ويكيپيديا:لملحوضية

هادي صفحة ديال لْحكام د لموسوعة. هاد صّفحة محمية و مايمكنش يبدل فيها غير مستخدم أمغار. يلا بغيتي تقتارح شي تبديل ف لْحكام ديال لملحوضية، حلّ شي حلقة د نّيقاش ف لبرلمان ولا حلّ شي حلقة ف صّفحة د إمغارن.

روابط نقاشات لمصادقة: 1 -

لملحوضية ولّا لموسوعية هيّا مفهوم ف ويكيپيديا لي كيحدد لقبول ديال شي موضوع باش يكون عندو مقال ديالو ف ويكيپيديا. لملحوضية ماشي ضمانة بلي موضوع غادي يكون عندو مقال خاص بيه، ولاكين هيّا شرط أساسي. شّروط د لملحوضية كيقدرو يتبدّلو علا حساب نّوع د لموضوع (بيوڭرافيا، ختيراع، مفهوم، ؤ غيرهوم)، ولاكين كاين شرط لي ضاروري يتوفر ف جميع لحالات، هوّا لوجود ديال مصادر مستاقلة ؤ مقبولة، لي ف لحالة د لأشخاص ؤ لمؤسسات، ماصادراش علا شّخص ؤلا لمؤسسة لي كايپروفيليهوم لمقال. لملحوضية ديال أي موضوع تقدر تّناقش مابين لكتاتبيا، ؤ أي كتاتبي عندو لحق يطرح لملحوضية ديال شي مقال تحت مسوال، ؤ يفتح مداكرة عليها ف صّفحة د لمداكرة ديال لمقال براسو. ف هاد لحالة، خاص يتزاد لموضيل موضيل:ملحوضية بشكل مناسب ف لفوق د صّفحة د لمقال، حتا تّسالا لمداكرة علا لملحوضية د لموضوع. يلا تّقبل لمقال بلي عندو ملحوضية، كيتحيد لموضيل. سينو علا حساب لقرار لّخراني، كيتزاد بلاصتو موضيل:دمج ؤلا موضيل:تحياد.

لملحوضية ديال موضوع د مقال ماعندهاش علاقة معا لجودة د لكتبة ديالو. يقدر يكون موضوع مكتوب بشكل عيان ؤ بلا مصادر عندو ملحوضية، ؤ موضوع أخور مكتوب ب ؤسلوب واعر ؤ متقون ماعندوش ملحوضية ؤ خاصو يتّدمج ف مقال أخور ؤلا يتحيّد. لملحوضية ديال موضوع د مقال كاتّحدّد ضونك ماشي ب لمقال براسو، مي ب تحقيقو ل شّروط د لملحوضية بغض نّاضار علا شنو مكتوب ف لمقال (طالما لموضوع واضح).

لوجود ديال مقال ف وحدة من لويكيپيديات لكبار (لي فايتين مليون مقال ؤ لعمق ديالهوم فايت 100)، كاتعطي لموضوع ديالو ملحوضية ف ويكيپيديا ب دّاريجة ف أغلبية د لحالات، سيرتو يلا كان متوفر ف كتر من وحدة فيهوم، ماحد داز من لمراجعة د لملحوضية تماك. هادشي ماكينفيش بلي أي كتاتبي يقدر يعاود يحل مداكرة علا لملحوضية ديال هاد لموضوع. لمواضيع لمحلية لي عندها علاقة ب لمغريب بشكل موباشير ؤلا ماشي موباشير، تقدر تكون عندها ملحوضية ف ويكيپيديا ب دّاريجة، وخا ماتكونش كاتحقق شروط د لملحوضية ف ويكيپيديات خرين.

بشكل عام، أي موضوع كيحقق هاد تّلاتة د شّروط، كاتّوفر فيه لملحوضية:

كيحقق شّروط د لملحوضية لعامة
كيحقق شّروط د لملحوضية لخاصة د لمجال ديالو
ماكيتعارضش معا سّياسة لمدكورة ف ويكيپيديا:ويكيپيديا ماشي..

لملحوضية ماكاتنطابقش علا حوايج مدكورين فوسط مقال. متلاً وخا يكون شخص ماعندوش ملحوضية، يقدر يتّدكر ب سميتو ف مقال يلا كان عندو علاقة ب لموضوع، بحال فرد ديال لفاميلة ديال شي شخص عندو ملحوضية ف لمقال ديالو.

