تبرزيط
التبرزيط ولا لپارازيتيزم هي واحد لعلاقة قريبة بينات النواع، فين واحد لأورݣانيزم، لي هو لپارازيط، كايعيش على السورفاص ولا لداخل د شي أورݣانيزم آخر، لي هو لمضيّف، هادشي لي كايخليه يسبب ل لمضيّف واحد النسبة فلانية من الضر، و كايكون مآضاپطي ب شكل هيكلي على هاد الطريقة د لعيشة. عالم د لحشرات إي. أو. ويلسن خصّل لپارازيطات كا "مفتارسين لي كاياكلو لفريسة ف وحدات قل من واحد". لپارازيطات منهم لپروطوزوات (protozoans) وحدانيات لخلية بحال لفاكتورات د لمالاريا، مرض النعاس، و مرض لآميبات (amoebiasis)؛ لحيوانات بحال الدود لخطافي (hookworms)، لݣمل، الناموس، و سحات الليل مصاصين الدم؛ الشومپينيو بحال فݣيع لعسل (honey fungus) و لفاكتورات د الدودة لخاتمية (ringworm)؛ و النباتات بحال الدبق (mistletoe)، لحامول (dodder)، و لهالوك (broomrape).
كاينين ستة د السطراتيجيات لپارازيطيين لكبار ديال ستيغلال لمضيّف لحيواني، لي هوما ليخصاء لپارازيطي (parasitic castration)، التبرزيط الدايز نيشان (ب شي كونطاكط)، التبرزيط الدايز ب ب لماكلة (منين لپارازيط كايتكال)، التبرزيط الدايز ب حمّال مرضي (vector-transmitted)، الشبه تبرزيط (parasitoidism)، و لميكرو فريس (micropredation)، واحد لمحوْر كبير ف الترتاب هو قدرة لغزو (invasiveness): پارازيط دخلاني (endoparasite) كايعيش وسط لكسدة د لمضيّف؛ پارازيط برّاوي (ectoparasite) كايعيش برّا، ف السورفاص د لمضيّف.
كيف لفريس، التبرزيط نوع من التفاعل مستهلك–مورد، و لكن على عكس لمفتارسين، لپارازيطات، من غير شباه لپارازيطات، كايكونو صغر بزاف من لمضيّفين دياولهم، و ماكايقتلوهمش، و دايماً كايعيشو وسط ولا على السورفاص د لمضيّف ل پيريوض مجبدة. لپارازيطات د لحيوانات كايكونو مختصين ب زايد، كل نوع پارازيطي كايعيش على شي نوع حيواني فلاني، و كايتكاتر ب موعدال زرب على لمضيّفين دياولهم. واحد لمتال معروف لي هو التفاعولات بين لمضيّفين السلسوليين و الدود الشريطي (السينتا)، لمتقوبات (الدود لفطح)، و دوك لي بينات النواع لي كايسببو لمالاريا بحال لپلازموديوم (plasmodium)، و لبرغوت.
لپارازيطات كاينقصو من الصلاحية (fitness) د لمضيّف ب پاطولوجيا (pathology) لي كاتفاوت من ليخصاء لپارازيطي ل التعدال د سلوك لمضيّف. لپارازيطات كايزيدو ف الصلاحية ديالهم ب ستيغلال لمضيّفين على قبل لموارد الضروريين باش يقدرو يبقاو عايشين، ب لماكلة منهم و ب تخدام مضيّفين وساطا (تانويين) باش يعاونوهم ف الدّوزان (transmission) من شي مضيّف موكّد (لولاني) ل مضيّف آخر. وخا التبرزيط ف لغالب كايكون واضح و مافيهش لغموض، هو طرف ف السپيكتروم (spectrum) ديال التفاعولات بينات النواع، و لي كايتدّرج من الشبه تبرزيط ل لفريس، و من التطوور ل لمقايضة (mutualism)، و ف شي شومپينيوات، كايوليو صاپروطروفيين (saprotrophic).
لمعرفة لبنادمية على لپارازيطات بحال الدود السطواني (nematodes) و السينتات (tapeworms) متورخة من زمانات مصر لقديمة، ليونان لقديمة، و روما لقديمة. ف الزمانات لعصريين لبديانيين، آنطوني ڤان ليوْنهوك حضا الجيارديا لمصرانية (giardia intestinalis) ب لميكروسكوپ ديالو ف عام 1681، ف لوقيتة لي فرانتشيسكو ريدي وصف لپارازيطات الدخلانيين و لبرّاويين بحال دود لكبدة لفطح (sheep liver flatworm) و لݣمل.
لپارازيطولوجيا لمعاصرة تطوورات ف لقرن 19. ف التقافة لبنادمية، التبرزيط عندو دلالات سلبيين. هاد الدلالات ستاغلهم دجوناثان سويفت ب شكل ساتيري ف لقصيدة ديالو د 1733 "على الشعر: قصيدة ملحمية" (on poetry: a rhapsody)، ب مقارنة الشوعارا ب لپارازيطات لفوقانيين (hyperparasitical) لي شبهّوم ب لآفات. ف التعاويد، ف الريواية لݣوتيكية د لخلعة د 1897 دراكولا (dracula) د برام سطوكر و ف بزاف من لآضاپطاسيوات دياولها التاليين، وراو واحد لپارازيط مصّاص د الدم. لفيلم د 1979 إيليْن (alien) د ريدلي سكوت واحد من شلا أعمال د التعاويد لعلمي لي كايوريو نواع پارازيطيين فضائيين.
كلمة پارازيط جات ل الداريجة من لكلمة لفرانساوية پاغازيت (parasite)، لي جات من الشكل د لكلمة اللاتيني پارازيتوس (parasitus)، لي جات من ليونانية لقديمة پارازيطوس (παράσιτος) لي كاتعني 'لواحد لي كاياكل ف لميدة د واحد آخر' لي ب راسها جات من پارا (παρά) 'حدا' و زيطوس (σῖτος) 'لݣمح، لماكلة'.
التبرزيط نوع من لمكافلة (symbiosis)، لي هي واحد التفاعل بيولوجي قريب و مداوم و طويل لمدّة بينات لپارازيط و لمضيّف ديالو. على عكس الساپروطروفات (saprotrophs)، لپارازيطات كاياكلو من مضيّف حي، وخا شي شومپينيوات پارازيطيين، لي يقدرو يكملو ف لماكلة د لمضيّفين لي قتلوهم. على عكس لمعايشة (commensalism) و لمقايضة (mutualism)، لعلاقة ف التبرزيط كاتضر لمضيّف، يا إما ب لماكلة عليه، ولا بحال ف لحالة د لپارازيطات لمصرانيين، كايقصّيو شي نسبة من ماكلتو. حيتاش لپارازيطات كايتفاعلو معا نواع خرين، كايقدرو ب السهولة يخدمو كا حمّالا (vectors) د لمومريضات (pathogens) هادشي لي كايسبب لمرض. لفريس كا تعريف ماكايتعتابرش مقايضة، حيت التفاعول كايكون قصير، و لكن عالم لحشرات إي. أو. ويلسن خصّل لپارازيطات ب صيفتهم "مفتارسين لي كاياكلو لفريسة ف وحدات قل من واحد".
و ف هاد النطاق كاينين بزاف د السطراتيجيات لي يقدرو يكونو. الطاكسونوميستات كايكلاصيو لپارازيطات ف واحد التشكيلة ديال الشيمات لمدّاخلين، هادشي مبازي على التفاعولات معا مضيّفينهم و على الدورات د حياتهم، لي شي مرات كايكونو معقدين بزاف. لپارازيط لملزوم (obligate parasite) كايعوّل ب لكامل على لمضيّف باش يكمل الدورة د حياتو، ف لوقيتة لي لپارازيط لماملزومش (facultative parasite) ماكايعولش على هادشي. دورات لحياة د لپارازيط لي كاتشمل غير مضيّف واحد كاتسمى "ديريكت"؛ ف لوقيتة لي كاتسمى عند هادوك لي ب مضيّف موكّد (فين لپارازيط كايتكاتر ب شكل جنسي) و ب شي وسيط مضيّف علاقل "ماشي ديريكت". پارازيط دخلاني (endoparasite) كايعيش وسط لكسدة د لمضيّف؛ پارازيط برّاوي (ectoparasite) كايعيش برّا، فوق كسدة لمضيّف ف السورفاص. لپارازيطات لمتوسطين (Mesoparasites)–بحال شي مجدافيات الرجلين (copepods)، كايدخلو من شي فتحة ف كسدة لمضيّف و كايبقاو مغروسين تما ب شكل جزئي. شي پارازيطات يمكن ليهم يكونو عامّيين (generalists)، ب لماكلة على قاعدة عريضة من لمضيّفين، و لايني بزاف د لپارازيطات، و لغالبية ف لپروطوزات و الدود لپارازيطي (helminths) لي كايبرزطو لحيوانات مختصين (specialists) و مقرونين ب لمضيّف ب شكل شديد. واحد لقسم بدياني ديال لپارازيطات ساسي و وضيفي لي كايفرّز لميكروپارازيطات (microparasites) و لماكروپارازيطات (macroparasites). عند كل واحد فيهم واحد لموضيل ماطيماتيك محطوط على قبل باش يحلل التحركات د النسمة د لݣروپات مضيّف–پارازيط. لميكروؤرݣانيزمات و لڤيروسات لي كايمكن ليهم يتكاترو و يكملو الدورة د حياتهم وسط لمضيّف معروفين ب صيفتهم ميكروپارازيطات. أما لماكروپارازيطات واحد لكائنات حيين معددين لخلية لي كايتكاترو و كايكملو الدورة د حياتهم برّا لمضيّف ولا على لكسدة د لمضيّف.
