واد بوزنيقة

من ويكيپيديا
واد بوزنيقة
واد موسمي
لمصب ديال واد بوزنيقة
لمصب ديال واد بوزنيقة
لجغرافيا
لبلاد لمغريب
لعمالة بنسليمان
جّيهة دار بيضا سطات
لجماعات بوزنيقة - عين تيزغة
الطول 14.3 كلم
-----------------------------


واد بوزنيقة، هو واد موسمي تايخوي فلپلاج ديال بوزنيقة، تايقطع لهضبة التحتانية ديال الشاوية، و تايفصل بين جماعة بوزنيقة و جماعة الشراط، وسط لإقليم د بنسليمان لي كاين فجهة الدار البيضا سطات ف لمغريب.[1]

خريطة

لموضع[بدل | بدل لكود]

تايقطع واد بوزنيقة جماعة عين تيزغة، وجماعة بوزنيقة فإقليم بنسليمان، وسط لأراضي لفلاحية ديال لمنطقة، قبل ما يوصل للمدينة ديال بوزنيقة فين كايتبناو فالجناب ديالو إقامات دالسكنة ومشاريع د لبني كبيرة.

بعد ما تايخرج من لمدينة، تايقطع واد بوزنيقة لحي الصناعي ديال مدينة بوزنيقة، بعدها تايوصل للݣولف ديال بوزنيقة و تايقسمو على جوج، فالمنطقة السياحية دالشط ديال پلاج بوزنيقة، هاد لمنطقة، هيئو فيها لواد بطريقة كاتسمح للإقامات السياحية لي فالشط باش تستافد من لجمالية ديال لواد.

ف لأخير تايوصل لواد للمصب ديالو بين لپلاج دالرملة ديال الشراط على ليمن، و جرف ديال لحجر مرتافع على ليسر فالجماعة ديال بوزنيقة.[2]

التضاريس[بدل | بدل لكود]

دار قريبة للواد ديال بوزنيقة

واد بوزنيقة هو واد موسمي، تاينشط بشكل كبير ف شّتوة، أما الشكل ديال لواد، فهو ضعيف ف لارتفاع ديال السفوح لي ماكايتفوتوش 15 ميترو ف ف لمنبع ديال لواد، أما لإنحدار ديال السفوح، فهو قوي فالجهة ليمنة د لواد مقارنة مع الجهة ليسرة، بالنسبة للقاع ديال لواد فهو واسع شوي، و فيه بزاف ديال لڤيراجات.[3]

لما[بدل | بدل لكود]

واد بوزنيقة هو واد موسمي، تاينشط بشكل كبير فاش تاطيح الشتا، و فيه شي عيون، لما فيها قليل. لمصب ديال لواد كايتأثر ب لماريا، حيت تايعمر لمصب كامل ف لوقت ديال لمد (مارية طالعة)، و تايخوى فوقت لجزر (مارية حسيبة)، إلا شي بلايص سياحية لي تايبقى فيها لما النهار كامل، بسباب التهيئة ديال لواد لي كاتحبس لما.[4]

لبيئة[بدل | بدل لكود]

واد بوزنيقة كايتميز ب لغنى لبيئي ديالو، خصوصا ف شّتوة، حيت بزاف ديال الطيور د لما و لبر، و النباتات د لما تا هوما، تايعيشو فيه، و زيد تا الزواحف و لبرمائيات بحال لفكارن د لما و الجران وغيرها، ف لوقت لي لمصب ديال لواد، هو مكان مفضل عند الطيور ديال لبحر.[5]

التلوث[بدل | بدل لكود]

مزال ماتدارتش شي دراسة مفصلة على لوضع د لبيئة ديال واد بوزنيقة، خاصة أنو تايقطع لحي الصناعي ديال مدينة بوزنيقة، و تايدوز على المدينة لي فيها عدد متوسط ديال الكثافة د السكان، زيادة على لأراضي د لفلاحة لمسقية.[6][7]

لمصب[بدل | بدل لكود]

المصب ديال واد بوزنيقة

لمصب ديال واد بوزنيقة هو مصب واسع و محلول على لمحيط لأطلسي، تهيئات الجنبات ديالو ب لحجر والسيمة، و دارو فالجهة ليمنة ديالو مون متوسط باش يسهلو لحركة ديال لفلايك و ليخوت وقت لماريا، أما وقت لجزر، تايخوا لمصب ديال لواد، و تايبان الصخر والرملة لي ف لقاع. هاد لمصب عزيز على الطيور ديال لبحر، خاصة النوارس.[8]

