ببر بينݣالي
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
 مقالة ؤلا فقرة ناقصينها عيون لكلام.لمعلومات لّي ف هاد لمقالة ؤلا هاد لفقرة ناقصين ف توتيق، خاصّ يتزادو فيها عيون لكلام باش تكون موتوقة. شوف هنا كيفاش تزيد لعيون. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط! |
ببر بينݣالي
| ||
| ||
| معلومات عامة | ||
| سمية لعيلمية | Panthera tigris tigris (كارولوس لينيوس، 1758) | |
| لخاصية د ترتاب | نوع تحتاني | |
| تابع ل | ببر | |
| حالة د لحماية | ||
| خصايصو | ||
| كاياكل | جاور، صمبر، أيل أرقط، أيل المستنقع، جاموس الماء، نلجاي، سيرو، طاكن، خنزير بري، أيل خنزيري هندي، منتجق هندي و Semnopithecus entellus | |
| لخاريطة ديال فين عايش لكائن | ||
| ||
ببر بينݣالي هي نسمة من النوع التحتاني د لببر، پانطيرا تيݣريس تيݣريس (panthera tigris tigris) و من النواع التحتانيين لمرشحين د لببر. كايتعتابر واحد من لقطوط لبرّيين لكبار ݣاع لي باقيين حيّين. كايتقدّر بلي هوما حاضرين ف شبه لقارة لهندية من اللخر د لپلايسطوسين هادي 12,000 ل 16,500 عام تقريباً. لمادى التاريخي ديالو غطى وادي نهر السند حتى ل لبدية د لقرن 19، تقريباً لهند كاملة، غرب پاكيستان، جنوب نيپال، بانݣلاديش، بوطان و جنوب غرب الشينوا. ليوما، كايسكن ف لهند، بانݣلاديش، نيپال، بوطان، و جنوب غرب الشينوا. لببر لبينݣالي مهدد ب الصيادة اللاقانونية، خسران لموايل و تقسام لموايل.
على حساب 2022، النسمة د لببر لبينݣالي تقدّرات ف 3,167–3,682 فرد ف لهند، 316–355 فرد ف النيپال، 131 فرد ف بوطان و ف جوايه 114 فرد ف بانݣلاديش.
فيليس تيݣريس (felis tigris) كان السمية العلمية لي خدّمها كارل لينيوس ف 1758 ل لببر. من بعد تحط ف ݣنس پانطيرا (panthera) من ريدجنلد إينيس پوكاك ف 1929. لبينݣال هي لبلاصة التقليدية النوعية د هاد النوييع و النوع التحتاني لمرشح پانطيرا تيݣريس تيݣريس.
الشرعية ديال بزاف د نوييعات لببر ف آسيا لقارة تشكك فيها ف 1999. ب شكل مورفولوجي، لببور لي من مناطيق مبدلين كايتنوعو غير شوية، و التدفاق الجيني بينات النسمات ف هاد لمناطيق كايتعتابر ممكن ف وقيت لپلايسطوسين. عليها، تقتارح بلي كايخص يتعتارف غير ب جوج نوييعات شرعيين، لي هوما پ. ت. تيݣريس (p. t. tigris) د آسيا لقارة، و پ. ت. سونضايكا (p. t. sondaica) ف ݣزاير السوندا لكبيرة و واقيلا أرض السوندا. النوييعات لمرشحين پ. ت. تيݣريس مكوّنة من جوج تقسيمات: التقسيمة الشمالية فيها نسمات لببور السيبيريين و لقزوينيين، و التقسيمة الجنوبية لي فيها ݣاع نسمات لببور لقارّيين لباقيين. نسمات لببور لمنقارضين و لباقيين ف آسيا لقارة كاملين بيهم تخشاو ف پ. ت. تيݣريس ف لموراجعة ديال طاكسونوميا السنوريات ف 2017.
لحاصول ديال واحد التحليل جيني د 32 عيينة د لببر كايعطي بلي لعيينات د لببر لبينݣالي تݣروپاو ف تقسيمة مبدلة على لعيينات د لببر السيبيري.
لببر لبينݣالي كايتعرّف ب تلاتة د لمواطع ديال نيكليوتيدات ميطوكوندريين مفرّزين و 12 لآليلات ميكروساطيليتيين أونيك. نمط التبدال الجيني ف لببر لبينݣالي كايتوافق معا لفرضية بلي وصل ل لهند هادي 12,000 عام تقريباً. هادشي تابت معا نقصان د فوصيلات لببر ف شبه لقارة لهندية قبل من اللخر د لپلايسطوسين، و لغياب د لببور ف سريلانكا، لي تفرقات على شبه لقارة ب سباب الزيادة ف نيڤوات لبحر ف اللول د لهولوسين.
_Ranthambhore_India_12.10.2014.jpg)
فرو لببر لبينݣالي كايكون صفر حتى ل ليموني فاتح، ب خطوط كايتفاوتو من لقهوي غالق حتى ل لكحل؛ لكرش و الطراف الدخلانيين د الرجلين كايكونو ب لبيض، و لقزيبة ليمونية ب حلاقي كوحل. لببر لبيض كايكون مطفّر ب شكل منحّي (recessive mutant)، لي من خطرة ل خطرة كايتريپورطا بلي موجود ف برّيّة د آصام، بينݣال، بيهار و ب الضبط ف لولاية لفايتة د ريوا. وخا هاكداك، لحضور ديال هادشي ماشي ب سباب لالبينيزم. ف لحقيقية، كاينة غير حالة وحدة فرّادية موتقة كاملة ديال ببر آلبيني د بصح، و حتى حالة د لببور لكوحل، يمكن ب ستيتناء واحد د واحد لعيينة ميتة تقلّب فيها ف تشيطاݣونݣ ف 1846. ربعطاش الجلدة د لببر لبينݣالي ف لكوليكسيو د متحف التاريخ الطبيعي ف لندن فيهم 21–29 خط. واحد اللون خر د الطفرة لمنحّية هو لببر الدهبي لي عندو فرو دهبي كاشف ب خطوط قهويين غاديين ل لحمر. لببور لمطفّرين نادرين ب زايد ف لبرّيّة.
أغلض جمجومة د لببر كان فيها 351 ميليميطر ف الدكور و 293 مم ف النتوات. عندهم ب شكل ستيتنائي سنان فاخرين.نيابهم فيهم 7.5 حتى ل 10 سونتيميطر ف الطول و عليها عندهم النياب الطوْل بينات لقطوط.
كايتعتابر لببر لبينݣالي من لقطوط لبريين لكبار ݣاع لي باقي عايشين حتى ل دابا. دكور و نتوات لببر لبينݣالي ف ريزيرڤ لببور پانا عندهم الطول من الراس ل لكسدة 183–211 سونتيميطر و 164–193 سم ب شكل مرادف، زيد على هادشي عندهم قزيبة طولتها 85–110 سم. الطوطال د الطول كايتفاوت من 283–311 سم عند الدكور و 255–285 سم عند النتوات. كايتفاوتو ف لعادة ف لعلو د لكتاف من 90–110 سم.
الدكور التحت بالغين كايوزنو بينات 130 و 170 كيلوݣرام و كايوصلو ل 200–260 كݣ منين كايوليو بالغين؛ النتوات التحت بالغات كايوزنو بينات 80–100 كݣ و كايوصلو ل 110–180 كݣ منين كايوليو بالغات. ف وسط لهند، 42 دكر بالغ د لببر لبينݣالي وزنو ف لمتوسط 190 كݣ ب مفاوتة من 167 ل 234 كݣ؛ الطوطال د الطول كان 282 سم ب مفاوتة من 267–312 سم، و متوسط طول كتافهم كان 99 سم؛ 39 نتوا بالغة د لببر لبينݣالي وزنو ف لمتوسط 132 كݣ ب ماكسيموم د 156 كݣ، و لمتوسط ديال الطوطال د الطول كان 254 سم ب مفاوتة من 239 ل 277 سم. بزاف د لعولاما عطاو بلي دكور لببر لبينݣالي لبالغين ف الطيراي كان فيهم كتر من 227 كݣ ف تقل لكسدة ب شكل منتاضم. سبعة د الدكور لبالغين لي تشدّو ف محمية تشيطوان لوطنية ف لبدية د السبعينات كان عندهم تقل متوسط د 235 كݣ ب مفاوتة من 200 ل 261 كݣ، و د النتوات 140 كݣ، ب مفاوتة من 116 ل 164 كݣ. جوج ببور دكور تقبطو ف محمية تشيطوان لوطنية ف التمانينات فاتو التقل د 270 و هوما أكبر ببور مطلوقين فايت تشجلو.
لوزان لمشجلين الصغر ݣاع د لببور لبينݣاليين كانو ف السونداربانس د بانݣلاديش، فين النتوات لبالغات وزنو 75–80 كݣ.
