هاياو مييازاكي

	هاياو مييازاكي
	معلومات عامة
زيادة	5 يناير 1941 (84 عام); بونكيو ()
لجنسية	الجاپون
لحرفة	مخرج د لأفلام، رسام د الروسوم، مانݣاكا، سيناريست، مونتور، مونتيج د أفلام، شاعر د لغنا، رسام توضيحي، عالم د لبيئة، موخريج، فنان د قصص مصورة، مصمم شخصيات، mechanical designer و مخرج رسوم متحركة
لّوغات لي كيعرف	جاپونية
	لفاميلة
لواليد	كاتسوغي ميازاكي
شريك	Akemi Ōta (1965–)
لولاد	غورو ميازاكي; Keisuke Miyazaki
	معلومات خرى
لأعمال	(1972) باندا! انطلق، باندا!; (1979) لوبين الثالث: قلعة كاجليسترو; (1984) ناوسيكا أميرة وادي الرياح; (1986) قلعة في السماء; (1988) جاري توتورو; (1989) كيكي لخدمة التوصيل; (1992) بوركو روسو; (1997) الأميرة مونونوكي; (2001) المخطوفة; (2004) قلعة هاول المتحركة; (2008) بونيو; (2013) مهب الريح; (2023) كيف تعيش؟;
تأتر ب	أوسامو تيزوكا، Sōji Yamakawa، انطوان دو سانت إكزوبيري، ؤرسولا لڭوين، جان جيرو، يوري نورستين و Lev Atamanov
سّيت رّسمي	https://www.ghibli.jp
لجوايز	(10 مارس 2024) جائزة الأوسكار لأفضل فيلم رسوم متحركة, كيف تعيش؟../... 28+;

مقال فيه مصادر مامقادينش مزيان.
هاد لمقال فيه مصادر، ولاكين مامكتوبينش بشكل مقادّ، متلاً يقدرو يكونو مدخّلين على شكل ليستة ف اللخر د لمقال، ولّا مامخدمينش لموضيلات لمعمول بيها ف ويكيپيديا. عافاك عاون بالزيادة ديال لإحالة للمصادر ف السطورا، و خدّم لكوضاج لمعمول بيه. تقدر تشوف هنا كيفاش تزيد لمصادر.

هاياو مييازاكي ( ب الجاپونية 宮崎駿 ولا 宮﨑駿، مييازاكي هاياو : [mijaꜜzaki hajao]؛ تزاد ف 5 يناير، 1941) هو آنيماطور، موخريج و مانݣاكا جاپوني. لمؤسيس د ستوديو ݣيبلي، خدا إيشادة دولية كا حجاي د لقصص حرايفي و الصانع د لأفلام د لآنيمي الجاپونية، و كايتعتابر واحد من أكتر لموخريجين لمتوجين ب الجوايز ف تاريخ لآنيماسيو (التحريك).

تزاد ف طوكيو ف ليمبراطورية د الجاپون، مييازاكي تبلى ب لمانݣا و لآنيماسيو بكري ف عمرو، و دخل ل طوويي آنيميشون ف 1963. ف عوام اللولا ف طوويي آنيميشون خدم فنان د لانطيرڤال و موراها بدا التعاون معا إيساو طاكاهاطا.