لغالبية د لأفكار على نواع التبرزيط تركّزو على لپارازيطات لحيوانيين لأرضيين، بحال الدود لپارازيطي. أما لپارازيطات لي كاينين ف بيئات خرين و معا مضيّفين خرين ف لغالب عندهم سطراتيجيات مشابهين. كا متال، لانݣيلة فطحة النيف (snubnosed eel) ف لغالب پارازيط ماملزومش (نص پارازيطي) لي كايحفر و ياكل ب شكل نتيهازي لحوت لمريض و لميت. لحشرات وكالين النبات بحال لحشرات لقشريين (scale insects)، ݣمل النبات (aphids)، و ليرقات (caterpillars) كايشبهو ب شكل قريب ل لپارازيطات لبرّاويين، كايهجمو على نبتات كبر منهم بزاف؛ كايخدمو كا حمّالا د لباكتيريا، الشومپينيو و لڤيروسات لي كايسسبو مراض النبات. و مادام لحشرات لقشريين النتوات ماكايقدروش يتحركو، هوما پارازيطات ملزومين، كايبقاو ملاصقين معا لمضيّفين دياولهم ب شكل دايم.
لمدخولات لحسيين لي كايوضّف لپارازيط باش يعرف و يقرّب ل شي مضيّف محتامل كايعييطو ليهم "سينيالات لمضيّف". بحال هاد السينيالات يقدرو يجمعو متلاً، لڤيبراسيو، ديوكسيد لكاربون لمزفور، روايح الجلد، السينياتورات لبصريين و ديال السخونية، و لفزوݣية. النباتات لپارازيطيين كايقدرو يخدّمو الضو، لفيزيوكيميا د لمضيّف، و لمواد الطايرين (volatiles) باش يعرفو لمضيّفين لمحتاملين.
كاينين ستة د السطراتيجيات لپارازيطيين لكبار، لي هوما ليخصاء لپارازيطي؛ التبرزيط الدايز نيشان؛ التبرزيط الدايز ب لماكلة؛ التبرزيط الدايز ب حمّال؛ الشبه تبرزيط؛ و لميكرو فريس. هادشي كايطّبق على لپارازيطات لي مضيّفينهم حيوانات و حتى النبتات. هاد السطراتيجيات كايمتلو دروات آضاپتيڤ (adaptive peaks)؛ السطراتيجيات لوسيطين يقدرو يكونو، و لايني لكائنات لحيين ف بزاف د لݣروپات لمبدلين بقاو مكملين ف التطوور التقاربي ف هاد السطراتيجيات الستة، لي تابتين ب شكل تطووري.
نقدرو ناخدو واحد الشوفة عامة على لأوپسيوات التطووريين ب لخودان ف لبال ربعة د لاسئيلة مفتاحيين: التأتير على الصلاحية (fitness) ديال لمضيّف د لپارازيط؛ عدد لمضيّفين لي عند لپارازيطات على حساب لمرحالة لعمرية ديالهم؛ واش لمضيّف ممنوع من لمكاترة؛ ولا واش التأتير كايعوّل على لكتافة (عدد لپارازيطات ف لمضيّف لواحد). من هاد التحليل، السطراتيجيات التطووريين لكبار ديال التبرزيط كايبانو، هوما و لفريس (predation).
لخصّايا لپارازيطيين (parasitic castrators) كايهلكو ب شكل كامل ولا جزئي لقدرة د مضيّفينهم على لمكاترة الجنسية، ب تحراف لينيرجي لي كاتكون غادية ل جيهة لمكاترة ل جيهة النمو د لمضيّف و لپارازيط، شي مرّات هادشي كايسبب ل لمضيّف التعمليق (gigantism). السيسطيمات لخرين د لمضيّف كايبقاو ماممسوسينش، هادشي لي كايخليه يبقى عايش و يديّم لپارزيط. لقشريات لپارازيطيين كيف بحال هادوك لي ف ݣنس لبرناقل (barnacle) لمختص، ساكولينا (sacculina) كايسببو ب الضبط لهليك د غدد لمكاترة ديال بزاف د النواع من لعقريشات لمضيّفين. ف لحالة د ساكولينا، تدهورو لفويلات (testes) د كتر من التلتين د لعقريشات لي مضيّفينهم، ب شكل كافي عند الدكور باش يطورو خصايل جنسيين تانووين د النتوات بحال، كروش عرض، مقابط صغر و الزوايد لي كايشدو لبيض. بزاف د النواع من الدود لپارازيطي كايخصيو مضيّفينهم (بحال لحشرات و لغلال). هادشي يقدر يطرا نيشان، يامّا ب شكل ميكانيكي ب لماكلة على لغدد د لمكاترة، ولا ب فريز واحد لمادة كيماوية لي كاتهلك لخلايا د لمكاترة؛ ولا يقدر يطرا ب شكل ماشي نيشان، يامّا ب فريز واحد لهورمون ولا ب تحراف التقاوت (nutrients). متلاّ، لمتقوب (trematode) زووݣونوس لاسيوس (zoogonus lasius) لي السپوروسيستات (sporocysts) دياولو بلا فم، كايخصي لغلال لبحري لمدّي طريتيا أوبصوليطا (Tritia obsoleta) ب شكل كيماوي، ب التطوور ف لغدد دياولو د لمكاترة و من بعد كايقتل لخلايا دياولو د لمكاترة.
لپارازيطات الدايزين نيشان (Directly transmitted) ماكايحتاجوش شي حمّال باش يوصلو ل لمضيّفين، منهم لپارازيطات د السلسوليات لأرضيين بحال لݣمل و السوس (mites)؛ لپارازيطات لبحريين بحال مجدافيات الرجلين (copepods) و ݣمل لبالين لي من مدوبلات الرجلين (cyamid amphipods)؛ وحدانيات لمضيّف (monogeneans)؛ و بزاف النواع من الدود السطواني؛ الشومپينيو، لپروطوزوات، لباكتيريا، و لڤيروسات. سوا كانو پارازيطات دخلانيين ولا پارازيطات براويين، ب جوج كايكون عندهم نوع مضيّف فرّادي. و ف وسط هاد نوع د لمضيّفين، لغالبية د لفراد كايكونو صافيين ولا شبه صافيين من لپارازيطات، ف لوقيتة لي غير واحد لاقلية لي كاتكون هازة معاها عدد كبير من لپارازيطات، هادشي معروف ب سمية التوزيع لمجموع (aggregated distribution).
لپارازيطات الدايزين ب لماكلة (Trophically-transmitted ) كايدوزو منين كايتكالو من لمضيّف. كايشملو لمتقوبات (كاملين من غير الشيسطومات [schistosomes])، السينتات، مشوكات الراس (acanthocephalans)، لخمساوات (pentastomids)، و بزاف النواع من الدود السطواني، و لپروطوزات بحال الطوكسوپلازما (Toxoplasma). عندهم دورات د لحياة معقدين كايشملو مضيّفين من جوج نواع ولا كتر. ف لمراحل ديالهم لبديانيين كايقيصو شي مضيّف وسيط و ف لغالب كايتقوقعو ف كيس ميكروبي (microbial cyst) وسطو. منين لحيوان لي هو هو لمضيّف لوسيط كايتكال من لمفتارس لي هو لمضيّف لموكّد، لپارازيط كاينجى من عمليات لهضيم و كايولي بالغ؛ شي وحدين كايعيشو ب صيفتهم پارازيطات مصرانيين. بزاف من لپارازيطات الدايزين ب لماكلة كايعدلو السلوك د مضيّفينهم لوساطا، هادشي لي كايزيد ف حتيمال ياكلهم شي مفتارس. بحال لپارازيطات الدايزين نيشان، التوزيع د لپارازيطات الدايزين ب لماكلة بينات لفراد لمضيّفين كايكون موزع ب شكل مجموع (aggregated). لعدوى لمرافقة (Coinfection) من بزاف د لپارازيطات كاتكون شايعة. لعدوى الداتية (Autoinfection)، فين (ب واحد الستيتناء) دورة لحياة د لپارازيط كاملة كاتاخد بلاصة ف مضيّف لولاني فرّادي، هاد لحالة تقدر توقع شي مرات عند الدود لپارازيطي بحال سنرونݣيلويديس سطيركوراليس (Strongyloides stercoralis).
لپارازيطات الدايزين ب حمّال (Vector-transmitted) كايعولو على طرف تالت، واحد لمضيّف وسيط، فين لپارازيط ماكايكونش كايتكاتر ب شكل جنسي، باش يقدرو يهزو ريوسهم من شي مضيّف موكّد ل واحد آخر. هاد لپارازيطات كايكونو ميكروؤرݣانيزمات، بحال لپروطوزوا، لباكتيريا، ولا لڤيروسات، دايماً كايكونو من لمومريضات الداخلين ل لخلية (لمسببات د لمراض). لحمّالا دياولهم ف لغالب من مصاصا د الدم مفصليات الرجلين (hematophagic arthropods) بحال لبرغوت، لݣمل، لݣراد (ticks)، و الناموس. متلاً، ݣرادة لأيل إيكسوديس سكاپولاريس (Ixodes scapularis) كاتخدم كا حمّالة د لمراض بحال مرض لايم (Lyme disease)، لبابيسيوز (babesiosis)، و لآناپلاسموز (anaplasmosis). لپارازيطات الدخلانيين لپروطوزويين، بحال پارازيطات لمالاريا ف ݣنس پلازموضيوم (Plasmodium) و پارازيطات مرض النعاس ف ݣنس طريپانوسوما (Trypanosoma)، كايكون واصلين ل مراحل لعدوى ف دم لمضيّف و كايتسيفطو ب سباب لعضّة د الناموسة ل مضيّفين جداد.