تلاتة د لببرات من السونداربانس د بانݣلاديش وزنو 76.7 كݣ. النتوا لكبر ݣاع ف لعمر وزنات 75 كݣ و كانت لحالة د عيشتها خايبة ف لوقيتة د الشدان ديالها. الجمجومات و لوزان ديالهوم كانو مفرّزين على لببور لي ف موايل خرين، هادشي كايعطي بلي واقيلا تآضاپطاو على قبل الضروف لأونيك د موؤل لمانݣرووڤ (mangrove). لقدود الصغار ديالهم ف لغالب ب سباب التخليطة د لمنافسة داخل النوع و لقد الصغير د لفرايس لموجودين على قبل لببور ف السونداربانس، ب لموقارنة معا لأيل لكبير و لفرايس لخرين لموجودين ف لموايل لخرين د لببور.
"ببر ليدس" (Leeds Tiger) لي كايتعرض ف متحف مدينة ليدس، تتّيرا فيه ف 1860 حدا مسوري (Mussoorie)، كان طولة كسدتو 371 سم ف لوقيتة د موتو. جوج ببور تيراو فيهم ف إقليم كوماون (kumaon) ف اللخر د لقرن 19 ف لغالب تعبرو 370 سم. و لايني ف ديك لوقت، لمكلفين ب لعبارات كانو باقي ماتبناو السيسطيم السطونضار د لعبارات؛ شي وحدين عبرو 'بينات الرجلين' ف لوقيتة لي وحد آخرين عبرو 'حتى ل فوق التقويسات'. أكبر طول تعبر ديال جمجومة لببر كان 41.3 سم "فوق لعضم"؛ هاد لببر تتّيرا فيه حدا ناݣينا (nagina) ف شمال لهند.
ف لبدية د لقرن 20، واحد لببر الدكر تتّيرا فيه ف وسط لهند ب طول 221 سم د الراس و لكسدة، 150 سم ف لعرض د الصدر، 109 سم ف علو لكتاف و 81 سم ف الطول د لقزيبة، لي واقيلا معضوضة من شي دكر منافس. هاد لعيينة ماقدروش يوزنوها، و لايني قدّرو بلي وازنة جوايه 272 كݣ. واحد الدكر وازن 259 كݣ تتّيرا فيه ف شمال لهند ف عوام 1930. واحد لببر دكر تتّيرا فيه ف نيپال كان وازن 320 كݣ و كان عبارو 328 سم 'فوق التقويسات'. أتقل ببر برّي واقيلا كان واحد الدكر كبير بزاف ف لقد ف 1967 ف لكديات د سفوح لهيمالايا. كان وازن 388.7 كݣ مور ما كلا صغير د لݣاموس؛ كان عبارو 323 سم ف الطوطال د الطول عل الجلد، و 383 سم فوق التقويسات. و وخا بلا ماياكل صغير لݣاموس، ف لغالب غايكون وازن 324.3 علاقل. هاد لعيينة كاتعرض ف لكولوار د لانستيتسيو سميثسونيان. ف لاقاليم لوسطانيين د لهند، واحد لببر دكر تتّيرا فيه كان وازن 317 كݣ و كان عبارو 3.02 ميطرو.
لببر لبينݣالي كاينافس لببر السيبيري ف لمتوسط د التقل.
لمادى التاريخي د لببر لبينݣالي غطى وادي نهر السند حتى ل لبدية د لقرن 19، تقريباً ݣاع لهند، غرب پاكيستان، جنوب نيپال، بانݣلاديش، بوطان، و جنوب غرب الشينوا. كايتقدر بلي هوما مازال حاضرين ف شبه لقارة لهندية من اللخر د لپلايسطوسين، شي 12,000 حتى ل 16,500 عام تقريباً. ف 1982، واحد الشبه فوصيل د لفالونج (phalanx) لوسطاني ليمني تصاب ف واحد الزبالة ماقبل تاريخية حدا كوروويطا ف سريلانكا، لي التاريخ ديالو جوايه 16,500 عام هادي و كايتعتابر ديال لببر. كايبان بلي لببور وصلو ل سريلانكا ف لوقيتة د شي پيريوض شتوانية (pluvial period)، لي كانو فيها نيڤوات لبحر نازلين، و هادشي واضح بلي طرا قبل من لماكسيموم الجليدي اللخراني (last glacial maximum) 20,000 عام هادي تقريباً. ف لغالب لببر وصل معطل بزاف ل جنوب لهند باش يمكن ليه يستعمر سريلانكا، لي كانت قبل مكونيكيطية معا لهند ب قنطرة أرضية. لحاصول ديال واحد الديراسة فيلوجغرافية ب تخدام 134 عيينة د لببور على طول لمادى لعالمي ديالهم كاتعطي بلي لحد د التوزيع التاريخي الشمال شرقي د لببر لبينݣالي هي لمنطاقة د لكديات السفحيين د تشيطاݣونݣ و حوض نهر براهماپوطرا، لي مفارقاه معا لحدود د لمادى التاريخي ديال لببر اللاندوشيني. ف شبه لقارة لهندية، لببور لبينݣاليين كايسكنو ف لغابات الستيوائيين لفازݣين دايمين لخضورة، لغابات الستيوائيين الناشفين، لغابات الستيوائيين و شبه ستيوائيين لفازݣين طياحين لوراق، لمانݣروڤات، لغابات شبه ستيوائيين و لمعتادلين لفوقانيين، و تيرات الربيع لآلوڤيين (alluvial). هاد لموؤل اللخراني واحد لوقت غطى مساحة عملاقة د تيرات الربيع، و لغابات النهريين لفازݣين النص طياحين لوراق على طول السيسطيم النهري اللولاني ديال كديات لݣانجا و لبراهماپوطرا، و لايني دابا ردو هاد لموؤل د لفلاحة و تضهور ب شكل شديد. ليوما، أحسن إيكزومپل ب النسبة ل هاد النوع د لموؤل محصور ف شي بلوكات صغار ف لقاعيدة د لكديات السفحيين لبرانيين د لهيمالايا منها وحدات (Units) لمحافضة على لببر راجاجي-كوربيت، بارديا-بانكي، و وحدات لمحافضة على لببر لعابرين لحدود تشيطوان-پارسا-ڤالميكي-ڤالميكي، دودوا-كايلالي و شوكلافانطا-كيشانپور. لكتافات د لببر ف هاد لوحدات د لمحافضة زايدة ف شي بلايص ب سباب لبيوماص (biomass) لهايلة ديال لحوافريات.
ف پاكيستان، خيرپور كانت آخر موؤل د لببور ف اللخر د لقرن 19؛ لببر اللخراني تتّيرا فيه ف 1906 ف باهاوالپور ف الدغال النهريين د السند.
ف لقرن 20، ليحصاءات لهنديين د لببور لبريين عوّلو على لمعرفة د كل فرد ب لبصمة د الرجل، هادشي معروف ب سمية علمات پوݣ (pug marks) – لي هي واحد لميطود تنتاقدات ب صيفتها بلا مفعول و ماشي إيكزاكط. كاميرات د لمكيدة هوما لي ولاو كايتخدّمو دابا ف بزاف د لمواضع.
موايل لببور لمزيانين ف لغابات شبه ستيوائيين و لمعتادلين منهم وحدات لمحافضة على لببر ماناس-نامضافا. و.م.ب ف لغابات الستيوائيين الناشفين منهم خيرية لحياة لبرية هازاريباݣ، ريزيرڤ لببور ناݣارجونساݣار-سريسايلام، پاساجات كانها-إيندراڤاتي، غابات أوريسا الناشفين، محمية پانا لوطنية، ريزيرڤ لببور ميلݣاط و ريزيرڤ لببور راطاپاني. وحدات لمحافضة على لببر ف لغابة الستيوائية لفازݣة طياحة لوراق ف لغالب وحدين من أكتر لموايل ف لمنتوجية ب النسبة ل لببور و فرايسهم، منهم ريزيرڤات لببور كازيرانݣا-ميݣالايا، كانها-پينش، سيمليپال و إيندراڤاتي. و.م.ب ف لغابات الستيوائيين لفازݣين دايمين لخضورة كايمتلو لموايل الشايعين ب شكل قل د لببر، محصورين ب شكل كبير ف لبلايص لفوقانيين و لقنات الرطبين د ݣات لغربية، بحال ريزيرڤات لببور پيرييار، كالاكاض-مونداتوراي، بانديپور و خيرية لحياة لبرية پارامبيكولام.
