عائشة الشنا
عائشة الشنا
| ||
.png)
| ||
| معلومات عامة | ||
| زيادة | 14 غشت 1941 الدار البيضا | |
| لموت | 25 شتنبر 2022 (81 عام) الدار البيضا | |
| لجنسية | لمغريب | |
| لحرفة | عاملة اجتماعية، مناضل، فرملي، أمينة سر، مسؤول من الفئة ألف و كاتبة علم | |
| لّوغات لي كيعرف | عربية و لفرانساوية | |
| لجوايز |
| |
عائشة الشنا ولاّ عيشة الشنا، تولدات ف 14 غشت 1941 ف كازا[1] ؤ توفات ف 25 شتنبر 2022، هيا ناشطة إجتماعية مغريبية كاتدافع علا حقوق لمرا و الطفل، ؤ ممرضة مسجلة، ؤ بصيفتها موظفة ف ويزارة د صحة كاتقابل لعيالات لي ناقصاهم الرعاية. ف عام 1985، أسسات جمعية د التضامن النسوي، هيا مؤسسة خيرية كاينة ف الدار البيضا أسستها باش تعاون لهجالات ؤ الضحايا ديال لغتيصاب. هادشي خلاها تاخد بزاف د لجوائز لإنسانية، بحال جائزة ؤپوس (نّݣليزية: Opus Prize) عام 2009 لي وصلات قيمتها مليون دولار.[2]
تزادت الشنا ف الدار البيضا ف وقت لحماية لفرانساوية على لمغريب، و من بعد مشات ل مراكش فين دوزات طفولتها. مات باها ملي كان ف عمرها 3 سنين ؤ تزوجات مها فاش كملات 12 عام، ولاكين راجل مها حاول يخرجها من لمدراسة، شّي لي خلا مها ترجعها ل كازا باش تعيش معا عمتها ؤ تكمل قرايتها ف مدراسة فرنساوية ديال اللغات بعد 3 سنين تطلقات مها ؤ لحقات عليها ل كازا. من بعد باعت مها دّهب ديالها باش تعاول عائشة ف قرايتها، ولاكين عائشة خرجات من لمدراسة فاش كان ف عمرها 16 عام، ؤ لقات خدمة ف السبيطار، خدمات سكرتيرة ف برامج أبحات لمرضى د لجذام و السل. ؤ دوزات متيحانات لمدراسة ديال لفراملية عام 1960 بعد ما طلبو منها صحابها تدوزو، ؤ تقبلات.[3] ملي خدات دبلوم التمريض، خدمات ف وحدة التعليم ف وزارة الصحة، ؤ مبعد رجعات منسقة ل برامج التوعية الصحية. ف السبعينيات، بدات ف إنتاج لبرامج د التلفازة ؤ الراديو على الصحة د لمرا ؤ كان بينها لبرنامج لّول فالتلفزة على التعليم الصحي.
توفات ف 25 شتنبر 2022 بعد معاناتها من مرض لكونصير.[4]
بدات الشنا عام 1959 ف لخدامي التطوعية اللولا ف "لجمعية د حماية الطفولة" و "لعصبة لمغربية د لمحاربة د داء السل". وف عام 1985، أسسات لجمعية د التضامن النسوي وهي منظمة مختصة ف مساعدة لهجالات و ضحايا لغتيصاب، كانت ف اللول غير ف كازا.[5] كاتدرب الجمعية لعيالات على الطياب والحياكة و لكونطابيليطي و بزاف تاع لحرافي، باش تعاونهم يعاودو يندامجو (معا لأطفال ديالهم) ف لمجتمع، و تخليوهم يستاقلو. ف عام 2002، تعرفات لجمعية بأنها منظمة رسمية لاحكومية، و من بعد خدات تبرع من محمد السادس.
عام 1996، نشرات الشنا كتاب سميتو "البؤس: شهادات"، لي حكات فيه عشرين قصة على لعيالات لي خدمات معاهم. توصف لكتاب بلي هوّا "إعلان النسوية" و أيضاً "منوعات من لقصص لحزينة". خدات جائزة ف السفارة د فرنسا، ف الرباط.
وصفات الشنا نفسها بلي كاتمتع بقلب مسلم ولكن عقلها علماني. و كاترجع الشهرة ديالها ل لوقت لي كانت فيه ف منصب موضفة ف وزارة صّحة و لخدمة ديالها ف لمناطق لخاضعة ل لمحرمات دّينية و لجتماعية. بما فيهم تنضيم لأسرة، و لوضع ديال لمّاوات لعزبات، ووضع لأطفال لّاشرعيين، ووضع ضحايا زنا لمحارم. تلقات الشنا نتيقادات متابعة من لمحافضين لجتماعيين، لي دّاعاو بلي خدمتها كاتخلي لفساد يولي شرعي.
ف عام 2009، خدات جائزة أوپيس لي لقيمة تاعها مليون دولار بسباب خدمتها معا لعيالات لمحتاجات ل رّعاية. و كانت أول مسلمة كاتربح هاد لجائزة، و قالت أن لفلوس ديال هاد لجائزة غادي يضمنو لستمرارية د لمؤسسة ديالها حتا بعد ما تموت.
