عوام 1980
| هادا مقال بوتي، عاون ف لمراجعة و التطوير ديالو. |
| ألفيات |
|---|
| لألفية 2 |
| قرون |
| عقود |
| عوام |
| تصنيفات: |
|
زيادة – وفيات تأسيسات – نحيلالات |
عوام 1980 ؤلا عقد 1980 ولّا التمانينات د لقرن لعشرين هوّ عقد ديال الزمان بدا ف 1 يناير 1980 و سالا ف 31 دجنبر 1989.
هاد لعقد عرف لهيمنة ديال لمحافظية و لإقتصاد ديال السوق لحرة، زيادة ديال زاخام صوسيوقتيصادي سبابو التطور الطيكنولوجي، و تبعاد ف لعالم كامل على لإقتصاد لمخطط، لي خدات بلاصتو الراسمالية د الليسّي فير laissez-faire capitalism ب لمقارنة معا السبعينات. معا الزيادة ديال التفكيك لإقتصادي ف لعالم لمتقدم، عدد ديال الشركات لعالمية بداو كيحوّلو عمليات التصنيع ديالهم ل طايلاند، لمكسيك، كوريا الجنوبية، طايوان، و الشينوا. ب لموقابيل، الجاپون و ألمانيا لغربية عرفو نمو قتيصادي كبير ف هاد لعقد.
الجايحة ديال السيدا تعرفات ف التمانينات، و من ديك الساع قتلات كتر من 40,4 مليون واحد (تال 2022).[1] ف نفس لوقت، النظرية ديال تبدال د لمناخ بدات كاتنتاشر ف لأوساط لعلمية و السياسية.
لعدد ديال بنادم ف لعالم داز من 4,4 ل 5,3 مليار واحد.
لعقد اللخر ديال لحرب لباردة بدا ب مواجهات مستامرة بين الجوج قوى لعظمى، لميريكان و لإتحاد السوڤياتي. التوترات بيناتهم طلعو بزّربة، بعدما الرئيس لميريكاني رونالد ريڭان حيّد السياسة د لإنفراج، و ولّا عندو موقف عدواني ضد السوڤيات. للمرة اللولة من لأزمة د الصواريخ د كوبا ف 1962، لعالم قرّب بشكل خطير للحرب النووية، ولايني ف النص التاني د لعقد، التوترات بينات لقوى لعظمى نقصات، و ف اللخر طاح لإتحاد السوڤياتي.
لبلدان النامية ف لعالم كامل عاناو من صعوبات جتيماعية و قتيصادية سبابها لأزمات د الديون، شي لي خلاهم يطلبو معاونة مالية من عند صندوق لفلوس الدولي و لبنك الدولي. إتيوپيا عرفات مجاعة كبيرة ف وقت لحكم لفاسد ديال مينڭيتسو هايلي ماريام، و ولّات معتامدة على لمعاونة لبرانية على ود توفير لماكلة للسكان ديالها. لعالم تموبيليزا باش يجمع لفلوس ل هاد لغاراض، بحال لحفلات لموسيقية د لايڤ إييد لي تدارو ف 1985 ف جوج بلايص، لندن ف النڭليز و فيلاديلفيا ف لميريكان.
بزاف د لأحدات لعنيفة و لحروب طراو، بحال لحرب لأهلية د أنڭولا، لحرب لأهلية د إتيوپيا، لمطايفة د لمورو، لحرب لأهلية د صالڤاضور، حرب الشجيرات د ؤڭاندا، التمرد د لاووص، لحرب د إيران و لعراق، لحرب لأفغانية السوڤياتية، حرب لبنان د 1982، حرب لفالكلاند، لحرب لأهلية السودانية التانية، التمرد ديال جيش مقاومة الرب، و حرب ناڭورنو كاراباخ اللولة. ف هاد لعقد، لإسلاموية ولّات قوة سياسية كبيرة، و بزاف ديال لمنظمات الجهادية تأسسو، منهم تنظيم لقاعدة.
ف 1986، لقومية عرفات رجوع ف لكتلة الشرقية، و بانت الرغبة ف الديموقراطية ف بلدان لإتحاد السوڤياتي. لأزمة لإقتصادية كمّلات الصورة و خلات ميخاييل ڭورباتشيڤ يدير سياسة لڭلاصنوصط و لپيريسطرويكا، لي ضعّفو السلطة ديال لحيزب الشيوعي، شرّعو لمعارضة و قننو أشكال محدودة ديال الراسمالية بحال الشركات التشاركية joint ventures معا شركات ف بلدان راسمالية. من بعد توترات ف أغلب سنوات لعقد، ف 1988 كانت لعلاقات بين لكتلة الشيوعية و لكتلة الرسمالية بدات كاتحسّن بزاف،[2] و لإتحاد السوڤياتي مابقاش باغي باش يدافع على لحكومات ديالو ف لبلدان لي تابعة ليه.
عام 1989 جاب معاه إنقلابات و محاولات د لإنقلاب ضد عدد د لحكومات الشيوعية بحال ف هنڭاريا، ألمانيا الشرقية، پولونيا، لإحتجاجات ديال ساحة تيانانمين ف الشينوا، التورة لمخملية ف تشيكوصلوڤاكيا، و لإنقلاب ضد نظام نيكولاي تشاوتشيسكو ف رومانيا. الطيحة ديال حيط برلين زلزلات لموازين الجيوسياسية. لحرب لباردة سالات ف لبدية د التسعينات ب معاودة توحيد ألمانيا، و لإنحلال د لإتحاد السوڤياتي من مور لمحاولة د لإنقلاب د غشت 1991.
