إيزابيل دو شاريير

إيزابيل دو شاريير
معلومات عامة
زيادة	20 أكتوبر 1740 Zuylen Castle
لموت	27 دجنبر 1805 (65 عام) Colombier
لجنسية	لجمهورية د هولاندا سويسرا
لحرفة	موطرجيم، ملحّين، روائية، كاتيبة، كاتيبة مسراحية، شاعيرة، كاتبة مقالات و فيلسوف
لّوغات لي كيعرف	لفرانساوية، لألمانية، نڭليزية و لهولاندية
لفاميلة
لواليد	Diederik Jacob van Tuyll van Serooskerken
لواليدة	Jacoba Helena de Vicq
شريك	Charles Emmanuel de Charrière de Penthaz (1771–)

إيزابيل دو شاريير (مزيودة ف 20 أكتوبر 1740، توفات ف 27 دجنبر 1805) لمعروفة ف هولاندا ب بيل ڤان زويْلن، كانت كاتبة هولاندية سويسرية ديال لفترة د الضواو، لي دوّزات النص التاني د حياتها ف كولومبيي، نوشاطيل، سويسرا. دو شاريير معروفة دابا ب لبريات و الروايات ديالها، و عندها تا كتيّبات، مؤلفات د لمزّيكة و مسراحيات. كان عندها هتيمام كبير ب لمجتمع و السياسة ف زمانها، و لأعمال ديالها ف جوايه التورة لفرانساوية تارت هتيمام مابيهش.

صغرها

تولدات إيزابيل ف قصر زويلن حدا مدينة ؤتريخت، ف فاميلة أريسطوقراطية، و كانت لكبيرة ف 7 د لخوت و لخواتات.

ف 1750، واليديها سيفطوها ل جونيڤ، و سافرات ف فرانسا و سويسرا معا لمربية ديالها لفرانساوية جان لويز بريڤوصط، لي قرّاتها مابين 1746 و 1753. حيت بقات كاتهضر غير لفرانساوية ل مدة عام، ملي رجعات ل هولاندا، كان خاصها تعاود تتعلم ل لهولاندية. وخا داكشي بقات لفرانساوية اللوغة لمفضلة عندها، و هادشي كيفسر علاش تشهرات كتر برا بلادها.

خدات إيزابيل تعليم ب مقدار كبر من لبنات ف زمانها، و واليديها كانو منفاتحين و خلاوها تقرا لماط و لفيزيك و اللوغات بحال اللاتينية، الطاليانية، لألمانية و النڭليزية. ب بزاف د الشهادات، كانت إيزابيل تلميدة قرّاية.

فاش كان ف عمرها 14 عام، بدات كاتبغي واحد لكونط پولوني سميتو پيتر دونهوف. هاد اللخر ماكانش مسوّق ليها، داكشي علاش جاها إحباط، و غادرات ؤتريخت ل مدة 18 شهر. و هي كاتكبر، تعرّفات على ناس خرين، ولاكين ماصدقاتش لعلاقة معاهوم. إيزابيل كانت كاتشوف الجواج طريق باش تاخد لحرية، ولاكين ف نفس لوقت كانت باغية تتجوج على حب.

لكبر

ف 1771، تجوجات ب شارل إمانويل دو شاريير دو پينطاز، لي كان ؤستاد ديال خوها روني. لكوپل ستاقرو ف كولومبيي، ف نوشاطيل، لي كان حاكمها فريدريك لعضيم. لمنطقة كانت كاتمتع ب حرية لعقيدة، و هادشي خلا عدد ديال الناس لمطاهدين سياسياً و فكرياً يهاجرو ليها، منهوم جان جاك روسو، لي إيزابيل ولات معجبة ب لأفكار ديالو.

إيزابيل دو شاريير ولات مرفّحة بعدما ورتات تروة من واليديها، لي منها 40% د لأسهم ديال شركات بحال شركة لهند لغربية لهولاندية، شركة لهند الشرقية لهولاندية، الشركة لبريطانية د لهند الشرقية و شركة لبحر د الجنوب، لي كانو كيجيبو بزاف د لفلوس ب تخدام لعبيد ف لمزارع. كاين ريّ لي كيڭول بلي إيزابيل ماكاتنش عندها نضرة نتيقادية ضد لعبودية، على حساب بريات ديالها و روايتها "تلاتة د لعيالات" Trois Femmes (1795). ف بريات خرين من 1798، هضرات على "لبشاعة" horreurs ديال لعبودية ف لمستعمرات، و ف ضرف 5 سنين مورما خدات لورت كانت باعت 70% ديال لأملاك ديالها ف دوك الشركات.