_female.jpg)
ف لوقيتة د واحد ليحصاء د لببور ف 2008، كاميرا لمكيدة و السكانينݣ د السينيالات خدمو سيسطيم لمعلومات الجغرافيين (GIS) لي توضف باش يقدّر لكتافات لمضبوطين على حساب لموضع د لببور، لمفتارسين التانويين و لفرايس. على حساب النتايج د هاد الستيطلاعات، النسمة الطوطال د لببور تقدرات ب 1,411 لفرد مفاوتين من 1,165 ل 1,657 ببر بالغ و تحت بالغ لي عمرهم كتر من 1.5 عام. على طول لهند، ستة د لكومپليكسات تضاربسيين لي تسكاناو و لي مضيّفين لببور و عندهم حتيمال باش يتكونيكطاو. هاد التضاريس كايشملو لموايل الجايين:
- ف السهول لفيضانيين د ݣانجا-سيڤاليكس موجودين ستة د النسمات، لقد د كل نسمة مقدّر ب 259 حتى ل 335 فرد ف مساحة د 5,080 كم² ديال لموايل لغابويين، لي كاينين ف محميات راجاجي و كوربيت لوطنيين، ف لموايل لمكونيكطيين د دودوا-كيري-پيليبهيت-پيليبهيت، ف ريزيرڤ لببور سوهيلوا، ف خيرية سوهاݣي باروا و ف محمية ڤالميكي لوطنية؛
- ف لاراضي لعاليين ف وسط لهند كاينين 17 النسمة، لقد د كل نسمة مقدّر ب 437 حتى ل 661 فرد ف مساحة د 48,610 كم² ديال لموايل لغابويين. لي فيهم التضاريس د كانها-پينش، ساطپورا-ميلݣاط، سانجاي-پالاماو، ناڤيݣاون-إيندراڤاتي؛ النسمات لمعزولين كايدعموهم ف الريزيرڤ د لببور بانضاڤݣاره، طاضوبا، سيمليپال، و لمحميات الطبيعيين د پانا، رانثامبوري–كونو–پالپور–مادهاڤ و سارانضا؛
- ف التضاريس د ݣاتس الشرقية كاينة غير نسمة فرّادية ب قد د النسمة مقدّر ب 49 حتى ل 57 فرد ف مساحة د 7,772 كم² د لموؤل ف تلاتة د لبلوكات غابويين مفارقين كاينين ف محمية سريڤينكاطيشوارا لوطنية، ريزيرڤ د لببور ناݣارجوناساݣار، و محمية لببور لوطنية لمقتارحة ݣوندلا براهميشوارا، و لبقع لغابويين ف مقاطعات كانيݣيري، باضڤيل، أوضاياݣيري، و ݣيضالور؛
- ف تضاريس ݣاتس لغربية كاينين سبعة د النسمات ب قد د النسمة مقدّر ب 336 حتى ل 487 فرد ف بلاصة غابوية د 21,435 كم² ف 3 د لوحدات تضاريسيين ساسيين، پيريار–كالاكاد–مونضاتوراي، بانديپور–پارامبيكولام–ساتيامانݣالام–موضامالاي–آنامالاي–موكورتي و آنشي–كودريموك–ضانديلي؛
- ف السهول لفيضانيين د براهماپوطرا و لكديات الشمال شرقيين لببور كايعيشو ف مساحة د 4,230 كم² ف بزاف د لغابات لي مقسمين و بحال لبقع؛
- ف محمية سونداربانس لوطنية لببور فيها كايعيشو ف مساحة 1,586 كم² تقريباً د غابة لمانكروڤ.
وحدات لمحافضة على لببر لي ف شمال شرق لهند، ماناس–نامضاپها، أورانݣ–لاوكهوا و كازيرانݣا–ميݣهالايا، مجبدين ل 14,500 كم² تقريباً على طول بزاف د لبلايص لمحميين. لببور عاوتاني حاضرين ف ريزرڤ پاكي د لببور. ف تلال ميشمي، لببور تشجلو ف 2017 ف علو واصل حتى ل 3,630 ميطرو ف التلج. محمية رانطامبوري لوطنية كاتضيّف أقصى نسمة غربية د لببور ف لهند. غابة ضانݣ ف جنوب شرق ݣوجارات موؤل محتامل د لببر.
ف ماي 2018، واحد لببر تشجل ف ريزيرڤ ساهيادري د لببور ل لمرة اللولى من تمن سنين. ف فبراير 2019، واحد لببر تقشع ف لبلاصة د لوناڤانضا ف ݣوجارات ف مقاطعة ماهيساݣار، و من موراها ب شوية تصاب ميّت. لمسؤولين فتارضو بلي لببر مأصل ف الريزيرڤ راطاپاني د لببور و سافر شي 300 كم ل مدة عاماين. ف لغالب غايكون مات ب الجوع. ف ماي 2019، كاميرات لمكيدة شجلو ببور ف خيرية الحياة لبرية مهاديي و خيرية بهاݣوان ماهاڤير و محمية موليم لوطنية ف ݣوا لي كان فيها أول تشجال من عام 2013.
لببور ف السونداربانس ف لهند و بانݣلاديش هوما بوحديتهوم ف لعالم لي كايعيشو ف غابات لمانݣروڤ. النسمة د السونداربانس لهندية تقدّرات ب 86_90 فرد ف 2018.
على حساب 2014، النسمة لهندية د لببور تقدّرات بلي كاتفاوت ف مساحة د 89,164 كم² ب 2,226 بالغ و تحت بالغ كبر من عام. شي 585 ببر كانو حاضرين ف ݣاتس لغربية، فين الريزيرڤات راضهاناݣاري و ساهيادري كانو عاد تصاوبو. أكبر نسمة سكنات ف ريزيرڤ كوربيت د لببور كانو فيها شي 215 لببر. نسمة لببور لي ف وسط لهند مقسمة و معوّلة على پاساجات لحياة لبرية لي كاتسهل لملاقية بينات لبلايص لمحميين. ف 2018، النسمة تزادت ب 2,603–3,346 فرد مقدّر. على حساب 2022، النسمة لهندية تقدّرات كاتجمع 3,167–3,682 فرد.
ف بانݣلاديش، لببور دابا تكمشو ف لپاساجات د لكديات ف غابات سونداربانس و تشيطاݣونݣ. غابة تشيطاݣونݣ محادية معا موؤل لببور ف لهند و ميانمار، و لكن لحالة د النسمة ديالهوم مامعروفاش.
على حساب 2004، تقديرات النسمة ف بانݣلاديش كاتفاوت من 200 ل 419 لفرد، لغالبية فيهم ف السونداربانس. هاد لمنطاقة هي لموؤل د لمانݣروڤ لفرّادي ف لمنطاقة لبيو، فين النمور ناجيين، ب لعومان من ݣزيرة ل ݣزيرة ف الديلطا باش يصيدو لفرايس. لقسم لغابوي لبانݣلاديشي ولا كايزيد زريع النباتات د لمانݣروڤ باش يوفرو لعلف ل لأيل لمنقط. من 2001 و زريع لغابات باقي مكمل ب وتيرة صغيرة ف السونداربانس. من أكتوبر 2005 حتى ل يناير 2007، أول ستيطلاع د كاميرا د لمكيدة تدار على طول ستة د لمواضع ف سونداربانس د بانݣلاديش باش يقدّرو كتافة النسمة د لببور. لمتوسط د هاد الستة مواضع عطى تقدير د 3.7 ببور ف 100 كم². مادام السونداربانس لبانݣلاديشية شادة مساحة 5,770 كم²، تستنتج بلي النسمة الطوطال د لببور فيها تقريباً شي 200 فرد. لمادى اللوكال د نتوات لببور لبالغات تشجل بلي فيه بين 12 و 14 كم²، هادشي لي واقيلا كايشير ل واحد لكاپاسيطي تقريبية ديال 150 نتوا بالغة. لمادى اللوكال الصغير د لببرات لبالغات و لي ب سبابو كاينة واحد لكتافة طالعة د لببور ف هاد النوع د لموؤل ب لموقارنة معا بلايص خرين يقدر يكون مرتابط ب لكتافة الطالعة د لفرايس و لقد الصغير د ببور السونداربانس ب جوج.
