لمحقق كونان

من ويكيپيديا
اذهب إلى التنقل اذهب إلى البحث
لمحقق كونان
لمحقق كونان
معلومات عامة
لعنوان لأصلي 名探偵コナン
نوع د لمانڭا Comedy drama anime and manga، mystery anime and manga، أدب بوليسي، thriller anime و mystery anime
مانڭاكا غوشو أوياما
لعام د نّشر 1996
تاريخ د لبدية 5 يناير 1994
لموقع الرسمي https://www.conan-portal.com و http://www.ytv.co.jp/conan/


لمحقق كونانجاپونية:名探偵コナン) ولي كتعني (المحقق العظيم كونان)، هادي سيرية جاپونية ديال لمانݣا دارها ڭوشو ؤياما. السيرية بدات ف 19 يناير 1994 ب لمنشور لول ف لمجلة سيمانية شونن سانداي، وفيها حتال دابا 99 كتيّب لي تباعت ف جاپون.

لمانݣا تدار من بعد سيرية ديال لانيم ف تّيليڤيزيون من طرف ستوديوهات TMS Entertainment، ومن قبل Tokyo Movie Shinsha، و Yomiuri Telecasting Corporation. هاد لانيم لي فيه دابا كتر من 1000 حلقة تدار ف تّلفازة لمرة لّولة نهار 8 يناير 1996 على رّيزو د تّلفازة جّاپوني نيپون تيڤي.

من لمرة لّولة لي تّعرض فيها المحقق كونان، تعرف بزاف وكانت عندو شعبية واسعة، وتطرح كا سيرية على بزاف ديال الوسائل، كا أنيم، OAV، لعابي د تّيليجو، و سلعات مديريڤيين منو. عام 2021، العدد العام من لمانݣا اللي تقرا وصل حتال 230 مليون نسخة، الحاجة اللي خلاتو يكون من بين أكتر لحجايات لمصورة لي تباعت ف لعالام. وفعام 2001، ربحات لمانݣا الجائزة الساتة و ربعين ديال شوكاكوكان فالقسم ديال شونن.

على العموم، الانتقادات للمانݣا وللقصة كانت مزيانة، وهدا كيرجع للحبكة والجودة ديال لقصص لإجرامية وطريقة الحل ديالها.

سينوپسيس[بدل | بدل لكود]

لمانݣا كيعاود القصة ديال سينشي كودو، وهو محقق شاب كيقرى ف لّيسي، لي تحول وصغار ف لعمر منين كلا واحد لحبة غريبة ديال المخدرات و ولات عندو 7 سنين. من بعد ما بقى كيعيش مع صديقة د الطفولة ران موري ومع باها طوݣو موري، غادي يبقى يقلب بشكل سري على طريقة باش يرجع للحالة العادية ديالو ويدخل العصابة اللي دارت فيه ديك الحالة للحبس.[1]

القصة كتقسم على سيريات ديال 3 ولا 4 ديال الأجزاء اللي كولهوم كيهدرو على قضية إجرامية وحدة كيخص كونان يحلها، مع شخصيات وظروف وألغاز مختالفة. لكل حالة، 3 ولا كثر من المتهمين محتملين، وخصنا نتسناو الجزء اللخر باش كونان يكشف على المتهم وكيفاش دار الجريمة، ويمكن بعض المرات المشاهد حتى هو يعرف شكون المتهم إلى تبع الدلائل اللي كيلقاها كونان خلال لونكيت اللي كيدير.

ف نفس لوقت، كونان كيقلب على أعضاء العصابة فتحقيق طويل طول القصة، كل مرة كيلقى دلائل ويجمع أفكار اللي تخليه يعرف الهوية ديال راجل ولا لمرا اللي متبعاه وكتراقبو هو وعائلتو. اللغز الكبير هو يعرف الهوية ديال الشاف ديال العصابة كاملة ويعرف الخطط والأهداف ديالها.

تقلاب ديال كونان باش يرجع للجسم ديالو ديال سينتشي، والعلاقة ديالو مع ران حتى هوما كاينين وحاضرين ف لمانݣا على طول القصة، بلحظات اللي كيقرب فيهوم كونان يصارح فيها ران بالهوية ديالو أو بالشك ديالها هي نيت فيه.

شخصيات[بدل | بدل لكود]

