حداد زرق إفريقي
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
 مقالة ؤلا فقرة ناقصينها عيون لكلام.لمعلومات لّي ف هاد لمقالة ؤلا هاد لفقرة ناقصين ف توتيق، خاصّ يتزادو فيها عيون لكلام باش تكون موتوقة. شوف هنا كيفاش تزيد لعيون. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط! |
حداد زرق إفريقي
| ||
| ||
| معلومات عامة | ||
| سمية لعيلمية | Cyanistes teneriffae (رينيه ليسن، 1831) | |
| لخاصية د ترتاب | نوع | |
| تابع ل | قرقف أزرق | |
| حالة د لحماية | ||
 | ||
| مامهددش | ||
| UICN | 103761672 | |
|---|---|---|
| لخاريطة ديال فين عايش لكائن | ||
| ||
لحداد الزرق ليفريقي (السمية لعيلمية: Cyanistes teneriffae، سيانيسطيس طينيريفاي) هو نوع من طير ف لفاميلة د لحداديات. هاد الطير موجود ف شمال إفريقيا، ف لمغريب، دزاير، تونس و ليبيا، و ف ݣزاير لكاناري ف الصبليون، و پانطيلّيريا ف الطاليان. لموؤل الطابيعي ديالو هو لغابات لمعتادلة. هاد النوع و لحداد الزرق لوراسياوي كانو كايتعتابرو شحال هادي نوع واحد. لحداد الزرق ليفريقي تخدم ف بزاف د لبحات حيت كاتعيش نواع فرعية منو ف ݣزاير حدا بعضياتها و لعالاقة ديالو ب نضرية التاطوور.
لحداد الزرق ليفريقي توصف لأول خطرة من عند غينيه لوصون ف عام 1831، سميتو لعيلمية سيانيسطيس طينيريفاي - Cyanistes teneriffae، هو طير من فاميلة لحداديات ف تنضيمة د عصفوريات الشكل، الطول ديالو كايتفاوت ما بين 11 و 12 لسونتيميطر كا متوسط، و لوزن ديالو 10 ݣرام كا متوسط.
هاد الطير كايتشابه معا قريبو لحداد الزرق لوراسياوي، و لكن شي ضيطاي ف الشكل د الريش و اللوان كاتفرزو على النوع لوراسياوي. هاد النوع هو ڤيرسيون عالية ف الشدة د اللوان على لحداد الزرق الشايع (لوراسياوي). الطراف لفوقانية د لبالغين كاتكون ف الرمادي-زرق. ف الجناوح، لآلولا و الجناوح لفوقانية كايكونو غاديين ل الرمادي ب قنات ف الزرق. الريش د الطيران ف الرمادي غالق، و لقنات ديالولهوم ب الزرق فاتح، ف لوقيتة لي الجناوح التالتين (الجناوح د اللور - Tertials)، كاتكون قمقومتهوم مرشوشة ب لبيض. لحداد الزرق ليفريقي مبدل على لحداد الزرق لوراسياوي حيت ناقصو لخط لبيض د الجناوح. لقزيبة لفوقانية كاتكون ب الرمادي-زرق غالق، معا هوامش ب الزرق فاتح. أما الجناوح لبرانية د اللور (Rectrice)، كاتكون قمقومتها ب لبيض.
ف الطراف التحتانية، الصدر، و لكرش كايكونو ب الصفر ب كحولية غادية و كاتفتاح ف لخط لوسطاني. التحت د لقزيبة كاتكون ب لخضر-صفر، بحال الجناوح التحتانيين. ف الراس، لعرف كايكون ب الزرق غارق، و كايولي غالق ف اللور د لعرف. هاد لعرف الزرق ضاير بيه خط بيض عريض، حتى ل الجبهة، لحجبان و اللور د لعرف. لحناك حتى هوما ب لبيض، مفروقين على لخط لي تدكر ب خط د لعين غادي ل لكحل لي كايبدا من الجناب د لوجه (Lores)، و كايدوز من لعينين و كايسالي ف لقرفادة. لمنقار لماضي و لمجهد د هاد الطير كايكون ف كحل. لعينين ب لقهوي غالق ل لكحل. السيقان و الرجلين ب الزرق-رمادي.
الجناس ب جوج بحال بحال. لعتاتݣ كايشبهو ل لبالغين، و لاكين عندهوم الجبهة، لحاجب، و لوسط د لقرفادة ب الصفر. الريش ديالهوم كايكون خافت و كاينقصو لخط لكحل لي ف الصدر.
هاد النوع و لحداد الزرق لوراسياوي كانو ف السابق كايتعتابرو نوع واحد. النوع لفرعية هي:
- سيانيسطيس طينيريفاي پالمينسيس (C.t.palmensis) - حداد زرق د پالما - موجود ف لا پالما، ݣزاير لكاناري.
- س.ط.أومبرييوسوس (C.t.ombriosus) - موجود ف إل هييرّو، لكاناري.