شباه لپارازيطات كايكونو حشرات لي ف لقريب ولا لبعيد كايقتلو مضيّفينهم، هادشي لي كايخلي لعلاقة ديالهم قريبة ل لفريس. جل شباه لپارازيطات كايكونو من الرزوزيات الشبه پارازيطيين (parasitoid wasps) ولا غشاويات الجناوح (hymenopterans) لخرين؛ نواع خرين كايشملو دبانيات (dipterans) بحال الدبان الشفار (phoridae). شباه لپارازيطات يقدرو يتقسمو ل جوج ݣروپات، التابتين (idiobionts) و لمحركين (koinobionts).
شباه لپارازيطات التابتين (idiobionts parasitoids) كايقرصو لفريسة ديالهم لي كاتكون كبيرة ف لغالب منين كايقبطوها، يا إمّا كايقتلوهم نيشان ولا كايشللوهم ف لبلاصة. من بعد كايهزو لفريسة لمامحركاش ل شي عش، شي خطرات معا فرايس خرين يلا ماكانتش كافية ف لكبورية باش يسوپورطيو شبيه لپارازيط (لبيض ديالهم) على طول لمراحل التطووريين دياولو. من بعد، واحد لبيضة كاتحط فوق لفريسة و من موراها لعش كايتختم. شبيه لپارازيط كايتطوور ب الزربة ف لمراحل ليرقيين/اللارڤيين (larval) و الشرنقيين (pupal) ديالو، ب لماكلة على لفريسة و الشياطا ديالها.
شباه لپارازيطات لمحركين (Koinobiont parasitoids)، بحال شي نواع ف الدبان و الرزوزي، كايحطو بيضاتهم وسط مضيّفين صغار، ف لعادة لارڤات (larvae). هادشي لي كايخليهم يكبرو، باش لمضيّف و شبيه لپارازيط يتطوورو معا بعضياتهم ل شي پيريوض مجبدة، هادشي كايسالي منين شبيه لپارازيط كايولي بالغ، لي كايخلي لفريسة ميتة، و موكولة من الداخل. شي شباه لپارازيطات لمحركين كايريݣلو التطوور د مضيّفهم، متلاً ماكايخليوهمش يتشرنقو ولا ينسالخو ف وقت ما شبيه لپارازيط كايكون واجد باش ينسالخ. واقيلا كايديرو هادشي ب لينتاج د هورمونات لي كايميميكيو هورمونات النسيلاخ د لمضيّف (إيكديسطرويدس-ecdysteroids)، ولا ب الريݣلاج د سيسطيم لغدد الصمكين (endocrine system) د لمضيّف.
_parasitized_by_Acrodactyla_quadrisculpta_larva_(RMNH.INS.593867)_-_BDJ.1.e992.jpg)
لميكرو مفتارس (micropredator) كايهجم على كتر من مضيّف واحد، ب تقلال الصلاحية د كل مضيّف ب نسبة صغيرة علاقل، و كايكونو ف كونطاكط معا أي مضيّف غير ب شكل مقطّع. هاد السلوك كايرد لميكرو مفتارسين مواتيين كا حمّالا، حيتاش يمكن ليهم يدوّزو لپارازيطات لي صغر من شي مضيّف ل واحد آخر. جل لميكرو مفتارسين كايكونو مصاصا د الدم (hematophagic). كايجمعو لحلقيات (annelids) بحال لعْلَق، لقشريات كيف ݣمل لحوت (argulidae) و مساويات الرجلين لݣناتيين (gnathiid isopods)، شلا دبانيات بحال الناموس و دبان التسيتسي (tsetse flies)، مفصليات الرجلين خرين بحال لبرغوت و لݣراد، سلسوليات كيف اللومپروات (lampreys)، و بزوليات بحال سحات الليل مصاصا د الدم.
لپارازيطات كايخدّمو تشكيلة من لميطودات باش يقيصو لمضيّفين لحيوانيين، هادشي كايجمع لكونطاكط لفيزيك، لمجرى لفمّي–الشرجي، لمراحل د لعدوى و لحمّالا لمطلوقين، مواتيين معا لمضيّفين لمبدلين، دورات لحياة، و السياقات لإيكولوجيين دياولهم. إيكزومپلات كايصورو شي شوية من بزاف لكومبوات لي يقدرو يكونو كاينين ف الطابلو.
من بين بزاف د التنواعات ف السطراتيجيات لپارازيطيين، كاين التبرزيط لفوقاني ، التبرزيط الجتيماعي، تبرزيط لعشاش، التبرزيط ب الشفرة، التبرزيط الجنسي، و تبرزيط لقراب.
لپارازيطات لفوقانييين (Hyperparasitism) كاياكلو من شي پارازيط خر، كيف ما كايبان ف لپروطوزات لي عايشين ف الدود لپارازيطي، ولا شباه لپارازيطات لملزومين و لماملزومينش لي مضيّفينهم يا پارازيطات تقليديين يا شباه پارازيطات. نيڤوات التبرزيط لمورا تانويين حتى هوما كايطراو، خصوصاً بين شباه لپارازيطات لماملزومينش. ف السيسطيمات د لبلوط التفاحي (oak gall)، يقدرو يكونو حتى كتر من خمسة النيڤوات د التبرزيط.
لپارازيطات لفوقانييين يقدرو يكونطروليو النسمات د مضيّفينهم، و على ود هاد لغرض كايتخدّمو ف لفلاحة و ل شي دوݣري ف الطب. تأتيرات لكونطرول يقدرو يتشافو ف الطريقة كيفاش ڤيروس CHV1 كايعاون ف لكونطرول على الضر لي سبباتو لآفة د لقصطال، كريفونيكطريا پارازيتيكا (Cryphonectria parasitica)، ل شجر لقصطال لأمريكي (American chestnut)، و ف الطريقة كيفاش لباكتيريوفاجات (bacteriophages) يقدرو يحدو لعدوات د لباكتيريا. ف لغالب، و وخا ماتقلّبش ف هادشي ب الشكل لكافي، جل لميكروپارازيطات لمومريضين فيهم پارازيطات فوقانيين لي يقدرو يكونو نافعين ب شكل عريض ف لفلاحة و الطب ب جوج.
لپارازيطات الجتيماعيين (social parasitism) كايستاغلو التفاعولات بينات النواع د لاعضاء د لحيوانات الجتيماعيين لعلويين (eusocial) بحال النمل، الطيرميط (termites)، و النحل الطنان (bumblebee) أمتيلة على هادشي منهم لفراشة الزرقا لكبيرة فينݣاريس آريون (Phengaris arion) لي اللارڤات دياولها كايوضفو لميميك د النمل باش يبرزطو شي نمل فلاني. النحلة الطنانة بومبوس بوهيميكوس (Bombus bohemicus) لي كاتدرّم على لخليات د النحلات لخرين و كاتهرف على لمكاترة ف لوقيتة لي صغارها كايترباو من لخداما لمضيّفين، النحلة الجتيماعية لعلوية ميليپونا سكوطيلاريس (Melipona scutellaris)، لي لملكات لعدرات دياولهم كايهربو من لخداما لقتالا و كايدرّمو على شي مستعمارة خرة بلا ملكة. واحد ليكزومپل شديد على التبرزيط الجتيماعي بين النواع كايتلقى ف النملة طيطراموريوم إينكيلينوم (tetramorium inquilinum)، لي هي پارازيط ملزوم كاتعيش ب شكل حصري على الضهور د نملات الطيطراموريوم لخرين. واحد لميكانيزم على ود التطوور د التبرزيط الجتيماعي تقتارح ل لخطرة اللولى من عند كارلو إيميري ف 1909. دابا معروف ب سمية "قانون إيميري-emery's rule"، كايقول بلي لپارازيطات الجتيماعيين كايميلو باش يكونو مرتابطين ب شكل قريب ل مضيّفينهم، دايماً كايكونو من نفس لݣنس.
التبرزيط الجتيماعي داخل النوع كايطرا ف الرضاعة لپارازيطية، فين شي فراد صغار كاياخدو لحليب من نتاوي ماكايجيوهومش. عند قرود لكاپوتشين الزيتوني (wedge-capped capuchins)، النتوات لي مقامهم عالي شي مرات كاياخدو لحليب من النتوات لي مقامهم حادر بلا حتى ردّان د لجميل.
ف التبرزيط د لعشاش (brood parasitism)، لمضيّفين كايخدمو كا والدين حيتاش كايربيو الصغار د نواع پارازيطيين ماشي دياولهم ب نفس الشكل لي كايربيو صغارهم. پارازيطات لعشاش منهم طيور ف فاميلات مبدلين بحال جحمومات لبݣر (cowbirds)، لهجّالات (whydahs)، الطياكك (cuckoo)، و لبط كحل الراس (black-headed ducks). هاد النواع ماكايبنيوش عشاش دياولهم، و لايني كايخلّيو بيضاتهم ف عشاش د نواع خرين. لبيضات د شي پارازيطات د لعشاش كايميميكيو هادوك د لمضيّف، ف لوقيتة لي شي بيضات د جحمومات لبݣر عندهم قشرة قاصحة، هادشي لي كايخليهم صعاب على لمضيّف باش يقتلهم ب التكّان، لميكانيزمات ب جوج بيهم كايلمحو ل لعزيلة د لمضيّف ضد لبيض لپارازيطي. زيد على هادشي النتوا لبالغة د الطيكوك الشايع كاتميميكي واحد لمفتارس، لي هو لباشق لأوراسي، هادشي لي كايعطيها لوقت باش تحط بيضاتها ف عش لمضيّف بلا مايقشعها.
ف التبرزيط ب الشفرة (kleptoparasitism)، لپارازيطات كايشفرو لماكلة لي جمعها لمضيّف. هاد التبرزيط دايماً كايكون جاي من النواع لقراب، يا إما من نفس النوع معا بعضياتهم ولا بينات النواع لي ف نفس لݣنس ولا لفاميلة. كا إيكزومپل، النسولا لكتار ديال نحل الطيكوك (cuckoo bees) كايحطو بيضاتهم ف خليات لعش د نحل خر من نفس لفاميلة. التبرزيط ب الشفرة ݣاعما شايع ب شكل عام و لكن كايتقشع ف الطيور؛ شي نواع بحال السكووات/لكراكر (skuas) متخصصين ف تقرصين لماكلة من الطيور لبحريين لخرين، كايتبعوهم و ماكايتفاكوش معاهم حتى كايديو ليهم ماكلتهم.
