التطور

التطور ف لبيولوجيا هوّا تغيير تدريجي ف لخاصيات لوراتية من جيل ل جيل لي كاتدوز على طريق الدنا ؤلا لحمض النووي. دوك لخاصيات كيكونو تعبير على جينات لي كيدوزو من لواليدين ل وليداتهوم على طريق التكاتر. نّضرية د تّطور (ب نݣليزية : Theory of Evolution) هي نّضرية لعلمية لي كتشرح التبديلات لوراتية لي كتوقع ف واحد مجموعة ديال لكائنات ف بزاف ديال جّيال ف واحد لمدة كبيرة.^[1]

التنوعات ديال الجينات كاتطرا بسباب الطفرات (تبدال صغير ف شي جين) ؤ لمعاودة د التركيب لجيني. التطور كيطرا ملي شي ميكانيزم بحال النتيخاب الطبيعي ؤلا التكحاز لجيني كيسلّط ضغط نتيخابي على لجينات و تنويعاتها، بحيت لجينات لي "مزيانين" (على ود لحياة و التكاتر) كيستامرو، و لجينات "لخايبين" (لي متلا كيقدرو يسببو لموت د لكائن، ؤلا كيضعّفو لفرصة ديالو باش يعيش ؤلا يتكاتر) كيتحيّدو ؤلا كاتنقص النسبة ديالهوم ف لمجموعة. ميتال على هادشي هوّا يلا جا شي مرض ضرب مجموعة د الناس، و كانو بعض لأفراد عندهوم مناعة طبيعية منو، هاد لأفراد غادي تكون عندهوم فرصة كبر باش يعيشو و يدوّزو لمناعة ديالهوم، و بالتالي هاد لمناعة لوراتية غادي تنتاقل و تنتاشر بين لأفراد د لأجيال لماجية.

جميع شكال لحياة ف لأرض عندها جد شامل لخراني (نوع بيولوجي كيمتّل مجموعة د لكائنات لي كينحادرو منها جميع لكائنات لحية لي كاينة دابا) لي عاش هادي 3,5 ل 3,8 مليار عام. السيجيل د لفوصيلات كيعطي فكرة مزيانة على النواع لحية لي بانو و غبرو من داك لوقت، من لحصاير لميكروبية، تال لفوصيلات ديال لكائنات متعددة السيلولات.

لبيولوجيا التطورية هوّا مجال لي كيدرس التطور بشكل مباشر، بوضع فرضيات، و التجريب ديالها باش تّتبت ؤلا تّنفا. ليوم بزاف د لخدمة على التطور كايدخلو فيها موضيلات د لماط، ف إطار لبيولوجيا لماطية و النضرية. لكتيشافات ديال لبيولوجيا التطورية عندهوم تأتير ماشي غير على لبيولوجيا، مي تا على الزراعة، الطب و لانفورماتيك.

تّنواع

تّنواع (ب نݣليزية : Genetic diversity) كيعني ب لخصوص درجة ديال تنواع ديال شي جين فشي نوع (حيوان ولا نبات).

يمكن نميزو عموما بين جوج نواع د تّنواع هما تنواع ضاهري وتنواع لجيني.

طفرة

طفرة (ب نݣليزية : mutation) هي شي تبديلات كيوقعو ف DNA ديال جينوم ديال شي سيلول. فاش كتوقع طّفرة تقدر ما يكون عندها حتا شي تاتير، ولا تقدر دير تاتير كبير، ولا تقدر توقف لجين لي هي وقعات فيه.

طفرات كتصنف ل تلاتة، طفرات كضر، طفرات مامسوقاش و طفرات نافعة.

كيوقعو طفرات ف بزاف دالمرات ب ضوبلاج ديال الكروموزم، هادشي كينتج عليه زيادة ديال شي جين ولا بارتيات منو.

