ويكيپيديا:لملحوضية

هادي صفحة ديال لْحكام د لموسوعة. هاد صّفحة محمية و مايمكنش يبدل فيها غير مستخدم أمغار. يلا بغيتي تقتارح شي تبديل ف لْحكام ديال لملحوضية، حلّ شي حلقة د نّيقاش ف لبرلمان ولا حلّ شي حلقة ف صّفحة د إمغارن.

روابط نقاشات لمصادقة: 1 -

لملحوضية هيّا مفهوم ف ويكيپيديا لي كيحدد لمقبولية ديال شي موضوع باش يكون عندو مقال ديالو ف ويكيپيديا. لملحوضية ماشي ضمانة بلي موضوع غادي يكون عندو مقال خاص بيه، ولاكين هيّا شرط أساسي. شّروط د لملحوضية كيقدرو يتبدّلو علا حساب نّوع د لموضوع (بيوڭرافيا، ختيراع، مفهوم، ؤ غيرهوم)، ولاكين كاين شرط لي ضاروري يتوفر ف جميع لحالات، هوّا لوجود ديال عيون/مصادر مستاقلة ؤ مقبولة، لي ف لحالة د لأشخاص ؤ لمؤسسات، ماصادراش علا شّخص ؤلا لمؤسسة لي كايپروفيليهوم لمقال. لملحوضية ديال أي موضوع تقدر تّناقش مابين لكتاتبيا، ؤ أي كتاتبي عندو لحق يطرح لملحوضية ديال شي مقال تحت مسوال، ؤ يفتح مداكرة عليها ف صّفحة د لمداكرة ديال لمقال براسو. ف هاد لحالة، خاص يتزاد لقالب موضيل:ملحوضية بشكل مناسب ف لفوق د صّفحة د لمقال، حتا تّسالا لمداكرة علا لملحوضية د لموضوع. يلا تّقبل لمقال بلي عندو ملحوضية، كيتحيد لقالب. سينو علا حساب لقرار لّخراني، كيتزاد بلاصتو موضيل:دمج ؤلا موضيل:تحياد.

لمقبولية ماشي هيّا لملحوضية، حيت يقدر موضوع كيحقق شّروط د لملحوضية يتزاد غير كا فقرة ف مقال، بلاصت مايكون عندو مقال خاص بيه، ؤلا يتّدمج معا شي موضوع أخور ف مقال واحد يلا كانو متقاربين، ؤلا مايتزادش ڭاع يلا كان كيخرق شي سياسة ديال ويكيپيديا من غير لملحوضية. لكتاتبيا بيناتهوم هوما لي كيحددو واش موضوع عندو ملحوضية يقدر يتزاد ليه مقال بوحدو ؤلا لا. لمقبولية كاتعني بلي لموضوع تّقبل باش يكون عندو مقال خاص بيه. لكتاتبي يلا بان ليه بلي موضوع عندو ملحوضية، يقدر يعطيه مقبولية ؤ يزيد ليه مقال. أي كتاتبي يقدر يعارض لمقبولية ؤ يقتارح باش يتزاد لمحتوى د لمقال ف شي صفحة ديال مقال أخور (كا فقرة متلاً)، وخا يكون لموضوع عندو ملحوضية.

لملحوضية ديال موضوع د مقال ماعندهاش علاقة معا لجودة د لكتبة ديالو. يقدر يكون موضوع مكتوب بشكل عيان ؤ بلا عيون عندو ملحوضية، ؤ موضوع أخور مكتوب ب ؤسلوب واعر ؤ متقون ماعندوش ملحوضية ؤ خاصو يتّدمج ف مقال أخور ؤلا يتحيّد. لملحوضية ديال موضوع د مقال كاتّحدّد ضونك ماشي ب لمقال براسو، مي ب تحقيقو ل شّروط د لملحوضية بغض نّاضار علا شنو مكتوب ف لمقال (طالما لموضوع واضح).

لمقبولية ديال مقال ف وحدة من لويكيپيديات لكبار (لي فايتين مليون مقال ؤ لعمق ديالهوم فايت 100)، كاتعطي لموضوع ديالو ملحوضية ف ويكيپيديا ب دّاريجة ف أغلبية د لحالات، سيرتو يلا كان متوفر ف كتر من وحدة فيهوم، ماحد داز من لموراجعة د لملحوضية تماك. هادشي ماكينفيش بلي أي كتاتبي يقدر يعاود يحل مداكرة علا لملحوضية ديال هاد لموضوع. لمواضيع لمحلية لي عندها علاقة ب لمغريب بشكل موباشير ؤلا ماشي موباشير، تقدر تكون عندها ملحوضية ف ويكيپيديا ب دّاريجة، وخا ماتكونش كاتحقق شروط د لملحوضية ف ويكيپيديات خرين.

