سكار (مرض)

سكار
معلومات عامة
نوع	مرض استقلاب الغلوكوز، أمراض الغدد الصماء و مرض مناعي ذاتي في الغدد الصماء

السكّار (نّݣليزية: diabetes) هو واحد المرض مزمن، يعني اللي كيبقى معا لواحد طول حياتو. المشكل فيه هو بلي الجسم ما كيقدرش يستعمل السكّار ديال لماكلة بشكل صحيح. هادشي كيجي من واحد المادة سميتها الأنسولين، وهي اللي كتساعد الجسم باش يستعمل السكّار. ملي الجسم ما كيكونش عندو بزاف من هاد المادة، السكّار كيتجمع ف الدم وهادشي هو اللي كيسبب المرض.

نواع مرض السكار

كاين جوج د النواع رئيسيين ديال مرض السكّار:

1. النوع اللول: هاد النوع كيجي غالبا عند الدراري الصغار والمراهقين. ف هاد الحالة، الجسم ما كيبنیش الأنسولين ݣاع. باش يعالجوه، كيديرو ليه ليباري ديال الأنسولين.
2. النوع الثاني: هاد النوع هو اللي كيجي عند أغلبية الناس. هنا، الجسم كيبنّي الأنسولين ولكن الخلايا ما كتعرفش تستعملو بشكل مزيان. باش يتعالج هاد النوع، كيتبدل نمط الحياة والتغذية و كيتخادو بعض الدوايات.

لأسباب ديالو

أسباب السكّار بزاف، ولكن أهم وحدين هوما:

• الوراثة: يعني تقدر تجي من الوالدين.
• لغلض: الوزن الزايد كيزيد من خطر الإصابة بالسكّار.
• نمط الحياة: لماكلة الزايد، قلة الحركة، والضغط النفسي كلهم عوامل كتزيد من خطر الإصابة.

لمضاعفات

ملي ما كيتعالجش السكّار مزيان، كيجيو بزاف ديال المشاكل:

• القلب والشرايين: السكّار كيزيد من خطر السكتة القلبية والدماغية.
• العين: يقدر يوصل لعمى.
• لكلاوي: تقدر تفسد.
• الأعصاب: كتجي فيها التنميل و الضرّان.
• الجلد: كيجيو فيه الجروح اللي ما كتشفيش بسهولة.

الكشف والتشخيص

كيتشخص النوع لأول وبزاف ديال الحالات من النوع الثاني ديال السكار على حساب لأعراض لأولية اللي كيبانو فالبدية ديال المرض، بحال كثرة البول والعطش الشديد، ويقدر يكون معاهم نقيص فالوزن. هاد لأعراض عادة كتطور وتزيد على مدار الأيام والأسابيع. وحوالي ربع الناس المراض بالنوع الأول كيعانيو من تحمض الدم الكيتوني (Acidocétose) ملي كيكتشفو المرض أول مرة. أما النواع الأخرى ديال السكار، فغالباً كيتبانو بطرق أخرى بحال لفحص الطبي ، أو ملي كيتلقى ارتفاع فمستوى السكار (الغلوزكوز) فالدم وقت شي تحليلة؛ أو عن طريق يبان شي أعراض بحال ضبابة فالعينين (تغيرات الرؤية) أو لعيا بزاف اللي ما عندو حتا سبب .

وفالغالب، كيتكتشف المرض ملي كيبدا لمريض يعاني من مشاكل ومضاعفات بسباب السكار، بحال السكتات القلبية، مشاكل فالكلاوي (اعتلال الكلى)، التعطال باش ابراو الجروح أو لقيح لرجلين ، مشاكل فالعينين، تعفنات لفطرية، أو فاش كتولد شي امرأة شي طفل بوزن زايد بزاف أو كيكون عندو لهبوط فسكار الدم.