لاستغلال[بدل | بدل لكود]

فلوكة ديال الصيد التقليدي من واد بوزنيقة

تايدوز هاد لواد على بزاف ديال لأراضي د لفلاحة، بالتالي تايستاغلوه لفلّاحا ف السقي فاش تايكون فيه لما، كيف ما تايستاغلو الناس ديال بوزنيقة هاد لواد باش يرميو شي نواع د الزبل، كيف ما عندو دور ف لحي الصناعي ديال بوزنيقة، حيت تايصرفو فيه شي نواع دالزبل.

لواد ديال بوزنيقة تايعطي قيمة سياحية كبيرة للملعب ديال لݣولف لي تايدوز وسط منو، بحالو بحال، التجزئات د السكنة لي تايدوز حداها.

واد بوزنيقة فيه مرسى صغيرة ديال لفلايك د الصيد التقليدي، و ريسطورا شعبية ديال لحوت على لواد. زيادة على أن مصب لواد مكان مفضل عند الصيادين ف لقصبة لي تايجيو لهاد لبلاصة من لمغريب كامل، هذا بالاضافة لكون مصب لواد مكان مزيان للاستجمام، خاصة فالصيف، حيت تايستقبل عدد كبير ديال السياح.[9][10]

عيون لكلام[بدل | بدل لكود]

  1. ^ "Google Earth". مأرشيڤي من لأصل ف 2023-10-14. تطّالع عليه ب تاريخ 2022-08-10.
  2. ^ "البيانات المفتوحة Portail national des collectivités territoriales". مأرشيڤي من لأصل ف 2022-05-01. تطّالع عليه ب تاريخ 2022-08-10.
  3. ^ "Google Earth". مأرشيڤي من لأصل ف 2023-10-14. تطّالع عليه ب تاريخ 2022-08-10."Google Earth"، earth.google.com، مؤرشف من الأصل ف 22 أبريل 2022.
  4. ^ "شواطئ بوزنيقة.. ملاذ الراغبين في الهروب من قيض الصيف". 2021-06-30. مأرشيڤي من لأصل ف 2023-01-19. تطّالع عليه ب تاريخ 2022-08-10.
  5. ^ "شواطئ بوزنيقة.. ملاذ الراغبين في الهروب من قيض الصيف". 2021-06-30. مأرشيڤي من لأصل ف 2023-01-19. تطّالع عليه ب تاريخ 2022-08-10."شواطئ بوزنيقة.. ملاذ الراغبين في الهروب من قيض الصيف"، Map Ecology، 30 يونيو 2021، مؤرشف من الأصل في 1 مايو 2022، اطلع عليه بتاريخ 30 أبريل 2022.
  6. ^ ""اللواء الازرق" يرفرف بشاطئ بوزنيقة للسنة الخامسة عشرة على التوالي". 2021-08-05. مأرشيڤي من لأصل ف 2022-05-01. تطّالع عليه ب تاريخ 2022-08-10.
  7. ^ "Coup d'envoi des travaux d'extension de la zone industrielle de Bouznika". مأرشيڤي من لأصل ف 2022-06-19. تطّالع عليه ب تاريخ 2022-08-10.
  8. ^ ""اللواء الازرق" يرفرف بشاطئ بوزنيقة للسنة الخامسة عشرة على التوالي". 2021-08-05. مأرشيڤي من لأصل ف 2022-05-01. تطّالع عليه ب تاريخ 2022-08-10.""اللواء الازرق" يرفرف بشاطئ بوزنيقة للسنة الخامسة عشرة على التوالي"، Map Ecology، 05 أغسطس 2021، مؤرشف من الأصل في 1 مايو 2022، اطلع عليه بتاريخ 30 أبريل 2022.
  9. ^ "شاطئ بوزنيقة يحصل على اللواء الأزرق". مأرشيڤي من لأصل ف 2022-05-01. تطّالع عليه ب تاريخ 2022-08-10.
  10. ^ "Pont sur l'Oued Bouznika : L'état d'avancement des travaux est de 80%". مأرشيڤي من لأصل ف 2022-04-30. تطّالع عليه ب تاريخ 2022-08-10.