نايضة
نايضة ؤلا حيحة ؤلا نوڤيل سين (ب لفرانساوية Nouvelle scène) هيّا حركة تقافية ؤ فنّية بانت ف لمغريب، سيرتو ف كازا، ف لعقد لّول د لقرن واحد ؤ عشرين ؤ نقدرو نعتابروها باقة مستامرة تال دابا. هاد لحركة عندها بزاف د تّجليات ف لفنون بحال لموسيقا، رّسيم، ؤ لأداب، ؤ مدعومة ؤ مݣيدية سيرتو من طاراف شّباب. لمصطلح د نايضة تخدّم ل لمرة لّولة ف غلاف ديال مجلة تيلكيل ف ماي 2006.[1] نقدرو نݣولو بشكل عام بلي حركة نايضة هيّا نتيجة ديال طلوع جيل جديد د شّباب لي متأتر ب لعولامة ؤ لأنتيرنيت، ؤ باغي تغيير جدري ف بزاف د لميادين. هاد لحركة كاتدعو ل تقافة حورة، بعيدة علا لبيروقراطية د صناعة د تّقافة ف لقنوات رّسمية.[2] كاين لي كيقارنها ب حركة موڤيدا لي بانت ف سپانيا مورما مات لجينيرال فرانكو.[3]
علا مستوى لموسيقا، واحد من أهم لأحدات كان هوّا طليق ديال لبولڤار ف 1999، لي هوّا فيستيڤال د لموسيقا كيتدار كولا عام ف كازا، ؤ كيجيو ليه شّباب من لمغريب كامل، باش يسمعو ل نواع موسيقية بحال رّاپ ؤ لهاردروك. من بين أهم لموسيقيين ؤ لݣروپات د لموسيقا لي بانو مزيان ؤ تشهرو ف لپولڤار كاين هوبا هوبا سپيريت، دون بيݣ، فناير، أش كاين، ؤ غيرهوم. هاد لحركة لموسيقية ب تّحديد كاتسما حيحة ميوزيك.
علا مستوى رّسيم ؤ لفنون ديال تازواقت، بانو موبادرات بحال صباغة باغة ف 2013 لي كيشاركو فيها فنانين من لمغريب ؤ من برا ف تزيين لفاصادات د لمباني ف لمدون لكبار بحال كازا، رّباط ؤ مراكش، لي باقي كاتدار كولا عام.[4]
علا مستوى لأداب ؤ لّيسانيات ؤ سّياسة لّوغاوية، شتدو لموطالبات ب دّاريجة كا لوغة د لكتابة ؤلا حتا باش يتقرّا بيها ف لمدارس، سيرتو ف لمستويات لّولة، ؤ خرج عاداد مابيهش ديال لأعمال لأدابية ؤ طرجمات ب دّاريجة، بحال ريوايات ؤ كتوبا علا مواضيع بحال لفلسفة، لّانݣويستيك ؤ صّيونص. هادشي نتيجة طابيعية ديال تخدام دّاريجة كا لوغة د تّواصل ف أنتيرنيت ؤ إسيميس، من طاراف شباب لي ولّات عندهوم هاد لّوغة عادية ؤ متداولة ف لكتابة، عكس لأجيال لي قبل منهوم.
كاينين موبادرات لي كومبيناو جوج ؤلا كتر من هاد لمضاهر تّقافية، بحال لمجلة د سكف كف ديال لكوميكس ب دّاريجة، لي ساهمو فيها مجموعة د شّباب بحال زينب فاسيكي، لي من بعد دارت أعمال د لكوميكس ديالها، ؤ موبادرات بحالها.[2]
نتيقادات[بدل | بدل لكود]
من بين لنتيقادات ضد حركة نايضة، كاين مقال تّنشر ف 4 يونيو 2007 ف جورنال التجديد لي تابع ل حيزب لعدالة ؤ تنمية، لي عتابر بلي لبولڤار "خاطار علا لهوية لمغريبية".[5] ؤ بشكل عام لإسلاميين كانو معارضين ل لحركة ؤ لمضاهر تّقافية ديالها علا جميع لمستويات، ؤ طّلوع د حيزب لعدالة ؤ تّنمية ل لحوكومة ف لنتيخابات د 2011، تقريبان أدّا ل ركود ديال حركة نايضة شي سنوات قبل ما يعاودو يحييوها موبادرات تقافية جداد.
تغطية[بدل | بدل لكود]
خرجو جوج د لأفلام وتائقية كيهضرو علا نايضة، لولاني ف 2007 ديال فريدة بليزيد ؤ عبدرحيم مطور ب سميت "كازا نايضة !"[6] ؤ تاني ف 2019 د هشام لعسري ب سميت "نايضة؟".[7]
عيون لكلام[بدل | بدل لكود]
- ^ "غلاف ديال تيلكيل نمرة 229" (ب لفرانساوية). 29 ماي 2006. مأرشيڤي من لأصل ف 2021-09-28. تطّالع عليه ب تاريخ 2021-09-28.
- ^ a b "" خانز وبنين " مجلة ترسم الواقع بريشة التمرد". لكم.كوم (ب لعربية). 11 غشت 2015. مأرشيڤي من لأصل ف 2023-02-03. تطّالع عليه ب تاريخ 2021-09-28.
- ^ Mohamed ELAJI (2 شتنبر 2008). "Au commencement était la « Nayda »". lopinion.ma (ب لفرانساوية). مأرشيڤي من لأصل ف 2021-09-28. تطّالع عليه ب تاريخ 2021-09-28.
- ^ ""صباغة باغة".. مهرجان لفن الشارع في الدار البيضاء" (ب لعربية). 22 يوليوز 2019. مأرشيڤي من لأصل ف 2021-09-28. تطّالع عليه ب تاريخ 2021-09-28.
- ^ Hassan Hamdani (23 يونيو 2007). "Maroc contre Marock" (ب لفرانساوية). مأرشيڤي من لأصل ف 2021-09-28. تطّالع عليه ب تاريخ 2021-09-28.
- ^ "Casanayda !". film-documentaire.fr (ب لفرانساوية). مأرشيڤي من لأصل ف 2021-11-15. تطّالع عليه ب تاريخ 2021-09-29.
- ^ ""Nayda", votre documentaire à regarder sur 2M, ce dimanche 06 octobre à 21h45". دوزيم (ب لفرانساوية). 4 أكتوبر 2019. مأرشيڤي من لأصل ف 2023-04-15. تطّالع عليه ب تاريخ 2021-09-29.