبرية و تحضاو ف لهند، سومطرة و روسيا. ف كازاخستان، لمعاودة ف لمصايبة د لموايل و لمعاودة د تدخال نواع لفرايس ف الريزيرڤ الطبيعية إيل–بالكاش تطورات و لمعاودة د تدخال لببور مخطط ليه ف 2025. لمعاودة د تدخال لببور ف شرق كامبوديا كايتعتابر ممكن، غير يطرا تحسان ف تسيير لبلايص لمحميين و لمݣادة ف خسران لغابة. ببور جنوب الشينوا مخليينهوم و كايجاوجوهوم ف حدايق لحيوان د الشينوا، و كاينين بلانات باش يعاودو يدخلو التفريخات دياولهوم ف لبلايص لمحميين و لمعزولين. پروݣرامات لمجاوجة لمنسقين بينات حدايق لحيوان ودات ل تنواع جيني كافي عند لببور باش يخدمو كا "تأمين ضد النقيراض ف لبرية ".
لببور كايتصادو من بنادم هادي ألفيات، كيف ما كايبان ف الرسمات على تخبيات الصخر بيمبيطكا (Bhimbetka rock shelters) لي متورخين هادي 5000–6000 عام. كانو كايتصادو على طول لمادى نتاعهوم ف آسيا، كانو كايتبعوهوم على ضهور لعوادن و على ضهور لفيال ولا حتى ب كلاب الزلاقات (sled dogs) و كانو كايقتلوهوم ب الرماح و من موراها ب السلاح الناري. بحال هاد الصيادات كانو كايتدارو من لحوكومات اللوكال و لمبراطوريات بحال لمبراطورية لمغولية، و من لمستعمرين لوروپيين. لببور كانو كايتصادو ديما ب صيفتهوم طروفيات و ب سباب لخطر لي واخدينو عليهوم الناس. شي 80,000 ببر تقريباً تقتلو بين 1875 و 1925.
ف غالبية لبلايص، لببور كايجتانبو لبشر، و لايني لهجمات كايبقاو ريسك فين ما تلقى الناس موجودين ف نفس النطاق د لببر. لملاقيات لخطيرين كايوقعو ف لغالب ف لحواشي د لموايل بينات لبريّة و لبلايص لفلاحيين. جل لهجمات على بنادم كايكونو كا دفاع، بحال حماية الصغار؛ غير هو، لببور شي مرات كايشوفو الناس فرايس. لببور وكالين بنادم كايميلو باش يكونو شارفين و و ݣاعما قادرين. لببور لي كايتجرّى عليهوم من لمادى لمملوك ديالهوم ب سباب السكنة عاوتاني ريسك يقدر يردهوم كاياكلو بنادم.
ف بدية لقرن 20، ببرة تشامپاوات كانت السباب ف كتر من 430 قتيلة د بنادم ف نيپال و لهند قبل مايتيري عليها دجيم كوربيت. هاد لببرة كانو سنانها مهرسين و ݣاعما كانت قادرة باش تقتل لفرايس لعاديين. لكتاتبيا لمعاصرين كايتوقعو بلي الدوام على اللحم الرقيق د بنادم بزز على هاد لقطّة باش تقتل كتر و كتر. هجمات لببر كانو زايدين ب الضبط ف سنغافورة ف وقيت وسط لقرن 19، منين لفلاحة توسعات ل موؤل لببر. ف عوام ل 1840، عداد لموتى ف هاد لبلاصة تفاوتو من 200 ل 300 ف لعام. هجمات لببر ف سونداربانس تسببو ف 1,396 موتة د بنادم ف لپيريوض بين 1935–2006 على حساب التشجالات الرسميين ف لقسم لغابوي د بنݣلاديش. الضحايا د هاد لهجمات هوما الناس اللوكال د لفيلاج لي كايدخلو على نطاق لببر باش يجمعو لموارد بحال لخشب و لعسل. لحواتا كانو ب الضبط هدف شايع ل لهجمات. لميطودات لي خدمو باش يكونطريو لهجمات د لببر منهوم ماسكات لوجه ملبوسين ب لمقلوب، حوايج كايكاليو، لعصي و مونيكات مكهربين محطوطين ب عناية.
