دوري الملوك

دوري الملوك
نوع ديال	كورة بستيل جديد
التسيير	InfoJobs
بانت ف	برشلونة اسيانيا
اللي ختارعها	جيرارد بيكي
لمدّة	40 دقيقة كل شوط فيه 20 دقيقة

دوري الملوك ولا كينڭس ليڭ (ب نݣليزية: The Kings League) هو تورنوا ديال لكرة سبعة ضد سبعة، قادها جيرار پيكي بالشراكة مع شخصيات معروفة اللي ف كورة و صناع المحتوى على الأنترنت. تأسسات ف 2022. هاد البطولة عندها قوانين مختلفة على كورة، بحال الپيلانتيات ف حالة التعادل، تغييرات بلا حدود، وزيد عليها "أسلحة سرية" باش تزيد الحماس والمتعة فالماتشات. الهدف من الدوري هو تقديم كورة جديدة وممتعة، خاصة للشباب، مع قواعد مختلفة وتركيز كبير على الترفيه والطكنولوجيا.

تاريخ

هاد الدوري دارو جيرار پيكي، لي كان كيلعب ف إف سي برصلونة و المنتخب الصبليوني. تعاون مع إيباي يانوس، لي هو أكبر صانع محتوى فإسبانيا باش يخلقو واحد البطولة جديدة كليا. فيها 12 فرقة، وكل فرقة عندها رئيس معروف، بحال سيرخيو أڭويرو لي كان كيلعب ف مانشستر سيتي، وإيكر كاسياس حارس ريال مدريد السابق.

وبدا أول موسم ف 1 يناير 2023. الدوري كان فيه 12 فرقة.

قواعد د لعبة

هاد الدوري كيتميز بقواعد مغايرة للقواعد ديال الكرة اللي كنعرفوها، كاتشبه قوانين ف رياضات خرين بحال كرة الما ولّا التينيس. مثلا، ضربة البداية كتشبه اللي كاينة ف كورة الما، حيث كيتسابقو اللّعابا باش ياخدو الكرة فوسط التيران. اللّعاب اللي بغا يدير پيلانتي خاصو ينفذها فـ5 تواني، ومن وسط التيران كيمشي يواجه الحارس. كل فرقة عندها الحق تستعمل تقنية الڤار غير مرة وحدة، ولكن تقدر تطلبها مرة أخرى يلا تبت بلي الطلب اللول كان صحيح.

عدد التبديلات ماشي محدود، و 5 د اللّعابا كيكونو فالإحتياط. التسلل كيتحدد فخط ثابت قريب لمنطقة د الپيلانتي.

اللاعب اللي كيجيه الكارطة الصفرا كيتوقف على اللعب لمدة ديال جوج دقايق، واللي كيجيه الكارطة الحمرا كيتوقف 5 دقايق، من بعد كيقدر ادخل بلاصتو لعاب أخور ماشي هو وحتى كدوز 5 دقايق عاد يقدر يدخل. أما الكارطات فـ"دوري الملوك" ما كايوقفش على الكارطات العادية اللي كنعرفوها فكورة، حيث كاينة الكارطة الذهبية اللي تقدر تقلب الماتش فأي لحظة. اللي عندو هاد الكارطة يقدر يستفد من امتيازات بحال إلغاء بطاقة صفرا ولّا يطلب يتحسب هدف إضافي. الماتشات ديال دوري الملوك كايتلعبو فتيران صغيور اللي عندو نص المساحة ديال التيران القانوني ديال كورة، يعني، قواعد دوري الملوك مختلفة على القواعد ديال كورة العادية، وحتى الجمهور عندو الحق يساهم فاقتراح بعض القواعد.

هاد "دوري الملوك" كيتكوّن من 12 فرقة، وكل فرقة كيترأسها نجم عالمي من نجوم الكرة. كل فرقة كاتشكّل من 7 د اللعابا، وعدد اللعابا المسجلين يوصل لـ12، منهم 10 اللي تسجلو قبل فـشهر دجنبر اللي فات.

الماتشات المدة ديالها 40 دقيقة. فحال إذا تسالا الماتش بالتعادل، كيتم اللجوء للپيلانتيات. وأفضل 8 فراقي كيمشيو لربع النهائي.

قواعد التسلل

شنو هو التسلل؟

التسلل هو واحد القانون باش اللعب يبقى منظم وما يكونش فيه غش. هاد القانون كيقول: ماشي من حقك توقف قريب بزاف من لڭون د الخصم بلا ما يكون قدامك على الأقل لعّاب ديال الدفاع وقت ما كتپاصى ليك الكرة.

