نوار (مرض)

النوّار ؤلا السّيفيليس ؤلا لمرضة لفرانساوية هوّا واحد التوسيخة ساكوفاحيا دايزة(ت.س.د) و اللي كاتقدر تدير مسايل خايبين بزاف يلا ماتداواتش. النوّار كايتقسم لتلتسطاجات(اللولاني، الجوجاني، التلتاني) اللي فلخر واقيلا تقدر تسالي بلموت، كل سطاج و لعلامي ؤ السامپطومات اللي كاتجي معاه، لمريض فلغالب ماكايعرفش راصو واش هاز لمرضة وداكشي علاش يقدر يدوزها للناس لخرين بلا مايعيق .

هاد لمرضة مولاتها واحد لباكتيرية على سيفة دالرّوصور(لولب) سميتها لعلمية "تريپونيمة پاليدومة" ؤ بالداريجة نقدرو نسميوها ب "مولانوّار باكتير" ؤلا "الروصورية لمشحوبة" .

الدّا ديال النوّار
بوغزّون فلوجه ؤ فدراع ديال واحد السيّدة
معلومات مسربية
سبابها :	تريپونيمة پاليدومة(مولانوّار باكتير)
نوع :	توسيخة ساكوفاحيا دايزة
حرفة :	باكتيريولوجيا، مراضي توسيخية/عدوية
دوا :	-حماية (م.ة : تخدام دلكاپو)، ؤونتيبيوتيك : إيكستونسيلين(پينيسيلين). -ماكاينة حتاشي جلبة ضدو.
لمكاشفة على لمرضة :	سبيطاري، بيولوجيا(تحاليل ديال الدم ؤ تيستات).
تدواز :	ساكوفاح، من مرا حاملة لبيجو ديالها، عطيان الدم.
لمرضة فلمغريب
لمناشرة ديالها	-كاتقدر ب0.56% عند لعيالات مابين 15 ؤ 49 عام، -عند لعيالات تحسبات جوايه 21672 حالة جديدة عام 2016م.
لعيون لمغريبية اللولة اللي هضرات عليه :	-"وصف إيفريقيا" ديال حسن لوزّان لمعروف بليوس أفريكانوس(لقرن 16). -"الأرجوزة في الحب الإفرنجي" ديال عبد لوهاب أدرّاق(لقرن 18)

لؤصولوجيا ديال السمية

النوّار كان فشحال هادي واحد لمرضة محشومة ؤ معيبة ؤ لبلاد اللي ضرباتها هاد الجايحة كاتسبها فبلاد لخرا، دابا كانو النݣالزا ؤ لاليمان ؤ لمغاربا كايقولو باللي هيّا مرضة فرانساوية ، بينما الرواسا كايقولو باللي هيا مرضة پولاندية ، و لپلانديا كايقولو باللي هيا مرضة أليمانية ؤ زيدوزيد...

أما لكليمة ديال" سيفيليس" تجابت فلقرن سطاش فاش واحد الشاعر ؤ طبيب طالياني جيرولامو فراكاستورو فعام 1530م دار واحد لخبّيرة سميتها "السيفيليس ؤلا لمرضة لفرانساوية" ؤ اللي كاتعاود على واحد لفلاح سميتو سيفيلوس تݣال باللي هوّا بنادم اللول اللي تصاب بيها حيت ستاهل لعقوبة دالرب "أپولو" لاحقاش سيفيلوس تعصب على هاد الرب حيت نشف ليه شجارو ؤ حبس عليه لعيون اللي كايرويو بهايمو السيد صافي جعر ؤ مابغاش باقي يعبد "أپولو" ، مورا هادشي الرب "أپولو" سخط عليه ؤ نعلو وهاكا غايسلط عليه واحد لمرضة خايبة سميتها السيفيليس.

تاريخو فلعالام

بزاف ديال لعيون كاتقول باللي لبدية ديال لمعرفة ديال النوّار كانت فعام 1495م فاش نتاشر كي مرضة جديدة ؤ كاتخلع ؤهادشي بان بين لعساكريا ديال شارل التامن لمليك دفرانسا فغزوتو على ناپولي الطاليانية وكانت لهضرة رايجة باللي هاد الجايحة جابوها لبانضيا ديال كريستوفر كولومبوس اللي جاو من لعالام الجديد. غير هوا كاينين شي فراضي كايقولو باللي لمرضة بانت من واهلي لاحقاش ياد أبوقراط وصف مزيان لعلامي اللي كاتضرب لعضاوي النسلية.

لمرضة تعرفات فاللول فوروپا ولايني لمناشرة لكبيرة ديالها دروكا كاينة فيفريقيا لكحلة(جانوب دالصحرا) ؤ لميريكان لجانوبية على حساب لمنضامة ديال الصحة لعالامية.

