بومالن دادس

بومالن دادس
‫بومالن دادس‬ (ar) ⴱⵓⵎⴰⵍ ⵏ ⴷⴰⴷⵙ (tzm)
لبلاصة
لبلاد	لمغريب
لإقليم	إقليم تينغير
السكان
شحال دالسكان	12,391 (2024)
شحال دلفاميلات	2,294 (2014)
لجغرافيا
لعلو	1,526 م
خط الطول بـ °	-5.9833
خط لعرض بـ °	31.3667
معلومات خرين
الرمز لجغرافي	6546556
لخريطة

بومالن دادس (بـ لأمازيغية: ⴱⵓⵎⴰⵍ ⵏ ⴷⴰⴷⵙ - بومال ن دادس) هي مدينة مغريبية وجماعة ترابية حضرية تابعة لـ إقليم تنغير فـ جهة درعة تافيلالت. لمدينة جات ف واحد البلاصة استراتيجية واعرة ف لجنوب الشرقي ديال لمغريب، وبالضبط ف التحت ديال جبال لأطلس لكبير الشرقي او حدى واد دادس المشهور بومالن دادس معروفة ف لعالم كامل كبلصة سياحية بسباب الطبيعة الوعرة ديالها، وهي نقطة درورية لكتربط بين مدينة وارزازات ومدينة تنغير. على حساب اش كيكول لإحصاء لعام 2024، وصل شحال دسكان لمدينة لـ 12,391 واحد.

السكان اوالفاميلات ديال لمدينة

هاد الجدول كيبين التطور ديال شحال دالسكان وشحال دالفاميلات ف بومالن دادس وفيه مقارنة بين الإحصاء ديال 2014 والإحصاء اللخر ديال 2024، الى عتمدنا على الأرقام لكلتهم المندوبية السامية للتخطيط:

العام ديال الإحصاء	شحال دالسكان	شحال دالفاميلات
2014	12,322	2,294
2024	12,391	8,920

لاصل ديال السمية

السمية ديال بومالن دادس عندها جذورة أمازيغية قديمة او مقسومة لـ جوج أجزاء:

• بومالن: كاينين بزاف ديال الحجيات او الهدرة على لأصل ديال هاد الكلمة, الرواية اللولة كتقول بلي أصلها هو بو إيمالن مول لمال ولا مول الشكرة او هادشي راجع للأراضي لي كتنوض منها الغلة بزاف ف واد دادس اوكاينة رواية خرى كتقول بلي أصلها من بومال لي كتعني البلاصة فين كيتجمعو الناس والرحل باش إكلسو ويبيعو ويشريو.
• دادس: هي السمية ديال الواد لي كيدوز من المنطقة كاملة واد دادس هاد الواد هو لي عاطي الروح للمدينة، والسمية ديالو كيبين للخصوبة والما لي كينزل من فوق جبال لأطلس لكبير باش يسقي واحات لجنوب الشرقي.

التاريخ او قصة زمان ديال لمدينة

تاريخ بومالن دادس هو تاريخ د المقاومة ف بلايص جبلية صعيبة:

• القبائل لي سكنات المنطقة: المنطقة معروفة من شحال هادي بلي هي الدار ديال قبايل أيت سدرات الأمازيغية. هاد القبايل كانو مسيرين حياتهم بواحد النظام اوقانون لهوا عرفي مزير سميتو أزرف كانو عايشين على الفلاحة ف الجنان حدا الواد، وكيسرحو لغنم ف تحت جبل صاغرو ف وقت الشتا.
• وقت الاستعمار: ف البدية ديال القرن العشرين، او فاش كنت لحماية لفرنساوية على لمغريب، لفرنساويين لقاو صعوبة كبيرة باش يدخلو لهاد المنطقة الجبلية, بومالن دادس عاشت معارك واعرة اوالجيش لفرنساوي قدر يسيطر على المنطقة ويبني فيها بيرو عرب حتى لعام 1930.
• التعايش د الأديان: بومالن دادس عرفات واحد التعايش كبير بين المسلمين او ليهود المغاربة. شحال هادي كانو عائلات يهودية ساكنين ف القصور د المنطقة، ومحترفين ف التجارة وصيناعة النقرةحتى للستينات د القرن العشرين.