حكام مخصصين خرجو من قرارات د الجماعة

المجال	لحكام	حلقة النقاش اللي تخاد فيها القرار

شّروط لعامة د لملحوضية

لملحوضية لأولية ديال موضوع كاتّحقق يلا توفرات تغطية كافية ديال لموضوع ف مصادر موتوقة، لي مستاقلة علا مول شّي (داكشي لي كيهضر عليه لموضوع).

أولية: وخا يتوفرو جميع شّروط ديال لملحوضية، كيبقا لموحديد لخراني هوّا لمداكرة ؤ لقرار ديال لكتاتبيا.
تغطية كافية: ماخاصش لموضوع يكون مدكور غير دايز (كلمة ؤلا جوملة صافي) ف جميع لمصادر. خاص يكون علّاقل مصدر واحد كايناقش لموضوع بشكل متعمق ؤ كافي ؤ وافي.
مصادر: لمقصود هنا هوما لمصادر تّانوية، لي كايكونو عادتن مقالات طوال ؤلا كتوبا منشورين من طاراف مؤسسات متخصصة، ؤلا علّاقل حرايفيا معروفين ف لمجال ديالهوم. لمصادر تّانوية كاتكون عادتن مبنية علا أبحات أصلية، لي منشورة ف جورنالات د صّيونص، ؤ لي كيقدرو يفهموها غير لحرايفيا د ضّومين. لمصادر تّانوية كاتحقق توازن ف لفهامة ؤ لموتوقية، حيت كاتكون جاية من عند لحرايفيا براسهوم، ؤ ف نفس لوقت موتاحة ل عامة د نّاس لي عندهوم معرفة ب ضّومين ؤ باغين يديرو مجهود باش يفهمو لموضوع. لمصادر تالتية، بحال لمقالات ؤ لكتوبا ديال تبسيط لعولوم ؤلا لمقالات د لخبار، كيقدرو يتخدّمو ف مقال، ولاكين ماخاصهومش، بشكل عام، يتخادو كا إتبات ديال لملحوضية. شّروط لخاصة علا حساب لمجال، تقدر تزيد تفصل ف هادشي، ؤلا تبدّل فيه علا حساب شنو كيتطلبو لمواضيع ديالو ؤفين كاتكون لكتبة عليهوم. مبدئياً، مصدر واحد تقدر تكون كافية، ولاكين عادتن باش تكون لملحوضية مضمونة، حسن يكونو بزاف.
موتوقية: خاص لمصدر يكون مقبول علا حساب لحكام د لمصادر، ؤ ماتكونش ف لبلاك ليست ديال ويكيپيديا ب دّاريجة، ؤ يكون مشهود ليها، سوا تاريخيا (ب سّتيعمال لمعاود ديالها)، ؤلا ف مصادر خرين، بلي عندها موتوقية ؤ بلي لمعلومات ديالها صحاح علا قدر لمعرفة لحالية ديال لحرايفيا د ضّومين. لّوغة ماشي موحديد ديال لموتوقية، ؤ أي مصدر ب أي لوغة ديال بنادم كايتّعتابر مقبول يلا توفرو فيه شّروط لمدكورين هادي شوية.
ستيقلالية: لمصادر لي كاتصدرهوم مؤسسة ؤلا شخص، بشكل موباشير ؤلا لاموباشير، مايمكنش يتخدّمو كا إتبات ديال لملحوضية ل داك شّخص ؤلا ديك لمؤسسة. متلاً لوطوبيوڭرافيا (سّيرة دّاتية) يلا كتبها شخص، ماكاتعنيش بلي هاد شّخص خاصو يتپروفيلا ف مقال خاص بيه ف ويكيپيديا ب دّاريجة. خاص يكونو مصادر مستاقلة لي كاتهضر علا هاد شّخص، لي كاتصدرها مؤسسات ؤلا أشخاص مامتعلقينش بيه (ماشي مؤسسات ديالو ؤلا أشخاص خدّامين عندو متلاً). يلا كانت لوطوبيوڭرافيا ف حد داتها عامال أدابي لي حقق شروط لملحوضية، ف هاد لحالة يقدر لكاتب ديالها ياخد لملحوضية يلا حقق شّروط لخاصين ب لكتّاب (شوف لتحت).

