ميدلت
ميدلت
| ||||
|
ميدلت (ar) | ||||
 | ||||
| لبلاصة | ||||
| لبلاد | لمغريب | |||
| لإقليم | إقليم ميدلت | |||
| السكان | ||||
| شحال دالسكان | 62,648 (2024) | |||
| شحال دلفاميلات | 16,225 (2024) | |||
| لجغرافيا | ||||
| لعلو | 1,508 م | |||
| خط الطول بـ ° | -4.7333 | |||
| خط لعرض بـ ° | 32.6833 | |||
| معلومات خرين | ||||
| السيت الرسمي | midelt.com | |||
| الرمز لجغرافي | 2542227 | |||
| لخريطة | ||||
 | ||||
ميدلت (بـ لأمازيغية: ⵎⵉⴷⵍⵜ - ميدلت) هي مدينة مغريبية وجماعة ترابية حضرية، وهي العاصمة الإدارية ديال إقليم ميدلت لي تابع لـ جهة درعة تافيلالت شحال هادي كانت تابعة لجهة مكناس تافيلالت قبل التقسيم الجديد ديال 2015 هاد لمدينة مبنية ف واحد البلاصة فشكل حيتاش جات ف الوسط نيشان بين جبال لأطلس لكبير وجبال لأطلس لمتوسط ميدلت مصنفة من بين لمدن العاليين ف لمغريب حيت جات ف لعلو ديال 1508 متر فوق سطح ديال البحر لمدينة معروفة ف لمغريب كامل بسميت لعاصمة ديال التفاح او مشهورة ف لعالم بالتراث ديالها لي مربوط بالمعدن او الجيولوجيا على حساب لإحصاء لعام 2024، وصل عدد ديال سكان دلمدينة لـ 62,648 واحد او هادشي كيبين التقليعة ف لبني او لقتيصاد لي عاشتو لمدينة ف السنين اللخرة.[1]
هاد الجدول كيبين التقليعة ف شحال دالسكان او شحال دالفاميلات ف ميدلت او فيه مقارنة بين لإحصاء ديال 2014 ولإحصاء اللخر ديال 2024 الى عتمدنا على دكشي لگلتو المندوبية السامية للتخطيط:[1]
| العام ديال الإحصاء | شحال دالسكان | شحال دالفاميلات |
|---|---|---|
| 2014 | 55,304 | 13,111 |
| 2024 | 62,648 | ممعروفش |
السمية ديال ميدلت عندها أصل أمازيغي حر او كاينة بزاف ديال الهدرة عليها بحال:
- الهدرة اللولة واللي قريبة للمنطق كتكول بلي ميدلت جاية من كلمة أماس لي كتعني الوسط حيت لمدينة جات نيشان ف الوسط بين جوج سلسلات د الجبال لأطلس لكبير او المتوسط
- الهدرة التانية كتربط السمية بـ كلمة أمازيغية قديمة كتعني المرعى اولا البلاصة فين كيتجمعو السرحة حيت قبل ما تتبنى لمدينة المنطقة كانت غي بلاصة كيسرحو فيها القبايل الرحل ف وقت الربيع او الصيف
قصة ميدلت كتجمع بين التقاليد ديال الأمازيغي القديمة او التاريخ الجديد ديال الصنعة او لمناجمالى جينا نشوفو بحال:
- القبائل لي سكنات المنطقة: قبل ما يدخل الاستعمار المنطقة كانت غا قصور او قصبات مجموعين فبلاصة وحدة بحال قصر عثمان أوموسى او قصر فليلو او كانت هي الدار ديال قبايل أيت يزدڭ او لمعونة ديال أيت يافلْمان الأمازيغي , هاد القبايل كانو عايشين على السرحة دالبهيم او شوية د الفلاحة، وكانو كيحضيو الطرقان د التجارة لي كدوز من الجبال.
- وقت الحماية او التأسيس لول: لمدينة د ميدلت بهاد الشكل الجديد بانت ف عهد لحماية لفرنساوية على لمغريب ف عام 1917 لفرنساويين عزلو هاد البلاصة باش إيصاوبو قشلة ديال العسكر او مكاتب ديال الإدارة باش يراقبو القبايل لي كانت كتقاوم ف الأطلس ولكن السبب لكبير لي خلاهم يطورو لمدينة هو ملي كتاشفو مناجم الرصاص او الزنك ف بلايص بحال أحولي او ميبلاذن لي قراب ليها
- الوقت الذهبي ديال لمناجم: ف الثلاثينات او الأربعينات ميدلت عاشت واحد الرواج اقتصادي كبير بسباب لمناجم صاوبو فيها السكة د التران الصغيراو بناو فيلات للمهندسين او سبيطار او ولات لمدينة عامرة بالخدامة لي جاو من كاع جويه لمغريب واخا هاد المناجم سدو ف السبعينات بقا داك الأثر ديالهم ف الذاكرة او لبني ديال لمدينة.