- س.ط.طينيريفاي (C. t. teneriffae) - حداد زرق د لكاناري - موجود ف لا ݣوميرا و طينيريفي، لكاناري.
- س.ط.هيدويجي (C. t. hedwigii) - موجود ف ݣران كاناريا - لكاناري.
- س.ط.ديجينير (C. t. degener) - موجود ف لانثاروطي و فويرطيبينتورا، لكاناري.
- س.ط.أولطرامارينوس (C.t.ultramarinus) - حداد زرق لازوردي (أولطرامارين) - موجود ف پانطيليريا (الطاليان)، و ف شمال إفريقيا من شرق لمغريب ل شمال تونس.
- س.ط.سيرينايكي (C. t. cyrenaicae ) - حداد زرق ليبي - موجود ف شمال شرق ليبيا.
لحداد الزرق ليفريقي كايتجاوج ف بزاف د لموايل بحال لغابات د لغار، النهور لمشجرة، و الشجيرات د ليوفوربيا، و ف لبلايص لمدينية بحال لپاركينݣات. عاوتاني كايتلقى ف لغابات نتاع الصنوبر ف علو مابين 1800 حتى ل 2000 ميطر ف ݣزاير لكاناري.
لحداد الزرق ليفريقي كاياكل ب لأساس لحشرات بحال لفاراشات و لخنافس الصغيرة. كاياكل عاوتاني الزريعة، لݣوز و شي فواكه.
لعيطة د لالارم د لحداد الزرق ليفريقي مجهدة << تشر-ر-ر-ر-ر-ق>> شي مرات ب <<تشي>> قصيرة ولا <<تشي-تشي-تشيڤيتشي>> كاتنطق قبل من لعيطة د لالارم. هاد الصوت كايشبه ل الصوت د الضريب لحديد (Hammering). لغنية هي سيرية من النوطات "تشيتشي-تشيريتشي-تشيريتشي-تشيريتشي" مجهدة و منغمة. نقدرو نسمعو شي تنويعات يا قل يا كتر ف النغمة، و لايني موسيقية ب شكل كافي. كل نوع فرعي كاتنطق تنويعات من هاد الصوات.
لحداد الزرق ليفريقي عندو الطيران التابت (بلا تحراك د الجناوح) و كايطير ف لأساس ل مسافة قصيرة من شجرة ل شجرة. ف لمسافات الطوال، كايولي عندو الطيران لمموج (ب تحراك د الجناوح).
لحداد الزرق ليفريقي ، بحال لحداد الزرق الشايع، ف لغالب كايتلقى ف كوپل ولا بوحديتو، و شي مرات ف ݣروپات صغيرة د لفاميلة. كاياكل لحشرات و الزريعة، و حتى لفروي. هاد الطير تقريبا مولف بنادم و ديما كايقرب منهوم باش يعطيوه لماكلة. كايعلف ف لعروش لغارقة ف بلايص منوعة ف الشجر، بحال الصنوبر ولا النخل، و نباتات خرى. هاد الطير آجيل، و كايقدر ياكل و هو مقلوب، ف لعروشا الرقاق ولا ف لمخروطات (الطرابش) د الشجر الصنوبر. يقدر عاوتاني يتبع لحشرات و هو طائر.
هاد الطير كايقبط لماكلة بينات رجليه على شي عرش ولا فشي سورفاسات خرى، و كايبدا يضرب ب منقارو بزاف د لمرات باش يقدر يهرس لبدور ولا لفاكية، ولا يقتل شي يرقات ولا حشرات. ف لوقيتة د لمجاوجة، الدكر كايقدم ل النتوا لماكلة ب نتيضام. النتوات كايطلبو لماكلة كي الطيور صغار و هوما مقوسين و جناوحهوم كايترعدو. تقدر تاخد التلت د لماكلة من عند الدكر.
لموسم د لمجاوجة كايكون ما بين أكتوبر و يناير. هادشي كايعول على لعلو، و الطير كايتجاوج بكري ف لعلوات لحادرة على لعلوات لعالية. لعش د لحداد الزرق ليفريقي ف لغالب كايتلقى ف شي تجويف، بحال التقابي د الشجر ولا ف الشقاق د الجدع، لحيوط ولا الصخر، لعشاش لصطيناعية، ولا حتى ف لرض. لبينية د السكنة كاتشابه معا لحداد الزرق لوراسياوي، و لاكين ف لماطيريال مبدلين على حساب لكترة د هاد لموارد ف لموايل ديالهوم.
لحداد الزرق ليفريقي ف لعادة كايخدم لݣازو ولا النباتات ليابسة، ف بلاصة لخز لي كايكون كتير ف بحال هاد لموايل. كايخدم عاوتاني الزغب و الريش، ليباري د الصنوبر و لوراق ف لمصايبة د لعش. لعش ف لعادة كايكون 3 ميطرو فوق لرض. النتوا كاتحط من 3 حتى ل 6 د لبيضات. السلوك د التعشاش د هاد النوع باقي مامعروفش. و لايني ف لغالب كايشبه ل ولد عمو حداد زرق لوراسياوي.