لمغارة د هرقول

لمغارة د هرقول
معلومات عامة
نوع	كهف
لبلاد	لمغريب
لموضع	طانجا
لمدينة	Coastline of Africa
تحل فـ	1920
تصنيف تراتي	ترات تقافي ديال لمغريب
معلومات إضافية
لمواد دبال لبني	حجر جيري

لمغارة د هرقول مجموعة د لكهوف لأركيولوجية لي جات حدا كاپ سپارطيل، 14 كيلوميطر ف لغرب ديال طانجا، ؤ ماشي بعيدة على لقصر لملكي د طانجا. لمغارة عندها جوج فتحات، وحدة كاتطل على لبحر، ؤ لوخرة على لبر، منين كيدخلو سّياح ف لعادة. لفتحة لبحرية كاتسمّا "لخريطة د إفريقيا"، حيت شّكل ديالها كيبان بحال يلا قلبتي لخريطة د قارة إفريقيا أفقياً.

لكهوف طرف منها طبيعي، ؤ طرف أخور كبير حفروه سّكان لأمازيغ لأصليين ف أزمنة غابرة باش يستعملو لحجر ف لمصاوبة ديال أدوات مختالفة، بحال روايض، طاحونات ؤ غيرهوم. ف لقديم كانو نّاس كيعتاقدو بلي لمغارة د هرقول كاتبقا نازلة بلا حدود، ؤ بلي كاين شي ممر سري طولو 24 كيلوميطر كيربطها معا ؤروپا تحت من مضيق جبل طّر.

أساطير

لؤسطورة كاتݣول بلي رّب ليوناني هرقول، نعس ف هاد لمغارة قبل مايكمّل لعطاشة نمرة 11 من بين 12 كان كلّفهوم بيه لماليك ؤريسثييوس، ؤ لي كانت باش يجيب تّفاحات دّهبية من جّردة ديال لحوريات لغربيات، لي لموضع ديالها كان ف مدينة ليكسوس حدا لعرايش. على حساب لمكتوبات د رّومان، كان واحد جّبل سميتو أطلس لي كان كيجمع شمال إفريقيا معا ؤروپا، ؤ فاش هرقول داز من تماك، بلاصت ما يتسلّق جّبل، هرقول خدّم لقوة لخارقة ديالو باش يهرّسو، ؤ بهادشي فصل لقارات بجوج على بعضياهوم، ؤ خلق مضيق جبل طّر. طرف من جبل أطلس لأسطوري هوّا جبل طّر، ؤ لاخور ف جّيهة لمقابلة هوّا إما جبل هاشو ؤلا جبل موسى. هاد جّبال من جوج جوايه كيتسمّاو لعمايد د هرقول.

تاريخ

ف لعصر نّيوليتي (جوايه 6000 قبل لميلاد) كان بنادم ساكن ف مغارة هرقول. ف لفترة لعصرية، عاودو تّكتاشفو هاد لكهوف ف 1878. ف 1920 سّلطات حلو لمغارة ل لعوموم، ؤ تصنّفات ترات تقافي وطني ف 1952.

ف 1986، ب موبادرة من صديقة ديال لفنان نّݣليزي براين ݣايسين، لي كان ساكن ف طانجا، تشتت رّماد ديال لبقايا ديالو ف لمغارة.

ف 23 أكتوبر 1995، لݣروپ د رّوك لبريطاني ديف ليپارد، لعبو لموسيقا ف لمغارة د هرقول (بعدما دارو حفلة د لموسيقا ف ڤانكوڤر ف كانادا ؤ ف لندن) ؤ بهادشي دخلو ل موسوعة ݣينيس د رّوكورات، حيت دارو تلاتة د لحفلات موسيقية ف 3 د لقارات ف نفس نّهار.

ف 20 دجنبر 2003، تسدو لكهوف على عوموم نّاس بعدما طرا نهيار سبابو أشغال د لبني حدا لموضع، ؤ عاود تحلّات ف يناير 2004، بعد لمعاينة د لبلاصة. ف شتنبر 2015، تحلّات لمغارة ل لعوموم، بعدما كانت تسدّات عامين بسباب إصلاحات.