توريا جبران

من ويكيپيديا
اذهب إلى التنقل اذهب إلى البحث
توريا جبران
توريا جبران
معلومات عامة
زيادة 16 أكتوبر 1952
الدار البيضا
لوفاة 24 غشت 2020 (67 عام)
الدار البيضا
سباب لموت سباب طبيعيسرطان ترجم و كوڤيد-19
لجنسية لمغريب
لميهنة ممثلة ترجم، سياسي و مخرجة مسرحية ترجم
لجوايز
IMDB: nm0413028 Allocine: 83556 Modifica els identificadors a Wikidata



توريا جبران ولا ثريا جبران، و سميتها لحقيقية السّعدية قريطيف (خلاقت ف دّار لبيضا ف 16 أكتوبر 1952 و توفّات ف دّار لبيضا ف 24 غشت 2020[1])، كانت فنّانة مسرحية و ممتّيلة و مرا سياسية مغريبية. سبقليها كانت وزيرة تّقافة بين 2007 و 2009، وكانت أول مرا فنّانة كاتّاخود لباليزة د هاد لقيطاع.[2]

حياتها[بدل | بدل لكود]

السّعدية قريطيف خلاقت ف دّار لبيضا و كبرات ف حي عين الشّق. كنية "جبران" خداتها من عند راجل ختها لّي هو لّي تكلّف بيها و كبّرها من بعد ما توفّا لواليد ديالها. لواليدة ديالها كانت خدّامة مربّية ف دار لأطفال د عين الشّق و هو شّي لّي خلا السّعدية تدوز وقت كبير د صغرها فيها، و داكشّي لّي كبّر فيها روح تّضامن مع لمهمّشين و نّاس ضّعاف ف لمجتمع.[3]

السّعدية بدات لمسرح و هي بنت عشر سنين و لعبات و هي صغيرة فوق لخشبة د لمسرح لبلدي د كازا و كان راجل ختها كايشجعها بزاف على لمسرح و عليها خدات كنيتو ف سميتها لفنّية.[3] كانت أول فرقة لعبات معاها هي "الأخوة العربية" لّي كان كايسيرها عبد العظيم الشناوي، وكانت أول مسرحية ديالها سميتها "أولاد اليوم".[3]

السّعدية قرات لبتيدائي و لّيسي ف كازا و كانت من نّسا لمغريبيات لّوالا لّي خداو شّهادة لبتيدائية ف لستيقلال.

من بعد لباك، تسجلات ف لمعهد د لمسرح لوطني د رّباط و خدات منّو ديبلوم التخصص المسرحي. كانت عندها ميولات سياسية و كاتلعب أدوار ف مسرحيات لّي كانو كايخلقو ليها مشاكيل مع لبوليس سّياسي د يامات لحسن تّاني. كانت محسوبة على حزب لتّيحاد لشتيراكي، يّامات كان حزب موعاريض، و وصل حد لمضايقات ل درجة أنها تخطفات فاش كانت غادية تشارك ف برنامج حواري سياسي ديال دّوزيم، هادوك لّي خطفوها تكرفسو عليها و قرّعو ليها شعرها.[2][3]

ف 2007 تعيّنات وزيرة د تّقافة، مع لتّيحاد لشتيراكي، و فلعهد ديالها تدارو بزّاف د لحوايج مزيانة ل لفنانين لمغاربة بحال قانون لفنّان، لاكارط د لفنّان و تّغطية صّحية د لفنانين. ماكملاتش ف لوزارة بسباب لمرض ديالها.[2]

لكاريير لفنية ديالها[بدل | بدل لكود]

تورّيا لعبات ف بزّاف د لأعمال ف لمسرح و تّلفزة و سّينيما.

كانت من رّواد د مسرح الهواة ف المغريب و لعبات مع بزّاف ديال لفراقي بحال "الشهاب"، "المعمورة"، "القناع الصغير" و لفرقة ديال لمسرحي لكبير الطيب الصّديقي لّي لعبات معاه مسرحية "ديوان عبد الرحمن المجذوب" ف 1980 و "ابو نواس" ف 1984 و "الف حكاية و حكاية في سوق عكاظ" ف 1985.

ف 1987 أسسات لفرقة د "مسرح اليوم" و كانت أول مسرحية ديالهوم "حكايات بلا حدود" لّي خرجها راجلها لمسرجي و لكاتب عبد الواحد عوزري و قتابس نّص ديالها من قصايد شّاعر سّوري محمد الماغوط.

مسرحيات[بدل | بدل لكود]

  • ديوان عبد الرحمن المجذوب - الطيب الصديقي - 1980.
  • أبو نواس - الطيب الصديقي - 1984.
  • حكايات بلا حدود - مسرح اليوم - إخراج عبد الواحد عوزري - 1987.
  • أربع ساعات في شاتيلا - 2001. (نصّ جان جوني).
  • الشّمس تحتضر - نصّ: عبد اللطيف اللعبي.
  • الشمس تحتضر.
  • بوغابة.
  • إمتا نبداو.
  • امرأة غاضبة.
  • حكايات بلا حدود.
  • النمرود في هوليود.
  • الجنرال.
  • طير الليل
  • اللجنة - نصّ من رواية صنع الله ابراهيم.
  • أيام العز.

أفلام[بدل | بدل لكود]

  • الناعورة - 1984.
  • الزفت - 1984
  • غراميات - 1984
  • شفاه الصمت - 2001
  • عطش - 2001
  • عود الورد - 2007

جوايز[بدل | بدل لكود]

  • وسام الاستحقاق الوطني (لمغريب).
  • وسام لجمهورية لفرنسية للفنون و الآداب من درجة فارس (فرانسا).
  • جائزة الشارقة للإبداع المسرحي العربي 2008 (لإيمارات).

مصادر[بدل | بدل لكود]

  1. "وفاة الفنانة المغربية ثريا جبران عن 68 عاما". skynewsarabia.com (بلعربية).
  2. 2.0 2.1 2.2 سارة بوحافة. "ثريا جبران.. مسار فنانة بدأت من الهامش وجلست على كرسي الوزارة". febrayer.com (بلعربية).
  3. 3.0 3.1 3.2 3.3 "ثريا جبران". aljazeera.net (بلعربية).
Wikimedia Commons تقدر تزيد شوف بزاف د صور و معلومات ديال Touriya Jabrane ف ويكيميديا كومنز.