انتقل إلى المحتوى

كوثر حفيظي

من ويكيپيديا
لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.
كوثر حفيظي
معلومات عامة
زيادةالرباط
لجنسيةلمغريب
لحرفةعالمة د الفيزيك
لّوغات لي كيعرفعربية، لوغات أمازيغية، الداريجة لمغريبية، لفرانساوية و نڭليزية
لفاميلة
شريكبراهيم مصطفى
لولادعمر مصطفى


كوثر حفيظي (بالداريجة: كوتر حافيضي) هي عالمة د الفيزيك مغريبية-ميريكانية فالضومين د الفيزيك النووية التجريبية ؤ هي عوتاني المديرة د القسم د علوم الفيزيك ؤ الهندسة ف المختبر الوطني د أرݣون الميريكاني. كاتدير البحت فالضومين د النويويات ؤ الهيكل النووي على طريق التخدام د سطالاسيونات د الكسيراطورات د الفرتيتات التحت-درية بحال مختبر تجيفيرصون (Jefferson Lab)، كسيراطّور ديسي (DESY)، ؤ فيرميلاب (Fermilab). هي عوتاني ناشطة حقوقية ؤ مدافعة على مبدأ التنوع[1] ؤ كانت على بونت غاتولي كوايرية محتارفة فاش كانت عندها 16 عام.[2]

الحياة ؤ القراية

[بدل | بدل لكود]

كوثر حفيظي كبرات ؤ تربات ف عائلة مغربية مسلمة محافظة فالعاصمة د المغريب، الرباط. فاش كانت صغيرة كانت كاتݣول ل باباها: "بغيت نعرف منّاش مصنوع الله. كانأمن بيه ولكن ما كانشوفوش".[3] الواليد د حفيظي هو اللي دفعها للضومين د الصيونص. فاش كان خاصها تختار التوجه ديالها فالتاسعة إعدادي ما بين الصيونص ؤ لأداب، الواليد ديالها اللي كان موظف فالحكومة المغربية من الطبقة المتوسطة، ݣال ليها: "أش عندك ما تديري بالأداب؟ ما فيه حتى نفع للبلاد. بما أنك مزيانة ف كلشي، خاصك تمشي للصيونص".[2] ب فضل الموهبة ديالها ف حل المشاكيل المنطقية اللي طوراتها ف الليسي، حفيظي كملات الليسونس ديالها فالفيزيك النضرية ف جامعة محمد الخامس فالرباط عام 1995.

ف حوار ليها مع CNN العربية ف 2017، حفيظي دوات على المظاهرات د الداكاتيرا اللي ما لقاوش خدمة ف 1995، ؤ اللي الحكومة ردّات عليهم بأنها سدات التخرج مؤقتا، الشي اللي فرض على حفيظي تسافر ل فرانسا باش تكمل القراية ؤ التخرج ديالها.[4] بّات حفيظي ما كانش عندو الفلوس باش يخلص عليها تقرى برا، داكشي علاش جدّاها ؤ خالاتها -اللي الصغيرة فيهم عالمة د الفيزيك حتى هي- باعو دهبهم ؤ عطاوها الفلوس اللي كانو خاصينها باش تكمّل قرايتها على برّا. حفيظي كاتعاود باللي كانو كايݣولو ليها عائلتها: "ما يمكنش لينا نخليوك تضيعي راسك ؤ الموهبة ديالك هنا". حفيظي كملات قرايتها ف جامعة پاري الجنوبية فين ضرسات الهيكل ليليكطرومغناطيسي د الدوطيريوم باش خدات الدكتوراه ديالها ف 1999.

