لونݣاج

من ويكيپيديا
لكوض سورس ديال پروڭرام مكتوب ب لّونڭاج سّي. سّطورا ب رّمادي كيمتّلو تعليقات لي كيسهّلو على أي واحد كيقرا لكوض باش يفهم لپروڭرام شنو كيدير. هاد لكوض يلا تكومپيلا ؤ تلونصا كيطبع فوق شّاشة لعيبارة "Hello, world!"

لّونڭاج ؤلا لّوغة د لبرماجة هيّا مجموعة د تّعليمات ؤ لقواعد لواجدة لي كاتطرجم ترّينڭة د لحروف ؤلا د لعناصر لمتشافة (ف لحالة د لّونڭاجات د شّوفان) ل لونڭاج د لماكينة باش تحصل على نواع مختالفين د نّتايج (نتيجة د حساب، تبدال ف شّكل ديال شي عنصر د شّاشة، ؤ زيد ؤ زيد). لّونڭاجات د لبرماجة هوما نوع من نواع لّونڭاجات د لورديناتور، ؤ كيتخدّمو ف لبرماجة د لورديناتور باش يأمپليمونطيو ألڭوريتمات. لمجموع ديال تّعليمات لمتسلسلة لي كاتأمپليمونطي شي ألڭوريتم كاتسمّا پروڭرام ؤلا برنامج، ؤ نّص د لپروڭرام كيتسمّا كوض سورس.

من لبدية د لقرن 19، تستعملو پروڭرامات باش يتحكّمو ف لماكينات، بحال لماكينة د جاكار ديال تّيكستيل، لبواطة د لموسيقا، ؤ لپيانولا (پيانو كيلعب راسو). هاد لپروڭرامات لّولين ماكانوش كيعطيو نتيجة مختالفة (أوتپوت) على حساب شنو تدخّل (إنپوت).

كاينين لألاف د لّونڭاجات لي تّختارعو ؤ باقين كيتّختارعو. كلا لونڭاج نقدرو نقسّموه ل جوج عناصر أساسيين: سّانطاكس لي كيمتّل شّكل ديالو، ؤ سّيمانتيكية لي كاتمتّل لمعنى. بعض لّونڭاجات كيكونو معرّفين ف شي سطوندار موتّق (بحال لّونڭاج سّي لي معرّف ف من طاراف مونضّامة إيزو)، ؤ كاين لي كاتكون فيه شي نسخة لي طاغية ؤ مستعملة بزاف بلا ماتكون موحّدة بشكل رسمي بحال پورل. نقدرو نقسّمو لّونڭاجات أيضا ل لونڭاجات د لمستوى لعالي، قريبة ل لّوغة د بنادم ؤ سهل ف لفهامة، ؤ لونڭاجات د لمستوى لهابط، لي قريبة ل لّونڭاج د لماكينة ؤ كاتكون صعب ف لفهامة، بحال لاصومبلور.[1]

نّضرية د لّونڭاجات هوّا مجال فرعي د لانفورماتيك لي كيعتاني ب دّيزاين، تّطبيق، تّحليل ؤ لكلاصاج ديال لّونڭاجات د لبرماجة.

عيون لكلام[بدل | بدل لكود]

  1. ^ "شنو هوّا لونڭاج؟" (بنڭليزية).
Midori Extension.svg
هادي زريعة ديال مقالة خاصها تّوسع. تقدر تشارك ف لكتبة ديالها.