خدام الدولة
| خدام الدولة | |
|---|---|
| مصطلح سياسي، فضيحة | |
| وجه من وجوه | احتيال، اختلاس  |
| بلاد | لمغريب |
| تاريخ | 2016 |
 مقالة ناقصينها تصاور. هاد لمقالة ناقصينها تصاور، حاول تزيد تصاور ماعليهاش كوپيرايت ف/من كومنز. باش تعرف كيفاش تزيد تصويرة ف مقال، شوف صفحة لمعاونة. يلا بان ليك بلي هاد لمقال مامحتاجش ل تصاور، زيد التصنيف تصنيف:ستيتناء من طاݣ ناقصين تصاور ف لّخر معا التصنيفات و حيّد هاد لموضيل. |
خدام الدولة هو مصطلح بان ف الساحة د الصحافة و السياسة ف لمغريب ف 2016 و كايعني واحد لمجموعة د الناس اللي هوما موضّافين كبار ولا رجال دولة ف المغريب (مستشارين، وزرا، سياسيين) و فيهوم حتا ناس مقرّبين من لقصر لملكي ف لمغريب لّي ستافدو من بقاعي د لأرض ف الرباط ب تمن رخيص بزّاف و قل من التمن د لميترو لحقيقي. هاد لبقاعي كانو ف ملكية الدولة المغربية و تعطاو ب شكل مباشر بلا طلب عروض.[1]
هاد القضية كانت تفجرات من بعد تحقيقات صحفية، كان موراها الصحفي عمر الراضي و نشروها و بحتو فيها مؤسسات إعلامية مغريبية بحال أخبار اليوم و السيت د لكم.كوم.
القضية كاين اللي عتابرها فضيحة أخلاقية و شكل ديال الرشوة و شرا ديال الولاءات وكاتخلق مشكل ديال شبهة "عندو خالتو ف العرس" (Délit d'initié). ف الجيهة ياخرا لّي ستافدو دافعو على هاد لحقّ و عتابرو أن لّي خاصّو يتلام هو القانون اللي كاين اللي كايعطي ل الدولة الحق تدير بحال هادشي.[2][3]
القضية خلقات حتا نقاش عمومي ف المغريب على قانون لوصول ل لمعلومة و لحماية د الصحافيين اللي كايديرو صحافة التحقيق.
سوا الصحافيين اللي خدمو على الضوسي ولا لمؤسسات لإعلامية اللي نشرات التفاصيل كاملين من بعد عوام قليلة تعرضو ل متابعات قضائية ف ملفات آخرا ولا تقطع عليهوم لإشهار و سدّو (ولا قرّبو يسدو)، و كاينين مونضّامات حقوقية لّي كايعتابرو هادشي شكل ديال لينتيقام على التحقيقات الصحفية ديالهوم.[4]
لقضية بدات ف 23 يوليوز 2016 فاش نشرو جورنالات و مواقع مغريبية (منهوم أخبار اليوم و لاكوم) تحقيقات صحفية فيهوم وتائيق كاتشير بلي عبد لوافي لفتيت (لّي كان ف ديك لوقت والي على الرباط-سلا-قنيطرة) شرا من عند الدولة بقعة د 3755 ميترو ب تمن 348 درهم/م² ف طريق زعير ف الرباط، و هي لبلاصة اللي لميترو فيها واصل ل 10 لاف درهم ل لميترو لمربع.[5]
من بعد دارت الداخلية و المالية بلاغ كايقولو فيه بلي لعملية قانونية و داخلة ف عملية د تفويت عقارات ل خدام الدولة، على حساب التعبير اللي جا ف البلاغ.[5]
ف 26 يوليوز 2016 لموقع د لكوم قدر يدبّر على الليستة كاملة و تنشرات ف مؤسسات صحافية مغريبية بحال أخبار اليوم. الليستة بانو فيها سميات من النّواع التالية:[6]
- مسؤولين ف شركات كبيرة د لبلاد.
- ناس قراب من لقصر لملكي و من محمد الساديس.