من 2007، حضية د لببور تشرف عليها كل عام من عند وايلد تيم (WildTeam) ف السونداربانس لبانݣلاديشية باش يحضيو التبدالات ف نسمة ببور السونداربانس و تقييم لمفعولية د مجهودات لمحافضة. هاد الستيطلاع كايقييس التبدالات ف لفريكونص د مسارات لببور ف الجوانب د مجاري لما لمديين و الجزريين كا موؤشر نسبي د كترة د لببور على طول التضاريس د السونداربانس. ف 2009، نسمة لببور ف السونداربانس لبانݣلاديشية تقدّرات ب 100–150 ببرة بالغة ولا 335–500 ببر ب شكل عام. تشجل لمادى اللوكال د النتوات ب تخدام سناسل د الجي پي إس، فين كاينين أصغر لببور لمشجلين، هادشي كايعطي بلي السونداربانس د بانݣلاديش تقدر تكون عندها وحدة من لكتافات الطالعين و النسمات لكبار ݣاع د لببور ف أي بلاصة ف لعالم. هوما معزولين من نسمة لببور لمحاديين ب مساحة تقدر توصل حتى ل 300 كم. ماكاينينش معلومات كافيين ف بزاف د الجوانب على لإيكولوجيا د ببور السونداربانس، منهم لكترة النسبية، حالة د النسمة، الديناميات د ليسپاص، عزيلة لموؤل، لخصايل د التاريخ لحيوي، الطاكسونوميا، الجينات، و لمراض. ماكاينش عاوتاني حتى پروݣرام د لحضية واجد باش يتبع التبدالات ف نسمة لببور من وقت ل وقت، و عليها ماكاينة حتى طريقة ف قياس ستيجابات النسمة على لأنشيطة د لمحافضة و التهديدات. لغالبية د الديراسات ركزات على الصيراع بين لببر و بنادم ف هاد لبلاصة، و لايني جوج ديراسات ف خيرية لحياة لبرية الشرقية ف السونداربانس وتقو نماط تخدام لموؤل عند لببور، و لكترة د فرايس لببور، و واحد الديراسة خرة قلبات ف عمارة (load) لپارازيطات لي كاتقيس لببور. شي تهديدات كبار على لببور تعرفو. لببور لي عايشين ف السونداربانس مهددين ب تخراب لموايل، خسران لفرايس، لمنافسة الدخلانية د النوع لعنيفة ب زايد، الصراع بين لببر و بنادم، و لقتيلة الديريكت د لببر. ف 2017، هاد النسمة تقدّرات ب 84–158 فرد. على حساب 2018، تقدّر بلي 114 لفرد كايعيشو ف لبلاد.
الطليع ف نيڤوات لبحر ب سباب التبدال لموناخي تحط ب صيفتو غايكون السبب ف خسران شديد ف لموايل الصالحين ل هاد النسمة ف لعقود الجايين، ف جوايه 50٪ ف 2050 و 100٪ ف 2070.
.jpg)
نسمة لببور ف منطاقة طيراي ف نيپال مفروقة ل تلاتة النسمات التحتانيين لمعزولين لي مفارقين ب لاراضي لفلاحيين و لموايل لمستوطنين ب شكل كتيف. النسمة لكبر كاتعيش ف محمية تشيطوان لوطنية و ف محمية پارسا لوطنية لي محادية هادشي كايشمل مساحة د 2,543 كم² من غابة د لاراضي لهابطين اللولانيين. ف جيهة لغرب، نسمة تشيطوان معزولة على ديك لي ف محمية بارديا لوطنية و لموؤل لمامحميش لي محادي ف أقصى لغرب، و لي مجبد 15 كم ف ريزيرڤ لحياة لبرية شوكلافانطا، لي فيها النسمة الصغيرة ݣاع.
من فبراير ل يونيو 2013، واحد الستيطلاع د كاميرا د لمكيدة تشرف عليه ف تضاريس طيراي آرك، ف مساحة د 4,841 كم² ف 14 لمقاطعة. نسمة لببور ف لبلاد تقدّرات ب 163–235 بالغ كايتجاوج ب جميع 102–152 ببر ف لبلايص لمحميين د تشيطوان–پارسا، 48–62 ف محميات بارديا–بانكي لوطنيين و 13–21 ف محمية شوكلافانطا لوطنية. مابين نونبر 2017 و أبريل 2018، الستيطلاع لوطني الشامل التالت على قبل لببور و لفرايس تدار ف تضاريس طيراي آرك؛ النسمة د لبلاد تقدّرات ب 220–274 ببر. على حساب 2022، 316–355 فرد تقدّر بلي كايعيش ف لبلاد.
ف بوطان، توتقو لببور ف 17 لمقاطعة من 18. كايسكنو السفوح الشبه ستيوائيين د لهيمالايا ف علو د 200 ميطرو ف الجنوب ل ما كتر من 3,000 ميطرو ف لغابات لمعتادلين ف الشمال. لبلاصة لمزيانة ديالهم كاتبان بلي كاينة ف لحزام لوسطاني د لبلاد بينات نهر مو ف لغرب و نهر كولونݣ ف الشرق ف علوات كايتفاوتو بين 2,000 ميطرو حتى ل 3,500 ميطرو. ف 2015، نسمة لببور ف بوطان تقدّرات ب 103 فرد.
محميات روايال ماناس و جيݣمي سينݣيي وانݣتشوك لوطنيين كايكوْنو أكبر بلايص د لمحافضة محاديين ف بوطان، لي كايجمعو نواع لموايل الشبه ستيوائيين و لآلپينيين (alpine). ف 2010، كاميرات لمكيدة شجلو واحد لكوپل د لببر ف علو د 3,000 حتى ل 4,100 م. على حساب 2015، نسمة لببور ف بوطان تقدّرات ب 89 حتى ل 124 فرد ف ستيطلاع شد مساحة د 28,225 كم².
ف 2008، واحد لببر تشجل ف علو د 4,200 م ف محمية جيݣمي ضورجي لوطنية، لي هو أكتر تشجال تتورخ ل ببر ف علو زايد. ف 2017، واحد لببر تشجل ف لوقت لي دوزو ف خيرية لحياة لبرية بومديلينݣ. ف لغالب داز من پاساجات لحياة لبرية باش يوصل ل شمال شرق بوطان.
نسمة لببور ف بوطان تقدّرات ف 90 فرد لي فيهم 60 نتوا و 30 دكر ب كتافة النسمة تقدّرات ب 0.19–0.31 ببر ف 100 كم² ف مارس 2015. على حساب 2022، النسمة تقدّرات ف 131 فرد.
لحضور د لببر لبينݣالي ف لمنطاقة د جنوب شرق التيبيت لي حاكما راسها ف الشينوا تقلب فيه ف 1995 منين طرا واحد لخسران د لكسيبة كبير ف إقليم ميضوݣ سبابو مفتارس كبير. لبصمات د كف لببر تلقاو ف مروج ف شلا ڤيلاجات. واحد لببر تتّيرا فيه ف 1996، و شي 4–5 لببور تريپورطاو من لمسؤولين ف هاد لبلاصة ف 1999. و شي 8–12 لببر تشافو بلي بقاو ف هاد لبلاصة شي عقد مورا هادشي. كاميرات لمكيدة و واحد الستيطلاع دخلاني ف لوقيتة بين 2013–2018 ف تسعود لمواضع لمحتاملين ف إقليم ميضوݣ ورقو بلي غير 1–3 د لفراد لي ماساكنينش واقيلا دخلو ل لبلاصة جنوب نهر يارلونݣ تسانݣپو، و لايني غير ف لوقيتة د لموسم الناشف من أكتوبر ل مارس. ف لبدية د 2019، واحد لببر بينݣالي تصور جوج خطرات ف علو د 2,000 م ف واحد لغابة عريضة لوراق ف الريزيرڤ الطبيعية لوطنية د وادي يارلونݣ تسانݣپو لكبير.
_-_Koshyk.jpg)
لوحدة الجتيماعية الساسية ديال لببر مكوْنة من نتوا و صغارها. لبالغين كايجمّعو معا بعضياتهم غير ب شكل وقتي منين شي ضروف خاصين كايسمحو ب هادشي، بحال لموارد لكتيرين د لماكلة. من غير هادشي، عيشتهم خلوية، و كايصيدو ب شكل فردي على ود فرايس د لغابة و د التيرات لفازݣين. لبالغين لي ساكنين من الجناس ب جوج كايخلّيو لمادى اللوكال ديالهم، هادشي لي كايحصر من لحركة ديالهم باش يحددو لموايل لي كاتقنّع لحتياجات ديالهم و ديال صغارهم، بحال لفرايس، لما و السكنة. ف هاد لموضع، دايماّ كايبقاو ف كونطاكط معا ببور خرين، خصوصاً هادوك لي من الجنس لاخر. لببور لي كايشركو نفس لرض، كايكونو عايقين مزيان ب لوجود، التحروكات، و لأنشيطة د بعضياتهم. ف محمية تشيطوان لوطنية، لببور التحت بالغين لمطوقين ب الراديو (radio-collared) بداو يتفرّقو من لبلايص لي خلاقو فيهم بكري ف عمر 19 شهر. و من 14 لببر تحت بالغ لي تدرس فيهم، الربعة د النتوات بقاو قرْب ل لمادى اللوكال د مهم ب لموقارنة معا 10 د الدكور. اللّخرين تفرّقو بينات 9.5 و 65.7 كم. حتى حد فيهم ما قطع من لبلايص لفلاحيين لمحلولين لي زيْد من 10 كم ف لعرض، و لايني تحركو من وسط لموايل لغابويين و لآلوڤيين (alluvial).
ف ريزيرڤ پانا د لببور، واحد لببر دكر بالغ مطوق ب الراديو تحرك ل 1.5 حتى ل 10.5 كم بينات لمواضع ف يام متابعين ف فصل الشتا، و 1 حتى ل 13.9 كم ف الصيف. لمادى اللوكال ديالو كان ف جوايه 200 كم² ف الصيف و 110 كم² ف الشتا. و جمع لمادى اللوكال ديالو مادى لوكال صغر ديال جوج نتوات، ببرة ب صغارها و ببرة تحت بالغة. كاملين بيهم شدو مادى لوكال مابين 16 و 31 كم².