بشكل عام، أي موضوع كيحقق هاد تّلاتة د شّروط، كاتّوفر فيه لملحوضية:

كيحقق شّروط د لملحوضية لعامة
كيحقق شّروط د لملحوضية لخاصة د لمجال ديالو
ماكيتعارضش معا سّياسة لمدكورة ف ويكيپيديا:ويكيپيديا ماشي..

لملحوضية ماكاتنطابقش علا حوايج مدكورين فوسط مقال. متلاً وخا يكون شخص ماعندوش ملحوضية، يقدر يتّدكر ب سميتو ف مقال يلا كان عندو علاقة ب لموضوع، بحال فرد ديال لفاميلة ديال شي شخص عندو ملحوضية ف لمقال ديالو.

حكام مخصصين خرجو من قرارات د الجماعة

المجال	لحكام	حلقة النقاش اللي تخاد فيها القرار

شّروط لعامة د لملحوضية

لملحوضية لأولية ديال موضوع كاتّحقق يلا توفرات تغطية كافية ديال لموضوع ف عيون/مصادر موتوقة، لي مستاقلة علا مول شّي (داكشي لي كيهضر عليه لموضوع).

أولية: وخا يتوفرو جميع شّروط ديال لملحوضية، كيبقا لموحديد لخراني هوّا لمداكرة ؤ لقرار ديال لكتاتبيا.
تغطية كافية: ماخاصش لموضوع يكون مدكور غير دايز (كلمة ؤلا جوملة صافي) ف جميع لعيون. خاص تكون علّاقل عين وحدة كاتناقش لموضوع بشكل متعمق ؤ كافي ؤ وافي.
عيون/مصادر: لمقصود هنا هوما لعيون تّانوية، لي كايكونو عادتن مقالات طوال ؤلا كتوبا منشورين من طاراف مؤسسات متخصصة، ؤلا علّاقل حرايفيا معروفين ف لمجال ديالهوم. لعيون تّانوية كاتكون عادتن مبنية علا أبحات أصلية، لي منشورة ف جورنالات د صّيونص، ؤ لي كيقدرو يفهموها غير لحرايفيا د ضّومين. لعيون تّانوية كاتحقق توازن ف لفهامة ؤ لموتوقية، حيت كاتكون جاية من عند لحرايفيا براسهوم، ؤ ف نفس لوقت موتاحة ل عامة د نّاس لي عندهوم معرفة ب ضّومين ؤ باغين يديرو مجهود باش يفهمو لموضوع. لعيون تالتية، بحال لمقالات ؤ لكتوبا ديال تبسيط لعولوم ؤلا لمقالات د لخبار، كيقدرو يتخدّمو ف مقال، ولاكين ماخاصهومش، بشكل عام، يتخادو كا إتبات ديال لملحوضية. شّروط لخاصة علا حساب لمجال، تقدر تزيد تفصل ف هادشي، ؤلا تبدّل فيه علا حساب شنو كيتطلبو لمواضيع ديالو ؤفين كاتكون لكتبة عليهوم. مبدئياً، عين وحدة تقدر تكون كافية، ولاكين عادتن باش تكون لملحوضية مضمونة، حسن يكونو بزاف.
موتوقية: خاص لعين تكون مقبولة علا حساب لحكام د لعيون، ؤ ماتكونش ف لبلاك ليست ديال ويكيپيديا ب دّاريجة، ؤ يكون مشهود ليها، سوا تاريخيا (ب سّتيعمال لمعاود ديالها)، ؤلا ف عيون خرين، بلي عندها موتوقية ؤ بلي لمعلومات ديالها صحاح علا قدر لمعرفة لحالية ديال لحرايفيا د ضّومين. لّوغة ماشي موحديد ديال لموتوقية، ؤ أي عين ب أي لوغة ديال بنادم كاتّعتابر مقبولة يلا توفرو فيها شّروط لمدكورين هادي شوية.
ستيقلالية: لعيون لي كاتصدرهوم مؤسسة ؤلا شخص، بشكل موباشير ؤلا لاموباشير، مايمكنش يتخدّمو كا إتبات ديال لملحوضية ل داك شّخص ؤلا ديك لمؤسسة. متلاً لوطوبيوڭرافيا (سّيرة دّاتية) يلا كتبها شخص، ماكاتعنيش بلي هاد شّخص خاصو يتپروفيلا ف مقال خاص بيه ف ويكيپيديا ب دّاريجة. خاص يكونو عيون مستاقلة لي كاتهضر علا هاد شّخص، لي كاتصدرها مؤسسات ؤلا أشخاص مامتعلقينش بيه (ماشي مؤسسات ديالو ؤلا أشخاص خدّامين عندو متلاً). يلا كانت لوطوبيوڭرافيا ف حد داتها عامال أدابي لي حقق شروط لملحوضية، ف هاد لحالة يقدر لكاتب ديالها ياخد لملحوضية يلا حقق شّروط لخاصين ب لكتّاب (شوف لتحت).

