عملاق غازي
لعملاق لغازي ولا لكوكب لغازي هو كوكب كبير ما كيتكونش من الصخور ولا شي حاجة خرة من لمواد لقاسحة و عندو النوا صغيرة شوي. و لعمالقة لغازية ف النيضام الشمشي ربعة و هي جوپيتر، ساتورن، أورانوس و نيپتون. و نقدرو نعتابرو أورانوس و نبتون نوع من لكواكب لعمالقة لباردة و لمتلجة، و لي كاتكون من التلج و شوي ديال لحجر و غازات د لما و لأمونيا و لميطان، ماشي بحال «لعمالقة لغازية التقليدية» بحال جوپيتر و ساتورن. و ماكاينش شي سطح قاسح ف لكواكب الربعة ولكن أورانوس و نبتون عندهم واحد النسبة قل من لهيدروجين و لهيليوم.[1]
لعولاما لقاو عماليقا غازية ف أنضيما شمسية خرة ف مجرة درب لبانة، ؤ ماشي كولهوم عندهوم نفس لمزايا ديال جوپيتر ؤ ساتورن. كاينة باقي مداكرة بين لعولاما د لفلك على لحد لفاصل مابين عملاق غازي ؤ نّجوم من نوع لأقزام لقهوية لي كاتكون نجوم صغيرة بزاف ؤ ماكاتضوّيش. وحدة من لقتيراحات هيّا بلي لأقزام لقهوية كاتكون علّاقل مرة ف حياتها عرفات تفاعل نووي.[2]
يمكن تكون النوا ديال لعمالقة لغازية صخرية ولا معدنية، ولكن كاتكون معضم كتلتها من لهيدروجين و لهيليوم مع شوي ديال لما و لميطان و لأمونيا و مركبات خرة هيدروجينية.
لعمالقة لغازية ماعندهاش سطح قاسح ولا معالم واضحة، و مايمكنش يتمشى بنادم على سطحها بمعنى لكلمة. و يمكن نقولو لكلمات بحال لقطر و لميساحة و لحجم و دّرجة د لحرارة السطحية و الكتافة السطحية كاتشير ل الطبقة لخرجانية لي كانشوفوها من لفضاء.
- ^ "Science daily, Gas giant" [صيونص كلا نهار، عملاق غازي] (ب نڭليزية). مأرشيڤي من لأصل ف 2023-08-20. تطّالع عليه ب تاريخ 2022-03-14.
- ^ "Brown Dwarfs: Failed stars, super Jupiters" (PDF) (ب نڭليزية). يونيو 2008. مأرشيڤي من لأصل (PDF) ف 8 ماي 2013.