تارودانت

تارودانت
‫تارودانت‬ (ar) ⵜⴰⵔⵓⴷⴰⵏⵜ (shi)
لبلاصة
لبلاد	لمغريب
لإقليم	إقليم تارودانت
السكان
شحال دالسكان	57,136 (1994)
شحال دلفاميلات	21,821 (2024)
لجغرافيا
لعلو	240 م
خط الطول بـ °	-8.87952805
خط لعرض بـ °	30.4699814
معلومات خرين
توقيت ديال لمدينة	ڭريتينش (توقيت قياسي) ڭرينيتش + 1 (التوقيت د الصيف)
كود د لبوصطة	83000
السيت الرسمي	int.taroudannt.ma
الرمز لجغرافي	2529649
لخريطة

سور تارودانت فـ2011.

تارودانت مدينة مغريبية و جماعة ترابية حضرية كاينة في إقليم تارودانت، جهة سوس ماسة، ساكنين فيها 79553 نسمة، على حسب الإحصاء العام 2014.

تاريخ

تارودانت ف لفترة لقديمة، قبل لإسلام، تقدر تكون هيّا نيت مدينت ڤالا لي كانت أبعد مدينة ف لجانوب ديال مملكة موريطانية.

لأصل ديال السمية

ما كاين حتى شي أصل حقيقي ومؤكد لتسمية "تارودانت"، كاين بزاف ديال لافتراضات ولاحتمالات اللي كتخلي معرفة الأصل الحقيقي صعيبة، وهي عبارة على روايات شفهية تناقلوها الناس القدام اللي زاروا المدينة.

ومن بين هاد الروايات: كاينة وحدة مشهورة فالتراث الروداني كتقول باللي لمدينة تعرضات لفيضان فواحد الزمان تسبب فالخراب ديالها وماتوا فيه أغلب السكان، وهنا كتحكى باللي واحد لمرا فقدات ولادها ومن حزنها غوتات بـ امازيغية (تاروا، دانت)، ومعناها بـ لعربية (الدراري مشاو). ومع مرور السنين، ولات لمدينة معروفة بهاد النعت، ومع كثرة الاستعمال تجمعات الكلمتين "تاروا" و"دانت" فكلمة واحدة وولات "تارودانت".

واللي كيدعم هاد الرواية هو أن لمدينة محاصرة بين وادي سوس و واد الواعر، هادشي اللي خلاها عرضة لفيضانات متتالية فالعصور القديمة فاش كان لمناخ رطب، وترسخات هاد الرواية فالذاكرة الشعبية حيت بقات كتعاود عبر الأجيال.

وكاين فمصادر أخرى باللي التأسيس ديال مدينة تارودانت كان على يد ناس من الشام، وتسمات "رودانة" بنت الشام، وهي رواية مشهورة ولكن ما عندها حتى سند حقيقي، ويقدر يكون الرواج ديالها جديد، وهاد الرواية غالباً غير مجاراة للعادات ديال لمؤرخين لمشارقة لقدام اللي كانوا كيشبهوا لمناطق والمدن اللي زاروها فالمغرب والأندلس بمناطق شامية مشرقية غير على قبل شبه بسيط.

وكاين تفسير آخر كيعتمد على الموقع المتميز ديال المدينة وسط سهل خصب ديما أخضر وكتسقيه وديان مهمة، ومن الناحية اللغوية كنلقاو لفظ "تارودانت" عندو جوج معاني (تار) كتعني: منعدم أو منعدمة، والمعنى الآخر (دانت) بمعنى: مشاو. من جهة أخرى، كاين اللي كيشوف باللي تارودانت اسم محرف على كلمة (تاغودانت)، وهو نوع من الكرموص بـ "لهجة تريفيت" وكيسمى بـ "تاشلحيت" (تالغودانت)، وهنا كيوقع تبادل بين حرف الغين والراء، وكاين اللي كيأكد هادشي بحال كلمة "اداوزداغ" اللي كتعني أهل المنطقة السفلى فالأطلس الكبير وتحولات لـ "اداوزدار".

