لمتحف ليهودي لمغريبي

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

لمتحف ليهودي لمغريبي
شي معروضات ديال لمتحف.
معلومات عامة
نوع	متحف و Jewish museum
لبلاد	لمغريب
لموضع	الدار البيضا
تاريخ د لبني	1997
تحل فـ	1997

لمتحف ليهودي لمغريبي هو لمتحف لول ف شمال إفريقيا اللي كييبين تأتير ليهودية كتقافة جتماعية معاونة ف تاريخ لمغريب لكبير. داكشي اللي كيتعرض فيه تيبين تاريخ ليهود ف لمغريب لكبير سيرتو ف الدار البيضا. لمتحف تيجيو ليه سياح بزاف اللي باغيين يتعرفو على تاريخ ليهود ف لمغريب ودور ديالهم ف لمجتمع لمغريبي. تصاوب هاد المتحف عام 1997 واللي صاوبتو هي مؤسسة ترات ليهودي لمغريبي وكان هادشي بمبادرة من مجلس طائفة ليهودية ب لمغريب. من عام 2002، ولات لباحتة لمسلمة زهور ارحيحيل هي اللي مكلفة بهاد لمتحف.

البلاصة

لمتحف ليهودي جاي ف حي لواحة جنوب مدينة دار البيضا، كيعسو عليه البوليس صباح وعشية، حيت كان هدف للهجوم ليرهابي اللي وقع عام 2003.

تاريخ

عاشو ليهود ف لمغريب مفرقين على جميع لمدون و دواور وجبال، وكل مدينة كبيرة كان عندها ملاحات ديالها بحال فاس ومكناس ومراكش وصويرة وطنجة وأصيلة وتطوان ووجدة ورباط وسلا وآسفي ودار البيضا و بجعد ووزان ودبدو، أما اليوما فما بقاش ليهم حضور بزاف ف بزاف ديال لمدون. و كيرجع هادشي، للهجرات من جوايه 1930، خصوصا من نهار تأسسات إسرائيل ف عام 1948.

ف عام 1995 كان المتحف ليهودي باكورة ديال مؤسسة ترات ليهودي لمغريبي، وهي مبادرة خاصة طلقها مجلس طائفة ليهودية ف لمغريب بالمعاونة من الحكومة المغرببية. قامت لمؤسسة بترميم سينيكوكات اللي هي بلايص صلاة عند ليهود، اللي كتميز بالديكور ديالها تقليدي ولميعماري لمغريبي، وتجميع التحف اليهودية سوا لداخل ديال لمغريب سوا اللي على برا. ومن لخدامي اللي كديرهوم هاد لمؤسسة حتى بلي كتعرف بترات ليهودي المغريبي ف المؤسسات التعليمية والتربوية والجامعات، وكتنظم معارض كتعرف بتاريخ لمغريب وليهود، زيد عليها الطباعة ديال لكتوبا والمنشورات، والجميع ديال التسجيلات على ݣاع داكشي اللي دار من أفلام وتائقية على ليهود، ووتائق، وخاصة لأغاني. تحل لمتحف ليهودي عام 1997، وكان لمبنى قبل داكشي دار ديال ليتامى ليهود ف عام 1948. من بعد وفاة شمعون ليفي، عضو لمكتب سياسي ديال حيزب تقدم وليشتراكية لحيزب شيوعي سابقا، ولى رئيس لمتحف هو جاك توليدانو ف دجنبر 2011.

لوصف

لمساحة ديال المتحف 700 ميترو كاري، كيتكون من صالون كبير وواسع كتدار فيه معارض تصوير لفوطوغرافي ورسم ونحت، وتلاتة د لبيوت خرين فيهم معروضات على الحياة دينية ولأسرية والخدامي اللي كانو ليهود تيخدموها باش إصورو طرف د الخبز، زيد عليهم بيوت خرين كتصور أماكن طقوس وشعائر دينية ديال ليهود.