.jpg)
لمادى اللوكال لي شادينو دكور بالغين ساكنين كايميل باش يكون حصري ب شكل مشروك، و يقدر شي ببر من الساكنين يتسامح ݣاع معا شي ببر دايز ولا شي دكر تحت بالغ علاقل ل شي وقت. دكر لببر كايخلّي زون كبيرة باش يقدر يجمع لمادى اللوكال د بزاف د النتوات وسط لحدود ديالو، باش يخلّي ليه حق لمجاوجة معاهم. لمباعدة بيانات النتوات مكمولة ب شكل قل. كاين ف لعادة تداخل جزئي بينات النتوات الساكنات الجارات. كايميلو باش يكون عندهم بلايص قاعديين، لي كايكونو حصريين كتر، علاقل ف لغالبية د لوقت. لمادى اللوكال ديال الدكور و النتوات ب جوج ماكايكونش تابت. التكحاز (shift) ولا التبدال د لمادى اللوكال من شي ببر كايكون مرتابط ب التكحاز د شي ببر خر. التكحاز من شي موؤل قل ف لمواتية ل موايل حسن كايتدار من لببور لي كايكونو أصلاً ساكنين. لببور الجداد كايوليو ساكنين غير ف لوقيتة منين كايكون لمادى خاوي/مطلوق (vacant)، منين شي ببر ساكن كايرحل ولا كايموت. موجودين بلايص كتر ل النتوات الساكنات على الدكور الساكنين.
ف لوقيتة ديال سبع سنين ديال التصوار ب كاميرا د لمكيدة، التتباع (tracking)، و الضونيات د لحضية ف محمية تشيطوان لوطنية، ستة حتى ل تسعود لببور لمجاوجين، جوج حتى ل سطاش لببر مامجاوجش، و ستة حتى ل عشرين ببر صغير قل من عام ف لعمر تديطيكطاو ف مساحة د الديراسة فيها 100 كم². وحدة من النتوات الساكنات خلات الزون ديالها ل وحدة من بناتها و هرفات على واحد لبلاصة محادية ب التجرية على نتوا خرة؛ و واحد النتوا مجريين عليها عرفات كيف تسكن عاوتاني ف واحد الزون قريبة لي ولات مطلوقة ب سباب لموت د شي ببر ساكن. من 11 النتوا ساكنة، 7 بقاو حيين ف وقيت لمسالية د الديراسة، جوج غبرو مورا ما خسرو الزونات دياولهم ضد لمنافسين، و جوج ماتو. لخسران لبدياني ديال جوج دكور ساكنين و لهريف لي جا موراه على لمادى اللوكال ديالهم من دكور جداد سبب واحد التزعزيع جتيماعي ل عاماين. من ربعة د الدكور ساكنين، واحد بقا حي و تلاتة تجرّا عليهم من لمنافسين. خمسة د لبيبرات الرضّاع تقتلو ب سباب قتيلة الطفال (infanticide)، جوج رضّاع ماتو حيتاش كانو صغار بزاف باش يضيپانيو ريوسهم منين ماواتهم ماتو. واحد لببر يافع تفتارض بلي مات من بعد ما تصوّر ب جرحات شداد ب سباب السلوكا د لمكيدة (snare) لي مديورين على قبل لأيل. الصغار لي بقاو عاشو كتر ب شكل كافي باش يوصلو ل عمر التفراق، جوج منهم ولاو ساكنين ف لبلاصة د الديراسة.
لببر لبينݣالي لحايمي و كايخيّر الصيادة ديال لحوافريات لكبار بحال لݣاور (gaur)، أيل الصامبار، لأيل لمنقط، أيل لݣلتات، ݣاموس لما، النيلݣاي (nilgai)، السيرو (serow)، و الطاكن (takin). لفرايس موسطين لقد منهم لحلوف لبري، لأيل لحلوفي لهندي، لمونتجاك لحمر لهندي (indian muntjac) و قرد اللانݣور الرمادي د السهول الشماليين. لفرايس الصغار كيف النيص لهندي بو عرف، الرنب، و الطاوس كايصايبو طرف صغير من الريجيم ديالو. ب سباب لهريف د بنادم على لموايل ديالو، لببر لبينݣالي عاوتاني كايفرس لكسيبة لمربية.
لببر لبينݣالي كايصييد و كايقتل شي مرّات لمفتارسين بحال النمر لهندي، تمساح لماݣر، الدب لكحل لآسياوي، الدب لمعݣاز، و الضول. هوما ب شكل عام ماكايآطاكيوش لفيال لهنديين لبالغين و وحيدات لݣرن لهنديين، و لايني هاد لوقايع النادرين ب شكل شديد فايت تشجلو. ف محمية كازيرانݣا لوطنية، لببور قتلو 20 وحيد لݣرن ف 2007. ف 2011 و 2014، جوج لحضات تشجلو ديال ببور بينݣاليين و هوما كايقتلو فيال بالغين؛ ف محمية دجيم كوربيت لوطنية على فيل عمرو 20 عام، و واحد لفيل آخر مريض ف عمرو 28 ف محمية كازيرانݣا لوطنية؛ هاد الفيل اللخراني تكال من بزاف د لببور ف دقة وحدة. واحد لبو سكة/لكوبرا ملكة (ophiophagus hannah)، واحد لكوبرا هندية (naja naja)، ورْل لما لآسياوي (asian water monitor)، زعطوط\ماكاك الريزوس، لحوت، لعقريش، و بشكل نادر بزاف لقطوط لحواتين (fishing cats) و لفكارن تلقاو ف لمعدة و لخرا د لببور ف السونداربانس. واحد لببر ف محمية تشيطوان لوطنية تريپورطا بلي صيّد تلاتة د تماسح لݣاريال.
نتايج تحاليل د لخرا عطات بلي لببور لبينݣاليين ف محمية ناݣاراهولي لوطنية فضلو لفرايس لي وازنين كتر من 176 كݣ و لوزن لمتوسط د فرايس لببر كان 91.5. نواع لفرايس منهم لأيل لمنقط، أيل الصامبار، لحلوف لبري و لݣاور. الشياطا د لݣاور تلقاو ف 44.8٪ من ݣاع عيينات لخرا د لببور، الشياطا د الصامبار كانت 28.6٪، د لحلوف لبري 14.3٪ و د لأيل لمنقط 10.4٪ من ݣاع عيينات لخرا. ف محمية بانديپور لوطنية، لݣاور و الصامبار ب جوج صاوبو 73٪ من ريجيم لببر.
ف لغالبية د لحالات، لببور لبينݣاليين كايقربو ل لڤيكتيم ديالهم من الجناب ولا اللور من مسافة قريبة قد ليمكان و كايقبطو لفريسة من قرجوطتها باش يقتلوها. من بعد كايجرو الجيفة ل شي بلاصة مضرّقة، ف شي مرات كايجروهم ل مياوات لميطروات، عاد كايكونسوميوهم. الطبيعة د ميطود لببر ف الصيادة و لوفرة ولا الشح د لفرايس كايوديو ل واحد الستيل د لماكلة لي "يا فيشطا يا مجاعة": دايماّ كايكونسوميو 18–40 كݣ د اللحم دقة وحدة. ف واحد الديراسة، لببرات من نيپال دارو 40–50 قتلة تقريباً ف لعام و كلاو مينيموم ديال 5–6.3 كݣ د اللحم ف ليوم. جوج دكور دارو 40–50 قتلة تقريباً ف لعام و كلاو 6.3–7.8 كݣ د اللحم ف ليوم علاقل.
لببور لبينݣاليين يلا تعطبو، ولا شرفو، ولا ولاو ضعاف، ولا منين كايوليو نواع لفرايس لي مولفينهم نادرين، كايبداو دايماّ يهجمو على بنادم و كايتآضاپطاو باش يوليو وكالين بنادم.
لببور ف لهند ماعندهومش شي مجاوجة إيكزاكط و مواسم لولادة. جل الصغار كايتولدو ف دجنبر و أبريل. شي صغار تصابو عاوتاني ف مارس، ماي، أكتوبر و نونبر. ف عوام 1960، شي جناب فلانيين من سلوك لببر ف محمية كانها لوطنية تورّاو، الدروة د النشاط الجنسي كان من نونبر ل جوايه فبراير، ف لوقيتة لي شي مجاوجات طراو على طول لعام.