بشكل عام، شّروط د لملحوضية ب نّسبة ل لمواضيع لي عندها علاقة ب لمغريب كيكونو مرخوفين شوية كتر من لمواضيع لي ماعندها علاقة بيه.

التبدال ف الشروط د لملحوضية كيتدار ب حلان نقاش جديد ف الصفحة د لمداكرة، ولّا قتيراح من كتاتبي أمغار لي خاصو يحل مداكرة على التبديلات لي دار و يطاڭي إمغارن لخرين..

شّروط لخاصة د لملحوضية

يلا شي موضوع كينتامي ل مجال مامدكورش هنا، خاصو يحقق شروط لملحوضية لعامة، و لحالة ديالو تقدر تتناقش يلا كان شك ف لأهمية لموسوعية ديالو. ف لموستقبال كلا واحد من هاد لمجالات غادي تكون عندو پاج ديالو كاتحدد شّروط د لملحوضية ديالو ب تّفصيل.

لبلايص

أي بلاصة جغرافية ساكنين فيها نّاس ؤ معتارف بيها قانونيا (بحال ف تقسيم تّرابي ولا لإحصاء د ناس) كاتحقق لملحوضية ؤطوماتيكيا.

لبلايص لي برا د كوكب لأرض

لبلايص لي كاينين ف لفضاء لبراني ؤلا فوق كسادي كونية (كواكب، مدنبات، كويكبات...)، كاتكون عندهوم ملحوضية غير يلا كانت كاتحقق الشروط لعامة د لملحوضية. متلاً شي فوهة فوق لڭمرة لي تدارو عليها بزاف د لأبحات.

لبلايص لخياليين

لبلايص لي طرف من موعتاقاد ؤلا ؤسطورة ؤلا عامال أدابي، لي ماعندهومش وجود ف لواقع (ؤلا ماشي كولشي نّاس متّافقين بلي كاينين بصح)، كاتعتامد لملحوضية ديالهوم علا شّروط د لملحوضية لعامة، معا تحديد وجود تلاتة د لمصادر تانوية ؤلا تالتية كيهضرو عليها بشكل ماشي دايز.

لأشخاص

بشكل عام لأشخاص لحيين ؤلا لميتين لي دارو أعمال مهيمة، شغلو مناصب كبيرة ؤلا كان عندهوم تأتير علا أحدات تاريخية، سوا قريبة ؤلا بعيدة ف لماضي، كيتعتابر بلي عندهوم ملحوضية. هاد لأهمية كاتّحدد ب وجود مصادر تانوية ؤلا تالتية كاتهضر عليهوم. كلما زاد لعاداد ديال هاد لمصادر ؤ مقدار تعاطيها ؤ تّعمق ديالها ف سّيرة د هاد لأشخاص، كلما زادت لملحوضية ديالهوم.

باش يحقق شخص لملحوضية، خاصو يحقق الشروط د لملحوضية لعامة، و شّروط ديال تصنيف ؤلا كتر من تّصنيفات لي تحت. يلا كان واخد شوية شوية من كتر من تصنيف، ولاكين ماكيحقق حتا واحد فيهوم 100%، خاص تّطرح لحالة ديالو ل لمداكرة ؤ لڤوط. ب نّسبة ل شّخصيات لمغريبية، أي شخص دار شي عامال موهيم بزاف لي لأهمية ديالو ماكاتقبلش نّيقاش (متلا ربح جايزة وطنية ولّا دولية عندها ملحوضية)، كاتكون عندو ملحوضية بشكل موباشير، يلا كانت وخا غير معلومة بيوڭرافية عليه متوفرة (متلاً لعام د زّيادة ؤلا لموت).

لملحوضية د لأشخاص لي ماشي مغاربا:
- كيحقق شروط لملحوضية ف ويكيپيديا ب نّڭليزية ؤلا ف لوغة من لّوغات ديال لبلاد ديالو ؤلا لي كيكتب ؤلا كيهضر بيها. من لأحسن يكون ديجا مقال عليه متوفر ف وحدة من هاد لويكيپيديات.

