جوطية
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
.jpg)
جّوطية هيّا سوق ديال لحوايج لقدام ؤلا لمستعملين، كيتدار عادتن ف بلاصة مفتوحة، ؤ كيقدر يكون يومي، سيماني (مرة ف سّيمانة، غالباً ف لويكاند)، ؤلا موسمي (مرة ف لموسم ؤلا ف لعام). جّوطيات كانلقاوهوم ف لعالم كامل، ولاكين طّابع ؤ تّنضيم ديالهوم كيقدر يختالف من بلاد ل بلاد. كاينين شلا نواع د لحوايج لي كيتباعو ف جّوطية، سيرتو لّباس، لأتات، لكتوبا، ؤ لأجهزة د ليليكطرونيك.[1] جّوطية كاتجبد ليها بزاف د لكليان على ود لأتمنة نّازلة د سّلعة لي كاتكون ب جودة مقبولة ؤ شي مرات مزيانة.[2] بعض نّاس كيمشيو ل جّوطية ماشي غير على ود لأتمنة، مي باش يلقاو شي حاجة نادرة ؤ عندها قيمة كبيرة، بحال لكتوبا لقدام، شّقفات د لفلوس، ؤلا لمصنوعات د لخشب.[1]
جّوطية كاتختالف على لبازار ؤ على لقيسارية، لي كيكونو ديما كلا نهار، ؤ لبيّاعا فيهوم كيعرضو سّلعة ديالهوم ف حوانت.[3]
كلمة جوطية تقدر تكون جات من كلمة لفرانساوية jeté ؤلا jetable بمعنى "مرمي" ؤلا "يقدر يتّرمى".[1] ؤلا تقدر تكون جات من تحريف ديال كلمة "جوق" ؤلا "جوقة" لي ب دّاريجة كاتعني "تجمع د بنادم". كاينة قرية تاريخية سميتها جوطة على واد سبو لي تقدر تكون خدات سميتها حيت كانت ف قرون غابرة سوق كبيرة كيتجمعو فيها نّاس.[4]
ف بزاف د لّوغات لؤروپية، لموقابيل ديال "جوطية" نقدرو نطرجموه حرفياً ب "لمارشي د لڭراد". متلاً ف نّڭليزية flea market، ف لألمانية Flohmarkt، سّويدية loppmarknad، لفينلاندية kirpputori، ؤ لّهجة سّپنيولية ديال جانوب فلوريدا pulguero من pulga (ڭرادة). هاد لّوغات يقدرو يكونو طرجمو لموصطلح من لفرانساوية marché aux puces لي يقدر يكون كيرجع ل لقرن 19، حيت لأتات لي كان كيتباع فيه كيكون عامر ب لڭراد.[5][6]
مقالة متعمقة: جوطية ف لمغريب
جّوطية ف لمغريب كاتختالف على نواع خرين د لأسواق تّقليديين، بحال سوق لخوضرا، لقيسارية، تّربيعة (سوق د صّنايعيا) ؤ لمنجرة (سوق نّجارين)، ؤ على لمارشيات ؤ سوپرمارشيات، لا ف نوع سّلعة لمعروضة والا شّكل ؤ تّنضيم د لموضع. ف جّوطيات د لمغريب على جّنب كيقدرو يكونو بيّاعا د لماكلة ؤ لمشروبات، بحال لعاصير د لّيمون، لبيض لمسلوق، معقودة ؤ غيرهوم.
لبيّاعا ف لمغريب عندهوم تعابير خاصة باش كيعيطو على لكليان، لي يقدر بنادم مايسمعهومش ف بلاصة خرة بحال:[2]
- بالي قبل ما تسالي
- عزل و تخيّر أ مولا وليدات
- تفركيسة فابور
- لا غلا على مسكين
- صحاب لعزلة و لمليح
جوطية ف ألمانيا
جوطية ف ساحة لمارشي د كووپيو، فينلاندا
.jpg)
.jpg)
- 1 2 3 "«جوطية» الرباط.. يلتقي فيها الميسورون والمعدمون ويباع فيه كل شيء" (ب العربية). 24 مارس 2013. Archived from the original on 22 أكتوبر 2014.
- 1 2 ""جوطية" المغرب ملاذ للعاطلين" (ب العربية). 11 يناير 2007. Archived from the original on 24 شتنبر 2015. Retrieved 25 يناير 2022.
- ↑ "Collins, bazaar" (ب الإنجليزية). Archived from the original on 2021-05-01. Retrieved 2022-01-26.
- ↑ "القيسرية وأخواتها" (ب العربية). Archived from the original on 28 نونبر 2016.
- ↑ "ؤكسفورد، ليكسيكو" (ب الإنجليزية). Archived from the original on 2022-08-23. Retrieved 2022-01-26.
- ↑ دجون پرييطو (2007). "تاريخ لمارشي د لڭراد". Archived from the original on 2023-04-19. Retrieved 26 يناير 2022.