بشكل عام، شّروط د لملحوضية ب نّسبة ل لمواضيع لي عندها علاقة ب لمغريب كيكونو مرخوفين شوية كتر من لمواضيع لي ماعندها علاقة بيه.

التبدال ف الشروط د لملحوضية كيتدار ب حلان نقاش جديد ف الصفحة د لمداكرة.

شّروط لخاصة د لملحوضية

ف لموستقبال كلا واحد من هاد لمجالات غادي تكون عندو پاج ديالو كاتحدد شّروط د لملحوضية ديالو ب تّفصيل.

لبلايص

أي بلاصة جغرافية ساكنين فيها نّاس ؤ معتارف بيها قانونيا (بحال ف تقسيم تّرابي ولا لإحصاء د ناس) كاتحقق لملحوضية ؤطوماتيكيا.

لبلايص لي برا د كوكب لأرض

لبلايص لي كاينين ف لفضاء لبراني ؤلا فوق كسادي كونية (كواكب، مدنبات، كويكبات...)، كاتكون عندهوم ملحوضية غير يلا كانت شي عين تانوية كاتهضر عليهوم بشكل واضح ؤ تفصيلي. متلاً شي فوهة فوق لڭمرة لي تدارو عليها بزاف د لأبحات.

لبلايص لخياليين

لبلايص لي طرف من موعتاقاد ؤلا ؤسطورة ؤلا عامال أدابي، لي ماعندهومش وجود ف لواقع (ؤلا ماشي كولشي نّاس متّافقين بلي كاينين بصح)، كاتعتامد لملحوضية ديالهوم علا شّروط د لملحوضية لعامة، معا تحديد وجود تلاتة د لعيون تانوية ؤلا تالتية كيهضرو عليها بشكل ماشي دايز.

لأشخاص

بشكل عام لأشخاص لحيين ؤلا لميتين لي دارو أعمال موهيمة، شغلو مناصب كبيرة ؤلا كان عندهوم تأتير علا أحدات تاريخية، سوا قريبة ؤلا بعيدة ف لماضي، كيتعتابر بلي عندهوم ملحوضية. هاد لأهمية كاتّحدد ب وجود عيون تانوية ؤلا تالتية كاتهضر عليهوم. كلما زاد لعاداد ديال هاد لعيون ؤ مقدار تعاطيها ؤ تّعمق ديالها ف سّيرة د هاد لأشخاص، كلما زادت لملحوضية ديالهوم. باش يحقق شخص لملحوضية، خاصو يحقق شّروط ديال تصنيف ؤلا كتر من تّصنيفات لي تحت. يلا كان واخد شوية شوية من كتر من تصنيف، ولاكين ماكيحقق حتا واحد فيهوم 100%، خاص تّطرح لحالة ديالو ل لمداكرة ؤ لڤوط. ب نّسبة ل شّخصيات لمغريبية، أي شخص عندو إيدونتيفيكاتور معروف عالمياً بحال وورلدكات WorldCat ؤلا ڤياف VIAF ؤلا غيرهوم، ؤ دار شي عامال موهيم بزاف لي لأهمية ديالو ماكاتقبلش نّيقاش، كاتكون عندو ملحوضية بشكل موباشير، يلا كانت وخا غير معلومة بيوڭرافية عليه متوفرة (متلاً لعام د زّيادة ؤلا لموت).