التبرزيط الجنسي (sexual parasitism)، واحد لموقاربة عجيبة كاتشاف ف شي نواع د حوت بو صنارة (anglerfish) كيف سيراتياس هولبوويلي (Ceratias holboelli)، فين الدكور كايتنقصو ل پارازيطات جنسيين ݣليولين، كايعولو ب شكل كلّي على النتوات من نفس النوع ديالهم باش يبقاو عايشين، كايبقاو لاصقين ب شكل دايم تحت كسدة النتوا، و ماكايبقاوش قادرين يديپانيو ريوسهم. النتوا كاتقوّت الدكر و كاتحامي عليه من لمفتارسين، ف لوقيتة لي الدكر ماكايعطي والو من غير لماني لي النتوا كاتحتاجو باش تنتج الجيل الجاي.
تبرزيط لقراب (Adelphoparasitism)، معروف عاوتاني ب تبرزيط الشقاق (sibling-parasitism)، كايطرا فين النوع لمضيّف كايكون مرتابط ب شكل قريب ل لپارازيط، دايماً كايكونو من نفس لفاميلة ولا لݣنس. عند شبيه لپارازيط إينكارسيا پيرپليكسا (Encarsia perplexa) لي كايبرزط الدبانة لكحلة د السيطروس (citrus blackfly)، النتوات لماملاقيينش يقدرو يحطو بيضات هاپلويديين (haploid) وسط من اللارڤات لمتطورين ب شكل كامل من نفس النوع دياولهم، هادشي كاينتج على تفريخة د الدكور، ف لوقيتة لي الدودة لبحرية بونيليا ڤيريديس (Bonellia viridis) عندها سطراتيجية د لمكاترة مشابهة، وخا اللارڤات كايكونو پلانكطونيين (planktonic).
التبرزيط عندو واحد لمادى طاكسونومي عريض، بحال لحيوانات، النبات، الشومپينيوات، لپروطوزوات، لباكتيريات، و لڤيروسات.
التبرزيط منتاشر ب شكل عريض ف مملاكة لحيوان، و تطوور ب شكل مستاقل من شكال لحياة مياوات د لخطرات. شلا نواع من الدود لپارازيطي بحال لمتقوبات و السينتات عندهم دورات لحياة كاملين كايشملو مضيّف ولا جوج مضيّفين. حتى ل دابا لݣروپ لكبير ݣاع ف لپارازيطات هوما الرزوزيات شباه لپارازيطات ف التنضيمة غشاويات الجناوح. لفيلومات و لكلاصات لي فيهم أكتر عدد د النواع لپارازيطيين مليستيين ف الطابلو. لعداد غير تقديرات مينيموم متحفضين. لكولومنات ديال التبرزيط الدخلاني و لبراوي كايعود على لمضيّف لموكّد، كيف ما موتق ف لكولومنات ديال السلسوليات و اللاسلسوليات.
پارازيط نصّي ولا هيميپارازيط (hemiparasite) بحال نبتة الدبق (mistletoe) كاتاخد شي نصيب د التقاوت من شي نبتة حية خرة، ف لوقيتة لي پارازيط ملزوم ولا هولوپارازيط (holoparasite) بحال نبتة لحامول (dodder) كاتاخد ݣاع التقاوت ديالها من شي نبتة خرة. النبتات لپارازيطيين كايصايبو واحد ف لمية من النبتات لمزوهرين (flowering plants) و هوما على بونت و يكونو ف ݣاع لبيومات (biomes) د هاد لكوكب. ݣاع هاد النبتات عندهم جدور معدّلين، لي كايتسماو لهوسطوريوم (haustorium)، لي كايتقبو النبتة لمضيّفة، و كايكونيكطيوهم معا السيسطيم د التوصال–يا إما لكسيليم (xylem)، ولا لفلويم (phloem) ولا ب جوج. هادشي كايعطيهم لقدرة باش يخرّجو لما و التقاوت من لمضيّف. نبتة پارازيطية كاتكلاصا على حساب إينا بلاصة لصقات ف لمضيّف، سوا الجدع ولا الجدر، و كمية التقاوت لي كايخصوها. مادام لهولوپارازيطات ماعندهومش لكلوروفيل و عليها ماكايقدروش يصايبو لماكلة ل ريوسهم ب لفوطوسانطيز، هوما ديما پارازيطات ملزومين، كاياخدو ݣاع ماكلتهم من لمضيّفين دياولهم. شي نبتات پارازيطيين يمكن ليهم يقلّعو النبتات لمضيّفين ب موركابات كيماويين كايديطيكطيو فين كاينين ف لهوا ولا التراب لي كايتطلقو من لبتيلات ولا الجدورا. شي 4,500 نوع ديال النبات لپارازيطي كاينين ف 20 فاميلة تقريباً معروفين حتى ل دابا.
النواع ف فاميلة الهالوكيات (Orobanchaceae) من أكتر النبتات كايخربو لقتيصاد. النواع لي ف دغل السحارة (witchweeds) تقدّرو بلي كايكلّفو ملاير د الضولار ف لعام ب سباب تخسارهم ل لاراضي لفلاحيين، ب مسّان كتر من 50 مليون ݣطار ديال لرض لفلاحية غير ف إفريقيا جنوب الصحرا بوحدها. دغل السحارة كاتمس الربيع و لحبوب، بحال الدرة، الروز، الدرة لبيضا (sorghum)، لي هوما من أكتر لمحاصيل د لماكلة لموهيمين ف الدنيا. لهالوك (Orobanche) كاتهدد واحد لمادى عريض من لمحاصيل لموهيمين، بحال الجلبانة، لحمص، مطيشة، خيزو، و لكرمب ب ݣاع نواعو. لخسران د لمحصول ب سباب لهالوك يقدر يكون ب شكل كلّي؛ وخا تدارو بحات مكتّفين، حتى ميطود ماصدقات ب شكل كامل باش يكونطروليو هاد النبتة.
شلا نبتات و شونپينيوات كايتبادلو لكاربون و التقاوت بيناتهم ف علاقة مبنية على لمقايضة (mutualism) و لميكوريزيا/لمعايشة بين الشونپينيو و النبات (mycorrhiza). شي 400 نوع من النبتات لفطريين غيريين التغدية (myco-heterotrophic)، جلهم موجودين ف لبلايص الستيوائيين، غير هو عندهم واحد لغش ب مفعول كتر ب خودان لكاربون من شي شونپينيو عوض يتبادلو بيه على قبل لمعادن. عندهم جدور منقّصين ب زايد، حيت ماكايخصهومش يمصو لما من التراب؛ الجدوع ديالهم رقاق ب شوية د لحزمات الشرايينيين (vascular bundles)، و وراقهم تنقّصو ل قد صغير، حيت ماكايديروش لفوطوسانطيز. الزريعات ديالولهم كايكونو صغار و بزاف و كتار، عليها كايبانو بلي كايعولو على شي شونپينيو لايق يقيصهم دغيا من مور النبيت (germinating).
الشومپينيوات لپارازيطيين كاياخدو شوية ولا ݣاع لحتياجات د التقوات من النبات، الشومپينيوات لخرين، ولا الحيوانات.
الشومپينيوات لي كايمرضو النبات مكلاصيين ل تلاتة د لكاطيݣوريات على حساب لموض ديال التقوات: لبيوطروف (biotrophs)، لهيميبيوطروف (hemibiotrophs)، و النيكروطروف (nectotrophs). الشومپينيوات لبيوطروفيين كاياخدو التقاوت من لخلايا د النبتات لحيين، و ف لوقيتة د لعدوى كايستعمرو النبتة لمضيّفة ديالهم ب واحد الطريقة كاتخليهم يبقاو حيين ل أطول وقت ممكن. واحد ليكزومپل معروف مزيان ديال لمومريضات لبيوطروفيين هو أوستيلاݣو مايديس (ustilago maydis)، لعامل لي كايسبب مرض سناج الدرة (corn smut). لمومريضات النيكروطروفيين من الجيهة لخرة، كايقتلو لخلايا د لمضيّف و كاياكلو ب شكل صاپروطروفي (saprophytically)، بحال لمستعمر د الجدور فݣيع لعسل ف ݣنس آرميلاريا (armillaria). لمومريضات لهيميطروفيين كايبداو الستيعمار د مضيّفينهم ب صيفتهم بيوطروفات، و ف اللخر كايقتلو خلايا لمضيّف و كاياكلو بحال لي كايديرو النيكروطروفات، هاد الضاهيرة عيطو ليها لقليب لبيوطروفي–النيكؤوطروفي.
الشونپينيوات لي كايمرّضو معروفين ب صيفتهم عوامل كايسببو لموت ل لحيوانات و حتى بنادم. التعفونات لفطريين ولا لميكوز (mycosis) تقدّرو بلي كايقتلو 1.6 مليون بنادم كل عام. واحد لمتال على مومريض حيواني فطري مجهد هو لميكروسپوريديا (Microsporidia) - پارازيط ملزوم داخل ل لخلية لي كايقيص ب شكل كبير لحشرات، و لكن يقدر يقيص حتى السلسوليات بينهم بنادم، هادشي لي كايسبب التعفون لمصراني لميكروسپوريديوز (microsporidiosis)
پروطوزوات بحال لپلازموديوم (Plasmodium)، الطريبانوسوما (Trypanosoma) و لإينطاميبا (Entamoeba) كايتعتابرو پارازيطات دخلانيين. كايسببو مراض خطيرين ل السلسوليات لي منهم بنادم بحال لمالاريا، مرض النعاس، و مرض لآميبات (amoebic dysentery) و كايكون عندهم دورات لحياة معقدين.