الدكور كايبلغو ف عمر 4–5، و النتوات ف عمر 3–4. ببرة بينݣالية كاتجيها الدورة لوداقية (لمعروفة زنقاوياً ب "الشالور") ب شكل مقطع ل شي 3–9 د السيمانات، و كايكونو واجدين ل لملاقية ل 3–6 يام. من مورا لوقيتة د لحبيل (gestation) لي من 104–106 يام، كايتولدو 1–4 د لبيبرات ف بلاصة مستورة ف وسط الربيع الطويل، الشجيرات لكتيفين ولا لغيران. لبيبرات لي عاد تولدو كايوزنو 780 حتى ل 1,600 ݣرام و كايكون عندهم واحد لفرو مصوّف و غليض لي كايبدا يطيح من بعد 3.5–5 الشهور. عينيهم و ودنيهم كايكونو مسدودين. سنان لحليب ديالهم كايبداو يخرجو ف جوايه 2–3 السيمانات من مورا الزيادة، و ب شوية ب شوية كايبداو يجيو بلاصتهم سنان دايمين ف عمر 8.5–9.5 السيمانات. كايرضعو ل 3–6 الشهور، و كايبداو ياكلو كميات صغار د لماكلة لقاصحة ف جوايه شهراين ف لعمر. ف هاد لوقيتة، كايوليو يتبعو مهم ف لخرجات د الصيادة و كايبداو يعاونو ف التصياد ف 5–6 الشهور ف لعمر. ف عمر 2–3 سنين، كايبداو يتفرقو ب شوية ب شوية على لفاميلة ديالهم و كايوليو دايزين (transient)، و هوما كايقلّبو على بلاصة فين يقدرو يديرو الساس ل لمادى اللوكال لمملوك ديالهم. الدكور الشابين كايتحركو بعْد من لمادى اللوكال لخلوقي ديالهم ب لموقارنة معا النتوات الشابات. غير لفاميلة كاتفرّق، لم كاتجيها الشالور عاوتاني.
حتى شي تضاريس د لمحافضة على لببر وسط لمادى د لببر لبينݣالي ما كبار ب شكل كافي باش يدعمو واحد لقد د النسمة فعّال ديال 250 فرد. خسران لموايل و لوتيرة لكبيرة ب زايد د حالات الصيادة اللاقانونية تهديدات خطيرين على النجو ديال النوع.
لاكط د حقوق لغابة لي تپاصا من لحكومة لهندية ف 2006 عطى لحق ل شي ناس من أفقر الجماعات ف لهند باش يملكو و يعيشو ف لغابات. هادشي لي ف لغالب كايزيد حتيمال ديالهم باش يديرو صيراعات معا لحياة لبرية و السطاف د قسم لغابة لي ناقص ف التكوين، و ف لموارد، و ف ليكيپمو. شحال هادي، لبراهن وراو بلي بنادم و لببور مايمكن ليهمش يتعايشو معا بعضياتهم.
التهديد لكبير ݣاع لي كايهدد وجود نسمات لببر لبري هي التجارة اللاقانونية ف لحياة لبرية د الجلود لمهربين و طراف لكسدة بينات لهند، نيپال و شينوا. لحكومات د هاد لبلدان سقطو ف خشيان ستيجابات تنفيديين ب شكل كافي، و الجريمة د لحياة لبرية بقات عندهم أولاوية هابطة ف داكشي لي عندو علاقة معا اللتيزام السياسي و الستيتمارات ف هاد لغرض من هادي عوام. كاينين عصابات منضمين مزيان ديال الصيادين اللاقانونيين لپروفيسيونيل، لي كايمشيو من بلاصة ل بلاصة و كايخييمو ف بلايص محسوسين. الجلود كايتعاجو ف لحقول و كايعطيوهم ل لبياعا، لي كايسيفطوهم يتدار ليهم معالجة كتر ف الصونطرات لهنديين ديال الدباغة. الشرايا كايعزلو الجلود من لبياعا ولا ديور الدباغة و كايهربوهم من واحد الشبكة معقدة د التوصال ل السواق برا لهند، ب شكل ساسي ف الشينوا. عاواميل خرين كايعاونو ف خسرانهم هوما الزحيف لمديني (urbanisation) و لقتيلة د التار. لفلاحا كايلومو لببور على لقتيلة د لبݣر و كايتيريو فيهم. جلودهم و طراف كسدتهم يقدرو يوصلو وخا هاكداك ب شي طريقة ل الصيادا اللاقانونيين. ف بانݣلاديش، لببور كايتقتلو من صيادا پروفيسيونيل، الصيادا اللوكال، صحاب لمكايد و الناس د لڤيلاجات. كل ݣروپ د الناس عندهم موتيڤات مبدلين علاش بغاو يقتلو لببور، كايتفاوتو من الربح لمادي و التفلية ل لغراض د السلامة.
الطلب اللاشرعي د عضام و طراف كسدة لببر على قبل تخدامهم ف الطب التقليدي الشينوي هو السباب ف الضغط لي باقي مكمل ديال الصيادة اللاقانونية على لببور ف شبه لݣزيرة لهندية. من ألف عام هادي علاقل، و عضام لببر موكوين ف الطب التقليدي لي كايتوصفو ب صيفتهم مقويات د لعضلة و دوا د الروماتيزم و حريق لكسدة.
ما بين 1994 و 2009، مجتمع حماية لحياة لبرية د لهند وتّق 893 حالة ببور تقتلو ف لهند، لي ف لحقيقة غير طرف صغير من الصيادة اللاقانونية و التهريب د لببور ف لوقيتة د هاد لعوام. ف 2004، ݣاع لببور لي ف ريزيرڤ لببور ساريسكا تقتلو من الصيادا اللاقانونيين. ف 2007، لبوليس ف اللّه أباد غفل واحد لملاقية ديال الصيادا اللاقانونيين، لمهربين و لكورييرات لمشبوهين. واحد من الناس لموقوفين كان الشراي لكبير ݣاع د طراف لببر لهندي لي ب راسو كايبيعهم ل الشرايا الشينويين، ب تخدام لعيالات من لقبايل النوماض كا كورييرات. ف 2009، حتى ببر من ال24 ببر لي ساكنين ف ريزيرڤ لببور پانا ما بقى ب سباب الصيادة اللاقانونية لفايتة لقياس. ف نونبر 2011، جوج ببور تصابو ميّتين ف ماهاراشطرا: واحد لببر دكر وحل و تقتل ف السلوكا د لمكيدة؛ واحد لببرة ماتت ب التريسينتي من مور ما مضغات واحد لكابل إليكطريك لي كايمد الطاقة ل واحد لبومبا د لما؛ ببرة خرة لقاوها ميتة ف ريزيرڤ لببور كانها و تشك بلي ماتت ب السم. ف 2021، لبوليس د بانݣلاديش وقف صياد لاقانوني مشبوه ف لقتيلة ديال 70 ببر بينݣالي على طول 20 عام.
شبه لݣزيرة لهندية دات الشمعة ب صيفتها لبلاصة د لمدابزات الشداد بين لببور و بني آدم. ف لبدية د لقرن 19 لببور كانو شلاّ، ل درجة ولات قتيلة لببور كايتخاد عليها لفلوس ف بزاف د اللوكالات. منطاقة طيراي سوپورطات واحد لعدد كبير د لببور لي تبزز عليهم يهربو لموايل هامشيين من مور لخمسينات، منين ردو لموؤل الطبيعي ديالهم تيرّات د الروز ب شكل متزايد. و من ديك لوقيتة لببور بداو يسلبو حياة بنادم ف لبلايص لي كايتداخل فيهم لمادى اللوكال د لببر معا التيرات لفلاحيين. كانو كايتشافو بلي كايتبعو لكسيبة لمربية لي كاتدوز الشتا ف السهول و منين كاترجع ل التلال ف الربيع، لببور كايبقاو بلا فريسة منين لقطعان كايتسيفطو ل لڤيلاجات د ماليهم. هاد لببور كانو من الشارفين، الصغار، و لمعوقين. كاملين بيهم دوزو شي تعويقة، ف لغالب يامّا ب سباب الجروح د شي فردي ولا الشوك د شي نيص.
ف السونداربانس، 10 من 13 لببر وكال د بنادم لي تشجلو ف عوام 1970 كانو دكور، و تحطات عليهم اللومة ف لقتيلة د 86٪ من لڤيكتيمات. هاد لببور وكالين بنادم تݣروپاو ل لببور لموكدين (confirmed) ولا لببور لمختصين (dedicated) لي كايشوفو بنادم فريسة؛ و لببور النتيهازيين (opportunistic)، لي ماكيقلبوش على بنادم ولايني يلا تلاقاو معا بنادم، كايهجمو عليه، كايقتلوه، و كايفرسوه. ف بلايص فين تلقاو لببور وكالين بنادم النتيهازيين، لقتيلة د بنادم تربطات ب لوفرة ديالهم، لغالبية د لڤيكتيمات تضيكلاراو ف وقيت موسم جميع لعسل. و تفتارض بلي لببور ف السونداربانس هجمو على بنادم لي دخلو ل الزونات دياولهم باش يقلبو على لخشب، لعسل ولا لحوت، هادشي لي خلّا لببور يدافعو على الزونات دياولهم. لعداد د هجمات لببور على بنادم يقدرو يكونو زايدين برّا لبلايص لمواتيين د لببر، فين كايكون لبشر بزاف، و ف نفس لوقت فرايس بريين قلال ل لببور.
