لميتولوجيا لأمازيغية

من ويكيپيديا
اذهب إلى التنقل اذهب إلى البحث

لميتولوجيا لأمازيغية هي مجموعة من لمعتقدات و لألهة لقديمة لي عبدوها لأمازيغ، سكان لأصليين ديال شمال افريقيا. بزاف من هاد لمعتقدات تطورات محليا، بينما معتقدات خرا جات ك نتيجة ل تواصل لحضاري عبر تاريخ، مع لأديان لإفريقية تقليدية، و ديانة لمصرية لقديمة، أولا تخدات من عصور قديمة من ديانة لبونية ديال قرطاج، ديانة ليهودية، لميتولوجيا لأيبيرية، و ديانة لهيلينيستية. آخر ما تأترات بيه لمعتقدات لأمازيغية هو لإسلام و ديانات لقديمة ديال لجزيرة العربية قبل لإسلام. بعض من هاد لمعتقدات لأمازيغية باقي حاضر ليوم ف تقافة شعبية و لعادات ديال لأمازيع. و بعض تأتيرات لأمازيغية حاضرة ف لمعتقدات ديال شعوب خرا.

طقوس ديال دفن[بدل | بدل لكود]

لبحت لأركيولوجي ف لمقابر لقديمة ف لمغريب لكبير، بين بلي لجتت ديال ناس لميتين كانو مصبوغين ب أوكسيد رصاص. ب رغم من أن هاد لممارسة تعرفات عند لإيبيروموريسيين، هاد تقافة كانت صناعة ديال لحضارة لقبصية. لموتى بعض لمرات كانو كايتدفنو مع لقشور ديال بيض نعام، لمجوهرات، و لأسلحة. لجتت كانو غالبا كايتدفنو ف لوضعية ديال لجنين.[1]

لڭوانش، لي هوما لأمازيغ ديال جزر لكناري، و خلافا لباقي لأمازيغ لي ف لبر رئيس، كانو كايحنطو لموتى. ف 1958، لبروفيسور فابريزيو موري (1925-2010) من جامعة روما، كتاشف واحد لمومياء لي عمرها 5000 عام تقريبا، يعني تقريبا ألف عام قبل من أي مومياء مصرية قديمة.[2][3]

لعبادة د لموتى[بدل | بدل لكود]

ف واحد لكتاب سميتو البربر، دكرو لمؤلفين بلي لعبادة ديال لموتى كانت وحدا من سمات لمميزة ديال لأمازيغ ف لعصور لقديمة.[4] لجغرافي روماني پومپونيوس ميلا قال بلي واحد لمنطقة ف شرق ليبيا لحالية سميتها أوجلة، عتابرو بلي لأرواح ديال لأجداد ديالهم آلهة. كانو كايحلفو بيهم و كايستاشروهوم. و بعد ما كايطلبوهم ف شي حاجة، كاينعسو حدا لقبور ديالهم باش يتسناو رد ف لأحلام ديالهم.[5]

لمؤرخ ليوناني هيرودوت ( 484 ق.م -425 ق.م تقريبا) هضر على نفس هاد لممارسات عند ناسامونس، لي هوما أمازيغ نوميديين سكنو صحاري ديال أوجلة، و لي حدا واحة سيوة ف مصر لحالية. كيقول هيرودوت:

[..] كانو كايحلفو ب رجال ديالهم لي كانو شجعان و مزيانين. كانو كايحطو يديهم على لقبور ديالهم، و كايديرو طقوس ديال تقديس و دعاء، و من بعد كاينعسو حداهم، و أي حاجة كايشوفها لواحد ف لحلم ديالو كايقبلها.[6]

لأمازيغ عبدو حتى لملوك ديالهم.[7] لقبور ديال لملوك نوميديين، هوما من أبرز لمعالم لأترية لي خلاوها لأمازيغ لقدام.

لقبورلأمازيغية لقديمة[بدل | بدل لكود]

لقبور ديال ناس لّولين و لأجداد ديالهم، كايبين بلي لأمازيغ و لأسلاف ديالهم (نوميديين و لموريطانيين) آمنو ب لحياة بعد لموت.  ناس لي عاشو قبل تاريخ ف شمال لغربي د افريقيا دفنو لموتى ديالهم ف حفر صغيرة، و فاش عرفو بلي لحيوانات كاتقدر تجبد دوك لجتت من تحت لأرض و تاكلهم، بداو كايدفنو لجتت ف حفر عميقة، و من بعد، ولاو يدفنو ف لكهوف، ولا تحت تلال صغيرة من تراب ولا لحجر.[1]

هاد لقبور تطورو من واحد شكل بدائي حتا ولاو أشكال دقيقة و مدروسة، بحال لأهرامات لي منتاشرين ف شمال إفريقيا. شرف ديال دفن ف بحال هاد لأهرامات هو ل ناس لي كانت عندهم مكانة كبيرة ف لمجتمعات ديالهم.

هاد لأهرامات تارو لهتيمام ديال بزاف د لعلماء، بحال محمد شفيق، لي كتب واحد لكتاب كايدوي فيه على تاريخ ديال هاد لقبور، لي قدرو يصمدو حتال ليوم. حاول أنه يربط بين لأهرامات لأمازيغية و لأهرامات لمصرية، من واحد لأساس تاريخي.[8] أشهر هاد لأهرامات لأمازيغية هوما واحد لهرم ف منطقة إيمدغاسن ف دزاير، فيه 19 ميترو من لفترة نوميدية قبل رومانية، و هرم لقبر لملكي لموريطاني، لي كاين ف تيبازة ف دزاير.[9]  هاد لهرم تدفن فيه لملك جوبا تاني، و لملكة كليوباترا سيليني تانية.