Dessin vectoriel représentant cinq visages côte à côte et se concentrant sur la coiffure et les accessoires.
شخصيات موخودة من لفرانشايز لمحقق كونان. من ليسر ليمن: أيومي يوشيدا، جوزو ميڭوري، هيبارا، كونان ؤ ران موري.
  • سينشي كودو (كونان إدوڭاوا) — هو الشخصية البطلة فالقصة، كان محقق كيقرا ف التانوي كيعاون البوليس فالقضايا الاجرامية. فاللول، كيبان كيهضر سريا مع جوج من الرجال ديال منظمة إجرامية كتسمى "المنظمة مولات لّبسة لكحلة" (ب لعربية المنظمة ذات الرداء الأسود)، ولكن كيتضرب ويوكلوه واحد السم باش يقتلوه بيه ولكن فالحقيقة كيرجعو طفل فالتحضيري. غيمشي من بعد يسكن عند كوڭورو موري (ؤلا توكو موري ف سپيستون) ومع بنتو ران موري، وهو مبدل سميتو لكونان إدوڭاوا. مؤدي الصوت ديال كونان فالسيرية الجاپونية هي مينامي تاكاياما واللي هي فنفس الوقت مرات كوشو أوياما، تزوجو 5 ماي 2005 قبل مايتطلقو 10 ديسمبر 2007. ف غشت 2001، المجلة ديال نيوتايب  NewType دارت سونداج فين تختار كونان إدوڭاوا الرابع فالصنف ديال الشخصيات الدكور اللي معروفة فالجاپون.
  • طوڭو موري — محقق خاص لا علاقة حيت مكيعرف والو، كيبقى غير يتفرج فالتلفازة وصافي.  كونان اللي ساكن عندو باش يقدر يتبع الأتار ديال المنظمة هو اللي خلاه يكون محقق معروف بزاف، منين كينعّسو ويهضر بصوتو بحال إلى طوڭو هو نيت اللي كيهضر ويحل القضية فبلاصتو، كيستعمل فهادشي شي آلات عطاهوم ليه الدكتور أڭاسا. عليها ولا كيتسمى "طوڭو نّاعس" (ب لعربية توكو النائم). وبعض المرات، كتجيه فشكل أنه مكيبقاش عاقل كيفاش حتى حل القضية منين كيفيق.
  • ران موري — بنت طوڭو موري وصديقة د الطفولة وخطيبة د سينشي كودو. كتلعب الكاراطي وعندها جوائز، كتعامل كونان بحال خوها الصغير. هاد كونان ديما مخلوع منها لاتعرف بلي هو نيت سينتشي. ران هي صاحبة سونوكو سوزوكي، بنت واحد من أغنى الرجال فالجاپون.
  • سونوكو سوزوكي — واخا هي من عائلة غنية كتعامل عادي وبكل تواضع. ديما ما كتصدع ران على سينتشي باللي خلاها ومغيرجعش. بعض المرات، منين طوڭو مكيكونش وكونان خاصو يحل القضية، كينعس سونوكو وعاوتاني يهضر بصوتها كيما كيدير مع طوڭو موري.
  • لپروفيسور أڭاسا — مخترع وجار للدار ديال سينتشي كودو، عندو 51 عام. هو أول واحد كيعرف أشنو وقع لسينتشي حتى ولا كونان، نصحو ميقول لحد باللي هو سينتشي باش متنتاقمش منو المنظمة مولات لّبسة لكحلة. هو اللي ختارع لكونان دوك الآلات اللي عندو، باش يقدر يحل القضايا بلا ما يعرفو حقيقتو. الدكتور أڭاسا كيربح فلوس صحيحة من الاختراعات اللي كيبيعها ل شركات كبار. غالبا ما كيسافر الدكتور أڭاسا مع المحققين الصغار وهو سايڭ طونوبيلتو فولكسڤاكن بيتل، سفرات كيتحولو لقضايا.
  • هيبارا — سميتها الحقيقية هي شيهو ميان، سميتها فالكواد هي شيري. ختارعات الصيروم APTX 4869، اللي كلاه كونان. منين مات ختها أكيمي ميانو، مبقاتش بغات تكمل مع العصابة فالأبحات، وحبسوها. خدات الصيروم حتى هي وهربات عند الدكتور أڭاسا وبدلات سميتها لهيبارا. المنظمة كانت هي عائلتها مع ختها، حيت والديها ماتو منين كانت صغيرة، كبرات فميريكان مع ختها.
  • هيجي هاطوري — محقق معروف كيقرى فالليسي، باه شاف ديال البوليس ف ؤساكا. قبل ميعرف حقيقة سينشي كان منافس ليه بالجهد، وقبل ميقول لحتى حد على كونان وولاو صحاب. بعض المرات كيعيط على كونان باش يعاونو يحلو بجوج شي قضية. هيجي هاطوري وكازوها طوياما كبرو بجوج وولاو صحاب.
  • المنظمة مولات لّبسة لكحلة — هي لعدو لّول ديال كونان، هي من المنظمات السرية بزاف وسميتها ماشي معروفة وكادير بزاف ديال العمليات لإجرامية، لبتزاز، لختطاف، التجسس، لقتيلة ؤ زيد ؤ زيد، على قبل أهداف ماشي معروفة، السميات الكود ديال الأعضاء معطيين ليهوم على سميات ديال الشراب. الهوية ديال الشاف الكبير مامعروفاش وهو اللغز الكبير ديال القصة. جين وڤودكا هوما الأعضاء اللولين اللي بانو منين ضربو سينتشي ووكلوه الحبة اللي صاوباتها المنظمة.
  • المحققين الصغار — ڭروب فيه خمسة د دراري ديال تحضيري؛ ڭينتا كوجيما، ميتسوهيكو تسوبورايا، أيومي يوشيدا، كونان وهيبارا، اللي عزيز عليهوم الغموض والإثارة.

ملاحضات[بدل | بدل لكود]

هاد المقالة هي طرجمة للمقالة اللي كاينة فويكيپيديا ب لفرانساوية تحت عنوان "Détective Conan"، مع بعض التحديتات والتغييرات والاضافات.

عيون لكلام[بدل | بدل لكود]

  1. ^ ݣوشو أويوما، المحقق كونان، الحجم 1، 7 سبتمبر 2004، الشاپيطر 2، الصفحة 44.(ISBN 1-59116-327-7)

شوف تا[بدل | بدل لكود]

Wikimedia Commons تقدر تزيد شوف بزاف د صور و معلومات ديال Detective Conan ف ويكيميديا كومنز.