تازواقت
التازواقت أولا الزواق (بالأمازيغية: ⵜⴰⵣⵡⵡⴰⵇⵜ)، هو فن من الفنون العريقة دالمغرب وللي تيتعتبر واحد من أهم الحوايج اللي كانو تيكونو فالبني المغريبي. فالمدن المعروفة بالتازواقت بحال فاس ومراكش وشفشاون، كان الخشب فالديور والقصور ماتاتسالي الخدمة ديالو حتا تيتصبغ ويتزوق، وباقا هاد الحرفة موجودة ومعروفة لدابا ف المغرب.[1]
المعلمين الزواقة عندهم قدرة واعرة باش يرسمو الشكالات الهندسية والمورقة، تيتقنو الطريقة د «الحسبة» و«القسمة»، اللي هي القواعد الضرورية باش ترسم الشكالات ديال «التسطير».[2] كاين شي زواق هندسي خاصو ضروري التقنية ديالو باش يترسم و«الحسبة» و«القسمة» هي طرق مغربية محضة ديال التسطير [3] وتيخدمو بها حتا المعلمية ديول حرايف آخرين بحال الڭبص وتاحجارت والرخام والنحاس والزليج.[3][4]
المعلم تيحسب القسمة ديال الزواقة شحال خاص يكون فيها على حساب العبار ديال البلاصة اللي بغا يزوق.[5]
الطرق دالحسبة والقسمة تاتخلي المعلم قادر يرسم الشكالات الساهلة والمعقدة، وباشما كانت القيمة ديال القسمة كبيرة تيكون الشكل معقد كثر. السمية ديال الشكالات تاتجي من العدد ديال الصفوطة اللي دايرين بالنجمة اللي تاتكون الوسط واللي تاتسما "ناعورة".[3][6] مثلا يلا كانت النجمة اللي لوسط عندها 16 قنت يعني داير بيها 16 صفط فالشكل غادي يتسمى "السطاشري"، ولا زدنا دورنا "السطاشري" بشكل آخر بحالو ولكن عندو 8 ديال الصفوطا يعني سميتو "المثمن"، فالشكل الكبير غادي يتسمى فالأخير "السطاشري بالمثمن" بمعنى "السطاشري" داير بيه "المثمن".
"التوريق" هو شكل من الشكالات ديال تازواقت اللي تاتكون على شكل لوراق ديال الشجر، و"التشجير" تيكون على شكل الشجر. هاد النوع من الزواق تيكون ديما متماثل يعني كل نص بحال النص لاخر، بحالا كينا شي مرايا لوسط تاتعكس الشكل.[1]
تقريبا ڭاع الشكالات ديال التوريق والتشجير تيكون عندها السميات ديول الورد ولا النباتات ولا الشجر:
- التوريق: من ورقة دالشجر؛
- التشجيرة: من شجرة.
- العرق: مِنْ العرق ديال الشجرة؛
- القرنفل: من الشكل دالقرنفل.
- سُوسان: من الشكل دالسوسان.
أيام زمان كانو المعلمين فالغالب تيدقو الحجر على حسب اللون ديالو وتيخلطون مع الغرا و تيسخنوه فوق المجمر. وفبعض الخطرات كانو تيزيدو حتا صفر البيض.[1]
كاتختلف المصادر ديال الصباغة على حساب المدينة، كانو المعلمين تيخدمو بداكشي اللي واجد عندهم فالمنطقة فين خدامين.
الصورة تاتبين شوية من المواد اللي كانو تيخدمو بهم الصنايعية ديال التزواقت:
- الصوف ديال الغنم المفروض يخلط مع الغرا.
- مادة بحال الطباشير.
- النيلا الزرقا..
- الخرقوم.
- الحناء مخلطة بقشور الرمان.
- التحميرة.
- وراق الرمان.
- العكر الفاسي مخلط بقشور الرمان.
- الغرا.
- الحديدة الزرقا.
تانخلطو التحميرة والعكر الفاسي مع وراق الرمان باش نخرجو لون الصباغة الحمرا اللي فالتصويرة لتحت على ليمن.
هاد المواد الطبيعية كانو تيتدقو بالمهراز حتا تيولو غبرة.