لملحوضية د لأشخاص لي ماشي مغاربا:
- كيحقق شروط لملحوضية ف ويكيپيديا ب نّڭليزية ؤلا ف لوغة من لّوغات ديال لبلاد ديالو ؤلا لي كيكتب ؤلا كيهضر بيها. من لأحسن يكون ديجا مقال عليه متوفر ف وحدة من هاد لويكيپيديات.

لكتّاب و لفنانين

لملحوضية د لكتّاب و لفنانين لمغاربا:
- بعض لمعلومات لبيوڭرافية متوفرة ف عيون/مصادر موتوقة (علّاقل جوج)، بحال: فوقاش تزاد، فين تزاد، فوقاش مات، فين مات، لمناصب، لأنشطة...
- علّاقل عامال أدابي ؤلا فني واحد عندو ردمك (ISBN) ؤلا إيدونتيفيكاتور كيقابلو (رقم إيداع قانوني ف لمغريب متلاً) لي هضر عليه لإعلام ف تلاتة د لمصادر علّاقل لي موتوقين ؤ مستاقلين قانونيا ؤ ف لمضمون ديالهوم (ماكيعاودوش نفس لهضرة). لأعمال لفنية تقدر ماتكونش عندها إدونتيفيكاتور (بحال لّوحات لمرسومة)، ولاكين خاصها تكون معروفة بشكل كافي.
- ؤلا يلا ماكانو حتا معلومات عليه متوفرين، عندو تلاتة د لأعمال ب قيمة د كتاب (كتاب، سيناريو د فيلم...)، واحد منهوم علّاقل عندو ردمك، ؤ جّوج لوخرين مدكورين ف تلاتة د لعيون مقبولين ؤ مستاقلين (ماشي ناقلين من بعضياتهوم).

لأكاديميين

لملحوضية د لأكاديميين لمغاربا:
- بعض لمعلومات لبيوڭرافية متوفرة ف عيون/مصادر موتوقة ؤ مستاقلة (علّاقل تلاتة)، بحال: فوقاش تزاد، فين تزاد، فوقاش مات، فين مات، لمناصب، لأنشطة...
- علّاقل 10 د لأبحات منشورين
- علّاقل إيدونتيفيكاتور واحد، بحال VIAF (ضوسي مخازني ڤيرتوالي).
لملحوضية د لأكاديميين لي ماشي لمغاربا، نفس داكشي لي كينطابق علا لمغاربا، ؤ زيد عليهوم بلي عندهوم شي رتيباط معا لمغريب (متلاً دارو بحت ف لمغريب ؤلا علا شي حاجة متعلقة بيه). ؤلا ب بساطة عندهوم ملحوضية ف ويكيپيديا ب نّڭليزية (من لأحسن يلا كان ديجا مقال عليهوم مديور ؤ داز من لموراجعة).

لمسؤولين

جميع لمسؤولين د شي بلاد لي خداو مناصب علا أعلا مستوى ف لبلاد (ملوك، رؤاسا، حوكومة، برلامان، ...) عندهوم ملحوضية بشكل تلقائي. ف لمغريب، لمسؤولين علا مستوى جيهة ؤلا مدينة ؤلا جماعة حتا هوما عندهوم ملحوضية، طالما كاينين:

تلاتة د لعناصر لبيوڭرافية
تلاتة د لعيون لمستاقلة كاتوتق لمنصب ؤ لبيوڭرافيا ديالهوم

رّياضيين

جميع رّياضيين لي خداو ميداليات علا لمستوى دّولي، كيما كانت لجنسية ديالهوم، خاص يتپروفيلاو، ب لإضافة ل لمغاربا لي خداو ميداليات ف لمغريب. لمغاربا لي شاركو ف تضاهورة رياضية دولية بلا ما ياخدو ميدالية ؤلا جايزة، ؤلا كيلعبو ف دّوري لّول ديال شي سپور، يقدرو يتپروفيلاو حتا هوما يلا كاينين:

تلاتة د لعناصر لبيوڭرافية
تلاتة د لعيون لمستاقلة كاتوتق لبيوڭرافيا ديالهوم

شخصيات تاريخية

شّخصيات لي ماتو ؤ كانو مشاركين ف أحدات تاريخية، ؤلا لي ماتو هادي 50 عام، وخا ماكانوش طرف ف أحدات تاريخية ؤ عندهوم ؤلا مرتابطين ب شي عامال موهيم (كتاب، بني، عامال فني، منصب...) كيتّعتابرو شخصيات تاريخية. يلا كان شّخص ؤلا لعامال ديالو مدكور ف شي عين تانوية بشكل ماشي عاراضي (ماشي غير دايز)، كاتكون عندو لملحوضية. ف حالت يلا كانو لعيون/لمصادر عليه قلال بزاف، ؤلا كيدكروه غير بشكل دايز، كيخص لملحوضية ديالو تتناقش.