وكاين عاوتاني زعم كيقوي باللي تارودانت تقدر تكون عندها علاقة بما يسمى فالمنطقة بالأمازيغية "دار وادان" اللي كتعني الحاجز، وبما أن المدينة داير بيها السور تسمات تارودانت، وهي المؤنث ديال "دار ودان" كاسم للسور، وبالتالي "تارودانت" يقدر يكون المعنى ديالها هو المدينة المسورة. ومن هادشي كامل كيبان باللي تارودانت هو الاسم القديم اللي تذكرات بيه المدينة فكتوب التاريخ، وخا كثرة الاجتهادات بقى الغموض داير بيها.

وفالاخير، نقدرو نرجحو الرأي ديال الأستاذ عمر افا فكتابو "مسألة النقود": باللي الكلمة الأمازيغية أصلها (أرودان) بمعنى المرتفع، وهاد الاسم تعرب وظهر فالمسكوكات النقدية اللي تضربات فالمدينة فالقرن 19م - ق13ه، باسم (رودانة).

إحصائيات

• نسبة الأمية : 23,3%
• نسبة السكان اللي قاريين فوق الليسي (ليسي و جامعة): 21,4%
• نسبة الناس النشيطين (اللي يقدرو يخدمو): 46,9%
• نسبة البطالة: 18,3%
• نسبة الناس اللي خدامين في الدولة (أولا البيطاليين اللي سبق ليهوم خدمو): 18,3%
• نسبة الناس اللي خدامين ف لپريڤي (أولا البيطاليين اللي سبق ليهوم خدمو):45,9%

الاقتصاد

القطاع البنكي والمالي

تارودانت فيها 16 لبنكة، 3 وكالات ديال التجاري وفابنك، 2 وكالات ديال لبنك الشعبي، 2 وكالات ديال سهام بنك، 2 وكالات ديال مصرف لمغريب، 2 وكالات ديال لقرض لفلاحي، 2 وكالات ديال بنك أفريقيا، 2 وكالات ديال بنك CIH، ووكالة وحدة ديال البنك لمغربي للتجارة والصناعة. وكاينين حتى 14 وكالة ديال تحويل الأموال (كاش بلوس - وفاكاش - الشعبي كاش - ضمان كاش - لنا كاش).

المحروقات

مدينة تارودانت فيها 9 ديال محطات ليسانس والمازوط.

القطاع التجاري ولأسواق

كتعتبر التجارة فتارودانت هي لمصدر الرئيسي اللي كيخلق فرص الشغل وكينعش لاقتصاد المحلي. لمدينة فيها بزاف ديال الأسواق، أهمها سوق "جنان الجامع" الخاص بالحوايج العصرية، والسوق لكبير للحرف التقليدية فين كاينين لمحلات اللي كيبيعوا منتوجات الصناعة التقليدية واللبس لمغربي التقليدي.

زيد عليهم السوق الأسبوعي اللي كيكون كل نهار حد فحي لمحمدي (لاسطاح)، وفيه بزاف د لمرافق بحال سوق لخضرة و الديسير، سوق الجملة، سوق لبهايم، وسوق ديال بيكالات. وفالمنطقة ديال لاسطاح كاين حتى السوق التجاري الممتاز أتقداو.

فالسنين الأخيرة، بدات السلطات كتوجه باش تبني "أسواق لقرب" فتارودانت باش يحلوا لمشكل ديال لفراشة والباعة المتجولين. وبدا هادشي ببني أول سوق قرب فحي "لمعديات" بالشراكة مع لمبادرة لوطنية للتنمية لبشرية، ومن لمنتظر يبداو يبنيوا سوق قرب آخر فحي "سيدي بلقاس"، ويديروا سوق ديال الخضرة والديس بالجملة فحي "أولاد لغزال" باش يحولوا سوق لاسطاح لسوق يومي للقرب. وكاينين بلانات باش يديروا أسواق أخرى خاصة بالموطورات والطوموبيلات المستعملة وسوق ديال الزرع فحي لاسطاح، ورحبة ديال الجلد فدار الدباغ، وسوق جديد فـ "فرق الأحباب".

المشاريع

الحي المحمدي (لاسطاح) فمدينة تارودانت

تارودانت عرفات تطور كبير فالمشاريع التنموية، خصوصاً ما بين 2010 و2020، سواء لمشاريع اللي كملات ولا اللي مازال خدامين فيها ولا اللي باقية فالدراسة.

