ويكيپيديا:تعارض د لمصالح
تّعارض د لمصالح هوا وصف ديال حالة كيكون فيها لكتاتبي عندو علاقة مباشرة و شخصية ؤلا مصلاحية معا لموضوع لي كيكتب عليه، متلاً يكتب على راسو، شي فرد من لعائلة، صاحبو، لكليان ؤلا لمشغل ديالو. أي علاقة ؤلا مصلاحة برانية على لمصلاحة د ويكيپيديا (نشر د لمعلومات بشكل محايد و ب ليعتيماد على مصادر موتوقة)، كاتّعتابر "تعارض د لمصالح". تّعارض د لمصالح وصف ل واحد لوضعية، و ماشي حوكم على رّأي، لمصداقية ؤلا نّية لمزيانة د شي كتاتبي.
تّعارض د لمصالح كيتّعتابر مكروه ف ويكيپيديا، حيت كيضعّف لمصداقية د لمحتوى، ؤ يقدر يخلي لأشخاص ؤلا لمؤسسات لي تّكتب عليهوم يتعرّضو ل إحراج عام و ف وسائل لإعلام، يلا تّعرف بلي كيكتبو على راسهوم ؤلا من طاراف شي حد قريب. تّعارض د لمصالح ماعندوش علاقة معا لملحوضية، و ماكيعنيش بلي لمقال ب ضّارورة غادي يتّحدف. يقدر يكون لكتاتبي ماواعيش ب تّأتير ديال تعارض لمصالح على شنو كيكتب، ولاكين ف حالت يلا تسبب هادشي ف مشاكيل ؤ خرق ل سّياسات د ويكيپيديا، يقدر لكونط د لكتاتبي يتعرّض ل لبلوك.
لكتاتبي لي ف حالة ديال تعارض د لمصالح ب نّسبة ل شي موضوع، خاصو يعلن عليها (من غير يلا كانت لقضية واضحة ب سّمية). أي واحد كيكتب ب لفلوس، خاصو يدكر إينا جيهة لي مخلّصاه. من لأحسن باش لكتاتبي لي عندو تعارض د لمصالح يقتارح تبديلات ؤلا لمصاوبة د لمقال، ؤ مايديرش داكشي ب يديه (شوف ويكيپيديا:طلبات لي فيها نواع طّلبات ف ويكيپيديا). فاش يكون لبحت جاري ف قضية ديال تعارض د لمصالح، خاص لكتاتبي ؤلا لأمغار مايحطش سّمية د لأشخاص ؤلا لمؤسسات لمعنية ف بلاصة عومومية، يلا ماكانوش ديجا معروفين، حيت هادشي يقدر يدخل ف إطار تّحرش ؤلا تّشهير.
سّياسة ديال تعارض لمصالح
[بدل لكود]يلا كان لكتاتبي عندو تعارض د لمصالح ب نّسبة ل شي موضوع، خاصو:
- يدير طلب ديال تّبديل ؤلا لمصاوبة د مقال. من لأحسن مايديرش تّبديلات رّاسو.
- يعلن على هاد تّعارض ف صفحة مناسبة (متلاً ف صفحة ديال طلب تبدال ؤلا لمصاوبة د مقال).
- مايكونش موراجيع ديال لمقال لمعني.
- يحتارم لخدمة و لقرارات ديال لكتاتبيا لي خدمو على لموضوع، و ف حالت يلا كان عتيراض، يسجّلو ف صفحة د لمداكرة د لمقال بشكل مختاصر ؤ محتارم.