شخصيات دينية ؤ ؤسطورية ؤ خيالية

شّخصيات لي لوجود ديالها طرف من دين ؤلا موعتاقاد، ولاكين ماكاينش إتبات تاريخي علا لوجود ديالها، كاتّعتابر شخصيات دينية. نفس شّي كينطابق علا شخصيات من أساطير قديمة، لي تدكرات ف كتوبا قدام ؤ شخصيات خيالية لي تّختارعات مؤخراً ف حجّايات ؤلا روايات حاديتة (متلاً سپايدرمان). لپروفيلاج ؤ لملحوضية ديال هاد شّخصيات كيعتامدو علا دّاراجة د لملحوضية ديال دّين، لؤسطورة ؤلا لعامال لأدابي لي هوما طرف منو.

متلاً، لأديان لي عندها عاداد قليل د لأتباع ؤ تأتير ضعيف جتيماعيا ؤ إعلاميا، يقدر يتّجمعو لمعلومات عليها كاملين ف پاج وحدة. بينمّا لأديان لكبار يقدرو يتدارو مياوات ؤلا آلاف د لپاجات لي كيفصّلو ف لعناصر ديالهوم، بما فيهوم شّخصيات لي داخلين ف لموعتاقاد ديالهوم.

بشكل عام، شّخصيات من هاد نّوع خاصهوم يحتارمو شّروط لعامة د لملحوضية، معا تحديد وجود تلاتة د لعيون تانوية ؤلا تالتية كيهضرو عليها بشكل ماشي دايز.

لكتوبا

لكتوبا لي كيتحققو فيهوم واحد ؤلا كتر من هاد لمزايا، كاتكون عندهوم ملحوضية:

لكتاب مدكور، بشكل ماشي غير دايز، ف أعمال أدابية ؤلا نقدية ؤلا مقالات لي مستاقلة علا لكتاب براسو (ماشي إشهار ديال لكتاب متلاً)، بحيت كيتم تحليل ؤ طرح لمواضيع ديالو، ؤ كيعطي مادة كافية باش يتّكتب مقال عليه من وجهات ناضار مختالفين. هاد لأعمال ؤلا لمقالات خاص تّوفر فيهوم شروط لعيون لي ديجا مدكورين.
لكتاب ربح جايزة كبيرة سوا ف لمغريب ؤلا ف لخاريج، ؤ متوفرين فيه شّروط لعامة د لملحوضية.
لكتاب ساهم بشكل واضح ؤ مافيه شك ف شي عامال فني ؤلا سينيمائي، ؤلا شي حادات تاريخي ؤلا سياسي، ؤلا شي حاراكة سياسية ؤلا دينية.
لكتاب كيتدرّس بشكل رسمي ف لمغريب ف أي مستوى د لقراية ؤلا مؤسسة، ؤلا ف جوج مؤسسات تعليمية برا د لمغريب.
لكاتب هوّا شخصية موهيمة ف تّاريخ، ل داراجة بلي أي حاجة كتبها كاتّعتابر بلي عندها ملحوضية. هادشي ماكيعنيش بلي لكاتب غير عندو ملحوضية (هادي مسألة ضمنية)، مي بلي عندو أهمية ستيتنائية لي كاتخلي حياتو ؤ جميع لإنتاجات ديالو موضوع ديال دّيراسة لأكاديمية (متلا جميع لكتوبا ؤ لإنتاجات ديال أفلاطون ؤلا شيكسپير). ب نّسبة ل لكتوبا ديال لمغاربا، يكفي باش يكون هادشي صحيح علا مستوى لمغريب، وخا مايكونش لكاتب معروف برا.
لكتاب تطرجم ل دّاريجة ؤلا لأمازيغية (لمعيارية د لمغريب ؤلا أي لهجة أمازيغية ديال لمغريب)، ؤ كيحقق شّروط لعامة