ومن بين لمشاريع لمهمة اللي تدارت فالسنين الأخيرة: لكلية متعددة التخصصات، كلية الشريعة، المسبح لبلدي لأولمبي، لمركب الثقافي، الثانوية التقنية، سوق الحوت، الغابة لحضرية، لمركب لمندمج للصناعة التقليدية، تيرانات لقرب ديال لكورة وديال التنس، وتيران ديال ألعاب القوى. أغلب هاد المشاريع تدارت برا الأسوار وخصوصاً فحي "لاسطاح"، باش يشجعوا الناس يسكنوا برا ويخففوا الزحام لداخل ديال لمدينة. لداخل ديال الأسوار حتى هو عرف تحديث ديال الطرقان بالباڤي (الطوب ديال سيما). أما أهم لمشاريع اللي مازال خدامين فيها دبا هي لقاعة لمغطاة للرياضات.

أما لمشاريع اللي مازال ما تدارتش، فمنها لقنطرة الثانية فوق واد لواعر باش تربط حي لاسطاح بالمدينة، ومشروع لمحطة الطرقية اللي مازال ما خرج للوجود بسبب مشاكل قانونية فالأرض، ولجماعة مازال كتقلب تشري أرض مناسبة للمحطة.

لمشروع الثاني هو مجمع الحرف والمهارات، وهو مشروع مهم لهدف منو يجمع كاع المحلات ديال الحدادة والنجارة والميكانيك اللي كاينين وسط لمدينة ومصدعين الناس، ويجمعوهم كاملين فبلاصة وحدة فحي لاسطاح بعيد على الديور، وهاد المشروع غادي يدار على مساحة ديال 30 هكتار.

تارودانت مازال خاصها منطقة صناعية، وما فيهاش محطة لتصفية المياه العادمة، وهادو من الأسباب اللي كيخليوا الاستثمارات ناقصة.

ومن المنتظر يدار حي صناعي فيه 170 هكتار فالشمال لغربي ديال حي لاسطاح. ونفس الحي غادي يشوف مشاريع أخرى مستقبلاً بحال: مصنع ديال لمانط و لأفرشة ، مصنع ديال مواد لبناء، مطاحن عصرية كبرى، مجزرة جديدة، حلبة ديال تعليم السياقة، مركز للإيواء والاستقبال، ومقرات جديدة للبوليس والبامبية.

السكان

على حساب الإحصاء العام للسكان والسكنى ديال 2014، عدد سكان مدينة تارودانت واصل لـ 79.553 نسمة (داخلة فيها 18.788 أسرة. السكان اللي داخل الأسوار كيشكلو كتر من النص ديال سكان تارودانت كاملة، وهادشي حيت أغلبية المحلات التجارية والأسواق والقهاوي كاينين تما لداخل. وكتعتبر أغلب الساكنة اللي كاينة دبا فالمدينة ناس ماشي أصليين، حيت بزاف منهم جاو من الدواوير اللي قريبة باش يستقرو فمدينة تارودانت، نظراً لأن إقليم تارودانت فيه أغلبية ديال لجماعات لقروية اللي كتنقصها لمؤسسات التعليمية ولا الصحية ولا الإدارية، هادشي اللي كيخلي بزاف ديال الناس يهاجرو من هاد لجماعات ويجيو يسكنو فتارودانت باش يقراو ولا يقلبو على الخدمة. أما اللغة اللي كيهضرو بيها الناس بزاف هي الدارجة المغربية، وكتتبعها تاشلحيت.

الأعوام	لعدد ديال سكان مدينة تارودانت
1960	141 17
1972	272 22
1982	848 35
1994	136 57
2004	489 69
2014	553 79

ناس معروفين من هنا

• محمد بن سليمان الروداني (عاش مابين 1628-1683م) عالم ديال لفلك و لماط و لفلسفة.

مصادر

ويكيميديا كومنز عندا تصاور و معلومات على تارودانت.

هادي زريعة ديال مقالة خاصها تّوسع. تقدر تشارك ف لكتبة ديالها.