بزاف ديال لباكتيريات كايكونو پارازيطيين، وخا كايتشافو ب شكل عام كا مومريضات كايسببو لمراض. لباكتيريات لپارازيطيين منوعين ب شكل شديد، و كايقيصو مضيّفينهم من مجاري منوعين. متلاً، لعصوية لمجمرة (Bacillus anthracis)، السباب ديال الجمرة لخبيتة (anthrax)، كاتوصل ب شي كونطاكط معا لحيوانات لمربيين لمقيوصين؛ لبويغات (spores) دياولها، لي يقدرو يبقاو عايشين ل عوام برا لكسدة، كايقدرو يدخلو ل لمضيّف من الجروح السطحيين ولا يقدرو يدخلو من النفس. بوريليا (Borrelia)، السباب د مرض لايم (Lyme disease) و السخانة لمعاودة (relapsing fever)، كاتدوز ب حمّالا، لي هوما لݣراد من ݣنس إيكسوديس (Ixodes)، من الريزيرڤوارات د لمراض بحال لأيل. كامپيلوباكطير جيجوني (Campylobacter jejuni)، السباب د لتيهاب لمعدة و لمصارن (gastroenteritis) كاتوصل من لمجرى لفمّي الشرجي من لحيوانات، ولا ب لماكلة د الدجاج لي ماطايبش مزيان، ولا من لما لملوّت ب هاد لباكتيريا. هيموفيلوس إينفلوينزي (Haemophilus influenzae)، لي هي واحد لفاكتور ديال لمينانجيت/لمكلفة لباكتيرية (bacterial meningitis) و د عدوات سيسطيم التنفوس، بحال لانفلوانزا، و لتيهاب لقصبات (bronchitis)، كاتدوز ب الرشان التنفوسي (droplet contact)–(لكحة، لعطيص...). طريپونيما پاليدوم، السباب د السيفيليس، كاتدوز ب لانشيطة د السيكس.
لڤيروسات هوما پارازيطات داخلين ل لخلية ملزومين، مخصلين ب وضيفة بيولوجية محدودة ب شكل شديد، ف لوقيتة لي كايقدرو ب شكل واضح باش يقيصو ݣاع لكائنات لحيين من لباكتيريات ل لعتايق (archaea) ل لحيوانات، النبات و الشومپينيو، باقي ما واضحش واش يقدرو يتسماو كا كائنات حيين. كايقدرو يكونو يا ڤيروسات د لا دي إن (DNA) ولا ڤيروسات د لا إر إن (RNA)، مصايبين من خصلة وحدة ولا مدوبلة ديال لمادة الجينية (آ إر إن ولا آ دي إن)، مغطيين ب ب غطا د لپروتين و شي مرات بريّة د ال ليپيد. و عليها هوما ناقصينهم ݣاع لماطيريال لمعروف ديال لخلية بحال لونزيمات، و كايعولو ب لكامل على لقدرة د خلية لمضيّف ف لمعاودة د لا دي إن و تركاب لپروتينات. جل لڤيروسات كايكونو باكتيريوفاجات (bacteriophages)، كايقيصو لباكتيريا.
التبرزيط طرف كبير ف لإيكولوجيا التطوورية؛ متلاً، تقريباً ݣاع لحيوانات لحيين كايكونو مضيّفين د نوع واحد د لپارازيط علاقل. السلسوليات، لي هوما أكتر ݣروپ تدرس فيه، مضيّفين د 75,000 حتى ل 300,000 نوع د الدود لپارازيطي و عدد بلا حساب ديال لميكروؤورݣانيزمات لپارازيطيين. ف لمتوسط، نوع بزولي واحد كايضيّف ربعة نواع من الدود السطواني، جوج نواع من لمتقوبات، و جوج نواع من السينتات. بنادم عندهم 342 نوع من الدود لپارازيطي، و 70 نوع من لپروطوزوات لپارازيطيين. شي تلت رباع ديال السلوكا د شبكة لماكلة (food webs) كايشملو لپارازيط، هادشي موهيم ف لمريݣلة د عداد لمضيّفين. واقيلا 40 ف لمية من النواع لموصوفين پارازيطات.
التبرزيط صعيب يبان من التسجال لفوصيلي، و لايني التقابي لي ف لفكاك التحتانيين (mandibles) د شلا عيينات ديال الطيرانوصور (Tyrannosaurus) يقدرو يكونو جاو من لپارازيطات شباه لمشعرات (Trichomonas-like). الصوروفتيروس (Saurophthirus)، لبرغوتة د لعصر الطاباشيري اللولاني، كانت كاتبرزط لپطيروصورات (pterosaurs). لبيض لي كان ديال الدود السطواني و يمكن لكياس لميكروبيين د لپروطوزوات تلقاو ف كوپروليت ديال لفيطوصور (phytosaur) من لعصر التلاتي اللخراني (late triassic). هاد اللقية النادرة ف طايلاند ورقات كتر على لإيكولوجيا د لپارازيطات لي ماقبل التاريخ.
ماحد لمضيّفين و لپارازيطات كايتطورو معا بعضياتهم، لعلاقة ديالهم ديما كاتبدل. منين كايكون شي پارازيط ف علاقة فرّادية معا شي مضيّف، لعزيلة كادفع لعلاقة باش تولي نافعة كتر، ولا حتى فيها لمقايضة (mutualistic)، حيتاش لپارازيط يمكن ليه يتكاتر ل وقت طوْل يلا لمضيّف ديالو عاش لوقت طوْل. أما يلا كانو لپارازيطات كايتنافسو، لعزيلة كاتفضل لپارازيط لي كايتكاتر ب شكل زرب، هادشي لي كايودي ل زيادة ف الجهد (virulence) د لپارازيط. عليها كاينين حتيمالات منوعين ف التطوور لمرافق (coevolution) بين لمضيّف و لپارازيط.
علم لاوبيئة التطووري (Evolutionary epidemiology) كايحلل كيفاش لپارازيطات كايتفرّقو و يتطوورو، ف لوقيتة لي الطب التطووري كايطبق تفكير مشابه ب النسبة لمراض اللاپارازيطيين كيف لكونصير و مراض لمناعة الداتية (autoimmune conditions).
الشراكات طوال لمادى يقدرو يودّيو ل واحد لعلاقة مستاقرة كاتميل ل جيهة لمعايشة (commensalism) و لمقايضة (mutualism)، حيتاش ف لمصلاحة التطوورية د لپارازيط بلي لمضيّف يعيش مزوهر. لپارازيط يقدر يتطوور باش يولي قل ف ضران لمضيّف ولا لمضيّف يقدر يتطوور باش يتآضاپطا معا لحضور لي بزز د لپارازيط–ل درجة كايولي غياب لپارازيط كايسبب الضران ل لمضيّف. متلاً، وخا لحيوانات لي كايبرزطوهم الدود ف لغالب كايتضرّو ب شكل باين، بحال هاد لعدوات عاوتاني يقدرو ينقصو ف النتيشار و التأتيرات د ضطيرابات لمناعة الداتية ف لمضيّف لحيواني، ب لحساب د لبشر. ف شي أمتيلة كتر ف التشدود، شي دودات سطوانيين ماكايقدروش يتكاترو، ولا حتى يبقاو عايشين، بلا مايتقاصو من لباكتيريا وولباخيا (Wolbachia).
لين مارݣوليس و وحدين خرين تناقشو، من مورا لكتاب د 1902، معاونة متبادلة: عامل د التطوور (Mutual Aid: A Factor of Evolution) د پيوطر كروپوطكين، بلي لعزيلة الطبيعية كاتدفع لعلاقات من التبرزيط ل جيهة لمقايضة منين لموارد كايكونو محدودين. هاد الطريقة تقدر تكون كاينة ف النشأة التكافلية (symbiogenesis) لي صاوبات حقيقيات النوى (eukaryotes) من واحد لعلاقة دخلانية ل لخلية بينات لعتايق (archaea) و لباكتيريا، وخا التسلسيل د لاحدات باقي مامضبوطش ب شكل كبير.
من لمتوقع بلي لمنافسة بينات لپارازيطات تقدر تكون كاتفضل هادوك لي زرب ف لمكاترة، عليها هادشي كايعطي پارازيطات كتر ف الجهد، ب سباب لعزيلة الطبيعية.
من بينات لباكتيريات لپارازيطيين قتالين لحشرات لي منافسين بيناتهم من ݣنس فوطورابدوس (Photorhabdus) و كسينورابدوس (Xenorhabdus)، الجهد (virulence) ديالهم عوّل على لمفعولية النسبية د الطوكسينات لأونتيميكروبيين (باكطيريوسينات-bacteriocins) لي كايتطلقو من الجوج سلالات (strains). منين غير شي باكتيريا وحدة كاتقدر تقتل لخرة، السلالة لخرة كاتقصى من لمنافسة. و لكن منين ليرقات كايتقاصو من شي باكتيريات لي ب جوج بيهم عندهم طوكسينات قادرين يقتلو السلالة لخرة، حتى سلالة ماكاتقصى، و الجهد ديالهم كايكون قل على منين كاتقاص لحشرة ب سلالة وحدة.
لپارازيط شي مرات كايدوز من النتيواع لمرافق (cospeciation) معا لمضيّف ديالو، هادشي كايودي ل النمط لي توصف ف قانون فاغنهولتس (Fahrenholz's rule) بلي لفيلوجينيات د لمضيّف و لپارازيط كايقلدو بعضياتهم.