لمكاشفة دلميكروب فلمرة اللولة كانت على يدّين جوج باكتيريالجا أليمانيين فريتز شودين ؤ هيريخ هوفمان وهادشي ف1905م ملّي عرفو باللي لميكروب مول النوّار هوّا تريپطونيمة پاليدومة (Terptonema Pallidum) وبلحرف فالداريجة سميتها : الرّوصورية لمشحوبة.

تاريخو فلمغريب

لمغريب كيبحال ݣاع لبلدان مازهقش من هاد الجايحة، و اللول اللي دوا ؤ شيّر عليها هوّا حسن لوزّان فكناشو "وصف أفريقيا"، ؤ على حسابو قال فيه باللي : "هاد الدا نشروه ليهود فلمغريب ؤ باللي ماكانش معروف ݣبل من 1495م عند لمغاربا ولايني فاش الدون لقشتالي فيرديناند حوّز على ليهود دصبلبون من شبيهتݣزيرة ديبيريا جاو بزاف منهوم لبلاد لبربر(قصد زعما لمغريب) ؤ هوما هازين هاد لمرضة. و عداد كبير من الزغبيا دلمغاربا دارو معاشرات ساكوفاحية معا لعيالات ديال دوك ليهود ؤبهاكا لمرض نتاشر شوية بشوية ؤ فوقيتة ديال عشر سنين ماخلا حتاشي دار مكانش فيها".

هاد لمرضة غايدوي عليها تاني واحد الطبيب مغريبي فالزمان ديال مولاي سماعين سميتو عبد لوهاب أدرّاق و اللي كان فنفس لوقيتة شاعر ، وصف بيها هاد لمرضة بلمرضة لواعرة ݣاع اللي كانت فزمانو ؤ ݣال عليها فواحد لقصيدة سميتها "الأرجوزة في الحب الإفرنجي" :

الحب معدود من البثور°°°وأمره من أصعب الأمور

وأسرع العدوى لدى الجماع°°°وليس في ذا الأمر من نزاع

ونازف بالدم والرطوبة°°°مع لهب وحكة صعيبة.

بلمعقول، لمغريب فلقرن سبعطاش كان كايحسب بزاف دالطبا اللي كانو ولاد زمانهوم ؤ كايخدمو بحال ݣرانهوم فوروپا ديك الساع و بنفس لمانيرة الدواوية ديالهوم يعني كانو كايعطيو فالدوّا الزّاواق و الزرنيخ ؤ الشبّة وهادو كانو دويان ملاح ضد هاد لمرضة. شي كنانش طبيين قبل من لحماية كايدويو بالتفصيل على هاد الدويان . عبد لكريم لعلج لخّص لينا لفورميلة الدواوية ضد النوّار و اللي فيها كايتعطاو شي كينات زرنيخوزاواقية معا واحد الرّيجيم دلماكلة اللي لمريض خاصو يتبعو. واحد لمزوار فرانساوي كان معيّن باش يعاود يعصرن لعسكر لمغريبي فلعهدة ديال مولاي لحسن اللول، سميتو جون جاك يوليوس هيركمان ؤهوّا نيت مول لكتاب ديال "لمغريب لعصري : Le Maroc moderne" عاش فلمغريب بين 1877 و 1883 ؤفيه كايݣول باللي فلمدينة دمولاي عقوب، حدا فاس، كاين فيها واحد الزاوية تبنات حدا واحد لمنبع ديال حامة كانو لمراض بالنوّار كايعومو فيها ؤ لغريب هوّا بصّاح كانت هاد لحامة كاداوي دوك لحبوب، واقيلا أشكو فيها لكبريت .

ولايني فلخر دلقرن تسعطاش و لبدية دلقرن عشرين مشاو هاد الطرقان السيونصية ؤ ولّاو بلاصتهوم طرقان كاتخدم الطب التقليدي بلعشوب ؤ خلاص بلامانهضرو على لوضعية السوسيوقتيصادية لمكفسة فداك الزمان اللي خلات لمغاربا يزيدو ينشرو فلمرضة بلا مايعيقو ولا يعرفو تعقيداتها.

علامولوجيا :

النوّار هوا واحد الدا اللي كاينتاشر بلمعاشرة الساكوفاحية ، و كاتسببها واحد لباكتيرية عندها شكل ديال روصور(لولب) كاتسما بالتريپطونيمة پاليدومة ؤلا بالدارجة "مولانوّار باكتير"، هاد لميكروب كايتعتابر مرّاض بنادمي بزّازي ؤ كايتعتابر بنادم هوّا خزّانو، مولانوّار باكتير مسؤول على علامي دلحرقة ملوكاليزية سيرتو فالجيهة دلحجر حيتاش كايتكاتر فلداخل ديال النسوجا ديال الجلد اللي تماك.