ومرض السكار كيتعرف بالطلوع لمتقطع أو لمستمر فالغلوكوز فالدم، ويمكن نأكدو هادشي بواحد من هاد لقيم لمرجعية:

• عبار سكار الدم فاش كيكون لواحد صايم: 126 مليغرام / ديسيلتر (7 مليمول / لتر) أو كثر.
• عبار سكار الدم: 200 مليغرام / ديسيلتر (11.1 مليمول / لتر) أو كثر، وهادشي بعد ساعتين من شريب 75 غرام ديال الغلوكوز، كيف كيدار فإختبار تحمل الغلوكوز (HGPO).
• لعبار لعشوائي (فأي وقت) ديال سكار الدم: 200 مليغرام / ديسيلتر (11.1 مليمول / لتر) أو كثر.

جهاز قياس سكر الدم (الغلوزكوز).

ملي كتكون النتيجة إيجابية ولكن ما باينينش لأعراض السكار، خاص ضروري تدار تحليلة أخرى باش نتأكدو من الحوايج اللي قلنا (صايم، فاطر أو لعشوائي). وأغلبية لأطباء كفضلوا يعبروا السكار والواحد صايم حيت هاد التحليلة ساهلة وكتوفر لوقت (بلا ما نتسناو ساعتين ديال اختبار تحمل الغلوكوز). وحسب التعريف لعلمي ديال دبا، يلا تدارو جوج عبارات ديال السكار و لواحد صايم وخرجو بجوج كثر من 126 مليغرام / ديسيلتر (7 مليمول / لتر)، فهذا دليل على الإصابة بالسكار.

أما الناس اللي كيكون سكار الدم عندهم وهم صايمين ما بين 110 و126 مليغرام / ديسيلتر (6.1 و7 مليمول / لتر)، كيتعتبر بلي عندهم شي خلل لمؤقت فسكار الصيام. وفي حالة يلا كان لعبار واصل لـ 140 مليغرام / ديسيلتر (7.8 مليمول / لتر) أو كثر بعد ساعتين من شريب 75 غرام ديال الغلوكوز، فهنا كيتسمى "ضعف تحمل لغلوكوز". وهاد لحالة اللخرة بالخصوص كتزيد من احتمال تطور لمرض سكار طالع بزاف و مشاكل فالقلب ولعروق ديالو .

و إلا أن الطلوع ديال السكار اللي كيشد فهموغلوبين الدم بطريقة ما كترجعش (واللي كيتسمى السكر لخزان أو الهيموغلوبين الغليكوزيلاتي HbA1c) بنسبة 6% أو كثر، كيتعتبر غير طبيعي عند بزاف ديال لمختبرات (على حساب معايير لميريكان ديال 2003). هاد لعبار كيتستعمل فلأساس باش يشوفو الطبيب واش الدوا عاطي مفعولو، حيت كيعطينا لمعدل ديال السكار فالدم فالتسعين يوم اللي دازت (3 شهور). ولكن بعض الأطباء كيطلبوه وقت التدواز باش يعرفو الحالة كيف كانت من قبل. النسبة لموصيين بها ديال لخزان لمرضى السكار هي قل من 7%، وهي اللي كتدل بلي السكار متحكم فيه مزيان، وخا بعض لأطباء كينصحوا بنسب رقم مناسب (بحال قل من 6.5%). وكينقص الرقم ديال حدوث لمضاعفات بحال شبكية لعين أو مشاكل الكلاوي عند اللي مريض بالسكار اللي كيحافظوا على الخزان ديالهم ما بين 6.5 و7%.

لوقاية

باش يحمي لواحد راسو من السكّار، خاص:

• لمحافظة على وزن صحي: لمشية، الجري، ولعب الرياضة.
• لماكلة لمزيانة: الخضار والفواكه، وشريب الما.
• تفادي السكريات والدهون: التقليل من لماكلة لمقلية و لحلاوي.
• لمراجعة معا الطبيب بانتظام باش يتبع لحالة الصحية.