لمدينة مبنية ف واحد البلاصة واعرة او قاصحة دقة وحدة او عامرة بالغلة ديال الطبيعة
- البلاصة: ميدلت جات ف واحد الهبطة عريضة مزيرة بين جبال صعاب ف الشمال ديالها كاين الأطلس المتوسط او ف لجنوب كيبان مزيان جبل العياشي
- جبل العياشي: هو الرمز ديال ميدلت العلو ديالو كيوصل لـ 3747 متر او كيبقى مغطي بـ الثلج شهور طويلة ف العام هاد الجبل كيتعتابر لخزين ديال الما ديال المنطقة او منو كيخرجو بزاف د الوديان او لكبير فيهم هو نهر ملوية لي كيشق طريقو حتى كيتكب ف البحر لبيض المتوسط.
- لجو: الجو ف ميدلت جبلي 100% ف الصيف الجو كيكون زوين او مبرد او هادشي هو كيجيب السياح لي هاربين من الصهد د مكناس او فاس او لمدون لخرة , اوف الشتا الجو كيكون قاصح بزاف اوالحرارة كتهبط تحت الصفر كتقدر توصل لـ -10 ديال درجات او الثلج كيطيح بالجهد هادشي لي كيخلي المنطقة تعيش ف واحد لعزلة شي مرات
لقتيصاد ف ميدلت واقف على الفلاحة او السياحة ديال الطبيعية 1. عاصمة ديال التفاح: ميدلت هي لي كتنتج أكبر نسبة ديال التفاح ف لمغريب البرد ديال الشتا او لجو لبارد ديال الصيف هو لي كيعطي للتفاح د ميدلت ديك الجودة او لبنة الوعرة لمنطقة كتخرج لغراق ديال تفاح كول عام والأنواع لي معروفة بزاف هي ڭولدن سطاركينڭ اوڭالا الفلاحة هنا زادت للقدام او ولات معولة على لفيرمات لكبار شباكي كيحميو من التبروري او فريڭوات كبيرة لي مخدمين آلاف ديال لخدامة.[2] 2. السياحة ديال طبيعة: ميدلت او النواحي ديالها بحال ميبلاذن هي مكة ديال الباحثين ف الجيولوجيا والناس لي كيجمعو الحجر الكريم ف لعالم المنطقة مشهورة حيت كيتجبد منها حجر الفانادينيت لحمر او السيروسيت لي كيتباعو ب ثمن غالي ف المعارض د أوروبا او ميريكان هادشي خلق سياحة علمية كيجيو فيها البرانيين باش يكتشفو المناجم القديمة.[3] 3. الصنعة التقليدية: الصنعة التقليدية ف ميدلت باينة ف الزرابي الأمازيغية او الطرز , قصبة مريم هي بلاصة قديمة صاوبوها راهبات مسيحيات فرانسيسكانيات شحال هادي او اليوم شادينها عيالات د لبلاد هاد الورشة كتعلم العيالات يطرزو وينسجو وكتعاونهم يدخلو مصروف ل ديورهم.
- شبكة ديال الطرقان: العرق الكبير لي كيربط ميدلت ب لمغريب هو الطريق الوطنية رقم 13 هاد الطريق كتربط بين مكناس أزرو او خنيفرة ف الشمال او كتنزل لـ الراشدية ف لجنوب على طريق تيزي ن تلغمت لي كيوصل العلو ديالو لـ 1900 متر هاد الطريق الجبلية كتكون صعيبة او خطيرة ف يامات التلج
- المشاريع الجديدة: ملي ولات ميدلت عاصمة د الإقليم ف 2009 الدولة دارت استثمارات صحيحة ف البنية التحتية، بحال سبيطار إقليمي جديد توسيع ديال شي طرقان و لكين كين شي بليص لي باقي خصهم إتصوبو
الجماعة ف ميدلت جبلين او شادين ف الجدورة الأمازيغية الأصلية ديالهم
- مهرجان دالتفاح: هو لموسم لكبير ف لمدينة كيدار كول عام ف شهر أكتوبر او كيكون فرصة للفلاحة باش يبينو الغلة ديالهم او فيه كيكونو سهرات د الموسيقى الأمازيغية، معارض د الصنعة التقليدية او كيجيو الناس من كاع لمدن
- الفن الشعبي ديال المدينة : فن أحيدوس هو الروح د الثقافة ف ميدلت كيتجمعو فيه الرجال او العيالات ف صفوفا متقابلة او كيغنيو شعر أمازيغي على الدقة ديال البندير هاد الفن كيبين لمعونة الصحيحة ديال بنادم الجبلي مع الأرض ديالو.
- 1 2 "النتائج الأولية للإحصاء العام للسكان والسكنى 2024". المندوبية السامية للتخطيط.
- ↑ "مخطط المغرب الأخضر وتنمية سلسلة التفاح بميدلت". وزارة الفلاحة والصيد البحري.[ليان مهرس ديما]
- ↑ "التراث المنجمي والجيولوجي بمنطقة أحولي وميبلاذن". وزارة الانتقال الطاقي والتنمية المستدامة.
 |
ويكيميديا كومنز عندا تصاور و معلومات على ميدلت. |
 هادي زريعة ديال مقالة خاصها تّوسع. تقدر تشارك ف لكتبة ديالها. |