مييازاكي عاون ف تأسيس ستوديو ݣيبلي ف 1985. خرج معا ݣيبلي بزاف د لأفلام، منها، لاپوطا: قصبة ف السما (1986)، جاري طوطورو (1988)، السيرڤيس د ليڤريزو كيكي (1989)، و پوركو روصّو (1992). لأفلام جابت نجاح تيجاري و نقدي ف الجاپون. لفيلم د مييازاكي، لأميرة مونونوكي كان أول فيلم محرك خدا جايزة لآكاديمية الجاپونية للأفلام، و موراها ب شوية ولا أكتر فيلم جاپوني ف لأرباح مور طليق ديالو ف 1997. التوزيع ديال هاد لفيلم ف لعالم لغربي زيّد ب شكل كبير الشعبية و التأتير د ݣيبلي برا الجاپون. لفيلم د 2001 ديالو، مخطوفة ولا أكتر فيلم جاپوني ف لأرباح ف التاريخ، ربح جايزة لأوسكار لأحسن فيلم آنيماسيو، و كايتعتابر واحد من أعضم لأفلام د لقرن لواحد و عشرين. مييازاكي علن على عتيزالو على لأفلام، وخا موراها رجع ل لكتابة و ليخراج د فيلمو ال12 لولد و لمالك الحزين (2023)، لي خدا عليه جايزة لأوسكار لأحسن فيلم آنيماسيو ل لخطرة التانية.

لبدية و لكاريير

لبدية د حياتو و أفلامو

بات مييازاكي كان لمودير د طيران مييازاكي، شاريكة تصنيع لي كاتصايب لپارتيات د الطيارات لموقاتيلة زيرو. لبيزنيس د لفاميلة زرع ف مييازاكي حب الطيران لي ولا واضح ف ݣاع أعمالو. مور ما كمل قرايتو ف لقتيصاد ف كولية ݣاكوشووين ف طوكيو عام 1963، خدا الطاش د آنيماطور موبتديئ ف ستوديو طوويي آنيميشون، ديڤيزيو ف طوويي لي هو أكبر مونتيج ل لآنيماسيو ف آسيا، و ف لوقيتة لي كان ف طوويي، تلاقى معا رفاقو، إيساو طاكاهاطا و أووطا آكيمي. اللول فيهوم ولا صاحب د لعمر، متعاون معاه ف لأعمال و شريكو ف لبيزنيس، أما أووطا، ولات مراتو. مييازاكي طلع ف لݣراضات ف طوويي، و هو كايخدم على مشاريع بحال السيرية التلفازية أووكامي شوونين كين ("لولد الديب كين") و لفيلم اللول د طاكاهاطا، طاييوو نو أووجي: هوروسو نو ضايبووكين (1968) ("لأمير النورسي الصغير"). مور ما مشى من طوويي ف 1971، مييازاكي، معا رفيقو طاكاهاطا، كملو ف لخدمة ف بزاف د الستوديووات ف عوام 1970. أبرز خداميه ف هاد لپيريوض منها لأفلام لقصيرة د پانضا! ݣو پانضا!، و أول فيلم طويل د مييازاكي، لوپان التالت: لقصبة د كاليوصطرو (1979)، لي هي قصة د لمغامرة كاتصور الشفار النبيل و رفاقو.

