ويكيپيديا:لحكام ديال التحياد الزربان
التحياد الزربان هوّا پروصي د التحياد د شي صفحة لي كيديروه لإمغارن بلا مايدوزو من لمداكرة ؤ لماخدة د لإجماع ديال الجماعة د لويكيپيديين. هاد الصفحة كاتليستي لحكام و الشروط لي خاص تّحقق باش لأمغار يكون عندو لحق يدير صفحة ف التحياد الزربان.
ف لعادة، لأمغار يقدر يحيّد الصفحة ديريكت، ولاكين مبدئيا عندو لحق باش يخدّم الطاڭ د {{تحياد زربان}}، معا تحديد سبب التحياد يلا بغا (يقدر يخليه خاوي) ب {{تحياد زربان|سبب التحياد}}. يلا تحط الطاڭ، خاص ف لعادة مايفوتش 24 ساعة قبل ماتحيّد الصفحة. الطاڭ كيتزاد باش ينوتيفي مول لمقال ؤلا لكتاتبيا لي خدمو عليه، باش يصلحو لموشكيل لي كاين ف لمقال يلا كان يقدر يتّصلح، ؤلا غي باش يعرفو السبب د التحياد و مايعاودوش يديرو نفس لغالاط. يلا فات الطاڭ 3 يام باش تزاد و ماتحيّداتش الصفحة، يقدر يحيّدها بوت لي عندو صلاحيات أمغار.
حكام عامة ديال التحياد الزربان[بدل لكود]
كاتحيّد صفحة من أي نوع ؤلا ف أي مجال سمياتي بشكل زربان يلا:
- كان لعنوان ديالها ماعندو تا معنى، متلاً جنلڢنلكفڢنن
- كان لمحتوى ديالها ماعندو تا معنى بشكل حرفي (بحال لقضية د لعنوان).
- يلا كان لموضوع ديالها معاود بشكل واضح، يعني كاينة ديجا صفحة خرة من نفس النوع كاتهضر على نفس لموضوع، و الصفحة التانية ماكاتزيد تا شي معلومة إضافية، ولا مامكتوباش بشكل مزيان.
- كان محتوى فيه سبان ؤلا تهجم على مشروع ويكيپيديا ؤلا على كتاتبيا خدامين فيها ؤلا أي شخص أخور ؤلا مؤسسة خرة، بلا مايكون لمحتوى قابل ل لإصلاح. ف حالت يلا كان لمحتوى خطير بزاف، خاصو يتحيد تا من ليسطوريك (التاريخ) ديال ويكيپيديا.
- كان محتوى فيه كلام مامتناسقش معا لموضوع لي كيشير ليه لعنوان
- كان لمحتوى ماشي موسوعي ؤلا ماخاصوش يكون ف داك النوع د الصفاحي
- كان محتوى فيه إشهار ل شي حاجة بشكل رئيسي
- الصفحة عاود تدارت بعدما كانت تحدفات ب قرار ديال الجماعة
- يلا كانت الصفحة تدارت أصلا بشكل تجريبي (ف لعادة خاص التجارب يتدارو ف ويكيپيديا:تيران د الرملة ؤلا صفحة بحالها)
- يلا أكبر مساهم ف الصفحة طلب باش تّحيّد، بشرط ماتكونش ضرورية (متلاً مقال مكتوب مزيان، تحويل مقبول، موضيل ؤلا مودول مخدّم). كون على بال بلي جميع لمحتويات النصية لي تنتجات ف إطار مشاريع ويكيميديا كاتكون مبدئيا ف لمجال لعام، و تا حد ماعندو حقوق د لملكية عليها، تا لي ساهم ف لكتابة ديالها.
- يلا كانت الصفحة تدارت خاوية بلا تا شي هدف واضح باش تّعمّر (سيرتو بنّسبة ل لمقالات).
حكام د لمقالات[بدل لكود]
- مقال مافيه والو، ؤلا مافيه غير تصاور
- مقال قصير بزاف بحيت لموضوع ديالو ماواضحش ڭاع
- مقال مكتوب ب شي لوغة من غير الداريجة
- مقال مكتوب ب داريجة عيانة بزاف و لإصلاح ديالو غادي يشد بزاف د لوقت
- مقال لمحتوى الرئيسي ديالو كيخرق حقوق النشر
- مقال لي لموضوع ديالو بشكل واضح ماكيحققش شروط لملحوضية
- مقال جديد فيه تعارض د لمصالح (متلا واحد كاتب على راسو). ف هاد لحالة ضروري يتّعلم مول لمقال ب هادشي، و بلي خاصو يدير طلب د لمصاوبة د مقال ف الصفحة د الطلبات.