حفيظي كانت عضوة فالفرقة الأصلية د المنتخب المغربي د كورة د العيالات، ف 1992. ؤ فوق هادشي عندها السمطة القهوية فالفولكونطاكط (فنون د المدابزة المخلطة MMA).[3]

حفيظي تلاقات ب راجلها التونسي براهيم مصطفى ف پاري ؤ اللي تا هو عالم د الفيزيك بحالها. تزوجات هي ؤياه ف 1998 ؤ سافرو بجوج بيهم ل ميريكان فين كايخدمو بجوج بيهم كا عولاما د الفيزيك ف المختبر الوطني د أرݣون. تزاد عندهم ولد ف 2005 اللي سمّاوه عمر.[4] ف واحد لانطيرڤيو مع پاتش (Patch) د إلينويز ف 2011، حفيظي دوات على التوفيق ديالها بين الحياة الشخصية ؤ الخدمة ؤ ݣالت: "كانضن باللي التوفيق بين الحياة الشخصية ؤ الخدمة ما كاينش. اللي كاين هو تكون راضي على راسك. خاصك تحاول تلقى البالونص اللي كايواتيك شخصيا ؤ تكون مقتانع ؤ راضي على الختيارات اللي درتي ف حياتك. أنا مازال كانعاني مع التوفيق بين الدار ؤ الخدمة ولكن راجلي كايعاوني بزاف." ؤ صرّحات باللي راجلها هو اللي كايتكلف بالدرجة اللولة بالتربية د ولدهم ؤ كاتعتارف ليه بالعوين ديالو ليها.[5]

الكاريير

[بدل | بدل لكود]

حفيظي دخلات فالبداية للمختبر د أرݣون كا مور-دكتورة (postdoc) ف 1999 تال 2002. موراها ولات عالمة مساعدة د الفيزيك ف 2002 تال 2006 ؤ عاد ولات عالمة الفيزيك من 2006 ل دابا.[6] ب صيفتها باحتة رايدة ف أرݣون، حفيظي كانت كاتسوّل أسئلة فلسفية اللي كاتقيس ف ضومينات تقنية الديڤ صوفتوير الشي اللي زاد وسّع لهتيمامات د البحت ديالها على فهم الديناميات د الفرتيتات التحت-درية (النويويات) ؤ القوّات اللي كاتخليهم مجموعين مع بعضيّاتهم. حفيظي كولابورات مع فريق د العولاما باش يدرسو التوزيع تلاتي الديمونصيونات دالپارطونات (Partons) (كواركات ؤ ݣلوونات تحت-درية) فالنوى ؤ النويويات على طريق تخدام كسيراطّور د الفرتيت ف السطالاسيون الوطني د الكسيراطّور د طوماس تجيفيرصون (Thomas Jefferson National Accelerator Facility) ف ڤيرجينيا، ؤ ف ديسي (DESY) ف هامبورݣ ألمانيا.[7] حفيظي باغا تشد اللحظة فين الكوارك كايولّي حر ؤلا شفاف. على طريق المقادة د الزربة د الكسيراطّور ؤ لانطونسيطي ديالو، الفريق ديالها لقاو أدلة قاطعة د حالات قصيرة ؤ شادة فين الكواركات كايكونو صغار بزاف ل درجة ما كايبقاوش يتشافو من عند المادة لوخرى الشي اللي كايخليهم يدوزو من وسط النوى بلاما يتفاعلو معاها.[8] حفيظي تنتاخبات كا عضوة ف مجلس لإدارة د الݣروپ د الخدايمية د مختبر جيفيرصون.

خرجات ل مدة قصيرة من أرݣون ف 2013 باش تخدم فالوزارة د الطاقة د ميريكان، فالبيرو د الفيزيك النووية. ف 2015 رجعات أرݣون كا شافة مساعدة د العولاما (Associate Chief Scientist) ف البحت و الديڤلوپمو المخباري.[6] ف 2017، عينوها كا المديرة د الديفيزيو د الفيزيك،[6] ؤ مالفوق زادو عينوها ف 2018 المديرة المساعدة د المختبر د علوم الفيزيك ؤ الهندسة.[9]

