لمورفين (راپور)
لمورفين
| ||
| ||
| معلومات عامة | ||
| زيادة | 1984 (39/40 عام) سلا | |
| لجنسية | لمغريب | |
| لحرفة | راپور | |
| لّوغات لي كيعرف | الداريجة لمغريبية | |
     
| ||
مهدي مهيب، ملقب بلمورفين، ولا لمورفو، ولا M-Psy، هو راپور مغربي تزاد عام 1984 فسلا و عاش فمدينة ميدلت و مكناس فالطفولة و المراهقة ديالو. المورفين معروف بلميطافور ولإيڭو تريپ فطراكات ديالو.
تزاد عام 1984 فسلا، و نتاقل ل مدينة ميدلت باش يكمل لقراية. تزاد فعائلة مثقفة، الأم ديالو دكتورة والأب دكتور خاص. قد يكمل قرايتو ف كندا فمجال الإدارة السياحية، و حاليا هو مزوج و عندو بنت (كنزة) و ولد (قيس)، و تايخدم فضومين ديال سياحة، و تايبيع ويشري فالصخور والمستحثات.[1]
لمسيرة لفنية ديال لمورفين بدات عام 1998، فاش كان للقب ديالو ل "M-psy"، بعد ما تأنسپيرا من راپ د ميريكان، لكن كان تايمارس راپ كهواية صافي، و طراكات ديالو ماكانوش منشورين فلأنترنت، تا لعام 2004، عاد فكر باش ينفاتح على الجمهور ديالو، و فعام 2006، غيدخل مع المجموعة ديال "Piranha-Labo" لي كانو فيها الرواپا ولاد سلا. عام 2010، تفارق لمورفين معا هاد لمجموعة، و رجع تايغني بوحدو من جديد.[2][3]
لمورفين عندو أكثر من 217 طراك فراپ[4]، أول مشروع بدا بيه كان هو "Maxi Mighnatiss" عام 2006، و فعام 2009، خرج ميكستايپ سميتو Na9ouss فيه 9 ديال طراكات، عجب للجمهور ديالو بزاف. لي خلاه يفكر يزيد يطور لخدمة ديالو كثر، و خرج بميكستيپ جديد سميتو "LMorphine" فيه 9 ديال طراكات، و بعد منو ميكستيپ أخر سميتو Total و بعد منو ميكستيپ أخر سميتو Paprika، و بعد منو ميكستيپ سميتو INK، تبعاتهم سلسلة من الأغاني مرقمة، لي سماها "لمورفينية"، بعد هادشي دار ألبوم سميتو "GALA" ف 2020، و كيوجد البوم yakine و تايوجد ألبوم أخر سميتو Excelsior. أشهر طراك عند لمورفين هو " Lmorphinya 17" و عنددو طراكات نالو شهرة واسعة فساحة الراب المغربي مثل sucré salé و Lmorphininiya 33 و kill 2 . لمورفين طلع للمنصة لأول مرة فلبولڨار فكازا عام 2022.[3][5]
لمورفين معروف بالميطافور، و كاين لي تايلقبو بلملك ديال لميطافور فراپ لمغريبي، لي تايخلي لكتابة ديالو خاصها نوع من تركيز وتحليل ولقراية لورا سطورة، بتالي لجمهور ديالو متشبت بيه، كيفما معروف عليه أنه ماتيديرش لڤيديو-كليپات، و تايسجل طراكات ديالو مباشرة بعد ما تايكتبهم.[6]
لجمهور ديال لمورفين كان قليل فلبداية، لكن بقا كايتطور، تا تأسسات عام 2015 مجموعة سميتها SQUAD 2020، لي جمعات ليفان ديال هاد راپور. 2020 كان بحال لعام لموعود لي كان مفترض ينشر فيه لمورفين لالبوم شهير ديالو Excelsior، لكن فلأخير ماقدرش ينشرو فهاد لأجل، لي خلى فئة من لجمهور ديالو تغضب عليه.[2] ف 2020 بدات عامة الشعب لمغريبي كاتسمع للمورفين، خصوصا بعد ما بان فشي مقابلات صحفية، و قدرات لموسيقى ديالو توصل عدد مشاهدات كبير فليوتيب. عام 2022 نشر لمورفين لالبوم ديالو GALA فمنصة Spotify لأول مرة، و لقى إقبال كبير، كيف ما معروف أنه تايفضل يتواصل معا لجمهور ديالو فتويتر.[4][5][6]
لمورفين أثر فلمسيرة ديال بزاف ديال لفنانا فلمغريب، بحال "پوز فلو"، "حمزة 15-3"، "رائد"، "نيسيو" ،"4.8"، الرائد، و غيرهم. كيف ما غنا معا رواپا أخرين بحال لموتشو، و كلاشا بزاف ديال رواپا بحال ل پوز و 8ird و لفردة وكلاس A و لموتشو.
- ^ "L'Morphine, Histoire et Projets d'un Lyricist Marocain sur IMPACT" (ب نڭليزية). مأرشيڤي من لأصل ف 2023-03-23. تطّالع عليه ب تاريخ 2022-12-09.
- ^ a b "L'Morphine - AY9ONA - The Documentary" (ب نڭليزية). مأرشيڤي من لأصل ف 2023-08-13. تطّالع عليه ب تاريخ 2022-12-09.
- ^ a b "L'Morphine". Genius (ب نڭليزية). مأرشيڤي من لأصل ف 2023-03-18. تطّالع عليه ب تاريخ 2022-12-09.
- ^ a b Empty citation (معاونة)
- ^ a b Empty citation (معاونة)
- ^ a b "L'Morphine : Je ne suis pas un fan du rap [INTERVIEW]" (ب نڭليزية). مأرشيڤي من لأصل ف 2023-03-31. تطّالع عليه ب تاريخ 2022-12-09.
