بهائية
لبهائية ولا لإيمان لبهائي (ب لفارسية بهائیت) وهو من ديانات توحيدية لي بانت هادي 200 عام ف إيران على يد واحد راجل سميتو بهاء الله.[1]
لبهائية دين كيخلط بين ديانة لإبراهيمية و لهندية و لمدهب شيعي.
كيأمنو لبهائيين بلي الله واحد و ما كاينش رب من غيرو. و كيأمنو بلي الله سيفط رسل من زمان لزمان لبداية بكريشنا، بودا، موسى، عيسى و محمد، حتى لتالي فيهم و لي هو بهاء الله. و بلي لبهائية جات باش توحد أتباع هاد رسل كاملين، و بلي لمسلم ولا لمسيحي ولا لبودي ولا لهندوسي ولا ليهودي كلهم ف الأصل بهائيين، و بلي لبهائية رسالة كتكمل رسائل و لا ديانات لخرين.
هي حركة و لا ديانة بانت ف شيراز ( إيران) حيت مول هاد لحركة لي تسمى ب لباب قال بلي غا يجي شخص لي هاز لحق بين يديه، و بشر بلي بهاء الله غا يجي باش يخلي لعالم واحد.
بهاء الله هو لقب ديالو، و سميتو لحقيقية هي حسين علي نوري. دّاعا بلي هو شخص لي بشر بيه لباب، و بدا دعوة ديالو ف إيران، ف فترة لي كانت إيران ضعيفة ف نص نتاع لقرن 19 ف لعهد نتاع لقاجارييين. و لكن ما طولش حتى نفاوه من إيران، و مشا كمل حياتو ف لإمبراطورية لعتمانية، و لكن موراها مباشرة دخلوه لحبس حتى تماك و موراها مات.
مور ما مات بهاء الله، خدا لولد ديالو عبد لبهاء عباس لمهمة، و بدا كيدير الدعوة برّا د إيران و شرق لوسطاني. نشر لبهائية ف ميريكان و ؤروبا، و كتب بزاف نتاع لبريات ل لملوك و حكام نتاع دول باش يأمنو ب دين جديد. مع لوقت بداو كيبانو بزاف نتاع لمؤسسات و تجمعات لبهائية، و تطور داكشي لإنتخاب شكون يكون لوالي نتاع لبهائية.
.jpg)
كيوصل عدد نتاع لبهائيين ف لعالم ل 7 مليون واحد. كيتعرضو لبهائيين ل لقمع ف دول بزاف، منهم إيران لي منين وقعات تورة نتاع دستور لفارسي ف عام 1906، دستور حرم لبهائيين من بزاف نتاع لإمتيازات. و مور تورة لإسلامية ف إيران 1979، تحكم على 200 واحد من لبهائيين بالإعدام و لعدد ديالهم ف إيران دابا تقريبا 260 ألف واحد.
- ^ "Bahāʾī Faith". تطّالع عليه ب تاريخ 2024-03-24.