لميكانزمات

من جهة داروينية جّديدة (ب نݣليزية : Neo-Darwinism) ، تطور كيخدم فاش كيتبدل تعاويد لحليلات فشي كروب كيكونو فيه نّواع كتوالدو، لميكانزيمات لي كتخلي تعاويد لحليلات يتبدل هي : انتخاب طبيعي، انحراف لوراثي، لمرافكة لجينية، طفرات، و لفلو د لجينات.

انتخاب طبيعي

انتخاب طبيعي (ب لونڭلي : Natural selection) هو لميكانزيم لي كايخلي طفرات لي كتنفع هي لي تكون باينة اكثر ف جيال لي كتجي من بعد، كيتوصف هاد لميكانزم علا انو منطقي حيث هو اصلا كيوقف علا تلات حقايق لي ساهلة :

خاص يكون شي تنوع قادر علا انه يتورت في كل كروب.
لعدد ديال نسل لي كايتولد كتر من داكشي لي غايقدر يعيش ويتوالد.
كاينات ديال نفس لكروب كايكون عندهم فرص مختالفة ديال نجاة.

هاد ظروف كتخلق واحد تنافس فوسط لكروب كتخلي كاينات لي عندها الافضلية هي لي دوز وتوالد وتعطي لجينات ديالها لي جيل لي جاي.

انحراف وراثي

لإنحراف لوراثي (ب نݣليزية : genetic drift) هو تبدال تعاويد لحليلات بشكل عشوائي من جيل لاخر.

لمرافكة لجينية

لمرافكة لجينية هو ميكانزيم جيني كيخلي تعاويد شي حليل (allele) يكتار ويزداد ف تردد ديالو داخل الجيل، غا حيت هاد الحليل مرتبط مع حليل آخر لي كيعونو فالانتخاب الطبيعي. بمعنى آخر، لمرافكة لجينية كتوقع ملي كيتواجد جوج حليلات ف الجينوم، واحد فيهم كيكون مفيد وكيزيد فرص البقاء والتكاثر، وهاد الحليل المفيد كيترافق مع حليل آخر في نفس الموقع الجيني، حتى لو كان الحليل الثاني مالو حتى فائدة أو حتى ضار.

هاد العملية كتخلي الحليل الضار أو الغير مفيد يكتر ف الأجيال القادمة غا حيت كايرتبط مع الحليل المفيد. هاد الميكانزيم كيكون مهم ف فهمنا للتطور وكيفاش كيتنقلو الجينات عبر الأجيال، وكيساهم ف تفسير وجود بعض الجينات اللي ماشي دائما كايكون عندها دور واضح أو مفيد.

مثال على لمرافكة لجينية هو كيفاش كيتنقلو جينات معينة ف النباتات اللي كيقاومو الأمراض، حتى لو كانو هاد الجينات مرتبطين مع جينات أخرى اللي ما عندهاش دور كبير ف مقاومة الأمراض. الانتخاب الطبيعي كيختار النباتات اللي عندها جينات مقاومة، وبالتالي كيجيبو معاهم الجينات المرافقة ليهم حتى لو كانت مالهاش فائدة مباشرة

لفلو دلجينات

ف لوراتة لفلو دلجينات (ب نّݣليزية: gene flow) هو العملية لي كيتنقل جين ولا حليل من كروب لشي كروب آخر. لفلو دلجينات كيوقع ف البنيات الوراثية لكروبات مختلفة، وهادشي كيأثر على التنوع الوراثي فهاد الكروبات.

مثال بسيط: تخيل معايا كروب د الحيوانات كيسكنو ف واحة معينة، وشي كروب آخر كيسكن ف واحة أخرى. إلا تلاقاو و تزاوجو، غادي ينقلو جيناتهم بيناتهم. هاد العملية كاتعاون باش تكون تنوع ف الجينات لكروبات جديدة و كاتكون عندها قدرات جديدة باش تتأقلم مع التغيرات البيئية.