ف عام 1985 بدات تاتخدم مع لمّاوات لعزبات وكانت كاتشوف بلي هوما فئة جتيماعية هشة ماكاتمتعش بتا شي حق من لحقوق. باش تنضم لخدمة وتأطرها، أسسات "جمعية التضامن النسوي". لجمعية كاينة ف حي النخيل بالدار البيضا، و فيها عشرات «لمّاوات لعزبات»، وهو مصطلح لمقصود بيه لعيالات لي ولدو الدراري و لبنات بلا زواج شرعي سوا ب إرادتهم ولا لي تعرضو ل لغتصاب، لكن الشنا كاتفضل تستعمل مصطلح «النسا لمتخلى عليهوم» ؤلا «النسا ف وضعية صعبة» بلاصت مصطلح «لمّاوات العزبات». و كاتعتابرهم الشنا ضحايا لمجتمع و لقانون، كيما كاتوصفهم ب «لأطفال لمتخلى عليهوم» ولا «لأطفال ف وضعية صعبة»، بلاصت مصطلحات: «اللقطاء» ؤلا «ولاد الزنا» ؤلا «أطفال د الشوارع»، حيث معندهم تا دنب، لكن جاو ليها نتيجة علاقات دايزة، و ماشي شرعية، ؤلا غتصاب، ؤلا وعود كادبة ب الزواج. كاتقدم لجمعية لمعاونة لقانونية و لقتصادية و نّفسية ل لعيالات، خصوصا كاتسهل عليهم لمساطر لقانونية و لإدارية لمتعلقة بتسجيل الدراري و لبنات ف لحالة لمدنية، عاد زيد تحسيس لعيالات بخطورة لعلاقات لجنسية خارج لإطار د الزواج.[6]
كيما كاتخدم على دمج لأمهات و ولادهم ف عائلاتهم، خلات لجمعية مجموعة د بّاوات يعتارفو ب ولادهم و يسجلوهم ف لحالة لمدنية، و شي وحدين ڭاع قررو يتزوجو بماوات ولادهم. عام 2005 عتارف 68 أب بولادهم و بناتهم؛ 17 منهم فضلوا لعتراف معا لزواج، بينما 51 منهم عتارفو ب لأطفال صافي.[7]
كاتعتابر الشنا بلي مايمكنش نقلدو النموذج لأخلاقي لغربي ف تربيتنا لمغريبية، وبلي ماشي من حق لمجتمع يتصرف كيفما بغى بدعوى بلي حنا ف لقرن لواحد و عشرين، بالنسبة ليها لمجتمع لمغريبي مسلم، وهي ضد لحرية لجنسية وضد لعلاقات لجنسية بلا زواج شرعي، و كاتدعم التماسك لأسري. و كاتقول بلي حرصها على هاد التماسك هو لي خلاها تدير مجهود كبير باش يتعرف لإبن علا «باه لبيولوجي» و باش ماتخلطش لأنساب و نطيحو ف زنا لمحارم. لجمعية عندها إعجاب كبير من لمناضلات و لفاعلين لجمعويين فالعالم.
من بين لأوسمة لكتيرة لي خدات عائشة الشنَّا:
- لجائزة د حقوق لإنسان من لجمهورية د فرانسا، 1995 ف باريز.
- جائزة إليزابيت نوركال، النادي لعالمي د لعيالات ف فرانكفورت، 2005.
- جائزة أوپيس د لأعمال لإنسانية لمتميزة، لي واصلة قيمتها مليون دولار. 2009 ف مينياپوليس (ميريكان).
- وسام جوقة الشرف من درجة فارس، من جمهورية فرانسا، 2013[8]
- ^ Zouak، Sarah (2014-05-12). "#1 Aïcha Ech-Channa". Women SenseTour (ب لفرانساوية). مأرشيڤي من لأصل ف 2023-06-03. تطّالع عليه ب تاريخ 2022-09-26.
- ^ "Discussions with Aicha Ech-Channa, Founder and President, Association Solidarité Féminine, Casablanca, Morocco". berkleycenter.georgetown.edu (ب نڭليزية). 2009-06-14. مأرشيڤي من لأصل ف 2022-11-13. تطّالع عليه ب تاريخ 2022-09-26.
- ^ Flah، Loubna (2013-04-08). "Morocco's Aicha Chenna, a Dauntless Activist in Defense of Women". موروكو وولرد نيوز (ب نڭليزية). مأرشيڤي من لأصل ف 2023-07-01. تطّالع عليه ب تاريخ 2022-09-26.
- ^ سالم، احمد (2022-09-25). "سبب وفاة عائشة الشنا من هي ماما عائشه". اليمن الغد (ب لعربية). مأرشيڤي من لأصل ف 2023-03-31. تطّالع عليه ب تاريخ 2022-09-26.
- ^ "علمانية ف راسي، مسلمة ف قلبي - قنطرة (2009) - بلونڭلي". مأرشيڤي من لأصل ف 2022-11-13. تطّالع عليه ب تاريخ 2022-09-25.
- ^ "الشنا تحصل على جائزة قيمتها مليون دولار". هيسپريس (ب لعربية). 2009-11-05. مأرشيڤي من لأصل ف 2022-09-28. تطّالع عليه ب تاريخ 2022-09-26.
- ^ مدارك. "عائشة الشنا.. و"الأمهات العازبات"". www.madarik-press.com (ب لعربية). مأرشيڤي من لأصل ف 2023-05-31. تطّالع عليه ب تاريخ 2022-09-26.
- ^ "فرنسا توشّح الناشطة الاجتماعيّة عائشة الشنا". هيسپريس (ب لعربية). 2013-04-03. مأرشيڤي من لأصل ف 2022-10-01. تطّالع عليه ب تاريخ 2022-09-26.
- لجمعية د التضامن النسوي مؤرشف 2017-12-02 فموقع وايباك ماشين