لمتحف ليهودي لهدف ديالو هو التعريف بالترات ليهودي ف بزاف ديال لميادين لعامة وتقافية ولقتصادية كيما تنلقاو فيه بزاف ديال لكتوبا والمطبوعات ليهودية والوثائق ولأغاني لي خاصة بليهود. لمتحف شد بلاصة دار ليتامى ديال ليهود اللي تصاوبات عام 1948. كاتسير هاد لمتحف سيدة مسلمة خلافا لباقي لمتاحف ديال أوربا اللي تيسيرهوم بزاف أشخاص اللي لأصل ديالهوم يهودي. ماشي غير هكاك لمتحف كاين فدار البيضا، حيت هي لمدينة اللي كانت مأوى لبزاف ديال ليهود واللي ما زالت فيها لحد الأن بزاف ديال البنايات ملك ليهوم، لمتحف كيترأسو حاليا ليهودي جاك توليدانو.

كنلقاو ف لمتحف ليهودي كولشي داكشي اللي متعلق بالحياة ديال ليهود وتراتهم المغريبي، حيت فيه لحوايج تقليديين ولباس ديال ليهود اللي منها لقفطان ليهودي وجلابة تقليدية ليهودية، كيما كيعرض لمتحف لحلي ليهودية وكولشي ݣاع داكشي اللي متعلق بلعوايد و تقاليد دينية ديال ليهود. كيما كيعرض كولشي داكشي اللي عندو علاقة ببلايص العبادة ديال ليهود واللي كتسمى لبيعة ؤلا السينيݣوݣ. لمتحف فيه حتى بزاف ديال الكتوبا لقدام ديال ليهود واللي من بينها وتيقة عزوز كوهين لقديمة لمكتوبة بدارجة لمغريبية ولايني حروف عبرية، واللي كتعتبر الوحيدة ف العالم واللي كتبها الكاتب اليهودي عام 1933. لمتحف واحد الفضاء ديال بزاف د لمخطوطات المغريبية لمكتوبة بحروف عبرية.

لمتحف فيه صالة كبيرة كتسمى «فضاء المعارض المؤقتة والدايمة»، واللي كتنضم فيها معارض ديال الفن التشكيلي والتصاو وكل ما هو خاص بتقافة ليهودية المغريبية و المغريب، وصالات خرين كتعرض فيهم مجموعات متحفية خاصة بالديانة اليهودية المغريبية، على حساب المحافضة ديال المتحف. من بين هاد لمجموعات لمتحفية اللي كاينة ف لمتحف ليهودي كنلقاو سفر توراة، وكتسمى ب«كابوجيم»، أي تفاحات اللي كتزين ريوس سفر توراة بطريقة مغريبية، على كونطر تفاحات اللي مصاوبة بالستيل لألماني ولا الميركاني ولا البلغاري، لاحقاش التفاحات اللي مصاوبة ف المغريب فيها تأتير كبير بالهندسة الميعمارية المغريبية، وكتشبه فبزاف ديال المرات لتصاميم صوامع ديال الجوامع المغريبية. وزيد عليهم لكيسان، اللي هي لبولات ولا لقنادل ف لبيعات لمغريبية وكيسميوها ب«كيسان الشعيل»، لأن هاد البولات على شكل كاس كتدار فيه فتيلة وزيت وكيشعل وكيضوي على عكس ليهود لأوروپيين اللي كيستعملو شموع.

زيادة على هادشي كامل، كاينين ف المتحف حوايج كتعكس لحرايف ليهودية، اللي كانو لحرايفية ليهود تيمارسوها، بحال صنعة نحاس الصفر اللي كيخدمها «الصفارون»، وصنعة الخيوط، وصنعة النسيج واللباس المزوق اللي الثمن ديالو غالي واللي كانو الخياطة ليهود كيخيطوها، اللي كيتسماو بلعيبرية ب«لحياطيم»، وصنعة لمشاطي ديال صوف، واللي كتسمى «لقراشليين». كاينين وتائق خرين تيبينو ممارسة ليهود ديال لمغريب لحرافي يدوية خرا بحال صنعة «بزيمات» لحزام، وطرز ديال شروج، ولحدادة، كيما كانو كيخرطو لخشب ونجارة. زيادة على لخياطين كانو صنايعية ديال طرابش و شاشيات وصباط؛ صباط لعيالات اللي كتسمى ب«شربيل» مطرزة بدهب ولا النقرة. كيما كانو حرايفية فصنعة لحرير «تاحرارت» وتطريز ديال التوب وصنعة لعقادي ولحزايم.

مصادر

ويكيميديا كومنز عندا تصاور و معلومات على لمتحف ليهودي لمغريبي.

لمزاود

• الموقع الرسمي للمتحف