حفيظي كاتتريس حتى البرنامج د أرݣون د العيالات الخدّامين فالصيونص ؤ الطيكنولوجيا (WIST).[10] هاد البرنامج كايوفّر الريادة ؤ الموارد باش يعاون فالنجاح د العيالات ؤ يشجّع النمو ؤ التطوير ديالهم ؤ كايخدم على دعم التنوع ف ݣاع النيڤووّات من وسط أرݣون باش يخلق منها مؤسسة د البحت العلمي معتبرة. حفيظي كانت عوتاني حتى رايسة المجلس د المجتمع الميريكاني د الفيزيك ف الكوميطّي د الوضعية د العيالات ف الفيزيك (CSWP).[11]

الجوايز

[بدل | بدل لكود]
  • 1996: متخرجة د منحة بحتية من عند لاجونص الدرية الفرانساوية.[6]
  • 2010: جايزة مرشد واعر من عند البيرو د الصيونص ف وزارة الطاقة الميريكانية.[6]
  • 2011: جايزة المبدعات من عند جمعية العيالات فالصيونص.[6][12]
  • 2012: الدروة د جوايز التعليم من عند جامعة شيكاݣو ؤ إلينويز.[6][13]
  • 2014: الجايزة د التنوع من عند العيالات د أرݣون اللي فالصيونص ؤ الطيكنولوجيا.[6]

النشاطات الحتيرافية

[بدل | بدل لكود]
  • 2007 - 2015: مختبر أرݣون الوطني، العيالات اللي فالصيونص ؤ الطيكنولوجيا، الكوميطي د السوݣان.
  • 2009 - 2012: عضوة ف الكوميطّي د المجتمع الميريكاني د الفيزيك على حالة العيالات فالفيزيك.
  • 2010 - 2012: خالقة د البرامج ف عيالات فالصيونص ؤ الطيكنولوجيا ف المختبر الوطني د أرݣون.
  • 2010 - 2012: عضوة ف مجلس الإدارة د الݣروپ د الخدايمية د مختبر تجيفيرصون.
  • 2011 - 2012: الرايسة د مجلس الإدارة د الكوميطّي د المجتمع الميريكاني د الفيزيك على حالة العيالات فالفيزيك.
  • 2012 - 2014: عضوة د الكولوار C د الݣروپ د الخدايمية د مختبر تجيفيرصون.
  • 2012 - دابا: الرايسة د مجلس الإدارة د ݣروپ الكولابوراصيون فالخدمة عالفيزيك النووية.
  • 2013 - دابا: عضوة ف مجلس التنوع ؤ لانكليزيون عند مختبر أرݣون الوطني.[14]

المنشورات المهمين

[بدل | بدل لكود]
  • Airapetian, A.; Akopov, N.; Akopov, Z.; Amarian, M.; Andrus, A.; Aschenauer, E. C.; Augustyniak, W.; Avakian, R.; Avetissian, A. (2005-01-06). "Single-Spin Asymmetries in Semi-Inclusive Deep-Inelastic Scattering on a Transversely Polarized Hydrogen Target". Physical Review Letters (ب الإنجليزية). 94 (1): 012002. arXiv:hep-ex/0408013. Bibcode:2005PhRvL..94a2002A. doi:10.1103/PhysRevLett.94.012002. ISSN 0031-9007. PMID 15698069. S2CID 119080643.{{cite journal}}: CS1 maint: article number as page number (link)
  • Airapetian, A.; Akopov, Z.; Amarian, M.; Andrus, A.; Aschenauer, E.C.; Augustyniak, W.; Avakian, H.; Avakian, R.; Avetissian, A. (2007). "Beam-spin asymmetries in the azimuthal distribution of pion electroproduction". Physics Letters B (ب الإنجليزية). 648 (2–3): 164–170. arXiv:hep-ex/0612059. Bibcode:2007PhLB..648..164H. doi:10.1016/j.physletb.2007.03.015.
  • Airapetian, A.; Akopov, N.; Akopov, Z.; Amarian, M.; Aschenauer, E. C.; Avakian, H.; Avakian, R.; Avetissian, A.; Avetissian, E. (2001-10-10). "Measurement of the Beam-Spin Azimuthal Asymmetry Associated with Deeply-Virtual Compton Scattering". Physical Review Letters (ب الإنجليزية). 87 (18): 182001. arXiv:hep-ex/0106068. Bibcode:2001PhRvL..87r2001A. doi:10.1103/PhysRevLett.87.182001. ISSN 0031-9007. S2CID 32289439.{{cite journal}}: CS1 maint: article number as page number (link)
  • Airapetian, A.; Akopov, N.; Akopov, Z.; Amarian, M.; Ammosov, V.; Andrus, A.; Aschenauer, E.; Augustyniak, W.; Avakian, R. (2005). "Quark helicity distributions in the nucleon for up, down, and strange quarks from semi-inclusive deep-inelastic scattering" (PDF). Physical Review D (ب الإنجليزية). 71 (1): 012003. arXiv:hep-ex/0407032. Bibcode:2005PhRvD..71a2003A. doi:10.1103/PhysRevD.71.012003. ISSN 1550-7998. S2CID 30252421.{{cite journal}}: CS1 maint: article number as page number (link)