واحد ليكزومپل هو بينات لڤيروس الرغوي د لقرودة (SFV) و لمضيّفين د الرئيسيات (primates). لفيلوجينيات على لپوليميراز د ڤ.ر.ق و لوحدة التحتانية د أوكسيديز سيطوكروم II لميطوكوندري من الرئيسيات د إفريقيا و آسيا تصابو بلي هوما مطّابقين ب شكل قريب ف الترتاب د التعراش (branching order) و لوقات د لمباعدة (divergence times)، هادشي لي كايعني بلي لڤيروسات الرغويين د لقرود وقع ليهم نتيواع مرافق معا رئيسيات لعالم لقديم 30 مليون عام هادي علاقل.
لفتيراض ديال واحد التاريخ تطووري مشروك بين لپارازيطات و لمضيّفين يقدر يعاون ف توضاح كيفاش طاكسونات (taxa) لمضيّف مرتابطين. متلاً، مازال كاين واحد النقاش على واش لفلامينݣوات (flamingos) مرتابطين ب شكل قريب ل بلارجات ولا لبط. لحقيقة بلي لفلامينݣوات كايشركو نفس لپارازيطات معا لبط و لوْز ف لبدية تخادت كا دليل بلي هاد لݣروپات مرتابطين قراب ل بعضياتهم ف عوض مايكونو لفلامينݣوات قراب ل بلارجات. وخا هاكداك، لاحدات التطوورين بحال لمعاودة (duplication)، ولا النقيراض د شي نوع پارازيطي (بلا أحدات مشابهين ف لفيلوجينيا د لمضيّف) ف لغالب كايمحيو التشابيهات بين فيلوجينيات لمضيّف و لپارازيط. ف لحالة د لفلامينݣوات، عندهم قمل مشابه معا هادوك لي عند لغطاسات (grebes). لفلامينݣوات و لغطاسات عندهم جد مشروك، هادشي لي كايعني النتيواع لمرافق د الطيور و لݣمل ف هاد لݣروپات، ݣمل لفلامينݣو من موراها كايقلب لمضيّف ب لبط، هادشي لي خلق واحد لحالة لي شوشات عولاما د لبيولوجيا.
لپارازيطات كايقيصو لمضيّفين لمتماكنين (sympatric–هادوك لي ف نفس لموطع الجغرافي) ب تأتير كبر، كيف ما بان ف لمتقوبات جاوجيات الجيال (digenetic trematodes) لي كايقيصو لغلال د اللاك (lake snails). هادشي كايتوازى معا فرضية لملكة لحمرا (Red Queen hypothesis)، لي كاتقول بلي التفاعولات بين النواع كاتودي ل عزيلة طبيعية منتاضمة على قبل لاضاپطاسو لمرافقة (coadaptation). لپارازيطات كايتبعو فينوتيپات لمضيّف الشايعين ب شكل لوكال، باش لپارازيط يولي قل ف لعدوى د لمضيّفين متباينين لموطن (allopatric)، دوك لي من مناطق جغرافيين مبدلين.
شي پارازيطات كايعدّلو سلوك لمضيّف على ود باش يزيدو من الدّوزان ديالهم بينات لمضيّفين، هادشي دايماً كايكون مرتابط ب لمفتارس و لفريسة (لپارازيط كايزيد من الدّوزان ب لماكلة). كا متال، ف لݣلتة لملحية ف الساحل د كاليفورنيا، لمتقبة يوهاپلورتشيس كاليفورنيينسيس (Euhaplorchis californiensis) كاتقلل قدرة لمضيّف حوت كيلي (killifish) على الجتيناب د لمفتارسين. لپارازيط كايكبر وسط طيرا بݣر (egrets)، لي ف لغالب كاياكلو حيتان كيلي لمقيوصين عوض لي مامقيوصينش. متال خر هي لپروطوزا طوكسوپلازما ݣوندي (toxoplasma gondii)، لي هو پارازيط كايكبر ف لقطوط و لايني يقدر يكون مهزوز من بزاف د لحيوانات لخرين. الطوبات لمامقيوصينش كايجتانبو روايح لقطوط، و لكن الطوبات لمقيوصين ب ط.ݣوندي كايتجدبو ل ريحتهم، هادشي لي يقدر يزيد من الدّوزان ل مضيّفين قطوط. لمالاريا پارازيط كايعدّل ريحة الجلد ديال لمضيّفين لبنادميين، هادشي كايزيد من الجادبية ديالهم ل الناموس و ف التالي كايطلعو من حتيمال لپارازيط يدوز. الرتيلا سيكلوزا آرجينطييوآلبا (Cyclosa argenteoalba) ديما كايكونو لاصقين فيها اللارڤات د الرزوزي لي كايبدلو من سلوك ديالهم ف صنيع لخيوط. ف عوض ماينتجو خيوط معلكين و ببوشيين الشكل نورمال، منين لپارازيط كايكون لاصق فيهم كايبداو يصنعو خيوط مبسطين. هاد السلوك لمتلاعب بيه بقى طوْل و كان بارز كتر ب قدر ما لپارازيطات بقاو ملاصقين ف الرتيلا ل مدة طوْل.
لپارازيطات كايقدرو يستاغلو مضيّفينهم باش يديرو شلا وضايف لي يلا ماكانوش كايخصهم يديروهم ب ريوسهم. لپارازيطات لي كايخسرو هاد لوضايف من بعد كايولي عندهم آڤونطاج د لعزيلة، حيت كايقدرو يميّلو لموارد ل جيهة لمكاترة. بزاف د پارازيطات لبراويين من لحشرات بحال بق لفراش (bedbugs)، بق سحات الايل (batbugs)، لݣمل و لبرغوت خسرو لقدرة ديالتهم على الطيران، و ف بلاصة هادشي ولاو كايعولو على مضيّفينهم ف الطرونسپور. خسران لخصلة (Trait loss) ب شكل عام منتاشر بزاف ف لپارازيطات. واحد لمتال شديد هو خنونية لبواغ (myxosporean) هينيݣويا زشوكيي (Henneguya zschokkei) لي هو پارازيط دخلاني ديال لحوت، و لحيوان لي بوحدو معروف بلي خسر لقدرة على باش يتنفس ب شكل آيروبي (ب شكل خلوي): لخلايا دياولو ناقصهم لميطوكوندريا (mitochondria).
لمضيّفين طوورو شلا إجراءات دفاعيين ضد لپارازيطات دياولهم، بحال لبارييرات لفيزيائيين كيف الجلد عند السلسوليات، سيسطيم لمناعة عند لبزوليات و لحشرات كايزوْل لپارازيطات ب شكل مداوم، و لموركبات لكيماويين الدفاعيين عند النبات.
عالم لبيولوجيا و.د.هاميلتن (W. D. Hamilton) قال بلي لمكاترة الجنسية تقدر تكون تطوورات باش تعاون ف غليب شلا پارازيطات ب سباب لاكتيڤاسيو ديال معاودة التركاب الجيني (genetic recombination)، و تخلاط الجينات باش يتصايبو تركابات جينيين منوعين. هاميلتن ورى ب موضيل ماطيماتيك بلي لمكاترة الجنسية كاتكون تابتة ب شكل تطووري ف مواقف مبدلين، و بلي التوقوعات د النضرية واتاو لإيكولوجيا لفعلية ديال لمكاترة الجنسية. غير هو، يقدر يكون واحد التناقوض بين لأهلية لمناعية (immunocompetence) و خصايل الجنس التانويين د الدكور لمجاوجين من لمضيّفين السلسوليين، بحال نمط الريش عند الطاوس و اللبدة عند السبوعا. هادشي حيتاش هورمون الطيسطوسطيرون د الدكر كايحفز النمو ديال خصايل الجنس التانويين، ب تفضال هاد بحال هاد الدكور ف لعزيلة الجنسية، على حساب التنقاص من الدفاعات ديالهم د لمناعة.
لباريير لفيزيائية ديال الجلد لقاصح و الناشف و لي ماكايدخلش لما عند الزواحف، الطيور و لبزوليات ماكايخليش لميكروؤرݣانيزمات لمستعمرين يدخلو ل لكسدة. الجلد د بنادم حتى هو كايفرز ليدام (sebum)، لي كايكون طوكسيك ل جل لميكروؤرݣانيزمات. من الجيهة لخرة، لپارازيطات لي كبر ف لقد بحال لمتقوبات كايديطيكطيو لموركابات لكيماويين لي كايخرجو من الجلد باش يعرفو لبلاصة د مضيّفينهم ف لوقيتة لي كايدخلو ل لما. لبزاق و الدموع د السلسوليات فيهم الليزوزيم، لي هو أونزيم كايهدم حيوط لخلية (cell walls) د لباكتيريات لمدرمين. و يلا لأورݣانيزم فات من لفم و داز، لخط الجاي د الدفاع كايكون هو لمعدة ب لاسيد هيدروكلوريك ديالها، لي طوكسيك ل لغالبية د لميكروؤرݣانيزمات. شي پارازيطات مصرانيين عندهم غلاف براوي قاصح و غليض لي كايتهضم تقيل ولا ماكايتهضمش ݣاع، هادشي لي كايخلّي لپارازيط يدوز من لمعدة حي، و ف هاد لوقيتة كايدخل ل مصارن و كايبدا لمرحالة الجاية من حياتو. غير كايولي لپارازيط وسط لكسدة، كايخصو يتحارب معا پروتينات السيروم (serum proteins) و الريسيپطورات د معرفة النماط (pattern recognition receptors) ديال سيسطيم لمناعة، لخلويين و الداخل خلويين، هادشي لي كايزند لخلايا اللمفاويين (lymphocytes) د سيسطيم لمناعة لآضاپتيڤ بحال لخلايا طي (T cells) و لخلايا بي (B cells). هاد لخلايا عندهم ريسيپطورات لي كايعرفو لپارازيطات.