كانو الحرايفية تيعطو لكل لون سمية خاصة بيه على حسب كيفاش مخلطة الصباغة ولا واش اللون فاتح ولا غامق. فالمثلا كنو تيقولو على اللون الصفر الفاتح "قلب البانان" و على اللون الزرق الغامق "زرق الليل". أما الصباغة اللي تيتخلطو فيها بزاف ديال الألوان فكانو تيقولو عليها "لون موسخ".[1]
 |
 |
الڭاباري (gabarit بالفرنسية) تيتصاوب على حساب العبار ديال الحاجة اللي بغينا نزوقو يا كانت شي حاجة فالبني بحال البيبان والسقوفة، يا كانت شي حاجة صغيرة بحال الطوابل والكراسا. الڭاباري تيتصاوب بالورق ديال الكارطون: تانرسمو فوقو الزواقة اللي بغينا وتانصبغوها. ومن بعد تانحيدو البلايص الزايدين بالمربوع، باش فاللخر تبقا لينا غير الزواقة بالكارطون.
الطريقة ديال الزواق معروفة مابين الحرايفية واخا هاكاك الخدمة ديال كل حرايفي تاتبقا باينة ومفروزة حينت واخا نفس الطريقة، كل معلم وخدمة يدو كيف دايرة، زيد عليها كل معلم عندو البصمة الفنية ديالو. فمثلا يلا كانو زوج معلمين خدامين فنفس السقف، يلا جيتي تشوف الخدمة من قريب غادي تقدر تفرز الخدمة ديال كل معلم.[7]
عادة، النجار تيوجد الخشب هو اللول ومن بعد تيبدا الحرايفي الزواق الخدمة وتاتكون فتلاتة ديال المراحيل :
غالبا الأرضية تاتكون مصبوغة بالحمر الغامق، من بعد المعلم تيحط الڭاباري فوق الخشب المصبوغ و تيياخد كموسة عامرة بالڭبص وتيدق بشوية فوقو باش داك الموتيف اللي فالڭاباري يتطبع فوق الأرضية.
فاش تانحيدو الڭاباري من بعد الطبيع تانلقاو الموتيف تتطرسا يعني البلايص اللي مافيهمش الڭبص هما اللي خاص يتصبغوا. الطريقة ديال الزواق هي المعلم تيشد القلم بيد وتيحطها فوق الكف ديال اليد لوخرا باش مايترعدش.
فاش تاتنشف الصباغة تانمسحو الڭبص وتانطراسيو الجناب ديال الموتيف بخط رقيق يا بالبيض يا بالكحل.
الزيت ديال زريعت الكتان هو اللي كانو تيڤيرنو بيه أي حاجة من الخشب:[1] تيشدو شيفون تيعمروه بالزيت و تيدوزو على ڭاع البلايص.
- ^ a b c d e André Paccard (1981). Le Maroc et l’artisanat traditionnel islamique dans l’architecture (بالفرنسية). atelier 74.
- ^ Brigitte Hintzen-Bohlen (2000). Andalusia : art & architecture (بالانجليزية). Könemann.
- ^ a b c Aboufadil، Youssef؛ Thalal، Abdelmalek؛ Raghni، My Ahmed El Idrissi (2013-11-15). "Symmetry groups of Moroccan geometric woodwork patterns". Journal of Applied Crystallography. 46 (6): 1834–1841. doi:10.1107/s0021889813027726. ISSN 0021-8898.
- ^ Touri, ‘Abdelaziz, Benaboud, Mhammad, Boujibar El-Khatib, Naïma, Lakhdar, Kamal, Mezzine, Mohamed (2000). Le Maroc andalou: à la découverte d'un art de vivre (بالفرنسية). Ministère des Affaires Culturelles du Royaume du Maroc & Museum With No Frontiers.
- ^ Abdullahi، Yahya؛ Embi، Mohamed Rashid Bin (2013-06). "Evolution of Islamic geometric patterns". Frontiers of Architectural Research. ج. 2 ع. 2: 243–251. DOI:10.1016/j.foar.2013.03.002. ISSN:2095-2635. مؤرشف من الأصل في 2023-02-07.
- ^ السايب، خالد (1964-....) (2016). كتاب التنوير وديوان التحبير في فن التسطير. [د.ن.]،. ISBN 978-9954-37-649-2. OCLC:1049203054. مؤرشف من الأصل في 2020-06-09
- ^ a b Jean-Marc Castréra, (1996). ARABESQUES : ART DECORATIF AU MAROC (بالفرنسية). باريس: ACR édition internationale.