التمانينات عرفات أكبر نمو ديال السكّان د لعالم ف التاريخ لي داز لعدد ديالهم من 4,4 ل 5,3 مليار، ب 1,33 مليار د لولادات و 480 مليون د لوفيات. النمو السكاني كان كبير سيرتو ف إفريقيا، الشرق لأوسط و بلدان جنوب آسيا، ب نسبة د النمو طبيعية فاتت 4% ف لعام. ف هاد لعقد لإجهاض لإنتقائي بسباب الجنس sex-selective abortion ستامر ف الشينوا و لهند، حيت الطيكنولوجيا د لفوق-صوت ultrasound خلات لواليدين يجهضو لبنات و يفضّلو لولاد.[3]
عوام 1980 عرفو تطور كبير ف الجينيتيك و الطيكنولوجيا الرقمية. مور سنوات ديال التجارب على لحيوانات من 1985، ف ماي 1989 تدار أول تعديل جيني على 10 د الناس بالغين،[4] لي عطا من بعد أول تطبيق عملي ديال لعلاج الجيني ف شتنبر 1990. أول مومّويات ب الديزاين، جوج د التويميات بنات، تدارو ف اللابو اللخر د 1989، و تولدو ف يوليوز 1990، بعد عملية ديال التكاتر ب لاسيست assisted reproduction ب التشخيص الجيني قبل الزريع preimplantation genetic diagnosis لي دار خبلة.[5] لكرا د لولّادة gestational surrogacy لي تدارت لمرة اللولة ف 1985 و عطات أول ولادة ف 1986، عطات لإمكانية باش مرا تكون أم بيولوجية بلا ما تدوز من لحمل للمرة اللولة ف التاريخ.[6]
لأنتيرنيت لعالمي بداو كيتشّكلو لمعالم ديالو عند لأكاديميين ف النص التاني د التمانينات، زيادة على ريزوات خرين ل أغراض أكاديمية و تيجارية بحال يوزنيت USENET، فيضونيت Fidonet و سيستيم لوحة الداطا bulletin board system. معا لمجية د عام 1989، لأنتيرنيت و الريزوات لي مكونيكطين ليه ولّاو كيشكّلو سيستيم عالمي ب روابط عابرة للمحيطات و ب ساطليتات و عڭايد ف أغلب لبدان لمتقدمة.[7] ب لإعتماد على خدمة لي كانت دارت قبل، قدر لباحت لبريطاني تيم بورنرز لي باش يوفرماليزي لكونصيپط ديال لويب ف 1989. التفراج ف التلفازة ولّا منتاشر ف لعالم التالت، و عدد التلفازات لي مخدّمين ف الشينوا و لهند تزاد ب 15 و 10 د لمرات على التوالي.
لكونصول د أطاري ديال لوعاب التيليجو تنتاشرات ف النص اللول د لعقد، و لعبة سپييس إنڤيدرز (لغزاة د لفضاء) كانت أشهر لعبة ف لپلاطفورم. لكراش د 1983 قتل الشعبية ديال سيستيم أطاري و ديال صناعة لوعاب التيليجو بشكل عام، تا بانت نينتادو. ف 1989 بان لڭيم بوي لي كيتشد ف ليد. أكتر لألعاب ف لمبيعات كانو سوپر ماريو بروص و تيتريس. أكبر لعبة ديال لأركيد (ماكينة د اللعب) د هاد لعقد هيّ پاكمان. لپيسي د الدار ولّا منتاشر. لپيسي د أي بي إم بان ف 1981. ماكينطوش بان ف 1984.
مقالات د لعقد د 1980:
- ↑ "Global HIV/AIDS Overview". aids.gov. Retrieved 16 أبريل 2016.
- ↑ Lewis, Flora (29 ماي 1988). "FOREIGN AFFAIRS; Cold War Recedes". The New York Times.
- ↑ Melhado, Lisa (29 شتنبر 2011). "Sex-Selective Abortions During Past Three Decades May Explain Absence of Millions of Girls in India". International Perspectives on Sexual and Reproductive Health. 37: 162–163.
- ↑ Recent advances in pediatrics-17. Jaypee Brothers Publishers. 1981. ISBN 978-81-8448-103-7. Retrieved 16 April 2016.[ليان مهرس ديما]
- ↑ Maugh II, Thomas H. (31 July 1990). "Genetic Defect Screened Out; Healthy Twins Born". Los Angeles Times. Retrieved 16 April 2016.
- ↑ "And Baby Makes Four: for the First Time a Surrogate Bears a Child Genetically Not Her Own". people.com. Archived from the original on 23 April 2016. Retrieved 16 April 2016.
- ↑ Brown, Ian (2013). Research Handbook on Governance of the Internet. Edward Elgar Publishing. p. 7. ISBN 978-1-84980-504-9.
 هادي زريعة ديال مقالة خاصها تّوسع. تقدر تشارك ف لكتبة ديالها. |
