ويكيميديا لمغريب

مجموعة لخدايميا ويكيميديا لمغريب ولاً ويكيميديا لمغريب هي مجموعة د الناس اللي تاتشجع وتعاون التخدام د مشاريع ويكيميديا فلمغريب. لمجموعة رسمية وتاتعتارف بيها لمؤسسة د ويكيميديا فميريكان, اللي هي لمؤسسة اللي تاتسيًر لمشاريع د ويكيميديا كاملة.

تأسسات ويكيميديا لمغريب نهار 6 أكتوبر 2015, وأسسوها رضا بنخضرة واسماعيل زنيبر وأناس السدراتي. لهدف د لمجموعة هو لمعاونة د ݣاع لمشاريع د ويكيميديا اللي هي إما كاينا فلمغريب ولاً عندها علاقة بلمغريب بشكل مباشر ولاً لا. بحال دابا, بزاف د لأعضاء د ويكيميديا لمغريب هوما من الناس اللي تيكتبو فويكيپيديا بالدارجة وتيطوروها باش تكبر.

الرئيس د ويكيميديا لمغريب د دابا هو رضا بنخضرة.

لأهداف

لهدف لأساسي د ويكيميديا لمغريب هو تساهم فالتنقيح و التحسين و الدعم د لمعرفة والثقافة لحرًة.^[1] هادشي تادًيرو بالتطوير د لوسائط لمعرفية خصوصا أي محتويات اللي مصايبة باللغات اللي كاتًهضر فلمغريب بحال الدارجة ولأمازيغية ولعربية ولفرانساوية ولينݣليزية والصبليونية على حساب لحاجة ولمواضيع.

لأنشطة

تاتنظم ويكيميديا لمغريب بزاف د لأنشطة فإطار لأهداف ديالها, منها أنشطة تاتعاود, وأنشطة اللي كانت غي فوقت واحد.

أنشطة اللي دازت

نظمات ويكيميديا لمغريب عدد د لأنشطة اللي كانت فوقت واحد وحضروليها بزاف د الناس. هاد لأنشطة هي:

2 صالونات ستراتيجية - (2019 - لمحمدية / 2020 - الرباط) عطاو فيه لمشاركين الرأي ديالهم على ستراتيجية ويكيميديا 2030.
مؤتمر ويكي عربية 2019 (مراكش) - اللي هو أكبر مؤتمر د ويكيميديا فلمنطقة د شمال إفريقيا والشرق لأوسط وجمع كتر من 80 واحد مهتمين بوكيميديا ولمشاريع ديالها فلمنطقة كاملة.

أنشطة تاتًعاود

تاتنظم ويكيميديا لمغريب بزاف د لأنشطة اللي تاتًعاود, يعني را تدارت وغادي تعاود تًدار. منها:

إديتاثون وورشات - لمعاونة د لويكيپيديين الجداد باش يتعلمو يكتبو فويكيپيديا.^[2]
اجتماعات - للناس اللي تيكتبو فويكيپيديا فلمغريب باش يتلاقاو بيناتهم ويتبادلو لأفكار.
مسابقات د التحرير - باش يشجعو الناس يكتبو فويكيپيديا وباش يشجعو يجيو ناس جداد.
رحلات التصوير والمسابقات - باش يتشجعو الناس يديرو تصاورهم الحرة كتر فمشاريع ويكيميديا.
ويكي ݣاپ (بشراكة مع السفارة د السويد) - فمارس من كل عام تيتجمعو عدد من الناس وتيكتبو فويكيپيديا على عيالات مغريبيات.