لكتّاب و لفنانين

لملحوضية د لكتّاب و لفنانين لمغاربا:
- بعض لمعلومات لبيوڭرافية متوفرة ف مصادر موتوقة (علّاقل جوج)، بحال: فوقاش تزاد، فين تزاد، فوقاش مات، فين مات، لمناصب، لأنشطة...
- علّاقل عامال أدابي ؤلا فني واحد عندو ردمك (ISBN) ؤلا إيدونتيفيكاتور كيقابلو (رقم إيداع قانوني ف لمغريب متلاً) لي هضر عليه لإعلام بشكل كافي ف تلاتة د لمصادر علّاقل لي موتوقين ؤ مستاقلين ف لمضمون ديالهوم (ماكيعاودوش نفس لهضرة) و مستاقلين على مول لموضوع. من لأحسن يكون عندو علّاقل عامال لي دّا جايزة وطنية ولّا دولية عندها ملحوضية، ولّا عامال مكتوب ب الداريجة بشكل كامل. لأعمال لفنية تقدر ماتكونش عندها إدونتيفيكاتور (بحال لّوحات لمرسومة)، ولاكين خاصها تكون معروفة بشكل كافي.
- ؤلا يلا ماكانو حتا معلومات عليه متوفرين، عندو تلاتة د لأعمال ب قيمة د كتاب (كتاب، سيناريو د فيلم...)، واحد منهوم علّاقل دّا جايزة وطنية ولّا دولية عندها ملحوضية، ؤ جّوج لوخرين مدكورين ف تلاتة د لمصادر مقبولين ؤ مستاقلين (ماشي ناقلين من بعضياتهوم).

لأكاديميين

لملحوضية د لأكاديميين لمغاربا:
- بعض لمعلومات لبيوڭرافية متوفرة ف مصادر موتوقة ؤ مستاقلة (علّاقل تلاتة)، بحال: فوقاش تزاد، فين تزاد، فوقاش مات، فين مات، لمناصب، لأنشطة...
- علّاقل إيدونتيفيكاتور واحد، بحال VIAF (ضوسي مخازني ڤيرتوالي).
- علّاقل 100 بحت منشور ولّا دار شي عامال مهم ولّا دّا جايزة وطنية ولّا دولية عندها ملحوضية.
لملحوضية د لأكاديميين لي ماشي لمغاربا، نفس داكشي لي كينطابق علا لمغاربا، ؤ زيد عليهوم بلي عندهوم شي رتيباط معا لمغريب (متلاً دارو بحت ف لمغريب ؤلا علا شي حاجة متعلقة بيه). ؤلا ب بساطة عندهوم ملحوضية ف ويكيپيديا ب نّڭليزية (من لأحسن يلا كان ديجا مقال عليهوم مديور ؤ داز من لمراجعة).

لمسؤولين

جميع لمسؤولين د شي بلاد لي خداو مناصب علا أعلا مستوى ف لبلاد (ملوك، رؤاسا، حوكومة، برلامان، ...) عندهوم ملحوضية بشكل تلقائي. ف لمغريب، لمسؤولين علا مستوى جيهة ؤلا مدينة ؤلا جماعة حتا هوما عندهوم ملحوضية، طالما كاينين:

تلاتة د لعناصر لبيوڭرافية
تلاتة د لمصادر لمستاقلة كاتوتق لمنصب ؤ لبيوڭرافيا ديالهوم

رّياضيين

جميع رّياضيين لي خداو ميداليات علا لمستوى دّولي، كيما كانت لجنسية ديالهوم، خاص يتپروفيلاو، ب لإضافة ل لمغاربا لي خداو ميداليات ف لمغريب. لمغاربا لي شاركو ف تضاهورة رياضية دولية بلا ما ياخدو ميدالية ؤلا جايزة، ؤلا كيلعبو ف دّوري لّول ديال شي سپور، يقدرو يتپروفيلاو حتا هوما يلا كاينين:

تلاتة د لعناصر لبيوڭرافية
تلاتة د لمصادر لمستاقلة كاتوتق لبيوڭرافيا ديالهوم

شخصيات تاريخية

شّخصيات لي ماتو ؤ كانو مشاركين ف أحدات تاريخية، ؤلا لي ماتو هادي 50 عام، وخا ماكانوش طرف ف أحدات تاريخية ؤ عندهوم ؤلا مرتابطين ب شي عامال موهيم (كتاب، بني، عامال فني، منصب...) كيتّعتابرو شخصيات تاريخية. يلا كان شّخص ؤلا لعامال ديالو مدكور ف شي مصدر تانوي بشكل ماشي عاراضي (ماشي غير دايز)، كاتكون عندو لملحوضية. ف حالت يلا كانو لمصادر عليه قلال بزاف، ؤلا كيدكروه غير بشكل دايز، كيخص لملحوضية ديالو تتناقش.