بنادم اللي توسخ بهاد لميكروب كايدوز فلعادي من واحد الطريق اللي فيها تلتمراحل متابعين على واحد لمودّة ديال عشرسنين هاد السطاجات هوما :

السطاج اللول = السيفيليس اللولاني

رسمة ديال قرحة نسلية فالشلقومة لكبيرة فلعضو نسلي ديال مرا.

رسمة لحجر ديال راجل كاتورّي لقرحة النسلية فلعضو نسلي ديالو معا ولسيسة حجرية(زومي باش تشوف مزيان)

السطاج اللول ماعندوش شي علامي اللي باينين ديما ويلا كانو فلعْموم مكايبانو حتا كادوز واحد تلاتة دالسيمانات مورا لعدوة. كاندويو على واحد لحبوبة جلدية غوزية فلعضو النسلي كاتسما بلقرحة النسلية ؤ هيا واحد جريحة وحدانية ، ماكاتوجعش ، نقية ؤ حدودها واضحين، ولايني كاتعادي دغيا يعني كاتكون عامرة ميكروب هادشي اللي كايخليها واحد لبلاصة مزيانة للطبيب باش يهز منها الشانتيو ، هاد لقرحة تقدر تكون ملامّة معا واحد لولسيسة حجرية تابعة ؤ اللي حتاهيا ماكاتوجعش ؤ ماكاتݣيّحش، ؤمنين ماكايكون لا وجع لا والو بنادم مكايتسوقش ليها وكايخلي لقرحة حتا تبرا بوحدها مورا واحد ربعة حتال ستة ديال السيمانات.

السطاج الجاوج = السيفيليس الجوجاني

راجل واصل لسطاج الجاوج ديال النوّار، خيّص على بوغزّون فجلدو.

بوغزّون فنيفو ديال لفخايد ؤ سيقان تاع دري صغير تصاب بالنوّار لمعاولداني(فوقت لولادة)

بوغزّون(شوف مزيان اللون لغوزي ديال هاد لحبوب)

لمولانوّار باكتير حݣا كايتشتت فلكسدة كاملة فالسيركوي الدماوي ؤ اللمفاوي ؤكايدير شي كمشة دلحبوب فالجلد سميتهوم : بوغزّون (طاشات صغار ؤ غوزيين) ، بوغزّون كايكون موضعو فلعادة فلكف دليدّين و الرجلين ، فلوجه ؤ يقدرو يكونو معاهوم حتا ولسيسات كتار.يقدرو يكونو معاهوم حتا علامي معمومين بحال السخانة، خسران الشعر ؤ لوزن، هنا يادلّي فاش لمريض كايبدا يعرف باللي شي حاجة ماهياش. غير هوّا بحال السطاج اللولاني هاد لعلامي كايغبرو غير بوحدهوم مورا عام منبعد لعدوة.

السطاج السكوتي =السيفيليس السكّوتي =

سبيطاريا سلبي ؤ مكايبانوش حتا علامي مرضاوية ولايني سيرولوجيا موجب يعني التحاليل ديال الدم بوحدهوم اللي يقدرو يقوّرو لمرضة.

السطاج التلتاني

كايبان واحد عشر سنين مورا لبدية دالتوسيخة عند الناس اللي مادّاواوش ؤ فيه كايكونو تعقيدات معطلين سيرتو قلبوعروقية ، عصبولوجية...

السطاج ديال عصبونوّار

واحد لمرْحْلة معطلة فلمرضة بالسيفيليس يلا ماتداواتش(تقدر توصل حتال تلاتين عام) مكاتبانش عند كولشي ولايني غير عند واحد 20 حتال 40 فلمية. كاتكون فالسطاج الجوجاني و التلتاني دالنوّار ؤ فيها كايبانو علامي عصبولوجية : مينانجيطة مجهدة، اللّقوة، شلالة، لعما ، كسيدة عروݣية مخية...

مكاشفة

• لمكاشفة لبيولوجية خاصها تدار قدام ݣاع لقرايح لخرزونسلية ولا لفمية وخاصها تدار قبل من التخدام دلؤونتيبيوتيك.

• الطريقة لمرجوع ليها فلمكاشفة على لباكتيرية مولات النوار هيا السيرولوجيا و اللي فيها التقلاب على كونطركسدات سوا التريبتونيمية(VDRL) سوا لماشي التريبتونيية.

عيون لكلام

تقدر تزيد شوف بزاف د تّصاور و لمعلومات ديال Syphilis ف ويكيميديا كومنز.