ديڤيد هيوم
ديڤيد هيوم
| ||
 | ||
| معلومات عامة | ||
| زيادة | 26 أبريل 1711 (يولياني) إدينبرا | |
| لموت | 25 غشت 1776 (65 عام) إدينبرا | |
| لجنسية | مملكة بريطانيا العظمى | |
| لحرفة | فيلسوف، إيكونوميست، مكاتبي، توارخي، كاتب مقالات و كاتب | |
| لّوغات لي كيعرف | نڭليزية | |
| لفاميلة | ||
| لواليد | Joseph Hume, 10th of Ninewells | |
| لواليدة | Katherine Falconer | |
| خوت | John Hume, 11th of Ninewells و Catherine Hume Fullerton | |
| شريك | لا قيمة | |
| معلومات خرى | ||
| دين | إلحاد | |
| لأعمال |
| |
| تأتر ب | جورج بيركلي، دجون لوك، فرانسيس هاتشسون و إسحاق نيوتن | |
   | ||
ديڤيد هيوم (مزيود ف 7 ماي 1711، توفى ف 25 غشت 1776) كاتب و فيلسوف و توارخي سكوطلاندي ديال فترة د الضواو.[1] هيوم معروف بزاف ليوم ب السيستيم لفلسافي ديالو لمبني على لمنهج التجريبي ؤلا لإمپيريقية empiricism (يعني بلي لمعرفة د بنادم ماكاتجي غير من التجريبة)، الشكوكية skepticism (لي كاتشكك ف لإمكانية باش بنادم يوصل ل معرفة حقيقية د لوجود)، و لفلسفة الطبيعية لوجودية ؤلا الطبيعانية naturalism (لي كاتڭول بلي جميع لموجودات كاينين ف الطبيعة، يعني ماكايناش شي حاجة فوق الطبيعة).[2] ف كتابو مقالة على الطبيعة د بنادم، حاول هيوم باش يحط الساس لپسيكولوجي ل الطبيعة د بنادم، من منضور طبيعاني naturalistic. هيوم تبع دجون لوك ف لموقف ديالو بلي ماكاينينش أفكار غريزية، و ستنتج بلي جميع لأفكار عند بنادم كيجيو من التجريبة. هادشي كيخليه واحد من لفلاسفة لإمپيريقيين كيما فرانسيس بيكون، طوماس هوبز، دجون لوك، و دجورج بيركلي.[3]
هيوم جادل بلي لمنهج لإستقرائي و لإيمان ب السببية ماعندهومش ساس منطقي، و بلي كيجيو غير من التقليد و لعادات الذهنية. حيت ماعمّر لواحد كيشوف بلي شي حاجة كاتسبب شي حاجة خرة، غير بلي جوج أحدات كيطراو معا بعضياتهوم ف تسلسل زماني و بشكل معاود. هاد لإشكال كيخلي أي ستينتاج سببي من تجريبة فايتة، ب الضرورة كيتعامد على عتيقاد بلي الجاي كيشبه ل لفايت، و هوّ فتيراض ميطافيزيكي لي مايمكنش يكون معتامد على التجريبة.[4]
هيوم كيعارض لعقلانيين، و كيڭول بلي لعاطفة عند بنادم كاتغلب لعقل.[3][3] و كان تابع لفلسفة الشاعرية لأخلاقية moral sentimentalism لي كاتڭول بلي لأخلاق كاتعتامد على لعاطفة و لأحاسيس، ماشي على مبادي أخلاقية متجردة. كيتّعتابر هيوم أول واحد ف لفلسفة لؤروپية لي شرح ب التفصيل لإشكال ديال راه-خاص، يعني بلي بيان وصفي (شنو لي كاين)، مايمكنش بوحدو نستنتجو منو بيان معياري (شنو خاص يتدار).[5]
هيوم نفى بلي بنادم عندو تصور حقيقي ديال "الدات"، و ڭال بلي التجريبة لي كانعيشو هيّ ديال ربطة ديال لأحاسيس، و بلي الدات ما هيّ غير هاد الربطة د لإدراكات لحسية لمربوطة بيناتها ب مجموعة د لأفكار. النضرية التوافقية ديال هيوم على حرية لإرادة كاتعتابر بلي السببية لحتمية منساجمة بشكل كامل معا لحرية د بنادم.[6] لفلسفة ديالو على الدين و الرفض ديالو ل لمعجزات و لأدلة من التصميم ديال وجود الله، كانو سباب ف جدل كبير ف زمانو.
ديڤيد هيوم خلا ترات فلسافي كبير لي أتر ف عدد د لفسلفات، بحال لفلسفة د الصيونص و لفلسفة التحليلية، زيادة على اللاهوت. إمانويل كانط ڭال بلي هيوم هوّ لي كان لهمو و فيّقو من "النعاس الدوڭماتي" لي كان فيه.
- ↑ Harris, M. H. 1966.
- ↑ Morris, William Edward, and Charlotte R. Brown. 2019 [2001]. "David Hume." Stanford Encyclopedia of Philosophy. Stanford: Metaphysics Research Lab. Retrieved 18 May 2020.
- 1 2 3 Atherton 1999, p. ?.
- ↑ Berlin, Isaiah (2013). The Roots of Romanticism (2nd ed.). Princeton: Princeton University Press. ISBN 978-0691156200.
- ↑ Garrett, Don.
- ↑ "Hume on Free Will". stanford.edu. Metaphysics Research Lab, Stanford University. 2016.