الطليق د ستوديو ݣيبلي

الستيل لي متفرد بيه مييازاكي غايبدا يبان ف ناوشكا د وادي الريح، لي هي مانݣا شهرية كتبها ل مجلة آنيميج، لقصة د هاد لمانݣا كاتتبع ناوشكا، أميرة و محاربة مترددة، ف طريقها ف وسط عالم بيئتو مدمرة. النجاح د لمانݣا أنسپيرا فيلم ب نفس السمية (تطلق ف 1984) و شجع مييازاكي و طاكاهاطا ف صنيع شركة دايمة بيناتهوم. ب جوج بيهوم طلقو ستوديو ݣيبلي ف 1985. لعام لي موراه تطلق فيلم لاپوطا: قصبة ف السما ف الجاپون و ناوشكا تطلق ف ميريكان. ستوديو ݣيبلي و مييازاكي كملو ف إنتاج أعمال كاتڤيزي السوق لمحلية، وخا هاكداك، فيلمو جاري طوطورو بدا ف 1988، وخا لفيلم خدا ستيقبال نقدي إيجابي، النجاح لمادي د الستوديو جا أساسا من لبيع د لمنتوجات و السلعة د طوطورو. تبعو فيلم پوركو روصّو (1992)، لي كايعاود مغامرة طيار بطل على لحرب لعالمية اللولى لي لصقات فيه لعنة وجه لحلوف. هاد النجاحات سرحات الطريق ل فيلم، لأميرة مونونوكي (1997)، بلوكباسطر لي هرس الروكور د لبوكس أوفيس الجاپوني. لفيلم بانو فيه طيمات لي كاتعاود ف أفلام مييازاكي، بحال الصيراع بين التقدوم د لباشار و النيضام الطابيعي و ليستيمرارية بين لعالم الروحي و لعالم الدنيوي، زيد على هادشي، التاقموص ديال لفيلم ل لكوضاما ( لأرواح د لأشجار الجاپونية). لفيلم د مييازاكي، مخطوفة (2001)، ربح الجايزة لكبرى د مهرجان بيرلين الدولي ف 2002، و جايزة أحسن فيلم ف جوايز هونݣ كونݣ للفيلم، و خدا جايزة أحسن فيلم آنيماسيو ف جوايز لأوسكار ف 2003. ف لفيلم، تشيهيرو، بنت صغيرة عادية يلا ما قلناش مفششة، توضرات على واليديها و دخلات ف عالم لآليهة و السحر. مييازاكي تبع النجاح لكبير د مخطوفة ب فيلم، لقصبة لمتحركة د هاول (2004)، قصة د بنت صغيرة تلعنات ب جسد د مرا شارفة و لمغامرة لي وداتها ل واحد لقصبة أسطورية كاتحرك، لفيلم ترشح لجايزة لأوسكار ف 2006. فيلم پونيو كان أكتر فيلم كايڤيزي لجمهور د الطفال ف ݣاع أفلام مييازاكي، وخا هاكداك، لفيلم جا ف الطوپ د لبوكس أوفيس الجاپوني د 2008. مييازاكي عاون ف كتابة السيناريوات ل ستوديو ݣيبلي بحال ف أفلام لعالم السري د آرييتي لي مبازي على لكتاب د الطفال د ماري نورتن، ذا بارووْرز، و فيلم كوكوريكوزاكا كارا (2011)، هي قصة د لبلوغ تآضاپطات من سيرية د لمانݣا. هاد لفيلم خرجو ولد مييازاكي ݣوروو.

لأعمال اللاحقة

فيلم الريح كايطلع (2013)، كان مقاربة نطيباعية على لحياة د لموهنديس هوريكوشي جيرو، لي ديزاينا الطيارات لموقاتيلة لي خدّماتها الجاپون ف وقيتة لحرب لعالمية التانية. لفيلم تبازا على لمانݣا د مييازاكي ب نفس السمية، و ترشح لجايزة لأوسكار ف 2014. مييازاكي علن بلي فيلم الريح كايطلع غايكون آخر فيلم طويل ليه، و بدا لخدمة ف بورو لفاراشة، فيلم قصير ل لمتحف د ݣيبلي ف ميطاكا. لعتيزال د مييازاكي كان غي مؤقات، ف 2016 هو علن بلي فيلم لفاراشة بورو غايتوسع ل فيلم طويل. لفيلم كان أول فيلم لمييازاكي ب التحريك د لورديناطور. ف عام 2015، مييازاكي خدا أوسكار شرفي من لآكاديمية د فونون و عولوم التصويرة لمتحركة.

ف 2023 مييازاكي عاوتاني رجع على لعتيزال ديالو باش يطلق فيلم لولد و لمالك لحزين، لقصة كاتدور على واحد الدري د طناش لعام من طوكيو، لي تنقل للبلاد مور ما مو تقتلات ف غارة د القنابل ف وقيتة لحرب لعالمية التانية. تما غايتلاقى معا مالك حزين رمادي، لي دفعو باش يدخل ل برج مسدود لي كايوصل لعالم مقسوم بين لميتين و لحيين. لكريتيك قلّعو ف هاد لفيلم لعناصر د لوطوبيوݣرافيا و النبرة الريتائية. لفيلم ربح جايزة لݣولدن ݣلوب و لبافطا لأحسن فيلم آنيماسيو، و ربح جايزة لأوسكار لأحسن فيلم آنيماسيو ف 2024.