ف نيپال، لحالات د ببور وكالين د بنادم كانو مفرقين و صافي. ف محمية تشيطوان لوطنية حتى حالة ماتشجلات قبل من 1980. ف الشوية د لعوام لمواليين، 13 لواحد تقتل و تكال ف لمحمية و الجنابات دياولها. ف لغالبية د لحالات، لببور وكالين بنادم بانو بلي عندهم علاقة معا لمنافسة الدخلانية بينات الدكور. واحد الستيطلاع د لانطيرڤيو معا 499 واحد من الناس اللوكال ف تشيطوان ورى بلي الطبقة التحتانية من لهيندوس و الناس لي عندهم تعليم مدرسي قل من تمن سنين كان عندهم تعامل سلبي معا لببور؛ جلهم كانت عندهم كسيبة و فات ليهم سمعو بلي شي ببور كايهجمو على بنادم و لكسيبة.
ف دجنبر 2012، واحد لببر تتّيرا فيه من لقسم لغابوي د كيرالا ف واحد لموضع فلاحي د لقهوة ف لحواشي د خيرية واياناض د لحياة لبرية. لمسؤولين د لحياة لبرية ف كيرالا أمرو ب تصياد لببر من مور لحتيجاجات لكبار لي زندو ف لوقيتة لي لببر بدا يدّي لكسيبة. لقسم لغابوي صايب واحد لقوة خاصة باش يقبطو لببر ب لمعاونة ديال 10 د ل أعضاء من لقوة لخاصة د حماية لببر و جوج فيال هنديين مدريسيين من ريزيرڤ لببور بانديپور ف كارناطاكا.
واحد لبلاصة مهمة موجودة ف "تضاريس طيراي آرك" ف السفوح د لهيمالايا د شمال لهند و جنوب نيپال، فين 11 لبلاصة محمية مكونة من سفوح غابويين ناشفين و صاڤانات د الربيع الطويل كاتسكّن لببور ف مساحة تضاريس د 49,000 كيلوميطر مربع. لغرض من لبلايص لمحميين هو ردّان لببور كا نسمة شبه مفرقة (metapopulation)، التفراق ديالهم بينات لملاجئ الساسيين يقدر يعاون ف السيادة ديالهم الجينية، الديموغرافية، و لإيكولوجية، و التوكاد بلي النوع و لمحافضة على لموؤل ديالو ولاو مخشيين ف آجيندات التنمية لقروية. ف نيپال، واحد لموضيل سياحي مبازي من لموجتاماع تصاوب ب تركيز مجهد على تقسام الرباحات معا الناس اللوكال و تجداد لغابات لمدهورين. هاد لموقاربة نجحات ف نقيص الصيادة اللاقانونية، ف ترجاع لموايل، و ف لمصاوبة ديال دائرة نتيخابية على قبل لمحافضة.
الصندوق لعالمي د الطبيعة (WWF) دار شراكة معا لممتل ليونارضو دي كاپريو باش يفورميو واحد لحملة عالمية "عتقو لببور دابا"، ب واحد لغرض طموح ديال لمصاوبة د واحد الدعم سياسي، مادي، و شعبي باش يقدرو يدوبلو النسمة د لببر ف 2022. عتقو لببور دابا بدات لحملة ديالها ف 12 التضاريس أولوية عند لببر تابعين ل الصندوق لعالمي د الطبيعة من ماي 2010.
هاد النسمة من لببر وقع ليها تقييم ف النيڤو اللوكال ف بزاف د لبلدان. لببر لبينݣالي مليستي مهدد ف نيپال، لهند، و بوطان، أما ف بانݣلاديش و الشينوا مليستي مهدد ب شكل شديد.
ف أبريل 2023، لهند سنات مدكرة مفاهمة معا كامبوديا باش يعاونو لبلاد ف معاودة تدخال لببر. علاقل 90 فدان (36 ݣطار) د جبال كارضاموم ف لخيرية لبرية طاطاي تحطو باش يضيّفو لببور لي تآمپورطاو من لهند. آخر ببر ف كامبوديا تصوّر ف 2007 ب كاميرا د لمكيدة. ف 2016، لحكومة لكامبودية علمات بلي نسمة لببر اللاندوشيني "نڨارضات فعلياً".
ف 1973، مشروع لببر تلونصا كايهدف ضمان واحد النسمة د لببور تقدر تبقى تعيش ف لبلاد و لمحافضة على لبلايص لي عندهم أهمية بيولوجية ب صيفتهم ورت طبيعي ديال الناس. لقوة لخاصة د لمشروع تخايلو هاد الريزيرڤات د لببور كا نواة د لمجاوجة، لي منهم كايتفرقو لببور لي كتارو ل لغابات لمحاديين. كاتّمتّل لعزيلة د لبلايص باش يردوهم ريزيرڤات ف التنواع د السيسطيمات لإيكولوجيين على طول التوزيع د لببر ف لبلاد. التمويلات و اللتيزامات تحطو باش يدعمو هاد لپروݣرام لمشدّد ديال حماية لموايل و معاودة الصليح تحت مساطر د لمشروع. ف اللخر د التمانينات، الريزيرڤات التسعود اللوالا غطاو مساحة 9,115 كيلوميطر مربع تزادو ل 15 الريزيرڤ مغطيين مساحة 24,000 كم². كتر من 1100 ببر تقدّرو كايسكنو الريزيرڤات ف 1984.
ب سباب هاد لمبادرة، النقصان د النسمة تقلب ب شكل بدياني، و لكن ف لعوام اللخرين بدات كاتنقص عاوتاني؛ نسمة لببر ف لهند نقصات من 3,642 ف عوام 1990 ل غير كتر من 1,400 من 2002 ل 2008.
لاكط لهندي ديال لحياة لبرية ف 1972 خلّا ل وكالات لحكومة لحق ياخدو إجراءات صارمة باش يضمنو لحماية ديال لببر لبينݣالي تقديرات معهد لحياة لبرية ف لهند وراو بلي عداد لببور طاحو ف مادهيا پراديش ب 61٪، ماهاراشطرا ب 57٪، و راجاستان ب 40٪. ليحصاء لحكومي د لببر اللول، لي تدار تحت مبادرة مشروع لببر بدا ف 1973، حسب 1,827 ببر ف لبلاد ف داك لعام. ب تخدام لمنهجية، لحكومة قشعات واحد زيادة تابتة ف النسمة د لببر لي وصلات ل 3,700 ببر ف 2002. غير هو، التخدام د وسايط مستاقلين و موتوقين د طيكنولوجيا ليحصاء لي بحال كاميرات لمكيدة على قبل إحصاء 2007–2008 د لهند كاملة ورى بلي لعداد ف لحقيقة كانو قل من النص ب لمقارنة معا ليحصاء لأصلي لي تحط من لقسم لغابوي.
من مور ما تعرف بلي غير 1,411 ببر بينݣالي موجود ف لبرية د لهند، لي نقص من 3,600 ف 2003، لحكومة لهندية حطات تمنيا د الريزيرڤات الجداد د لببر. ب سباب التكماش د عداد لببور، لحكومة لهندية وعدات ب 153 مليون ضولار باش تموّل مزيان مبادرة مشروع لببر، ب حطان واحد لقوة د حماية لببر باش يتباطاو معا الصيادا اللاقانونيين، و باش يموّلو معاودة تسكان د ما كتر من 200,000 من ناس لڤيلاجات ف بلايص جداد باش يقللو من التفاعولات بين بنادم و لببر. ف 2022، لخيرية لبرية رانيپور تضيكلارات ب صيفتها ريزيرڤ لببور ال54.
ف يناير 2008، حكومة لهند لونصات واحد لقوة ديديكي ضد الصيادة اللاقانونية مكوّنة من خوبارا من لبوليس، مسؤولين د لغابة و بزاف د لوكالات لبيئيين خرين. محمية رانطامبوري لوطنية دايماّ كايتستشهد بيها ب صيفتها نجاح كبير د لمسؤولين لهنديين ف لحرب ضد الصيادة اللاقانونية.
كونو-ئدپالپور ف مادهيا پراديش عولو عليها باش تدخّل السبوعا لآسياويين من ݣوجارات. ماحد حتى سبع ما تطرونسفيرا من ݣوجارات ل مادهيا پراديش حتى ل دابا، عوض هادشي تقدر تخدّم كا خيرية د لببور.
لببور لبينݣاليين كايترباو ف لكاپتيڤيطي من عام 1880 و تكروز ب شكل كبير معا ببور من بلدان خرين لي داخلين ف لمادى ديالو.
