ويكيپيديا ب الداريجة
ويكيپيديا لمغريبية ولا ويكيپيديا ب دّاريجة، هيا ڤيرسيون ديال لموسوعة ويكيپيديا ب داريجة لمغريبية، تدارت ف 20 يوليوز 2020.[1][2] و وصل عدد لمقالات ديالها نهار 9 أكتوبر 2026 ل 20,369 مقالة، و ف لمجموع 109,796 صفحة، ب 590,339 تبديل. كاينين فيها 21,898 خدايمي مقيّد و 59 خدايمي مداوم (لي دارو تبديل ف شّهر لّخر) ، ب لإضافة ل 4 ديال إمغارن (إداريين).
ف يونيو 2023، ويكيپيديا ب دّاريجة تشافت كتر من 640.000 مرة، لي مامحسوبينش فيهوم شّوفات ديال بوتات ؤلا پروݣرامات ؤطوماتيكية. ؤ ف لمجموع تّقراو لمقالات د ويكيپيديا لمغريبية كتر من 20 د لمليون مرة من نهار بدات ف يوليوز 2020.[3]
هاذ المشروع جا من بعد ما رتافعت العديد من الأصوات لي كتنادي بالكتابة بالدارجة باش الناس كاملة تفهم و المعلومة توصل بطريقة مباشرة و قريبة للمتلقي، الشي لي خلا فعلا الشركات ف المغرب يلتجؤو للاشهارات بالدارجة، نفس الشي بالنسبة للنشرات الاخبارية الطارئة و لي خاص يفهمها ڭاع الناس فجميع المستويات و الأعمار (حملة التحسيس ضد كورونا كمثال). [مصدر؟]
ف 2008، كانت ويكيپيديا ب دّاريجة بدات، بحال بزاف د لويكيپيديات لوخرين، ف لانكوباتور (ب لعربية الحاضنة)، لي هوّا سيت خاص تابع ل مؤسسة ويكيميديا كيتدارو فيه لمشاريع د ويكيميديا لي باقين ف لمرحلة تّجريبية.[4] بزاف لي خدمو عليها ف لبدية كانو تابعين ل مشروع كتب داريجة، ؤ كانت لكتابة فيها ب لأساس ب لحروف لّاتينية، وخا بقات نوع د لفوضا ف لكتابة بشكل عام.[5] لمشروع ماتنضّم مزيان تال 2019، فاش بدات لخدمة عليه بشكل جدي، و تڤاليدا الطلب ديال لخروج الرسمي ديالها، و تنفّد ف 20 يوليوز 2020. الناس لي كيكتبو ف ويكيپيديا ب الداريجة فيهوم مغاربا ديال الداخل و ديال لخاريج.[4]
ف ماي 2021، كان لمجموع د شّوفات د ويكيپيديا ب دّاريجة وصل ل 900.000 من نهار بدات.[6]
ف 2023، مابين 25 أبريل و 10 يونيو، ويكيميديا لمغريب نضّمات مسابقة ديال لكتابة ف ويكيپيديا ب اللوغات د لمغريب (لعربية، تاشلحيت و الداريجة) لي يقدر يشارك فيها أي واحد، و لهدف ديالها إغناء لمحتوى لمغريبي ف لأنتيرنيت.[7]
جوج د لأبحات لي صدرو ف 2022[8] و 2023، و قارنو مابين ويكيپيديا ب الداريجة و ويكيپيديا ب لعربية و ويكيپيديا ب لمصرية، بيّنو بلي النسخة ديال الداريجة صغيرة ف عدد لمقالات ديالها (جوايه 5000 تال 6500 فاش تدارو الدراسات بجوج)، ولاكين لمحتوى ديالها "كيمتّل التقافة و التعبير ديال الناطقين ب اللوغة لأم"، ف لوقت لي النسخة لمصرية كبيرة ف حجمها، ولاكين لمحتوى ديالها سطحي، حيت مولّد ف أغلبيتو بشكل ؤطوماتيكي. النسخة لعربية هيّ لوحيدة من بين التلاتة لي كاتجمع مابين لحجم لكبير و التمتيلية لمزيانة ديال اللوغة لي مكتوبة بيها، و هادشي كيخليها مناسبة ل تطبيقات ديال لپروصيصاج د اللوغة الطبيعية NLP.[9]
- 20 يوليوز 2020: لبدية د السيت بشكل رسمي.[10]
- 1 غشت 2020: ويكيپيديا ب الداريجة وصلات 1194 مقال (أول إحصاء ديال عدد لمقالات ديالها ف ميطاويكي).[11]
- 7 غشت 2020: ويكيپيديا ب الداريجة فاتت 10000 تبديل.[11]
- 23 غشت 2020: ويكيپيديا ب الداريجة فاتت 2000 مقال.[11]
- 24 أكتوبر 2020: ويكيپيديا ب الداريجة فاتت 1000 خدايمي مقيّد.[12]
- 31 غشت 2021: ويكيپيديا ب الداريجة فاتت 100 ألف تبديل.[13]
- 2 مارس 2022: ويكيپيديا ب الداريجة فاتت 5000 مقال.[14]
- 18 أبريل 2024: ويكيپيديا ب الداريجة فاتت 10000 مقال.[15]
- دابا: ويكيپيديا ب الداريجة فيها 20,369 مقال.