مصادر

[بدل | بدل لكود]
  1. ↑ CCME. "CCME – The Moroccan Kawtar Hafidi named director of Physics Division (Argonne National Laboratory)". www.ccme.org.ma (ب الفرنسية). Archived from the original on 2021-12-03. Retrieved 2019-03-04.
  2. 1 2 "Women @ Energy: Kawtar Hafidi". Energy.gov (ب الإنجليزية). Archived from the original on 2017-05-30. Retrieved 2019-03-04.
  3. 1 2 "Chicago Business Features Argonne Woman in Nuclear Physics". Energy.gov (ب الإنجليزية). Archived from the original on 2023-10-10. Retrieved 2020-06-09.
  4. 1 2 "مغربية تتزعم قسم الفيزياء بمختبر أرغون الأمريكي". CNN Arabic (ب العربية). 2017-02-09. Archived from the original on 2023-06-07. Retrieved 2020-06-09.
  5. ↑ "Q&A: Argonne Physicist Wins Innovator Award". Darien, IL Patch (ب الإنجليزية). 2011-07-18. Archived from the original on 2023-06-03. Retrieved 2020-06-09.
  6. 1 2 3 4 5 6 7 8 "Kawtar Hafidi". www.phy.anl.gov. Archived from the original on 2016-04-18. Retrieved 2019-03-04.
  7. ↑ "February 2011 Scientist of the Month: Kawtar Hafidi - AWIS Chicago" (ب American English). Archived from the original on 2023-06-03. Retrieved 2020-06-09.
  8. ↑ "Learning what God is made of". Crain's Chicago Business (ب الإنجليزية). 2012-01-07. Archived from the original on 2023-06-03. Retrieved 2020-06-09.
  9. ↑ "Kawtar Hafidi - Argonne National Laboratory". www.anl.gov (ب الإنجليزية). Archived from the original on 2023-06-03. Retrieved 2019-03-04.
  10. ↑ "February 2011 Scientist of the Month: Kawtar Hafidi - AWIS Chicago" (ب American English). Archived from the original on 2023-06-03. Retrieved 2020-06-09.
  11. ↑ Taylor, Eleanor (24 يونيو 2011). "Argonne physicist receives 2011 Innovator Award". www.anl.gov (ب الإنجليزية). Argonne National Laboratory. Archived from the original on 2023-06-03. Retrieved 11 يونيو 2020.
  12. ↑ "Argonne physicist receives 2011 Innovator Award - Argonne National Laboratory". www.anl.gov (ب الإنجليزية). Archived from the original on 2023-06-03. Retrieved 2020-06-09.
  13. ↑ "Argonne Physics Division". www.phy.anl.gov. Archived from the original on 2023-06-03. Retrieved 2020-06-09.
  14. ↑ "Kawtar Hafidi". www.phy.anl.gov. Argonne National Laboratory. Archived from the original on 2016-04-18. Retrieved 2019-03-04.
مرجّعة من "https://ary.wikipedia.org/w/index.php?title=كوثر_حفيظي&oldid=448420"