الستيل و الطيمات

السيلمية

ليمان بلي ݣاع لمدابزات تقدر تتحل سيلميا بلا مانحتاجو نخدمو لقوة لجسدية واحد من أكتر الطيمات لي كاتعاود ف أعمال مييازاكي. "قصبة ف السما" ، "لقصبة لمتحركة د هاول"، "لأميرة مونونوكي"، و "ناوشكا د وادي الريح"، هوما عيينات مفرزة من هاد الطيمة. الشخصيات الرئيسية كايديرو ما ف جهدهوم باش يلقاو السلام ف و وسط عالم عامر ب الصيراعات. وخا لخيلافات لجسدية حتى هي حاضرة، مي كاتستعمل غير لتسليط الضو على لعوقم ديالها، ب تخدام الصيراعات، ولا حتى لحرب، باش يروّج ل حلول سلمية.

لمشاهيد د الطيران

مييازاكي من ديما كايبغي الطيارات، ب الضبط لقديمة، فاميلتو ملكات شاريكة كاتنتج الجناوح د لموقاتيلات زيرو، و هادشي خلا تأتير كبير على شخصيتو. هادشي علاش كل فيلم ديالو فيه مشاهيد د الطيران د شي نوع، و هو باغي يصور التحلاق كا شكل من ليعجاب و الدهشة. وخا هاكداك، مييازاكي قال بلي هو كان مجدوب ل الطيارات لعسكارية و هو طفل، و لكن ولا كايكرههوم و هو كايكبر، من تما فهم لقيوى التدميرية ديالهوم. هاد النقطة د لفتنة معا الدات حضرات ب شكل طاغي ف "الريح كاتطلع"، فين لحلام د جيرو ف صنيع الطيارات، ولكن غي فهم لعواقيب د الطيارات لحربية، حس ب ندامة على لمصاوبة د ماكينات لموت.

پروطاݣونيست نتوة

لأغلبية د أفلام مييازاكي كايصورو پروطاݣونيستات نتوات. ب النيسبة ليه، لبنات كايبانو حسن و التأتير د فعايلهوم ف لمشاهيد كايكون موؤتير كتر، متلا، بنت كاتتيري ب فردي غاتبان ف التصويرة حسن من ولد على حساب ريو، وخا هاكداك، الشخصيات النتوات ماشي ضعيفات بحال لأميرة سنوو وايت، و لكين عرفين شنو بغاو و شي مرات شوجاعات. هاد لخصلة واضحة كتر ف الشخصية د ناوشكا، ف "ناوشكا د وادي الريح" و ف سان د "لأميرة مونونوكي". فوق من هادشي، حتى لآنطاݣونيست النتوات (الشريرات)، كايتصورو كا شخصيات معقدة و متعددة لبعاد، فين ف بزاف د لحالات كاتكون متناقضة، ميتال، ف "لأميرة مونونوكي"، إيبوشي تقدر تكون السباب ف بزاف د التدميرات، و لكن ف نفس لوقت كاتعتق لعيالات لمريضات. هاد لخصلة حتى هي، كاتبين لفيمينزم لباين لي كايتجلى ف أعمالو.

