قنية مربية

قنية مربية
معلومات عامة
سميتو لعيلمية	Oryctolagus cuniculus domesticus
لخاصية د ترتاب	نوع تحتاني
كاينتامي ل	أرنب أوروبي

لقنية لأليفة، ولا لقنية لمضوميستيكية هو شكل من لقنية لؤروپية، عضو ف التنضيمة د رنبيات الشكل. كاينين ميئات النواع من لقنية، تأصلو ف بزاف د لقنات ف لعالم.

لقنية تضوميستيكات لأول خطرة من عند الروم. لقنية تقدر تعيش ف الدار، ولاينّي لفيكرة بلي لقنية لمضوميستيكية كا حيوان د الدار، ولا كيما كايقولو ليها قنية د الدار (بحال لقط د الدار) بدات تبان و تتروّج ليها حتى لشي منشورات تكتبو ف عوام 1980. لقنيات يقدرو يتدريساو، و لاكين خصهوم لوقت، و يقدرو يديرو أضرار ف الدار ولا يجرحو راسهوم، ب سباب لحاجة لفيطرية ديالهوم للمديغ. التفاعولات لعلاّوية بينات لقنيات لمضوميستيكية و لقنيات لبرية، وخا كاتبان عادية، مكايتنصحش بيها، حيتاش لمجاج مبدل بينات النواع ب جوج، زيد يقدرو لقنيات لبرية يهزو معاهم شي مرض. لقنيات لمضوميستيكية، تجاوجو لأجيال تحت ليشراف د بنادم باش يكون ساهلين ف التݣياد، و كاينقصوهوم غرايز لبقو، و دغيا كايموتو ف لبرية يلا لاحوهوم ماليهوم ولا هربو من لمحميات لمخصوصة ليهوم.

لقنيات لمضوميستيكية كايترباو كا قطيع على ود اللحم، الصوفة ( ف لحالة د النوع د آنݣورا)، ولا لفرو ديالهوم. عاوتاني يقدرو يترباو كا حيوانات ديال الدار، ولا كا حيوان د لابوراطوار.

أصل لكلمة

كلمة قنية ب الداريجة جات من لكلمة الصبليونية Conejo لي جات من لكلمة اللاتينية cunīculus، أما كلمة ضوميستيكي هي نعت لي جات من لكلمة لفرانساوية Domestiqué لي حتى هي جات من لكلمة اللاتينية Domesticare لي كاتعني "روّض" ولا "دريسي".

تاريخ لقنية لمضوميستيكية

على حساب واحد لأسطورة، لقنية تضوميستيكات لأول مرة ف لقرن لخامس ميلادي. ف ديك لوقت، هاد النوع كان محصور غير ف شبه لݣزيرة لإيبيرية. على حساب ماقالو، الرهبان ل ف جنوب فرانسا هما لي بداو ف الضوميستكاسيو د لقنية من لرنب لوروپي. السباب كان لطبيعة عملية. قالو بلي اللحم د هاد لحيوان غادي ل اللحم د لحوت، عليها كان حلال عليهوم ياكلوه ف لوقيتة د الصيام لكبير Lent. الرهبان قالو بلي هوما أول وحدين بداو يعزلو و يجاوجو ف لقنيات باش يملكو راصات مختالفة ب وزان و لوان د لفرو مختالفين. و معا الزيادة ف لبيع و الشرا بينات لبلدان، لقنية مشات من شبه لݣزيرة لإيبيرية ل بزاف لپارتيات ف لعالم. و بسباب لكترة د موارد لماكلة و موعدال لولادة عند لقنية، تنتاشرات ب شكل سريع.

ف بحت تنشر ف جورنال تيجاهات ف لبيئة و التطوور، لي شاركو فيه عولاما من كلية أوكصفورض، ب تخدام مقاربة متعددة لوجوه، لي فيها تحليلات جينية، وتايق تاريخية، بقايا آركيولوجية و براهين د لفوصيل، جا ضد هاد التاريخ د لقنيات و دحض لهضرة لي كاتقول بلي لقنيات تضوميستيكاو ف ل قرن 5 ميلادي. النتائيج عطات بلي هاد التاريخ سبابو تأويل غالط ديال وتيقة قديمة.

