لحكمة د الجماعة
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
لحكمة د الجماعة هوّا لمجموع د لأراء ديال مجموعة متنوّعة د لأفراد لمستاقلين على بعضياتهوم، ف لموقابيل ديال رأي د حرايفي (متخصص) بوحدو (لحكمة د لفرد). وخا هاد لپروصي قديم بزاف، تّجليات ديالو ولات باينة كتر ف لعصر د لمعلومات ف سيتات د لويب بحال كورا Quora، ريديت Reddit، سطاك إكستشينج Stack Exchange، ؤ ويكيپيديا، ؤ موارد خرة لي كاتعتامد على لمعرفة لجماعية د بنادم. واحد تّفسير ديال هاد لفينومين كيڭول بلي لحكم لفردي كيكون ديما فيه واحد "ضّجيج" (أخطاء، أحكام جاهزة...) بشكل ضمني، لي كيخلي لفرد مايوصلش ل لحقيقة، و بلي يلا خدينا لموعدّال ديال لأراء على مجموعة متنوعة ديال نّاس، كانقرّبو كتر ل تّصور لي كيمتّل لواقع، حيت داك ضّجيج على لمستوى لفردي كيلغي بعضياتو.
لحكمة د جّماعة كانلقاو تّطبيق ديالها ف لقانون، ف سّياسة، ف لفينونص[1] و بزاف د لمجالات خرين لي كيعتامد لقرار فيهوم على معرفة عامة د لعالم ؤلا تقدير تقريبي، ماشي على معرفة دقيقة ديال مجال محدد لي نقدرو نعتامدو فيه على شي واحد متخصص (حرايفي ديال لمجال). ف شلا حالات كانلقاو بلي جّواب لي نتجاتو لحكمة د جّماعة، كيكون ب نفس لقيمة ؤلا شي مرات حسن من جّواب ديال حرايفي.
ف نضرية د لختيار الجتيماعي Social choice theory، طيوريم د الجوري Jury's theorem كيعطي دليل شكلي على لأفضلية ديال لحكمة د جّماعة، تحت شروط محددة. هاد شّروط ؤ نّتايج لي كيترتبو عليهوم باقين تحت نيقاش، ولاكين لمنطقية ديال طّيوريمات براسهوم مافيها شك. أقدم طيوريم د الجوري هوّا طيوريم د الجوري د كونضورصي Condorcet's jury theorem لي كيرجع ل 1785.
واحد من أول لفلاسفة لي هضرو على لحكمة د جّماعة هوّا أرسطو ف كتابو سّياسة. ف هاد لكتاب كيڭول:
|
يقدر يكون بلي بزاف د نّاس، وخا فردياً ماشي مزيانين، ملي كيتجمعو كيوليو حسن، ماشي كا أفراد مي كا جماعة، من شي واحد لي مزيان، بحال كيما شي عشا جماعي لي كيساهمو فيه بزاف كيكون حسن من عشا لي كيخلّص عليه واحد | 
|
—أرسطو، السياسة | ||
ف لفترة لعصرية، لمفهوم ديال لحكمة د جّماعة تنتاشر ب سباب واحد لكتاب عنوانو لحكمة د الجماعة لي صدر ف 2004، من تأليف دجيمس سوروڤيكي.[1]
كاينين نتيقادات ل هاد لمفهوم، حيت ماشي ديما كيكون قابل ل تّطبيق، سيرتو فاش لأراء د لأفراد ماكيكونوش مستاقلين ؤلا ماكيكونوش لأفراد عندهوم معرفة كافية باش يعطيو رأي عندو قيمة، ؤلا كاتسيطر عليهوم لعقلية د لقطيع. ف 2018، واحد دّراسة علمية تنشرات ف مجلة نيتشر، بيّنات بلي لحكمة د الجماعة تقدر تحسّن كتر يلا لأفراد تجمعو ف جماعات صغيرة ؤ ناقشو شي موضوع بيناتهوم، قبل مايعطيو رّأي لفردي ديالهوم.[1][2]
شروط د لحكمة د الجماعة عند سوروڤيكي[بدل | بدل لكود]
على حساب سوروڤيكي، كاينين ربعة د شّروط لي خاصها تّوفر باش تكون لحكمة د الجماعة:[1]
- الجماعة خاص تكون عندها لإمكانية ديال تنوع لأراء
- رّأي ديال فرد خاصو يكون مستاقل على لأراء د أفراد خرين ؤ مايكونش متأتر بيهوم
- أي فرد من لأفراد خاصو يكون قادر يكوّن رأي ديالو ب لمعرفة لفردية ديالو
- الجماعة خاصها تكون قادرة تجمع لأراء لفردية ف رأي ؤلا قرار جماعي
عيون لكلام[بدل | بدل لكود]
- ^ a b c d "Investopedia, Wisdom of Crowds". مأرشيڤي من لأصل ف 2023-05-28. تطّالع عليه ب تاريخ 2022-11-05.
- ^ "Aggregated knowledge from a small number of debates outperforms the wisdom of large crowds". نيتشر. 15 يناير 2018. doi:10.1038/s41562-017-0273-4.