قلعة مݣونة
قلعة مݣونة
| ||||
|
ⵜⵉⵖⵔⵎⵜ ⵏ ⵉⵎⴳⵓⵏⵏ (tzm) | ||||
 | ||||
| لبلاصة | ||||
| لبلاد | لمغريب | |||
| لإقليم | إقليم تينغير | |||
| السكان | ||||
| شحال دالسكان | 17,737 (2024) | |||
| شحال دلفاميلات | 3,900 (2024) | |||
| لجغرافيا | ||||
| لعلو | 1,457 م | |||
| خط الطول بـ ° | -6.128408 | |||
| معلومات خرين | ||||
| كود د لبوصطة | 45200 | |||
| الرمز لجغرافي | 2549981 | |||
| لخريطة | ||||
| لپاراميطر , -6.128408 ماشي قيمة صالحة ل "خطوط الطول و لعرض" | ||||
.jpg)
قلعة مڭونة (بـ تاشلحيت: ⵜⵉⵖⵔⵎⵜ ⵏ ⵉⵎⴳⵓⵏⵏ) هي مدينة مغريبية وجماعة ترابية حضرية جات ف إقليم تنغير، لي تابع لـ جهة درعة تافيلالت. هاد لمدينة راها العاصمة د الثقافة والتاريخ ديال قبايل إمڭونن القدام. لمدينة كيعيطو عليها لعاصمة ديال الورد ، حيت كتنتج أحسن أنواع د الورد لبلدي لي كيتصدر للخارج. على حساب لإحصاء لعام 2024، وصل عدد سكان لمدينة لـ83,748 واحد.[1]
هاد الجدول كيبين المقارنة ديال التطور ف شحال دالسكان و شحال دالفاميلات ديال قلعة مڭونة بين الإحصاء ديال 2014 والإحصاء اللخر ديال 2024، بالاعتماد على دكشي لگلتو المندوبية السامية للتخطيط:[1]
| العام ديال الإحصاء | شحال دالسكان | شحال دالفاميلات |
|---|---|---|
| 2014 | 16,956 | 3,171 |
| 2024 | 83,7448 | 15,649 |
التاريخ ديال قلعة مڭونة قديم بزاف، ومربوط بالقبايل د لأمازيغ لي سكنو ف جبال ديال لأطلس لكبير.
- لأصل د السمية: السمية ديال قلعة مڭونة جات من ديك القصبة الكبيرة او لا القلعة لي كانت كتحمي المنطقة شحال هادي, ومڭونة هي السمية ديال قبيلة إمڭونن اللولة لي سكنات ف دوك الجبال والوديان، السكان القدام د المنطقة باقين تال ليوم كيسميو السونطر د لمدينة بـ "تامتتوشت".
- القصور ولقصبات: السر ديال الجمال د هاد المنطقة هو لبني لحقيقي ديالها البني شحال هادي كان معتمد 100% على الطوب والتراب المخلط بالتبن كول عائلة كبيرة ولا قبيلة كانت كتبني قصبة عالية ومحصنة باش تحمي راسها وتخزن فيها الغلة ديالها، وباقي تال ليوم كنشوفو شهود تاريخية واقفة بحال قصبة ميرنا لي كطل على لمدينة، وهاد القصور لي دايرين بواد مڭون كيشهدو على كيفاش كنو الأمازيغ كيحميو و كيدفعو على رسهم .
- دور الزوايا: الزوايا حتى هما لعبو دور كبير ف تاريخ لقلعة. كانو كيحلو المشاكل لي كتكون بين القبايل على الما والأرض، وكيعلمو الدراري الصغار القران وعلوم الدين، وهادشي هو لي خلى المنطقة تعيش ف الهنى وتوازن قرون طويلة.