لببور كايخليوهوم كاپتيڤ من الزمانات لقدام. ف روما لقديمة، لببور خدموهوم ف لومفيطياطر (لمسرح الروماني)؛ كانو كايݣزروهوم ف صيادات لڤيناصيو (Venatio) و كانو كايتخدمو باش يقتلو لموجريمين. لحاكم لمغولي قوبلاي خان تݣال بلي كانو عندو لببور ف لقرن 13. و من لبدية د لعصور لوسطانيين، لببور كانو محبوسين ف لميناجريات لوروپيين (Menagerie). لببور و الحيوانات ليݣزوتيك لخرين كانو كايتخدمو ب شكل ساسي على ود ترفيه لآليبّة و لايني من لقرن 19 ل لقدام، بداو يوريوهوم ل لپوبليك. لببور كانو ب الضبط جدّابين ب شكل كبير و نسمة لكاپتيڤ ديالهوم تهزّات. ف 2020، كانو كتر من 8,000 ببر كاپتيڤ ف آسيا، و كتر من 5,000 ف ميريكان و كتر من 859 ف أوروپا. كاينين لببور ف لكاپتيڤيطي كتر من لي موجودين ف لبريّة. لببور لكاپتيڤ يقدرو يبينو واحد السلوك سطيريوتيپي (Stereotypical behaviour) بحال الزربة و لخمول. حدايق لحيوان لعصريين قادرين باش يقللو من هاد السلوكات ب لمعارض لي تديزايناو باش لحيوانات يقدرو يتحركو بينات لبيوت لي مفارقين و لاكين ملاقيين ف نفس لوقت. التويشييات د النفع حتى هوما موهيمين على ود صحة هاد لقط و على ود التحفيز د السلوكات الطبيعيين دياولهوم.
لببور لعبو دوار بارزين ف السيركات و ف السپيكطاكلات لحيين لخرين. رينݣلين بروز كانو فيها شلا مورويضين د لببور ف لقرن 20 كيف مايبل سطارك، لي ولات عندها سمعة كبيرة و دوزات كاريير طويلة. كانت معروفة ب لقدرة ديالها باش تكونطرولي لببور وخا كانت مرا ݣليولة؛ ب تخدام تويشييات "مرجلين" بحال لمسويطات و السلاح الناري. واحد لمورويض خر لي هو كلايد بيدي، لي خدم لكراسا، لمساوط و السلاح الناري باش يپروڤوكي لببور و لوحوش لخرين باش يوليو مجعورين و يبان هو الزعايمي. كلايد پيرفورما معا 40 سبع و نمر ف شوو واحد. من الستينات ل لقدام، لمورويضين بحال ݣونثير ݣيبل ويليامس غايخدم ميطودات الرطبين (gentler methods) باش يكونطرولي لحيوان. سارا هوك تسمى عليها "لوشواشة د لببر" حيت طرينات ب لقط باش يسمع ليها ب تخدام التوشويش ف لودن. سيݣفريد & روي ولاو مشهورين و هوما كايپيرفورميو معا ببور بيضين ف لاس ڤيݣاس. السپيكطاكل سالا ف 2003 منين واحد لببر هجم على روي ف وقيت د لپيرفورمونص. ف 2009، لببور كانو هوما أكتر حيوان د السيرك كايتاجرو بيه. تخدام لببور و حيوانت خرين ف الشوو غاينقص ف اللخر ف شلا بلدان ب سباب الضغط لي جاي من ݣروپات حقوق لحيوان و الرغبات لكبار من لپوبليك باش يشوفوهوم كتر ف بلايص طبيعيين. بزاف د لبلدان كايكبلو ولا كايمنعو بحال هاد لفعايل.
لببور ولاو شعبيين ف التجارة د حيوانات د الدار لإيكزوتيك، ب الضبط ف ميريكان، فين غير 6٪ من نسمة لببور لكاپتيڤ ف 2020 كانو ف حدايق لحيوان و ف لمراكيز لخرين لمقبولين من جمعية حدايق لحيوان و لآكواريومات. الجامعين لپريڤي كايتشافو بلي ما عندهومش ليمكانات اللازمين باش يتهلاو ف لببور ب شكل سليم، هادشي لي كايخد من راحتهوم. يقدرو عاوتاني يهددو سلامة لپوبليك منين كايخليو الناس يتفاعلو معاهوم. التخلية د لببور و لقطوط لكبار لخرين من الناس لپريڤي تمنعات ف ميريكان ف 2022. غالبية الدول ف التيحاد لوروپي منعو مجاوجة و تخلية لببور برا حدايق لحيوان لمرخصين ليهوم و السونطرات د لعتيق، و لايني شي دول مازال كاتسمح ب هادشي.