لكتاتبيا لي خرّجو ويكيپيديا ب دّاريجة من لانكوباتور:
- أناس السدراتي
- رضا بنخضرة
- رشيد أورقية
- عبد الرحمان آيت علي
- أمين تيفراتين
ويكيپيديا ب دّاريجة:
- فيها كتر من 84000 صفحة (منهوم مقالات، تصنيفات، موضيلات، صفحات د شّرح ؤ لمعاونة...)
- تكتبو ف لمقالات ديالها ل حد سّاعة كتر من جوج د مليون و 380 ألف كلمة
- تشافو صّفحات ديالها كتر من 39 د لمليون مرة من نهار بدات (9 د لمليون ديال قاريين بنادم)
- Moroccan Darija Wikipedia: Basics of Natural Language Processing for a Low-Resource Language مؤرشف 2024-09-09 فموقع وايباك ماشين
- Guokan Shang, Hadi Abdine, Yousef Khoubrane, Amr Mohamed, Yassine Abbahaddou, Sofiane Ennadir, Imane Momayiz, Xuguang Ren, Eric Moulines, Preslav Nakov, Michalis Vazirgiannis, Eric Xing (2024). "Atlas-Chat: Adapting Large Language Models for Low-Resource Moroccan Arabic Dialect". arXiv. doi:10.48550/arXiv.2409.17912.
{{cite journal}}: CS1 maint: multiple names: authors list (link) - Anass Sedrati, Reda Benkhedra, Mounir Afifi (2025). "Standardizing Darija: Collaborative approaches in the Moroccan Darija Wikipedia". Lingua Posnaniensis. doi:10.14746/linpo.2025.67.1.4.
{{cite journal}}: CS1 maint: multiple names: authors list (link) - Safouane Boudakkou; Abdelaaziz El Hibaoui (2026). "AryWiki-Instruct: A high-fidelity instruction tuning dataset for Moroccan Arabic (Darija)". Data in Brief. 68. doi:10.1016/j.dib.2026.113140. ISSN 2352-3409.
هادو مجموعات د الداطا مبنيين على ويكيپيديا ب الداريجة:
- ↑ Yousra Jaa (10 يونيو 2021). "La darija fait son entrée dans Wikipédia". medias24.com (ب الفرنسية).
- ↑ "Create Moroccan Arabic Wikipedia" (ب الإنجليزية). Archived from the original on 2023-08-15. Retrieved 2021-09-26.
- ↑ "إحصائيات د ويكيپيديا ب دّاريجة مابين يوليوز 2020 ؤ يوليوز 2026".
- 1 2 "Wikipédia se décline en darija, le dialecte marocain". 2021-06-13. Retrieved 2024-01-11.[ليان مهرس ديما]
- ↑ مداكرة:الصفحة اللولا
- ↑ "How can editing contests support smaller Wikipedias? (Arctic Knot Conference 2021)". 22 يونيو 2021. Archived from the original on 16 نونبر 2022.
- ↑ "عربيةٌ وأمازيغية ودارجة.. مسابقة تطور محتوى "ويكيبيديا" حول التجربة المغربية". 2023-04-24. Archived from the original on 13 غشت 2023. Retrieved 2023-08-05.
- ↑ الشهراني, سعيد; والي, عصمة; ماثيوز, جينا (8 دجنبر 2022). "Learning From Arabic Corpora But Not Always From Arabic Speakers: A Case Study of the Arabic Wikipedia Editions". Proceedings of the The Seventh Arabic Natural Language Processing Workshop. doi:10.18653/v1/2022.wanlp-1.34. Retrieved 2024-01-11.
- ↑ الشهراني, سعيد; الشهراني, نورة; ديي, سوميابراتا; ماثيوز, جينا (7 دجنبر 2023). "Performance Implications of Using Unrepresentative Corpora in Arabic Natural Language Processing" (PDF). Proceedings of the The First Arabic Natural Language Processing Conference. نيويورك: Department of Computer Science, Clarkson University: 218–231. Retrieved 2024-01-11.
- ↑
{{cite web}}: Empty citation (معاونة) - 1 2 3
{{cite web}}: Empty citation (معاونة) - ↑
{{cite web}}: Empty citation (معاونة) - ↑
{{cite web}}: Empty citation (معاونة) - ↑
{{cite web}}: Empty citation (معاونة) - ↑ "Wikimedia News/2024". Retrieved 2025-04-11.
 |
ويكيميديا كومنز عندا تصاور و معلومات على ويكيپيديا ب الداريجة. |