البلاصة او لجو اوالبيئة

بومالن دادس عندها بلايص جبلية واعرة وواحات خضراء كطير العقل:

• واد دادس والواحة: لمدينة مبنية ف لعلو ديال 1500 متر فوق سطح البحر. كيدوز منها واد دادس لي كيصاوب واحة طويلة وخضراء وسط الجبال الحمراء والناشفة. هاد الواحة عامرة ب الشجر د اللوز، الكركاع، الكرموس، والزيتون.
• الجبال د الحجر : من بين الحوايج الطبيعية لي مشهورة بيها المنطقة كاين دوك الجبال الصخرية لي دايرين بحال الصبعان د اليد، والناس كيسيموها بـ صابع القرد هاد الصخور تصاوبو هادي ملايين السنين بسباب الريح والما لي كياكل ف الحجر.
• لجو: الجو ف بومالن دادس جبلي اوشبه جاف, ف الصيف كيكون الجو مزيان ف النهار وكيبرد شوية ف الليل اوف الشتا كيكون السميقلي والبرد قاصح بزاف، والحرارة كتهبط لتحت الصفر، وكطيح التلج فوق الجبال لي دايرة بلمدينة.

منعرجات تيسضرين الخطيرة والزوينة ف نفس الوقت

السياحة او لبني ديال الطين

السياحة هي لي كتحرك الحركة ف بومالن دادس او المدينة كتعطي للسياح تجربة ماكايناش ف بلاصة خرى:

• مضايق دادس وطريق تيسدرين: غير كتفوت لمركز د لمدينة بشوية كيبداو ليكورج ديال دادس لي كيوصل العلو ديال الجروف ديالهم لـ 500 متر. فهاد ليكورج كاينة طريق تيسدرين المشهورة، وهي واحد الطريق جبلية فيها منعرجات صعيبة تبنات ف وقت الاستعمار، واليوم ولات من أشهر الطرق ف لعالم لي كيجيو ليها الناس يتصورو.
• القصور والقصبات: لمدينة والنواحي ديالها عامرة بـ القصبات لي مبنية بـ لطوب والتراب. هاد البني البلدي هو لي كيخلي الدار مبردة ف الصيف ودافية ف الشتاف او من أشهر القصبات كاينة قصبة أيت الخرط او قصبة أيت يول.

لقتيصاد د المنطقة

لقتيصاد ف بومالن دادس واقف على هاد الساس: 1. السياحة الجبلية: هي لي مخدمة بزاف د الناس لمدينة ف الاوطيلات, الريسطورات اوالمرشدين السياحيين كيدخلو مصروف مزيان للسكان. 2. الفلاحة المعيشية: الناس معولين على الفلاحة ف الواحة او كينتجو اللوز, التفاح او الكركاع او هادشي كلو مربوط بـ واد دادس والطريقة البلدية د السگي. 3. لفلوس ديال ناس الخريج: نسبة كبيرة من ولاد بومالن دادس عايشين على برا او خصوصا ف فرانسا، بلجيكا، وهولندا الفلوس لي كيصيفطو هاد الناس عندها واحد نتجة لهد لمدينة

اجماعة او لعرف ديلهم

الى دوينا على اجماعة ف بومالن دادس فراه كيكولو كيكبرو بالضيف او شادين ف التقاليد ديالهم :

• الفنون: الفن اللول ف المنطقة هو أحيدوس لي هو شطيح وغنا جماعي واقف على الإيقاع ديال البندير او الشعر الأمازيغي لكيكولو ليه تاني إيزلان
• الصنعة التقليدية: العيالات ف بومالن دادس مشهورين كيصوبو الزرابي الأمازيغية اولا الحنبل اواللباس البلدي لي كيقرب ل اللوان د الطبيعة د الجبل.

مصادر

ويكيميديا كومنز عندا تصاور و معلومات على بومالن دادس.

هادي زريعة ديال مقالة خاصها تّوسع. تقدر تشارك ف لكتبة ديالها.