لببر من بينات لحيوانات لكبار لكاريزميين (Charismatic megafauna) لمشهورين ݣاع. كايلاش سانخالا قال عليه "واحد التخليطة نادرة من الشجاعة، لوحشية، و اللوان الضاويين"، أما كاندي ديسا قالت عليه "مجهد و مسيطر من برا، و نبيل و مميز من الداخل". ف واحد الطومبولا أونلاين د 2004 جمعات كتر من 50,000 واحد من الناس من 73 بلاد، لببر صوتو عليه كا أكتر حيوان عزيز على الناس ف لعالم ب 21٪ من التصويتات، ربح لكلب على بونت. و بحال هادشي، واحد الديراسة د عام 2018 صابت بلي لببر هو لحيوان الشعبي ݣاع على حساب الستيطلاعات، و حتى على حساب الضهور ف السيطات د لويب د حدايق لحيوان الرئيسيين و لپوسطيرات د شي افلام د لانيماسيو.
ف لوقيتة لي السبع كايمتل لملكية و لقوة ف التقافة لغربية، لببر كايلعب نفس الدور ف بزاف د التقافات لآسيويين. ف الشينوا لقديمة، لببر كان كايتشاف "ملك لغابة" و رمز لقوة د لمبراطور. ف علم التنجيم الشينوي، لببر هو التالت ف 12 الرمز ف لأبراج الشينويين و كايشدو لوقيتة بين التلاتة و لخمسة د لعشية. لعام د لببر كايتشاف بلي كايجيب "أحدات دراميين و متطرفين". لببر لبيض هو واحد من ربعة د الرموز ديال لكوكبات الشينويين، كايمتل لغرب هو و ليين (yin) و فصل لخريف. هو لكونطرير د الدراݣو اللازوردي، لي على لعكس كايرمز ل الشرق، ليانݣ (yang) و فصل الربيع. لببر واحد من لحيوانات لي تحطو ف ختم پاشوپاتي ديال حضارة وادي السند (indus valley civilization). هاد لقط لكبير بان ف لخواتم (Seals) و السوانت ف وقيت السلالة لحاكمة تشولا (Chola dynasty) د جنوب لهند، و كيف ما كانت الشعار الرسمي.
لببور كانت عندهوم أهمية دينية و فولكلورية. ف لبودية، لببر، لقرد و لأيل هوما تلاتة لمخلوقات بلا حاسة، معا النمر كايرمز ل لغضب. ف لهندوسية، لببر هو لمركابة د دورݣا، إلاهة لقوة النتوية و السلام، لي خلقوها لآليهة باش تقاتل معا الجنون. و بنفس الطريقة، ف لعالم لغريقي-الروماني، لببر تصوّر مركوب عليه من لإيلاه ديونيوس. ف لميطولوجيا لكورية، لببور هوما لمرسولين د جبل لآلهة. ف التقافة الشينوية و لكورية ب جوج، لببور كايتشافو هوما لي كايحاميو ضد لأرواح الشريرة و التصويرة ديالهوم تخدمات باش تزيين الديور، لقبور و لحوايج لملبوسين. ف لفولكلور لماليزي و لاندونيسي، "الشامانات لببور" كايداويو لمريض ب تحضار لببر. لكونسيپط د الناس لي كايوليو ببور و لعكس صحيح منتاشر ب شكل عريض؛ بالضبط لببور لبنادميين لي هوما ناس لي كايقدرو يتبدلو ل ببر و يتبدلو ل بنادم عاوتاني. شعب لمنونݣ ديال لاندوشين كايشوفو بلي لببور يقدرو ياخدو شكل بنادم. و ف شي شعوب أصليين ف سيبيريا، كان كايتشاف بلي الرجال يقدرو يفتنو النسا منين كايتحوولو ل ببور.
لقصيدة الشيعرية د 1794 "ذا تايݣر (لببر) - the tyger" كاتصور لحيوان ب صيفتو زديواجية د الزين و لوحشية. هاد لقصيدة خت "ذا لامب (لخروف) - the lamb". لببر بان ال ريواية الشينوية ديال لعصور لوسطانيين، "حاشية لما - water margin" ، فين لقط كايتباطا و كايتقتل من لقطايعي وو سونݣ، ف لوقيتة لي لببر شيريخان ف كتاب الدغال (1894) د روديارد كيپلين هو لعدو اللدود د لپروطاݣونيست لبنادمي ماوݣلي. التصويرة ديال لببر لمروض و الضريف حتى هي موجودة ف التقافة، ب لآخص تيݣر، الشخصية لي ف ويني ذا پووه و طوني لببر، لماسكوت ديال لكورن فليكس كيلوݣ.