السور العظيم ديال الشينوا

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

السور العظيم ديال الشينوا (بالشينوية: 万里长城) هو واحد السور لي كاين فالحدود الشمالية ديال جمهورية الشينوا الشعبية، من منطقة تشنهوانڭتاو و خليج بحر بوهاي (لواد الصفر) فالشرق حتا لمنطقة ڭاوتاي ف مقاطعة قانسو ف الغرب. و تبنى سور واحد خور ف الحدود الجنوبية، بدا من پيكين حتال هاندن. و كيبلغ الطول ديال السور العظيم ديال الشينوا علاين 21196,18 كلم،^[1]^[2] و سور الصين العظيم كيتعتابر من أهم لبلايص تاع التوراث العالمي، و تختار واحد من عجائب الدنيا السبعة الجديدة ف العالم ف واحد إستطلاع دولي ف عام 2007. و هادشي خلا السور واحد من أهم المراكز السياحية ف لعالم، و لي كيجيو ليه الناس من جميع لبلايص من العالم كل عام.^[3]

و كيتعتابر السور العظيم ديال الشينوا واحد من المشاريع ديال لميليطير النادرة و القديمة بزاف ف التاريخ لمعماري ديال بنادم، و حتا التاريخ لحربي. و هو رمز من الرموز ديال الشعب الشينوي، لي كيبين الذكا ديال جدودهم، و حتا لمجهودات لي داروها على قبل الراية تاع البلاد. و هو مشهور بزاف ف لعالم ب تاريخ لعريق ديالو و ب لعظمة و ب لقوة الدفاعية ديالو. المؤرخين كيقولو بلي لبدية تاع لبني ديال السور العظيم ديال الشينوا كانت ف لعهد ديال الربيع و الخريف و ف لوقيتة ديال الممالك المطايفة، يعني قبل كتر من 2000 عام.

السور العظيم ديال الشينوا هو واحد المشروع ديال الديفاع لي متكامل، و كيتكون من الحيوطا تاع الديفاع و الأبراج ديال العسّة و الدوزات المخفية و القشلات ديال العسكر و الأبراج ديال التحذير و بزاف ديال البنايات تاع لميليطير. و كيتحكم ف هاد المشروع ديال الديفاع واحد نيظام معسكر ديال القيادة، كيتكون من بزاف ديال لڭرادات لمختالفة.

السور العظيم ديال الشينوا كيتواجد ف تضاريس جوغرافية مختالفة و معقدة بزاف، و لي حتا هي كتلعب دور ديفاعي مهم. هاد السور كيدوز من الجبال لعالية ومن الأراضي لمواطية و من الطلعات و لحدورات و كيدوز حتا من الصحرا و لمروج و لويدان. دكشي علاش لمعمار ديال السور مختالف من بلاصة لبلاصة و ماشي موحد، حيت كل منطقة و تستعملات فيها المواد لي كتناسبها كتر و كتناسب المناخ ديالها.

التاريخ ديالو

تبنات الپارتيات لولة ديال السور ف لوقيتة ديال لحكام تاع تركيو صبحيو تشانڭو، و كان هاد البني ديكساع كيخليهم يحميو المملكة ديالهم من لهجمات ديال الشعوب الشمالية (المنڭول و التواركا). و أغلب الپارتيات ديال السور بناها الحاكم تشين شي هوانڭ، لي كان حتا هو كيخاف من الحملات لبرّانية الهمجية، لي كانت كتجي من الشمال.

من مور التوحيد تاع الشينوا على يد تشين شي هوانڭ عام 221 ق.م، بداو كيطلقو راسهم باش يساليو البني ديالو، حتا سالاو ف عام 204 ق.م، مور ما شارك ف عملية لبني كتر من 300.000 واحد، ولكن لبني محبسش هنا. منبعدهم كملات لفاميلة ديال "هان"، و موراهم "سوي" الأعمال ديال البني. و حتا لفاميلة ديال "مينڭ" ساهمات ف التطويل و التدعيم ديال السور، و بدلات الپارتيات لي مبنية ب الغيس، ب مواد حسن بحال الطوب. و وصل الطول لخراني ديال لبني لـ (6.700 كم). و ف عام 1987 تزاد السور العظيم د الشينوا لليستات ديال التوراث لعالمي التي حطاتها اليونسكو، وفـ 2007 تختار كواحد من العجائب السبعة ديال الدنيا.