سي (لونڭاج)

هادي مقالة على لونڭاج ف لانفورماتيك. ل معاني وحدين خرين، شوف سي (توضيح).

سي
معلومات عامة
نوع د لّونڭاج	لغة برمجة أمرية، لغة برمجة إجرائية، لغة برمجة مهيكلة، لغة مجمّعة، لونڭاج و مصطلح ف لانفورماتيك
شكون ختارعو	دينيس ريتشي
شكون طورو	مختبرات بل، دينيس ريتشي، المعهد الوطني الأمريكي للمقَايِس، المنظمة الدولية للمعايير و كين تومسن
متأتر ب	ألڭول 68، بي، لغة تجميع، فورتران، PL/1، سي بي إل، لغة البرمجة الأساسية المختلطة، ألڭول 60 و ألڭول
لفلسفات د لبرمجة	برمجة أمرية، برمجة مهيكلة و برمجة إجرائية
تّنواع	manifest typing و weak typing
جّرات د لفيشي	c و h
مايتخالطش معا	C
سّيت رّسمي	https://www.iso.org/standard/74528.html و https://www.open-std.org/jtc1/sc22/wg14/

لونڭاج سي (نّݣليزية: C language) هوّا لونڭاج د التخدام لعام لي ختارعو عالم لانفورماتيك دينيس ريتشي ف السبعينات د لقرن 20. هاد اللونڭاج باقي مخدم بزاف ل حد الساعة، و كان و مزال عندو تأتير كبير ف لمجال ديال لبرماجة.

اللونڭاج سي مخدم ف لكتابة ديال لكوض سورس د پروڭرامات بحال السيستيمات د التشغيل، درايڤرات، و سطاك د پروطوكول (تطبيق ديال پروطوكول د الريزو لمعلوماتي). كاينين أپليكاصيونات مكتوبين ب سي، ولاكين هاد التخدام ولّا قل من قبل، حيت أغلبية د لموبرميجين كيفضّلو يخدمو ب لونڭاجات خرة بحال جاڤا ؤلا پايثون، ف التطبيقات لي ماكاتطّلبش تدبير دقيق ديال لميموار، و كاتكون لحساسية د مدة لبرماجة و الصيانة د لپروڭرام عندها أهمية كبر من السرعة د التنفيد ديالو. بزاف ديال لمودولات د لونڭاجات بحال پايثون كيتكتبو ب سّي (متلاً نامپاي ديال لحساب د لماطريسات)، باش تطلع لفعّالية ديال لپروڭرام لي مكتوب بيهوم.

هاد اللونڭاج تسمّا "سي" C، حيت جا باش يخلف لونڭاج بي B language، و طوّرو دينيس ريتشي فاش كان خدام ف مختبرات بيل، مابين 1972 و 1973، باش يصاوب پروڭرامات ديال الصيانة ف سيستيم ؤنيكس.

ف 2023، لونڭاج سّي مكلاصي التاني ف لانديكس د تيوبي TIOBE Index ديال اللونڭاجات لي مطلوبة بزاف، مورا پايثون، و قبل من سي++ لي مبني عليه.

نضرة عامة

سّي كيتّعتابر لونڭاج أمري ب لپروصيات. و تّبنا على الساس ديال ألڭول (فاميلة د اللونڭاجات لي بانو ف اللخر د لخمسينات). عندو سيستيم د التيپاج تابت (عكس پايثون متلاً لي خدام ب سيستيم ديناميكي، بحيت التيپاج ديال شي پاراميطر كيقدر يتبدّل على حساب شنو كيدير بيه لپروڭرام). لكوض ديال السي لي كيكون قابل ل التنفيد، كيكون ديما وسط فونكسيونات. لپاراميطرات ديال لفونكسيونات كيدوزو ف لعادة ب لقيمة ديالهوم call by value، ولاكين ف لحالة ديال الليستات arrays كيتدوّزو ب پوانتور pointer لي كاتكون فيه لادريسة ف لميموار ديال لقيمة اللولة ف الليستة. فاش كايتدوّز شي پاراميطر ف فونكسيون ب پوانتور كانڭولو بلي دوّزناه ب لإحالة call by reference ؤلا passing by reference.

لكوض سورس ديال سّي كيكون ب ب فورما حر، يعني يقدر لواحد يكتب لكوض كاملو ف سطر واحد طويل يلا بغا، ؤلا يفرّقو على بزاف د السطورا. كلا تعليمة ضروري تّسالا ب فاصيلة منقوطة، و كلا بلوك ديال التعليمات كيكون مجموع ب معقوفات.

اللونڭاج سي كيتميّز ب هاد لمزيات ؤلا لعناصر:

• كلمات خاصة بحال if/else، for، do while، while، switch، و غيرها. لپروڭرامور فاش يسمّي لپاراميطرات ديالو خاصو يحضي باش مايخدّمش هاد لكلمات لخاصة، حيت غادي تعطي غالبا شي غالاط ف لپروڭرام.
• رموز د لحساب بحال +,+=,++,&,||
• پاراميطرات ؤلا متغيرات لي كاتكون كلا وحدة منها عندها سمية وحيدة، و تيپاج محدّد.
• تيپاج لي كيحدد نوع الداطا لي كاتكون ف شي پاراميطر متلاً. بحال int ب النسبة ل لأعداد الطبيعية، char ب النسبة ل كاراكطير...
• فونكسيونات:
  • لفونكسيون لي كاتدير شي عملية بلا ماترد تا شي قيمة كاتكون ف لعادة مسبوقة ب لكلمة لخاصة void. ف هاد لحالة كاتسمّى "پروصي" procedure.
  • لفونكسيون لي كاترد شي قيمة كاتكون مسبوقة ب لكلمة لخاصة ديال التيپاج ديال الداطا لي كاترد. متلا شي فونكسيون سميتها calculate كاترد عدد طبيعي غادي تّكتب ب هاد الشكل

    int calculate(){}
    

  • يلا فونكسيون عندها پاراميطرات د لإنپوت، كيخصهوم يتكتبو بين جوج قواس ديال لفونكسيون ب التيپاج ديالهوم، متلاً شي فونكسيون كاتدير لجمع ديال جوج أعداد طبيعية سميتها add غادي تّديكلارا ب هاد الشكل

    int add(int a, int b){}
    

  • لفونكسيون تقدر تعيّط ل راسها، هاد لبلان كيتسمّى الترياص recursion.
  • يلا تعرّف شي پاراميطر وسط لفونكسيون، كيكون لمدا scope ديالو غير وسط ديك لفونكسيون. يعني يلا تعيّط ل داك لپاراميطر ب سميتو برا لفونكسيون إما لكومپيلاتور كيعطي غالاط، ؤلا كاتخدّم قيمة خرة ديال شي پاراميطر عندو نفس السمية برا لفونكسيون.

ميتال ديال پروڭرام

هادا پروڭرام بسيط ب لونڭاج سي كيطبع "hello, world" فوق الشاشة:

#include <stdio.h>

int main(void)
{
    printf("hello, world\n");
}