شخصيات دينية ؤ ؤسطورية ؤ خيالية

شّخصيات لي لوجود ديالها طرف من دين ؤلا موعتاقاد، ولاكين ماكاينش إتبات تاريخي علا لوجود ديالها، كاتّعتابر شخصيات دينية. نفس شّي كينطابق علا شخصيات من أساطير قديمة، لي تدكرات ف كتوبا قدام ؤ شخصيات خيالية لي تّختارعات مؤخراً ف حجّايات ؤلا روايات حاديتة (متلاً سپايدرمان). لپروفيلاج ؤ لملحوضية ديال هاد شّخصيات كيعتامدو علا دّاراجة د لملحوضية ديال دّين، لؤسطورة ؤلا لعامال لأدابي لي هوما طرف منو.

متلاً، لأديان لي عندها عاداد قليل د لأتباع ؤ تأتير ضعيف جتيماعيا ؤ إعلاميا، يقدر يتّجمعو لمعلومات عليها كاملين ف پاج وحدة. بينمّا لأديان لكبار يقدرو يتدارو مياوات ؤلا آلاف د لپاجات لي كيفصّلو ف لعناصر ديالهوم، بما فيهوم شّخصيات لي داخلين ف لموعتاقاد ديالهوم.

بشكل عام، شّخصيات من هاد نّوع خاصهوم يحتارمو شّروط لعامة د لملحوضية، معا تحديد وجود تلاتة د لمصادر تانوية ؤلا تالتية كيهضرو عليها بشكل ماشي دايز.

لكتوبا

لكتوبا لي كيتحققو فيهوم واحد ؤلا كتر من هاد لمزايا، كاتكون عندهوم ملحوضية:

لكتاب مدكور، بشكل ماشي غير دايز، ف أعمال أدابية ؤلا نقدية ؤلا مقالات لي مستاقلة علا لكتاب براسو (ماشي إشهار ديال لكتاب متلاً)، بحيت كيتم تحليل ؤ طرح لمواضيع ديالو، ؤ كيعطي مادة كافية باش يتّكتب مقال عليه من وجهات ناضار مختالفين. هاد لأعمال ؤلا لمقالات خاص تّوفر فيهوم شروط لمصادر لي ديجا مدكورين.
لكتاب ربح جايزة كبيرة سوا ف لمغريب ؤلا ف لخاريج، ؤ متوفرين فيه شّروط لعامة د لملحوضية.
لكتاب ساهم بشكل واضح ؤ مافيه شك ف شي عامال فني ؤلا سينيمائي، ؤلا شي حادات تاريخي ؤلا سياسي، ؤلا شي حاراكة سياسية ؤلا دينية.
لكتاب كيتدرّس بشكل رسمي ف لمغريب ف أي مستوى د لقراية ؤلا مؤسسة، ؤلا ف جوج مؤسسات تعليمية برا د لمغريب.
لكاتب هوّا شخصية موهيمة ف تّاريخ، ل داراجة بلي أي حاجة كتبها كاتّعتابر بلي عندها ملحوضية. هادشي ماكيعنيش بلي لكاتب غير عندو ملحوضية (هادي مسألة ضمنية)، مي بلي عندو أهمية ستيتنائية لي كاتخلي حياتو ؤ جميع لإنتاجات ديالو موضوع ديال دّيراسة لأكاديمية (متلا جميع لكتوبا ؤ لإنتاجات ديال أفلاطون ؤلا شيكسپير). ب نّسبة ل لكتوبا ديال لمغاربا، يكفي باش يكون هادشي صحيح علا مستوى لمغريب، وخا مايكونش لكاتب معروف برا.
لكتاب تطرجم ل دّاريجة ؤلا لأمازيغية (لمعيارية د لمغريب ؤلا أي لهجة أمازيغية ديال لمغريب)، ؤ كيحقق شّروط لعامة

الجوايز

أي جايزة كاتحقق لملحوضية يلا كانت على لمستوى لوطني ولّا الدولي، و كاتصدر على مؤسسة عندها ملحوضية (متلا "أكاديمية لمملكة لمغريبية")، و كاتحقق شروط لملحوضية لعامة. الجوايز على مستوى محلي ولّا جيهاوي (إقليم ولّا جهة ف دولة) تقدر تا هيّ تحقق لملحوضية، ولايني خاص تتناقش لحالة ديالها.