لعالم د روكانون
لعالم د روكانون
| ||
| معلومات عامة | ||
| عنوان أصلي | Rocannon's World | |
| نوع د لكتاب | خيال عيلمي | |
| مؤلف | ؤرسولا لڭوين | |
| لبلاد لأصلية | الولايات المتاحدة د ميريكان | |
| لّوغة لأصلية | لينڭليزية د لميريكان و نڭليزية | |
| تاريخ د نّشر | 1966 | |
لعالم د روكانون (لعنوان لأصلي Rocannon's World) رواية د لخيال لعلمي من تأليف لكاتبة لميريكانية ؤرسولا لڭوين لي كانت أول رواية ديالها. تنشرات أول مرة ف 1966 ف نفس لكتاب معا رواية "لحكم ديال كار-تشي" The Kar-Chee Reign ديال لكاتب أڤرام ديڤيدصون. لأحدات د الرواية كيطراو ف لعالم لخيالي د هيين Hain، ولاكين فيها عناصر ديال لفانطازيا لملحامية. لبطل د لقصة ڭاڤرال روكانون كيتلاقى معا أسياد ساكنين ف قصور و هازين سيوفا، و كائنات خيالية بحال لأقزام و لحوريات، ف كوكب لي متخلف طيكنولوجياً.
ف هاد الرواية ختارعات لڭوين كلمة "أنسيبل" ansible لي كاتعني بيها جهاز ديال التواصل سرع من الضو، و لي نتاشرات عند بزاف د لكتّاب د لخيال لعلمي.[1]
تنشرات الرواية جوج مرات موراها، مرةّ ف 1978 معا لكوكب د لمنفى و لمدينة د لأوهام ف نفس لكتاب ب عنوان "تلاتة د الروايات لهينية"، و مرة خرة معا نفس الروايات ب عنوان "لعوالم د النفي و لوهم" ف 1996.[2]
كاتبدى الرواية ب مدخل ب عنوان "السنسلة د سيملي" Semley's Necklace، لي كان تّنشر قبل على شكل قصة قصيرة ف شتنبر 1964 ب عنوان The Dowry of Angyar. هاد لقصة كاتعاود على واحد لمرا شابة سميتها "سيملي" لي خداوها أقزام على مركابة فضائية من كوكبها لمتخلف، ل متحف كاين ف واحد لكوكب أخور، لي محطوطة فيه سنسلة د لعنق كانت ف لأصل ديال جدودها. ف هاد لقصة روكانون كيكون خدّام ف داك لمتحف، و كيعطيها السنسلة.
بسباب التمدد د الزمان، على حساب نضرية د النسبية، ملي كاترجع سيملي كاتلقى بلي بنتها قدّها ف لعمر و راجلها ديجا مات، وخا الرحلة ب نّسبة ليها شدات غير ليلة.
لباقي د الرواية كيركّز على روكانون، لي كيسافر ف مغامرة معا صاحبو لحاكم موڭين (حفيد ديال سيملي) و لأتباع ديالو، باش يلقاو لقاعدة ديال واحد لعدو لي دمّر لمركبة لفضائية د روكانون و قتل صحابو. ملي كينجح روكانون ف لمهمة ديالو، كيستاقر ف لقارة الجنوبية د لكوكب، و كيتجوج ب واحد لمرا تماك. ملي الناس ديالو كيوصلو ل لكوكب بعد 9 سنين، كيلقاو بلي روكانون مات ديجا بلا مايعرف بلي لكوكب ولّا مسمّي عليه.