لآتار صخرية[بدل | بدل لكود]

لقديس أوڭسطين دكر بلي لأفارقة لي كايآمنو ب بزاف د لآلهة عبدو لحجر.[10] أپوليوس حتا هو هضر على هاد لممارسات، و ڭال بلي ناس كانو كايعبدو لحجر ف لقرن تاني.[10] هاد تقافة يمكن كانت جزء من لعبادة د لموتى و لعبادة د نجوم.[10]

لمعلمة ديال مسورة هي أشهر معلمة أترية صخرية ف شمال لغربي د إفريقيا، كاتكوّن من دائرة من لحجر، و وسطها كاين واحد لقبر على شكل هضبة. أعلى حجرة ف هاد دائرة طولها كتر من 5 ميترو. و على حساب ما ڭالت لأسطورة، هاد لقبر هو ديال لملك لأسطوري أنتي.[11] واحد لمعلمة صخرية تكتاشفات ف لجنوب د كازا ف 1926، و لقاوها منقوشة ب عبارات جنائزية ب تيفيناغ.[10]

هيرودوت ڭال بلي لأمازيغ لقدام عبدو شمس و لقمر، و دارو طقوس د تضحية من أجلهم. ڭال:

كايبداو ب لودن ديال ضحية، لي كايقطعوها و كايلوحوها على ديورهم. كايقتلو لحبوان من لعنق. كايضحيو من أجل شمس و لقمر، و ماشي لأي اله اخر. هاد لعبادة معروفة عند كاع ليبيين.[12]

لخطيب روماني سيسيرو (105 ق.م – 43 ق.م) هضر على نفس طقوس ف كتابو في الجمهورية (لحلمة ديال سكيبيو)

فاش (لمتكلم هو سكيپيو) تعرفت عليه، راجل لكبير ف لعمر (ماسينيسا، لملك ديال لماسيل) عنقني، و بكا، و من بعد شاف ف سما، و ڭال، كنشكرك أ سما، و كنشكر ڭاع لكائنات سماوية، أنني و قبل ما نودّع هاد لحياة، كانستقبل ف لمملكة ديالي، و ف لقصر ديالي، سكيپيو [13]

كاينين بعض نقوش ب لاتينية تلقاو ف شمال لغربي د إفريقيا، مهداة ل لإله ديال شمس. متال على هاد نقوش كاين ف سوق أهراس (لبلاصة فين تزاد أوڭستين) ف دزاير، مكتوب فيه "Solo Deo Invicto" ب لاتينية.

لمعتقدات لّيبية لمصرية[بدل | بدل لكود]

لمصريين لقدام كانو جيران ديال لأمازيغ، ب تالي من طبيعي أن بعض لآلهة تعبدو من قبل شعبين ب جوج. لآلهة لمصرية ليبية يمكن تصنف على حسب لأصل ديالها.

لآلهة لمصرية[بدل | بدل لكود]

هيرودوت ڭال بلي لأمازيغ شرقيين لقدام عبدو إيزيس و ست. ڭال

لّيبيين لقدام عمرهوم كلاو لحم ديال لبڭر، ل نفس سبب لي خلا لمصريين ماياكلوهش، و ماكانوش كايربّيرو لخنازير، و حتا ف سيرين (منطقة ف شرق ليبيا)، لعيالات كانو كايشوفو بلي خايب لواحد ياكل لبڭري، و بهادشي تايكرمو الالهة لمصرية ايزيس، لي تايعبدوها عن طريق صيام و لإحتفالات. لعيالات د مدينة برقة حرمو على ريوسهم ماشي غير لحم د لبڭري، و لكن حتا لحم د لخنزير.[14]

هاد لّيبيين لي ماكانوش تاياكلو لحم د لخنزير حيت رتابط مع لإله ست، و ماكانوش تاياكلو لحم د لبڭري، حيت مرتابط ب الالهة ايزيس [15]

لمصادر[بدل | بدل لكود]

  1. 1.0 1.1 Ouachi, Moustapha. “The Berbers and the death.” El-Haraka
  2. "Wan Muhuggiag". Retrieved 16 November 2015.
  3. Hooke, Chris (Director) (2003). The mystery of the Black Mummy (Motion picture). Libya, USA: Magellan TV. Retrieved 7 October 2019.
  4. Brett, Michael, and Elizabeth Fentress. 1996. The Berbers. Oxford: Blackwell, p. 35
  5. Brett, Michael, and Elizabeth Fentress p. 35
  6. Herodotus, Histories, Book 4, 170
  7. James Hastings, Encyclopedia of Religion and Ethics Part 4 - p. 512
  8. Tawalt, Libyan Massyle Site مؤرشف 2007-01-02 فموقع وايباك ماشين قالب:In lang, Chafik, Mohammed. Revue Tifinagh. Elements lexicaux Berberes pouvant apporter un eclairage dans la recherche des origines prehistoriques des pyramides].
  9. Chafik, Mohammed. Revue Tifinagh. Elements lexicaux Berberes pouvant apporter un eclairage dans la recherche des origines prehistoriques des pyramides
  10. 10.0 10.1 10.2 10.3 . “The Berbers and rocks.”
  11. Tertre de M'zora مؤرشف 2004-06-24 فموقع وايباك ماشين قالب:In lang
  12. Herodotus, Histories, book IV, 168–198.
  13. M. Tullius Cicero (105-43 BCE): from On the Republic (Scipio's Dream).
  14. Herodotus: The Histories.
  15. Mohammed Mustapha Bazma, The Libyan Influence on the Egyptian and Greek Civilizations and their Influence on the Libyan Civilization.