لحشرات دايماً كايآضاپطيو عشاشهم باش ينقصو من التبرزيط. متلاً، واحد من لسباب لمفتاحيين علاش الرزوزية پوليسطيس كانادينسيس (Polistes canadensis) كاتعشش ف بزاف د الشهاد (combs)، عوض ما تبني شهد واحد بحال بزاف د النواع ف ݣنسها، هو باش ماتقاصش من لعت د لفراش (tineid moths). عتة لفراش كاتحط بيضها وسط عشاش الرزوزي و من بعد هاد لبيضات كايفقسو ل لارڤات لي كايحفرو من خلية ل خلية و كايفرسو الشرانق د الرزوزي. الرزوزيات لبالغين كايحاولو يزوْلو و يقتلو بيضات و لارڤات لعت ب مضيغ لقنات د لخليات، و ب طليان لخليات ب واحد ليفراز فمّي لي كايعطي ل لعش واحد لمضهر قهوي غالق.
النبات كايستاجب ل هجمات لپارازيطات ب سيرية د الدفاعات لكيماويين، بحال پوليفينول أوكسيداز (polyphenol oxidase)، تحت لكونطرول د مجاري السينيالات ديال آسيد لياسمين-اللاحساس (jasmonic acid-insensitive) و آسيد الساليسيك (Salicylic acid). لمجاري لمبدلين د لمواد لكيماويين لبيو كايتآكتيڤاو ب هجمات مبدلين، و لمجاري ب جوج كايمكن ليهم يتفاعلو بيناتهم يا ب شكل إيجابي ولا سلبي. ب شكل عام، النبات كايقدر يبدا يا ستيجابة محددة ولا مامحدداش. الستيجابات لمحددين كايشملو لمعرفة د لپارازيط ب الريسيپطورات لخلووين د النبتة، هادشي لي كايودي ل واحد الستيجابة مجهدة و لكن مضبوطة: لمواد لكيماويين الدفاعيين كايتنتجو ف جوايه لبلاصة فين تديطيكطا لپارازيط، و كايبلوكيو التفراق ديالو، و زيد كايجتانبو تضياع لينتاج الدفاعي ف لوقيتة لي ماكايحتاجوهش. الستيجابات الدفاعيين لمامحددينش كايكونو نضاميين (systemic)، هادشي كايعني بلي الستيجابات مامحصورينش على شي موضع فلاني ف النبتة، و لايني كايتفرّقو على طول النبتة، هادشي لي كايخلييهم ساويين ف خسران الطاقة. هاد الستيجابات عندهم مفعولية ضد واحد لقاعدة عريضة من لپارازيطات. منين كايوليو مضرورين، من نواع بحال ليرقات حرشفيات الجناوح (lepidopteran caterpillars)، وراق د النبتات بحال الدرة و لقطن كايطلقو كمية زايدة من لمواد لكيماويين الطايرين بحال الطيرپينات (terpenes) لي كايطلقو سينيال بلي هوما تهجم عليهم؛ واحد التأتير د هادشي هو جديب الرزوزيات شباه لپارازيطات، لي كايهجمو على ليرقات.
التبرزيط و تطوور لپارازيط حتى ل لقرن 21 كانو كايتدرسو من لعولاما د لپارازيطات (parasitologists)، ف واحد لعلم محكوم عليه ب الطب، ف عوض عولاما د لإيكولوجيا ولا عولاما د لبيولوجيا التطوورية. وخا التفاعولات مضيّف–پارازيط كانو مواضيع إيكولوجيين و موهيمين ف التطوور، التاريخ د لپارازيطولوجيا تسبب ب داكشي لي عيّط ليه عالم لإيكولوجيا روبرت پولين "لهريف على التبرزيط من لعولاما د لپارازيطات"، هادشي خلّا عولاما د لإيكولوجيا يتجاهلو هاد الجيهة. هادشي كان على حساب ريّو "مؤسف"، حيت لپارازيطات "عومالا د لعزيلة الطبيعية موجودين ف كل بلاصة" و قوّات شداد ف التطوور و لإيكولوجيا. على حساب ريّو، التقسام طويل لمادى بينات لعلوم حد من تباديل لأفكار، ب مؤتمرات مفرقين و جورنالات مفرقين. اللوغات التقنيين د لإيكولوجيا و لپارازيطولوجيا شي خطرات كايجمعو ف نفس لكلمات معاني مبدلين. زيد كاينين تبدالات فلسافيين، لي تأترو من الطب، "بزاف د عولاما لپارازيطات قبلو بلي التطوور ودّى ل نقصان ف جهد (virulence) لپارازيطات، ف لوقيتة لي النضرية التطوورية لمعاصرة كانت غاتوقع مادى كبر د النتائيج".
لعلاقات لمعدين د لپارازيطات كايخليوهم صعاب باش تبلاصيهم ف شباكي لماكلة: متقوبة وحدة (trematode) ب كتر من مضيّف على قبل دورات لحياة لكتار لي عندها غاتشد ف نفس لوقت بزاف د لمواضع ف الشبكة د لماكلة، و غاتقدر توجد سيريات د لكوران الطاقي (energy flow)، هادشي لي دوّخ التحليل. فوق من هادشي، مادام ف كل حيوان تقريباً پارازيطات (بزاف)، لپارازيطات قادرين يشدو النيڤوات الطوپ ف كل شبكة د لماكلة.
لپارازيطات كايقدرو يلعبو واحد الدور ف لمكاترة د النواع اللاأصليين (non-native). كا إيكزومپل، لعقريشات لخوضر لمستعمرين (green crabs) كايتقاصو ب شكل صغير من لمتقوبات لأصليين (native) ف الساحل لأطلاسي الشرقي. هادشي كايعاونهم باش يطغاو ف لمنافسة على لعقريشات لأصليين بحال عقريشة الصخر لأطلاسية (Atlantic Rock Crab) و عقريشة يونس (Jonah Crab).
لپارازيطولوجيا لإيكولوجية تقدر تكون موهيمة ف لمحاولات د لكونطرول، بحال ف وقيت لحملات على قبل التفنية د دودة غينيا (Guinea worm). وخا لپارازيط تفنّى ف ݣاع لبلدان من غير ربعة، الدودة بدات تخدّم الجران كا مضيّفين وساطا قبل مايقيصو لكلاب، هادشي كايخلّي لكونطرول صعب كتر ب لموقارنة معا يلا كانو لعلاقات مفهومين حسن.
وخا لپارازيطات كايتعتابرو ب شكل عريض بلي كايجيبو الضر، التفنية ديال ݣاع لپارازيطات ماغاتكونش نافعة. كايكوّنو لپارازيطات علاقل النص د التنواع لحيوي؛ كايلعبو أدوار إيكولوجيين موهيمين؛ و بلا بيهم؛ لكائنات لحيين يقدرو يميلو ل جيهة لمكاترة اللاجنسية (asexual reproduction)، و ف التالي التنقاص د تنواع د لخصايل الجايين من لمكاترة الجنسية. لپارازيطات كايعطيو واحد لوپورتونيطي على ود الطرونسفير د لماطيريال الجيني بين النواع، هادشي لي كايسهل التبدال التطووري. بزاف د لپارازيطات كايخصهوم كتر من مضيّف د نواع مبدلين باش يكملو دورات حياتهم و كايعولو على التفاعولات مفتارس-فريسة ولا التفاعولات لإيكولوجيين التابتين لخرين باش يوصلو من شي مضيّف ل واحد آخر. عليها حضور لپارازيطات كايعطي بلي لإيكوسيسطيم ف صحة مزيانة.
لپارازيط لبراوي، قملة كونضور كاليفورنيا (Colpocephalum californici) ولات قضية معروفة د لمحافضة. واحد لپروݣرام د لمجاوجة لكاپتيڤ كبير و ساوي بزاف تدار ف ميريكان باش يعتقو كونضور كاليفورنيا (California condor). لي كان مضيّف د واحد لݣملة، لي عاشت فيه بوحدو. أي ݣملة تلقات "تقتلات عمداً" ف وقيت لپروݣرام، باش يخلّيو لكونضور ف أحسن صحة ممكنة. لحاصول كان بلي تعتق نوع واحد لي هو لكونضور و رجع ل لبريّة، ف لوقيتة لي النوع لاخر، لي هو لپارازيط ولا منقارض.
وخا لپارازيطات دايماّ كايتحييدو ف التصوار د شباكي لماكلة، هوما ف لعادة كايشدو لموضع لفوݣاني. لپارازيطات يقدرو يخدمو بحال النواع لمفتاحيين (keystone species)، حيت كاينقصو من لحكام ديال لمنافسين لفوݣانيين و كايخليو النواع لمنافسين يكونو موجودين ف نفس لبلاصة.
ف لعادة نوع د لپارازيط فرّادي عندو توزيع مجمّع على طول لحيوانات لمضيّفين، هادشي كايعني بلي جل لمضيّفين هازّين معاهم شوية د لپارازيطات، ف لوقيتة لي مضيّفين قلال هازّين معاهم كمية كبيرة ب زايد من لفراد د لپارازيطات. هادشي كايشكل ل الطلبا د إيكولوجيا لپارازيطات مشاكيل كايتخادو ف لبال، حيتاش كاترد السطاتيستيكات لپاراميطريين (parametric statistics) لي كايتخدّمو من عولاما د لبيولوجيا بلا فايدة. الطرونسفورماسيو د الضونيات (Log-transformation) قبل التطبيق د شي طيسط پاراميطري، ولا التخدام د السطاتيستيكات اللاپاراميطريين (non-parametric statistics) كايتنصح بيهم من شلا كتاتبيا، و لايني هادشي يقدر يزيد مشاكيل كتر، عليها لپارازيطولوجيا لكمية (quantitative parasitology) مبنية على ميطودات بيوسطاتيستيكيين متطوورين كتر.