التهلية ف لبيئة

لبيئة وحدة من الطيمات لمركازية ف لفيلموݣرافيا د مييازاكي، ف لحضور لملموس ديالها و كا تحفيز ف بزاف د التعليقات. شي مرات ف أفلامو، الطابيعة و لينسانية كايعيشو ب نسيجام معا بعضياتهوم ف بزاف د لآطموصفيرات. بحال شي بلاد، ڤيلاج، ولا حتى مدون. مييازاكي كايشوف بلي الناس يقدرو ولا خصهوم يعيشو ف الطابيعة ولا، على لاقل، يتعايشو ب سلام معاها. هاد لملحوضة غاتولي باينة ف "جاري طوطورو"، فين الطابيعة بدات كاتتهلى ف الطفال. غير هو، مييازاكي ف نفس لوقت كايعتابر الطابيعة بلاصة لي كاتجلى فيها لقوة، كيفما كايبان ف لدغال لمسمومة ف "ناوشكا د وادي الريح" و ف لغابة ف "لأميرة مونونوكي". ف هاد لفلام ب جوج بيهوم، كايحضر ميساج بيئي قاصح، يلا لباشار قررو يجيو ضد الطابيعة، الطابيعة غادي تنتاقم.

التافاؤول

ماحد لأفلام د مييازاكي كاتڤيزي الدراري و لبنات الصغار، و الناس الشابين، و ماحد مييازاكي كايشوف من لموهيم ب النيسبة ليهوم ياخدو شوفة زوينة على لعالم، خشى ف لأعمال ديالو بزاف د التفاؤولية، لي كاتبان طاغية ف اللخر د أفلامو، "ناوشكا د وادي الريح"، و "لأميرة مونونوكي"، و"مخطوفة" هوما عيينات مفررزة على خصلة التفاؤول. غير هو، التفاؤول ديالو كايتقابل ب شكل منتاضم معا التشاؤوم، بحال ف "لاپوطا: قصبة ف السما"، فين الطمع دار بزاف د لادى قبل ما يربح التفاؤول. على حساب مييازاكي، و ف ايصال دريكت معا التهلية ف لبيئة ديالو، الطابيعة ديما كاتدبر ف شي طريق كيفاش تلقى التوازون معا لبشرية.

لأعمال ديالو

لأعمال اللولى

لوپان التالت لجوزء 1 (1971) - سيرية آنيمي تلفازي : عاون ف ليخراج د 15 لحلقة معا إيصاو طاكاهاطا
پانضا ݣو پانضا! (1972) - فيلم آنيمي قصير: كونصيپط، السيناريو، لوحات د لقصة، ديزاين د لمشهد، و لانيماسيو لمفتاحية
كونان ولد لمستقبل (1978) - سيرية آنيمي تلفازي: ليخراج
لوپان التالت لجوزء التاني (1980) - سيرية آنيمي تلفازي : ليخراج (2حلقات)
شارلوك هاوند (1984) - سيرية آنيمي تلفازي: ليخراج (5/6 حلقات)
نادية: السر ديال لما الزرق (1990) - سيرية آنيمي تلفازي: كاتب (لكونصيپط لأصلي د لقصة كتبو ف السبعينات)

مانݣا

لعالم لعجيب د قط ف بوط: 1969
الباشار ف الصحرا:1969-70
ݣزيرة لكنز د لحيوانات: 1972
ناوشكا د وادي الريح: 1982-94
ل ختي: 1982
الرحلة د شونا: 1983
لعصر د لفلوكة الطايرة: 1990
الرجوع د هانس: 1994
لعشا ف لهوا: 1994
ببور ف لغيس: 1998-99
طريپ ل تاينماوث: 2006
الريح كاتطلع: 2009
طيپوو ساموراي: 2015

أفلام آنيمي

لقصبة د كاليوصطرو: 1979
ناوشكا د وادي الريح: 1984
قصبة ف السما: 1986
جاري طوطورو: 1988
السيرڤيس د ليڤريزو كيكي: 1989
پوركو روصّو (حلوف حمر): 1992
توشويشة ف لقلب: 1995 (ماشي ليخراج)
لأميرة مونونوكي: 1997
مخطوفة : 2001
لقصبة لمتحركة د هاول: 2004
پونيو: 2008
آرييتي: 2010 (ماشي ليخراج)
من لفوق د تلة د پوپي: 2011 (ماشي ليخراج)
الريح كاتطلع: 2013
لولد و لمالك لحزين: 2023

مصادر