ف يوليوز 1976، بيلي آرجان سينݣ جاب واحد لببرة مربية على ليد من حديقة حيوانات توايكروس ف لمملكة لمتحدة، و عاود دخلها ل لبريّة ف محمية دودهوا لوطنية ب لإدن د لوزيرة اللولى د لهند إنديرا ݣاندي. ف عوام 1990، شي ببور من هاد لبلاصة تقشعو بلي عندهم مضهر نوعي د لببور السيبيريين، كيف الراس لكبير، لفرو لباهت، لبشرة لبيضة، و لخطوط لعراض، و تشكك بلي هوما تكرويزة د لببور السيبيريين–لبينݣاليين. عيينات د زغب لببر من لمحمية لوطنية تدارو ليهم تحليل ب تخدام التحليل د التسلسيل لميطوكوندري. الريزولطا ورى بلي هاد لببور لي تسقصى فيهم كان عندهم واحد لهاپلوتيپ (haplotype) ميطوكوندري د شي ببر بينݣالي هادشي لي كايعطي بلي مهم كانت ببرة بينݣالية. الجلد، الزغب، و عيينات من الدم د 71 ببر تجمعو من حديقة حيوانات هندية، ف لمتحف لهندي، كولكاطا و ب حسبان جوج عيينات من محمية دودهوا لوطنية تخدّمو على قبل واحد التحليل د لميكروساطيليت وراو بلي جوج ببور كان عندهم آليلات (alleles) ف جوج مواضع (loci) لي جاو من لببور لبينݣاليين و السيبيريين. وخا هاكداك، لعيينات ديال جوج ببور مكروزين صاوبو واحد لقاعيدة د لعيينات صغيرة بزاف باش يتفتارض ب شكل قطعي بلي طارا كانت السورس د جينات لببر السيبيري.
حدايق لحيوانات لهنديين رباو لببور ل لمرة اللولانية ف حديقة لحيوانات عليپور ف كولكاطا. كتاب لپيديݣري (studbook) الدولي د لببور د عام 1997 ليستا النسمة لعالمية لكاپتيڤ ديال لببور لبينݣاليين ف 210 لفراد لي كاملين مخلّيينهم ف حدايق لحيوانات لهنديين، من غير واحد النتوا ف أمريكا الشمالية. التكمال د كتاب لپيديݣري د لببر لبينݣالي لهندي متطلب ضروري ف لمصاوبة ديال پروݣرام تسييري على قبل لببور لكاپتيڤ ف لهند.
وايلدتيم (WildTeam) خدّامة معا لوجتاماعات اللوكال و لقسم لغابوي لبانݣلاديشي باش ينقصو الصيراع بين لببر و بنادم ف السونداربانس لبانݣلاديشية. هادي كتر من 100 عام و لبشر، لببور، و لكسيبة كايتبليساو و كايتقتلو كا ضحايا د هاد الصيراع؛ ف لعقود اللخرين كتر من 50 بنادم، 80 راس د لكسيبة، و 3 لببور كايتقتلو كل عام. دابا، ب سباب لخدمة د وايلدتيم، كاين واحد لفرقة د الستيجابة لمقر ديالها كاين ف فلوكة لي كايعطيو معاونة لولانية، الطرونسپور، و و سوپور ف ترجاع لكسدات ديال الناس لي ماتو ف لغابة ب سباب شي ببر. وايلدتيم حطو عاوتاني 49 فرقة ستيجابة د لمتطوعين د لڤيلاج لي مطرينيين باش يعتقو لببور لي توضرو ف لڤيلاجات و لي يقدرو يتقتلو. هاد لفراقي د لڤيلاج فيهم كتر من 350 متطوع، لي هوما دابا عاوتاني كايدعمو لخدمة ضد الصيادة اللاقانونية و لأنشيطة د التربية/التوعية على لمحافضة. زيد وايلدتيم كاتخدم باش تقوي لوجتاماعات اللوكال باش يدخلو ل الصندوق لحكومي باش يعوضو خسران/توْعات ديال لكسيبة و لبشر من هاد الصيراع. باش يحضيو الصيراع و يقييمو لمفعولية د لخدمة، وايلدتيم حطو عاوتاني واحد السيسطيم د الضيكلاراسيو و تجماع الضونيات د الصيراع بين لببر و بنادم.
ف ماي 2010، تصايبات محمية بانكي لوطنية ب قد د 550 كم². لحكومة ڤيزات التدوبيل د نسمة لببور د لبلاد معا عام 2022 ف مؤتمر لقمة لعالمي د لببور ف 2010. نسمة لببور وصلات ل 355 ف 2022، و على بونت باش تطريپلي نسمة لي كان فيها 121 ببر ف 2009.
ف 2000، مشروع معاودة د التصوڤيج (re-wilding) د لببر لبينݣالي بداه دجون ڤارتي، لي هو و الزولوجيست دايڤ سالموني طريناو ب بيبرات مربيين كاپتيڤ كيفاش يتليدو، يصيدو، و كيفاش يربطو التصياد معا لماكلة و يرجّعو غرايزهم د لفريس. على حساب هضرتهم غير لببور يوليو يبينو بلي ولاو قادرين يضيپانيو ريوسهم ف لبريّة، غادي يتطلقو ف لمادى لمطلوق د لخيرية لبرية د جنوب إفريقيا باش يعييْشو ريوسهم.
لمشروع نوض بلبالة من مور لتيهامات ديال لمستتمرين ديالهم و لخدامين ف لمحافضة ب التلاعب ب سلوك لببور على غرض لينتاج د واحد لفيلم، ب لعيشة معاهم، و كاين لي كايشوف بلي هاد لببور ماكايعرفوش يصيدو. ستوورت براي، لي ف لأصل ستتمر واحد لقد كبير من لفلوس على ود لمشروع، قال بلي هو و مرتو، لي تشوان، شافو طاقم لفيلم"[كايجريو مورا] لفريسة حتى ل السياج و كايزييدوها ف طريق لببر غير على قبل شي تصوير درامي"
الربعة د لببور لي مشمولين ف هاد لمشروع تكونفيرما بلي هوما تكرويزة بين لببور لبينݣاليين و السيبيريين، لي ماخصهومش يتخدّمو لا ف لمجاوجة لا يتطلقو ف منطاقة كاروو. لببور لي ما نقيينش جينياّ ماكايتكاليفاوش باش يدخلو ف لبلان ديال النجو د لببور، حيتاش ماكايتخدموش ف لمجاوجة، و ما مسموحش ليهم يتطلقو ف لبرية.
لببر واحد من لحيوانات لي تعرضو ف ختم پاشوپاتي د حضارة وادي السند. لببر عاوتاني هو الرمز د سوانت التشولا (chola). كايعطي لحضور ديال بزاف السوانت د ببر، حوتة، و قوس د النبل بلي هوما قضايا د سلالة تشولا.
ليوما، لببر هو لحيوان لوطني د بانݣلاديش و لهند. لفلوس لورقيين د بانݣلاديش كايوريو واحد لببر. لحزب السياسي رابطة لمسلمين ف پاكيستان حاط النمر كا لوݣو د النتيخابات ديالهم. تيپو سلطان، لي حكم مملكة ميسور ف اللخر د لقرن 18، كان حتى هو مولوع ب هاد لحيوان. لأوطوماط (automaton) لمشهور د لقرن 18، ببر د تيپور حتى هو تصايب على ودو. لببر كان رمز سلالي ديال هاد السلالة لحاكمة. ف لوقيتة ديال التورة لهندية ف عام 1857، مجلة پانتش (punch) لبريطانية عرضات واحد لكارتون سياسي كايبين الروبالا (rebels) لهنديين كا ببر كايهجمو على لڤيكتيم.
- لأونطاݣونيست الساسي ف كتاب الدغال (jungle book)، شيريخان، ببر بينݣالي.
- كتاب "وكالين بنادم ديال كوماون" (man-eaters of kumaon) مبازي على ببور و نمور وكالين بنادم ف إقليم كوماون.
- ف الريواية د لفنطازيا و لمغامرة لحياة د پي (life of pi) و ف لآضاپطاسيو لفيلمية ديالها د عام 2012، كاين واحد لببر بينݣالي سميتو ريتشرد پاركر هو الشخصية لبطلة.
- مسراحية لببر لبينݣالي ف حديقة لحيوانات د بغداد (the bengal tiger at the baghdad zoo) تبازا على قصة د بصح ديال واحد لببر لي هرب من لحديقة د لحيوان د بغداد ف 2003 و بدا كايجول ف شوارع بغداد و هو كايقلب على لمعنى د لحياة.
- لأرض لمخسورة د لببر (the lost land of the tiger) هو ضوكيمونطير د بي بي سي على لببور ف بوطان.
لفيلم لهندي د 2014 زئير – ببور د السونداربانس كايضور على واحد لببرة بينݣالية بيضة ف السونداربانس