لپارازيطات لبنادميين منهم الدود السطواني، دودة غينيا، (Guinea worm)، الدود لمشعر (threadworms)، و السينتات تدكرو ف تسجالات لبرديات لمصريين هادي 3000 عام قبل التاريخ ل لقدّام؛ بردية إيبيرس (ebers papyrus) وصفات الدودة لخطافية (hookworm). ف ليونان لقديمة، لپارازيطات كيف السينتا د لحلوف (pork tapeworm) توصفو ف كورپوس هيپوقراط (Hippocratic Corpus)، أما لكتاتبي لكوميكي د لمسراحيات آريسطوفانيس (Aristophanes) عيّط على السينتات "التبروري". لفيزيسيانات الروميين سيلسوس و ݣالينوس وتقو الدودات السطوانيين آسكاريس لومبريكويديس (Ascaris lumbricoides) و إينطيروبيوس ڤيرميكولاريس (Enterobius vermicularis)
ف كتابو لقانون ف الطب، لي كمل ف 1025، لفيزيسيان لفارسي بن سينا شجل لپارازيطات لبنادميين و لحيوانيين منهم الدود السطواني، الدود لمشعر، دود غينيا، و الدود الشريطي (سينتات).
ف كتابو د 1397، معاهدة الدولة، علم و تطباق فن الرعي (Traité de l'état, science et pratique de l'art de la Bergerie)، جون دو بغي (Jehan de Brie) كتب لوصف اللولاني على شي متقوبة (trematode) لي هي لپارازيط الدخلاني مورقة لكبدة (Fasciola hepatica).
ف لپيريوض لعصرية لبكرانية، ف كتابو د عام 1668 تجاريب ديال الجيل د لحشرات (Esperienze Intorno alla Generazione degl'Insetti)، فرانتشيسكو ريدي وصف ب كل صراحة لپارازيطات الدخلانيين و لبراويين، ب رسيم لݣراد، اللارڤات د دبان لأيل النيفي (nasal flies of deer)، و لمورقة لكبدية. ريدي قشع بلي لپارازيطات كايتديڤلوپاو من لبيضات، هادشي لي كايتناقض معا النضرية د الجيل التلقائي (spontaneous generation). ف كتابو د عام 1684 موراقبات على لحيوانات لحيين لي كايتلقاو وسط لحيوانات لحيين (Osservazioni intorno agli animali viventi che si trovano negli animali viventi)، ريدي وصف و رسم كتر من 100 پارازيط منهم الدودة السطوانية لكبيرة عند بنادم لي كاتجيب مرض لآسكارس (ascariasis). ريدي كان أول واحد سمّى لكيسات (cysts) د لمشوكة لحبايبية (Echinococcus granulosus) لي تقشعات ب صيفتها پارازيطية ف لكلاب و لحوالا؛ قرن من بعد، ف 1760، پيطر سايمن پالاس قتارح ب شكل صحيح بلي هادو كانو اللارڤات د السينتات.
ف 1681، آنطوني ڤان ليوونهوك حضى و رسم لپارازيط لپروطوزواني الجيارديا لمصرانية (Giardia lamblia)، و ربطو ب "لخرى ديالو الجاري". هادا كان لپارازيط لپروطوزواني د بنادم اللول لي تقشع ب لميكروسكوپ. عوام قلال من بعد، ف 1687، لبيولوجيستات الطاليانيين دجيوڤاني كوزيمو بونومو و دجياتشينطو تشيسطوني وصفو الجربة (scabies) لي كاتجي من السوسة (mite) لپارازيطية، لقارمة الجربية (Sarcoptes scabiei)، هادشي لي علْمها ب صيفتها أول مرض بنادمي ب عامل مسبب ميكروسكوپي معروف.
لپارازيطولوجيا لعصرية تضيڤلوپات ف لقرن 19 ب مراقبات دقيقين و تجارب من بزاف د لباحتين و الطبا لكلينيكيين؛ هاد لموصطلاح تخدّم ل خطرة اللولى ف 1870. ف 1828، دجايمس آنرسلي وصف مرض لآميبات (amoebiasis)، لي هوما عدوات پروطوزوانيين د لمصارن و لكبدة، ب سباب لحمّال، إينطاميبا هيسطوليكا (Entamoeba histolytica)، لي ماتكتاشفش حتى ل 1873 من فغيدغيخ لوش. دجايمس پادجيت كتاشف الدودة السطوانية لمصرانية الشعيرية لببوشية (Trichinella spiralis) ف بنادم ف عام 1835. دجايمس مكونل وصف متقوبة كبدة بنادم، لمتقوبة الشينوية (Clonorchis sinensis)، ف 1875. آلدجرنون طومس و غوضولف ليوكاغت صايبو ب شكل مستاقل أول كتيشاف د دورة لحياة د شي متقوبة، لمورقة لكبدية، ف تجريبة ف 1881–1883. ف 1877 پاتريك مانسن كتاشف دورة حياة الدود لفيلاري (filarial worms) لي كايسببو مرض لفيل اللمفاوي (elephantiasis) لي كايدوز ب الناموس. زيد على هادشي مانسن توْقّع بلي پارازيط لمالاريا، لپلازموديوم، كان عندو حمّال ناموسة، و قنع رونلد روص باش يقلب ف هاد لغرض. روص وكّد بلي التوقّوع كان صحيح ف 1897–1898. ف نفس لوقيتة، دجيوڤاني باتّيسطا ݣراسي و وحدين خرين وصفو مراحل دورة حياة پارازيط لمالاريا ف الناموس آنوفيليس (Anopheles). ب شكل نوض لبلبالة روص خدا جايزة نوبل ف 1902 على قبل لعمل ديالو، أما ݣراسي ماخداهاش. ف 1903، دايڤيد بروس إضونتيفيا هاد لپارازيط لپروطوزواني و لحمّال دبانة التسيتسي لي كاتجيب مرض لمتقبيات لإيفرقية (African trypanosomiasis).
ب لخودان ف لبال لاهمية د لمالاريا، ب 220 مليون واحد تقريباً مقيوص بيها سنوياً، شلا محاولات تدارو باش يقطعو الدوزان ديالها. بزاف د لميطودات د لوقاية من لمالاريا تجرّبو منهم التخدام د الضروݣات أونتيمالاريين باش يقتلو لپارازيطات ف الدم، التفنية ديال لحمّالا الناموس ديالها ب لورݣانوكلورين (organochlorine) و لموبيدات لحشريين لخرين، و الديڤلوپمو د جلبة لمالاريا. ݣاع هادو برهنو بلي فيهم لمشاكيل، ب لمقاومة د الضروݣ، لمقاومة د لموبيدات لحشريين، و السقوط لمعاود د الجلبات ف لوقيتة لي لپارازيط كايتطفّر (mutates). على حساب 2015، أول جلبة ب لإيدن و لي بوحدها على قبل أي مرض پارازيطي د بنادم هي (RTS,S) على قبل مالاريا لپلازموديوم فالسيپاروم (Plasmodium falciparum malaria).
شلا ݣروپات د لپارازيطات، بحال لحمّالا لميكروبيين و الرزوزيات شباه لپارازيطات تخدّمو كا عوامل د لكونطرول لبيولوجي ف لفلاحة و لبستانة.
پولين قشع بلي التخدام لوقائي د الضروݣات الدود لپارازيطي (anthelmintic drugs) ف لحوالا و لبݣر لمربيين كايتكوّن من واحد التجريبة عالمية مامكونطرولياش ف تطوور تاريخ لحياة د لپارازيطات دياولهم. لحاصول كايعوّل على واش الضروݣات كاينقصو الشونص د اللارڤا د الدود لپارازيطي ف لوصول ل لبلوغ. يلا آه، لعزيلة الطبيعية تقدر تكون متوقعة ل جيهة إنتاج لبيض بكري ف لعمر. يلا لا، الضروݣات كايأترو ب شكل ساسي على الدود لپارازيطي لبالغ، لعزيلة تقدر تسبب ف تعطال ف لبلوغ و زيادة ف الجهد (virulence). بحال هاد التبدالات كايبانو بلي مكملين: الدودة السطوانية طيلاضورساجيا سيركومسينكطا (Teladorsagia circumcincta) كاتبدل ف لقد لبالغ ديالها و ف موعدال لمكاترة (لخصوبة) كا ستيجابة ل الضروݣات.
ف لحقبة لكلاسيكية، لكونصيپط د لپارازيط ماكانش عندو معنى تنقيصي ب شكل قاطع: لپارازيطوس (parasitus) كانو واحد الدور مقبول ف لموجتماع الرومي، فين كان شي حد يقدر يعيش ب الضيافة د وحدين خرين، كا ردان د لجميل على "الشكير، السيرڤيسات لبساط، و لإيرادة على هزان الدل".
ف الريواية د لخليعة لݣوتيك د 1897، دراكولا، د برام سطوكر، و ف بزاف من لآضاپطاسيوات دياولها، لكونط دراكولا پارازيط مصاص الدم (ڤومپير). الناقدة لورا أوتيس قالت بلي "ب صيفتو شفّار، غاوي، صانع، و ميميك، دراكولا هو لپارازيط لموطلق. لغرض لكامل من لڤومپيريزم هو مصان دم الناس لخرين–لعيشة على حساب الناس لخرين".
النواع لفضائيين لپارازيطيين لي كايعيّفو و يخلعو منتاشرين ب شكل عريض ف التعاويد لعلمي. متلاً ف لفيلم د 1979 د ريدلي سكوت آليين (Alien). ف واحد اللقطة، واحد الزينومورف (xenomorph) شرݣ الصدر د راجل ميت من الداخل و خرج من وسطو، ب الدم مرشوش تحت واحد الضغط زايد لي معاونينو لمينات د التفرݣيع (explosive squibs). لأعضاء د لحيوان تخدّمو باش يزيدو ف تأتير الصدمة. اللقطة تفيلمات ف شدّة وحدة، و الرياكسيو د لممتيلين كانت فيها الدهشة.