ويكيپيديا:التصنيف ب الزايد

التصنيف ب الزايد هوّا فاش شي مقال ؤلا صفحة د ويكيپيديا بشكل عام كيتزادو فيها تصنيفات كتر من داكشي لي كاتطلّب، ؤلا فاش كيتقادو صفاحي جداد ديال التصنيف بلا مايكون مبرر واضح.

قواعد عامة باش تزيد تصنيفات ف صفحة

• زيد تصنيفات لي عندها معنى و كاتشمل لموضوع د الصفحة. متلاً عباس الجراري جا تحت تصنيف:كتاب مغاربة، ولاكين مايمكنش نزيدو ليه تصنيف:كتاب ألمانيين حيت عباس لجراري ماشي ألماني.
• يلا كان تصنيف دقيق مزيود ف الصفحة، بلا ماتزيد تصنيف عام لي فوق منو. متلا ماتزيدش تصنيف:لأداب ل عباس الجراري حيت ديجا تصنيف:كتاب مغاربة وافي لغاراض و هوّا نيت جوج درجات تحت من تصنيف:لأداب.
• ستيتناء د هاد لقاعدة هوّا فاش كايكون التصنيف موقابيل ل لموضوع ديال الصفحة. متلاً، صفحة ألمانيا جات تحت تصنيف:ألمانيا، ؤ تا تصنيف:بلدان د ؤروپا، حيت تصنيف:ألمانيا هوّا التصنيف لموقابيل ديال ألمانيا.
• الستيتناء التاني هوّا فاش كايكون لموضوع موهيم بزاف، بحيت خاصو يبان تا ف التصنيف لفوقاني ؤلا عندو علاقة قوية معاه.

قواعد عامة باش تزيد صفحة جديدة ديال تصنيف

• خاص التصنيف يكون "طبيعي"، ماشي جاي من دمج جوج حوايج لي مبدئيا ماعندهومش علاقة معا بعضياتهوم بشكل عشوائي
• و ب لخصوص، خاص يكون لموضوع ديال التصنيف قابل باش يكون عندو مقال مبدئيا (وخا لمقال مايكونش مصاوب ديجا). متلاً تصنيف:كتاب من الرباط أڭدال ماعندو تا معنى، حيت ماكاينش شي نوع أدابي عندو علاقة معا الرباط أڭدال لي كيتميّز على لأداب لمغريبي بشكل عام، و لي يقدر يتّكتب عليه مقال. ولاكين تصنيف:كتاب مغاربا د لقرن 19 يقدر يتدار، حيت نقدرو نصاوبو مقالة على لأداب لمغريبي ف لقرن 19.
• كاينين تصنيفات تنضيمية، إدارية ؤلا تقنية لي كيتزادو باش يسهّلو لخدمة ب التصنيفات ؤلا شي نوع د الصفاحي، و هادو ماشي ب الضرورة يكونو مرتابطين ب شي موضوع