جيهة (مستوى إداري)

من ويكيپيديا
اذهب إلى التنقل اذهب إلى البحث

لجيهة هي سمية كاينة فلمجال ديال السياسة وليدارة وليقتيصاد معروف باللي هو طرف من التراب اللي فيه مميزات طبيعية وبشرية ديالو كاتخليه كايبان على لجيهات اللي مجاورين ليه أولا فلمجموعة اللي تابع ليها. لجيهة فلمفهوم ديالها اللي معروف كاتعني لمينطقة أولا الناحية. لكلمة ديال لجيهة تقدر تعني بلاد أولا ݣروب ديال لبلدان أولا قارة أولا طرف من قارة، أما فالناحية ديال لعملية: الجهة كايجي معاها شي صفات كايميزوها بحال إما تكون بحرية أولا صيناعية أولا حضرية أولا قتيصادية.[1]

تصنيف لجيهات[بدل | بدل لكود]

لجيهة الطبيعية[بدل | بدل لكود]

لجيهات ديال فينلاندا

هي طرف ديال لرض (صغير أولا كبير) اللي الضواهير ديالو الطبيعية مشابكة فما بينها، الشي اللي كايعطي واحد لجغرافيّة اللي طبيعيا واحدة وكاينة بوحدها ما كاتشابه معاها حتى شي بلاصة خرة، وعندها التضاريس ديالها ولموناخ ديالها ولحاياة لبرية فيها. الجبولة متالا كاتحدد كيفاش غايكون لموناخ والشجر والزرع فيها ونوع لحياوانات اللي يقدرو يعيشو تما، ومن تما كايجي التشكيل ديال كيفاش الناس ديال ديك لجيهة غادي يعيشو.

لجيهة لحضرية[بدل | بدل لكود]

هي جيهة فيها بزاف ديال ليپول أولا لأقطاب (مدون أولا مراكز) اللي مترابطة بيناتها ودايرة التواصول وفيها مراكيز ديال لينتاج والتوزيع.

نوع لجيهات[بدل | بدل لكود]

كاتختالف لجيهات على حساب لماعايير وليختيارات اللي حاطّاهوم الدولة، والاكين ممكين نفرقو بين جوج مرارك على حساب الناشاط اللي هاد لجيهات كايديروه، واللي هوما:

لجيهة السياسية[بدل | بدل لكود]

لجيهات ديال فرانسا من لبدية ديال 2016.

هاد النوع ديال لجيهات كايجمع بزاف دلمناطيق اللي متقاربين وعندهوم سياسات وقتيصاد مشارك فواحد التقسيم ليداري، وكاتعني التحكوم ديال واحد لݣروپ دلباشار متقاربين كايستاغلو لمواريد ديال لرض اللي حاكمينها. وهي كاتكون فاش كايتصاوب سيستيم ديال ليدارة عندو صلاحيات ديال النموداج دالدولة، حيتاش عندو سلطة كاتشبه داكشي اللي عند الدولة بحال السلطة التشريعية ولقضائية كيما دارت الدانمارك وفرانسا اللي عطاو لجماعات واحد ليستيقلالية فالتسيير ديال ديك لارض تقريبا فكولشي.

لجيهة لوضيفية[بدل | بدل لكود]

لجيهات (محافضات) ديال السويد.

يمكن لينا نهضرو على هاد النوع ديال لجيهات فاش كاتعطيهوم الدولة باش إيديرو شي حوايج على قبالت يقادو التنمية ديال ليقتيصاد ولمجتماع محليا ووطنيا بلا ما يوصلو لجيهات هادو للنيڤو ديال لجيهة السياسية، كيما كاين فلمملكة لمتحدة والسويد اللي دارو جيهات قتيصادية اللي حقيقية باش إيعاونو فالتفعيل ديال ليقتيصاد لماحلّي ديالهوم.[1]

لجيهة فلمغريب[بدل | بدل لكود]

لخاريطة ديال جيهات لمغريب

لجيهة فلمغريب عرفات واحد التطور اللي كبير حيتاش تقسمات لبلاد إيداريا ل40 إقليم و9 دلعمالات و2 دلولايات ؤولا التقسيم ديال وزارة الداخلية وهادشي ف1989. من موراها ف1990 وصلات التقسيمات ل16 جيهة و45 إقليم و26 عمالة و10 دلولايات. ومن مورا هاد التقسيم بان مفهوم جديد اللي هو "لجيهة ليقتيصادية" اللي كاتمتل السلطة ديال لمركز واللي حطات فبالها فاش كانت كاتقسم لبلاد لحقائيق ديال ليقتيصاد ولبشر. ف2015 تدار تقسيم جديد اللي نقص عدد لجيهات من 16 ل12.[2] هاد لجيهات هوما: جهة الداخلة وادي الذهب، جهة الدار البيضاء سطات، جهة الرباط سلا القنيطرة، جهة الشرق، جهة العيون الساقية الحمراء، جهة بني ملال خنيفرة، جهة درعة تافيلالت، جهة سوس ماسة، جهة طنجة تطوان الحسيمة، جهة فاس مكناس، جهة مراكش آسفي وجهة ݣلميم واد نون.

لمصادير[بدل | بدل لكود]

Wikimedia Commons تقدر تزيد شوف بزاف د صور و معلومات ديال Regions ف ويكيميديا كومنز.