الثقافة ف قلعة مڭونة مخلطة بين داكشي لي عطات الطبيعة والتاريخ القديم، وهادشي كيبان ف بزاف د لحوايج لي باقين الناس محافظين عليهم:
فن أحيدوس هنايا ماشي غير شطيح، هو الروح د المنطقة. أحيدوس د مڭونة معروف ب واحد الإيقاع زربان وبديك الجرية فاش كيوقفو الرجال والعيالات ف صفوف وكيشطحو مجموعين وداكشي منظم, الهدرة ديالو كيتسماو إيزلان، كيتغناو بـ تاشلحيت وكيعاودو على هموم الوقت، الجمال د الطبيعة، وقصص ديال الحب والمقاومة ديال الناس د الجبل.
من الحرافي القديمة لي باقة شادة بلاصتها ف لقلعة كاينة الصناعة ديال الخنجر المڭوني، وبالضبط ف واحد الدوار سميتو أزلاك. هاد الخناجر ماشي غير سلاح، مي راها رمز ديال الرجولة والشان والهمة عند الأمازيغي. كول خنجر كيخدموه المعلمية ب ليد، كيزوقوه ب النقرة والنحاس، وفيه نقوشات كتبين لهوية د الأمازيغ.
هادي هي أكبر حفلة كدار ف لمدينة كول عام ف شهر خمسة, كتحتافل المنطقة بـ الورد لي كيقولو الروايات الشفوية بلي جابوه التجار والحجاج المغاربة من الشرق شحال هادي، واخا مكاينش شي حجة مكتوبة كتأكد هادشي.
- ملكة جمال الورد: ف هاد المهرجان، كيختارو بنت من المنطقة باش تكون ملكة جمال الورد. وماشي غير الزين لي كيحكم فهاد الاختيار، مي خاص البنت تكون كتعرف مزيان ف العادات د لبلاد، لابسة اللباس اللول تاسبنيت والقطيب, وعارفة مزيان الثقافة د منطقتها.[2]
السكان ديال لقلعة معروفين بالضيافة، النية، وتشبثهم بـ تيموزغا.
- اللغة: تاشلحيت هي اللغة باش كيهضرو الناس ف الزنقة وف ديورهم، وهي لي خبات كاع دوك الأمثال والحجايات القديمة د المنطقة.
- لعرف ديال المدينة: شحال هادي، قبل ما تكون المحاكم ديال دبا، كانو الناس كيفكو حريرتهم بـ أزرف لعرف والقانون الأمازيغي كانو كيتجمعو شيوخ القبيلة لي كيتسماو إنفلاس باش يتحكمو ف المشاكل د الما د السقي والأرض وباقة ديك الروح ديال التضامن لي كيسيميوها التويزة عايشة بين الناس ف الدواور، فاش كيبغيو يحصدو ولا يبنيو شي دار كيتعاونو بيناتهم فابور.
الاقتصاد ديال قلعة مڭونة هو اقتصاد وردي قح، ومربوط بزاف بالفلاحة د الواحات:
- الذهب لوردي: المنطقة كتخرج أطنان ديال الورد كول عام ف شهر أبريل وماي. هاد الورد كيتعصر ف تعاونيات ومعامل كاينين تما باش يخرجو منو ما ورد المقطر، الزيوت الأساسية الغالية ومواد التجميل هاد الحرفة ورثوها الناس من جدودهم لقدام وهي لي معيشة بزاف ديال العائلات، وخصوصا العيالات لي كيخرجو ف الفجر يجنِيو الورد قبل ما تطلع الشمش باش ما تضربوش السخانة.[3]
- السوق لأسبوعي: سوق لاربعا هو السوق لكبير د لمدينة ف الجانب ديال التجارة. تما فين كيتلاقاو الفلاحة لي هابطين من الجبل مع التجار د لمدينة، وفيه كيتباع كولشي من البهائم للغلة د الفلاحة للعطرية.
- 1 2 "النتائج الأولية للإحصاء العام للسكان والسكنى 2024". المندوبية السامية للتخطيط.
- ↑ "مهرجان الورود بقلعة مكونة: احتفاء سنوي بالذهب الوردي". المكتب الوطني المغربي للسياحة.
- ↑ "تنمية سلسلة الورد العطري في حوض دادس ومكون". الوكالة الوطنية لتنمية مناطق الواحات وشجر الأركان (ANDZOA).