حكام د لفيشيات[بدل لكود]
- لفيشي كيخرق حقوق النشر و مامقبولش ف النشر ب تخدام مقبول
- لفيشي كيخرق حقوق النشر و مولاه بغاه يتحيد
- لفيشي كيخرق شي حكمة من حكام ويكيپيديا، متلا مديور غير ل لإشهار ؤلا بشكل عام ماعندو تا شي فايدة موسوعية
- لفيشي كيضر ب السمعة ؤلا الصورة لعامة ديال شي شخصية حية بشكل واضح، و ماشي ضروري باش يتّفهم شي موضوع متعلق بيها
حكام د لموضيلات و لمودولات[بدل لكود]
- موضيل ؤلا مودول معاود و ماعندو تا قيمة زايدة، بحال تبديل ديال موضيل ؤلا مودول أخور بحيت ماكيعطيش مظهر مختالف و مرغوب، ؤلا معلومات زايدة
- صفحة فرعية ديال موضيل ؤلا مودول لي مامخدماش، بحال الصفحات لي كيساليو ب /توتيق ؤلا /توثيق، حيت كاين ديجا /شرح
- موضيل ؤلا مودول لي مامخدمش و مامعوّلش باش يتخدّم ف شي وقت ؤلا تقدر تكون لحاجة ليه ف أي لحضة، سيرتو يلا كان منقول من ويكيپيديا خرة
- صفحة د الشرح ديال موضيل ؤلا مودول بحيت الصفحة الرئيسية د لموضيل ؤلا لمودول ماكايناش
حكام د التصنيفات[بدل لكود]
- تصنيف لي ماكيستاجبش ل حكام التصنيف (شوف ويكيپيديا:التصنيف ب الزايد)
- تصنيف لي خاوي من الصفاحي و من لمحتوى (ماداخل ف تا شي تصنيف أخور)، و ماكايناش حاجة ليه لي باينة
- تصنيف ب سمية غالطة، بحيت ماكاينش حتيمال كبير بلي شي حد غادي يقلب عليه ب ديك السمية. يلا كان التصنيف ضروري يكون، خاص يتم التحويل ديالو ل السمية الصحيحة، و تبدال السمية ديالو ف الصفاحي لي تابعين ليه، و عاد تّحيد التحويلة لي ب سمية غالطة
- تصنيف ماشي أمغاري لي خاوي ديما و مامعولش ڭاع باش يعمر ف شي وقت. التصنيفات لأمغارية لخاوية ماخاصهاش تّحيّد حيت عندها فايدة ف الصيانة د ويكيپيديا، و تقدر تعمر ف شي وقت. كونها خاوية ف حد داتو كيبيّن ل لأمغار بلي ماكاينينش صفاحي خاصهوم صيانة. هاد الصفاحي ف لعادة خص يتزاد ليهوم لموضيل {{تصنيف خاوي}}.
حكام د لقيساريات[بدل لكود]
- صفحة د قيسارية ماكاتستاجبش ل شروط لقيسارية. متلا مكتوبة بحال مقال، ؤلا خاوية
حكام د التحويلات[بدل لكود]
- تحويلة ماكاتدي ل تا بلاصة (الصفحة لي كاتدي ليها تحيدات ؤلا ماعمرها ماكانت)، و الصفحة لي كاتدي ليها مامعولش باش تّصاوب
- تحويلة ب عنوان غالط، و هاد لغالاط ماشي شايع بحيت يقدرو كتاتبيا ؤلا قاريين خرين يخدّموه ف شي وقت
- تحويلة ب لوغة ماشي داريجة و ماشي عربية، و ماشي ب كلمة لي تقدر تخدّم مبدئيا باش يقلّب لواحد ف ويكيپيديا ب الداريجة، ؤلا لي يقدر شي پروڭرام (بحال مودول ؤلا موضيل ؤلا بوت) يخدّمها بحيت تسهال لخدمة ديالو
- تحويلة كاتدي ل صفحة د الشرح ديال موضيل ؤلا مودول، و ديك التحويلة مامخدّمة ف تا شي بلاصة خرة ف ويكيپيديا
- تحويلة كاتدي ل صفحة د لمداكرة، و ديك التحويلة مامخدّمة ف تا شي بلاصة خرة ف ويكيپيديا