- ووزارا
- مستشارين د لملوك د لمغريب
- أعيان ديال الصحرا
- أجانب ديپلوماسيين من الدول لعربية
- ناس قراب من لمستفيدين: عيالاتهوم و ولادهوم.
سميت "خدام الدولة" نتاشرات ف اللول بزّاف ف مواقع التواصل لجتيماعي و تدارو هاشطاݣات "خدام الدولة" كا شكل د لنتيقاد و السخرية من الجملة اللي تخدمات ف البلاغ اللي خرجوه لوزارات د المالية و الداخلية و اللي جا فيه:
إن القطعة الأرضية التي اشتراها والي جهة الرباط سلا القنيطرة، عبد الوافي لفتيت، جزء من تجزئة سكنية مخصصة لموظفي وخدام الدولة منذ عهد المغفور له جلالة الملك الحسن الثاني[5]
لنتيقادات شارت ل كون "خدام الدولة" مصطلح ما كاين لا ف لقانون ولا ف لمساطر د لإدارة لمغريبية.
- عبد الوافي لفتيت: كان والي و دابا وزير الداخلية د المغريب.
- عبد السلام أحيزون: الرئيس لمدير لعام د تّيصالات لمغريب.
- عبد العزيز مزيان بلفقيه: كان وزير يامات لحسن التاني و مستشار د محمد سّاديس (توفا ف 2010).
- محمد معتصم: مستشار د محمد سّاديس.
- عبد الحق القاديري: جينيرال كبير ف لعسكر من يامات لحسن التاني.
- مراد الشريف: كان مدير د لمكتب الشريف د لفوسفاط (لوصيپّي).
- نور الدين بنسودة: كان مدير عام د الضرائب و دابا لخازن لعام د لمملكة. قرا ف لمعهد لمولوي معا محمد سّاديس.
- محمد حصاد: سبقليه كان وزير مع لحسن التاني و كان وزير داخلية معا محمد سّاديس.
- ادريس لشݣر: لكاتب لعام د حزب لتّيحاد لشتيراكي.
- محمد الكتاني: الرئيس لمدير لعام د التّيجاري وافا بنك.
- ميمون المنصوري: لقايد لعام د الحرس الملكي.
- مطفى المنصوري: اللي كان وزير و سبقليه كان رئيس التجمع الوطني د لأحرار.
- حكيم المنصوري: خو مصطفى لمنصوري.
- عبد العزيز الماعوني: الطبيب الخاص د محمد سّاديس.
- بوعمر تغوان: كان وزير التجهيز.
- مصطفى الساهل: كان والي و سبقليه كان وزير داخلية.
- محمد بوسعيد: كان والي و سبقليه كان وزير المالية.
- محمد فاضل بنيعيش:
- عبد الرحمن السعيدي: كان وزير د الخوصصة يامات لحسن التاني و كان أول مدير عام د لاسامير من بعد ما تخوصصات.
- عبودي حمد أبو شهاب و حميد بن أحمد المعلا: من السلك الديبلوماسي د لإيمارات.
- ↑ ""لكم" تكشف حصريا عن اللائحة الكاملة للمستفيدين من تجزئة "خدام الدولة" بثمن بخس".
- ↑ "لشكر أول المستفيدين من أرض "خدام الدولة" يخرج عن صمته: نعم استفدت..وهذه هي القصة!". Archived from the original on 2021-07-28. Retrieved 2020-09-24.
- ↑ "مفهوم "خدام الدولة"". Archived from the original on 2016-08-07. Retrieved 2020-09-24.
- ↑ "بروفيل- محاكمة الصحافي عمر الراضي.. من اختراق مربع "خدام الدولة" إلى "الموت ولا المذلة"". Archived from the original on 2021-11-08. Retrieved 2020-09-24.
- 1 2 3 "المغاربة يحلمون أن يكونوا "خدام الدولة"".
- ↑ "اللائحة الكاملة للمستفيدين من بقع "خدام الدولة" – صور وفيديو". Archived from the original on 2021-08-02. Retrieved 2020-09-24.