لأصل ديال لأسطورة كيرجع ل عام 584 ميلادية، فاش التوارخي و لقديس ڭريڭوري د تور St. Gregory of Tours (ماشي لبابا ڭريڭوري لكبير كيما كاتڭول لقصة) لي كان كتب بلي واحد سميتو روكونيلوس كان قايد هجمة على مدينة تور، ولايني مات حيت كلا لحم د قنية ف لفترة د الصيام لمسيحي. هاد لقصة تفهمات و تّنتاشرات بشكل غالط من لقرن 19. لبحت ديال ؤكسفورض بيّن بلي الجدود د لقنيات كانو عايشين ف جنوب فرانسا و شمال شرق سپانيا من ملاين لعوام، و بلي واحد السلالة برية لي عاشت ف فرانسا مور لعصر الجليدي هادي 18000 عام هيّ لأصل ديال جميع لقنيات لي كانعرفو دابا. السلالة لمضوميستيكية نفاصلات على لبرية مابين هادي 17000 عام و 12200 عام، على حساب التحليل د الجينات لي تدار ف هاد الدراسة.

بيولوجيا

ريجيم

لقنيات حيوانات عاشبة و كايتعتابرو من لحيوانات لي كاترعى، حيت ديما كايدوزو نهارهم كامل ف لماكلة. عندهوم جيهاز هضمي معقد و هوما مجهدين ف لمعالجة د لماكلة. بحال لعوادن، لقنيات عندهوم لأعور، و كايقدرو يخمّرو لمصران لكبير. لقنيات عاوتاني عندهوم حتياجات خاصة ف الريجيم. يلا حضّرتي ماكلة جديدة دغيا ولا يلا عطيتيهوم شي ماكلة مكاتجيش معاهوم، لباكتيريا لي فيهوم غاتضيرونجا و غاتبدا تطلق ݣاز/ طوكسين لي كاينتاشر ب شكل كبير، و يقدر يخلي لقنية تمرض ولا تموت ݣاع.

التبن ماكلة أساسية ف الريجيم د ݣاع لقنيات و طرف رئيسي ف الرزمات د لعلف التيجارية لمخصوصة ل لقنيات لمضوميستيكية، هاد الرزمات موتاحين ف بزاف د لبلايص ف لعالم. أغلب الرزمات د لقنيات مكونين من لبرسيم على ود لپروتين و لألياف لي فيه، لحوبوب لي كايكملو لحتياجات لخرى من لكاربوهيضرات. لمعادن و لڤيطامينات كايتضافو حتى ل لوقيتة د إنتاج الرزمات. عوينات شايعة أخرى د التبن د لقنيات آپار من لبرسيم منها، لخرطال، الشويعرة، و الزوان، توكال لقنيات لخضرة د الدار خاص يكون غير شي مرات، حيت لقنيات كايتأترو ب السكريات بحال لي ف خيزو كا ميتال.

مجاوجة

لقنيات قادرين يحملو بكري ف حياتهوم، و شي راصات صغيرة من لقنية كايبداو لحياة د لمجاوجة ف عمر 4 شهور تقريبا. النتوة د قنية كاتكون خصبة لعام كامل إلّا ف 3 يام ف كل شهر، و لكن كاتقدر تنتج لبويضة على ود التخصيب حتى كاتجاوج معا دكر د قنية ف لتيصال لجينسي. غير كاتولي حاملة، لقنية لأم كاتسنى 32 يوم ف لمتوسط، باش تولد صغارها لي كايكونو 6 ف لعادة، وخا تقدر قنية وحدة تولد حتى ل 14 لقنية. مور لولادة، لقنية لأم تقدر تتخصب عاوتاني تقريبا ف لبلاصة، هادشي كايعني بلي، كا فتيراض، نتوة تقدر تولد كل شهر ف لعام.