كيفاش كيتحدد التسلل؟

كاين خط وهمي قدام منطقة لپيلانتي (البلاصة اللي كاينة قدام لڭون). هاد الخط هو اللي كيعتامد عليه الحكم باش يعرف واش شي لعّاب ف موقع قانوني أولا لا.

1. يلا كان لعّاب قدام الخط:
   • اللعّاب متسلل إذا ما كاينش على الأقل لعّاب ديال الخصم (غير الحارس) قدامو وقت التمريرة.
2. يلا كان لعّاب ورا الخط أولا متساوي معاه:
   • ما كاين حتى مشكل، اللعب قانوني.
3. شنو كيوقع وقت التمريرة؟ الحكم كيشوف واش اللعّاب كان قدام الخط فالحظة اللي خرجات الكرة من رجل اللعّاب اللي عطا الپاص.

علاش كاين هاد القانون؟

تصوّر يلا ما كانش التسلل:

• المهاجمين غادي يبقاو واقفين قريب من لڭون بلا ما يلعبو اللعب الحقيقي.
• المدافعين غادي يتغلبو بزاف، واللعب ما غاديش يكون متوازن.

التسلل كيخلي كلشي يلعب بشكل منظم، ويخلي المهاجمين يتحركو بزاف ويتقاتلو باش يوصلو للڭون بطريقة ذكية.

واش ديما التسلل؟

لا، كاينين حالات اللي ما كيتحسبش فيها التسلل:

1. يلا كان لعّاب فنص التيران ديالو وقت لپاص.
2. يلا جات الپاص من لعّاب ديال الخصم (بحال تدخل خطأ).
3. يلا كان لعّاب بعيد و ماشي مشارك فالحركة ديال الكرة (يعني ما قاسهاش وما أثرتش على المدافعين).

شنو كيوقع إذا كان لعّاب متسلل؟

يلا الحكم شاف لعّاب متسلل:

• كيوقف اللعب.
• الفرقة الخصم كاتستافد من ضربة حرة ماشي مباشرة (يعني اللعب من البلاصة اللي كان اللعّاب فيها متسلل).

مثال بسيط:

• اللعّاب واقف قدام لڭون، و الكرة عند صاحبو اللي غادي يعطيه الپاص.
• يلا كان اللعّاب واقف قدام الخط ديال التسلل وما كاينش مدافع ساد عليه، وخرجات الكرة، الحكم غادي يصفر التسلل.
• ولايني يلا كان اللعّاب ورا الخط أولا متساوي معاه، كلشي غادي يكون قانوني ويتقدر اللعّاب يجيب بيت.

التسلل فهاد النظام الجديد:

فالعادة، التسلل كيتحدد بناءً على موقع لمدافع اللخر. ولكن فهاد النظام الجديد، كاين خط محدد قدام منطقة لپيلانتي هو اللي كيلعب دور المرجع. هاد الشي كيبسط اللعب ويخلي الحكم ياخذ القرار بسهولة.

كاس لعالم د لكينڭس ليڭ 2025

•  مقالة متعمقة: كاس لعالم د لكينڭس ليڭ 2025

المنتخب المغربي لعب أول ماتش ديالو فالبطولة العالمية ديال "دوري الملوك" نهار الخميس 2 يناير 2025 ف ميلانو. ضد المنتخب الكولومبي مع الستة ديال العشية بتوقيت المغرب، والماتش تم البث ديالو على يوتيوب وكيك وتويتش. وخسر المغرب ب 4 لبيوتا مقابل بيت واحد، كان المدرب ديال المنتخب هو مجيد الخال، حارس الوداد القديم.

الفرقة فيها لعّابا محترفين ف دوري الملوك الصبليوني بحال ندير لواح لي ربح الكرة الدهبية ف 2024، وفؤاد العمراني، وعصام الراقي، وأشرف سعود، و زكريا حدراف، وحارس الفوتسال بنسلام. كاينين حتى شي لعّابا معروفين فالسوشل ميديا بحال مهدي العامري وسعيد العوني "لولا الظروف". اليوتيوبر فاروق لايف لي ساكن ف سپانيا هو اللي عوض إلياس المالكي لي تطلق من الحبس قبل يومين من البطولة.

البطولة فيها 16 فرقة، وكل فرقة خسرات فالدور اللول عندها فرصة تانية باش تتأهل لدور الثمنية.